Fandaharana mba Hianarana ny Fahaizana Miteny sy Mampianatra

NA TANORA ianao na efa be taona, na lahy ianao na vavy, io fandaharana io dia hanampy anao hanatsara ny fahaizanao milaza hevitra sy mampianatra ny Tenin’Andriamanitra.

Ny mpiandraikitra ny sekoly no hanapa-kevitra ny amin’ny anjara hataon’ireo misoratra anarana ao amin’ny Sekolin’ny Fanompoana. Ho hitanao eo amin’ireo pejy telo manaraka ny taratasin-torohevitrao manokana. Ireo tarehimarika eo alohan’ny zavatra hotandremana tsirairay dia mifanitsy amin’ny laharan’ireo lesona hita ao amin’ireo pejy manaraka. Haseho ao amin’ireo lesona ireo izay tokony hataonao mba hianarana ireo lafiny samihafa amin’ny fahaiza-miteny sy mampianatra ireo, sy ny maha zava-dehibe ny tsirairay aminy. Ho hitanao ao koa ny fomba hampiharana ny torohevitra omena ao.

Ireo loko samy hafa eo amin’ilay taratasin-torohevitra dia mampahafantatra hoe iza amin’ireo zavatra hotandremana no mihatra 1) amin’ny famakian-teny, 2) amin’ny fifampiresahan’ny olona roa na mahery, na 3) amin’ny lahateny. Ny mpiandraikitra ny sekoly no hifidy ny zavatra tokony hotandremanao. Tsara kokoa raha zavatra iray isaky ny anjara no tandremana. Hanampy anao ny fanaovana ireo fanazaran-tena eo amin’ny faran’ny lesona manazava ilay zavatra hotandremanao. Raha hita fa nampiharinao tsara ilay torohevitra ao amin’ilay lesona voatondro, dia hifidy zavatra iray hafa ilay mpanome torohevitra anao.

Raha tokony ho fifampiresahana ny anjaranao, dia hila faritra ianao. Misy faritra maromaro voatanisa eo amin’ny pejy faha-82, nefa tsy voafetra io lisitra io. Mety hamela anao hifidy faritra iray ilay mpanome torohevitra, na hanondro iray ho anao, mba ho za-draharaha amin’izy io ianao.

Vakio ity boky ity, ary ataovy ireo fanazaran-tena omena ato, na dia tsy manana anjara amin’ny sekoly aza ianao. Tena hanampy anao handroso izany. Angamba ianao afaka mianatra lesona iray isan-kerinandro eo ho eo.

Mbola afaka mihatsara foana ianao, na hafiriana na hafiriana no nanao sekoly na nandray anjara tamin’ny fanompoana. Enga anie ianao handray soa feno avy amin’ny fampianarana omen’ny Sekolin’ny Fanompoana.