Nanao Lehilahy sy Vehivavy Andriamanitra

Nanao zaridaina tany amin’ny faritra iray nantsoina hoe Edena i Jehovah. Nisy voninkazo sy hazo ary biby be dia be tao. Nanamboatra an’i Adama i Jehovah avy eo, ary izy no lehilahy voalohany teto an-tany. Vovoka no nanamboarany azy, dia nampidirany fofonaina avy eo teo amin’ny orony. Dia inona no nitranga taorian’izay? Velona izy! Nasain’i Jehovah nikarakara an’ilay zaridaina sy nanome anarana ny biby rehetra i Adama.

Nisy didy notenenin’i Jehovah an’i Adama avy eo, sady tena zava-dehibe ilay izy. Hoy izy taminy: ‘Azonao hanina daholo ny voankazo rehetra, afa-tsy ny voan’ny hazo iray ihany. Fa raha mihinana an’ilay izy ianao, dia ho faty.’

Hoy i Jehovah tatỳ aoriana: ‘Andeha aho hanamboatra olona hanampy an’i Adama.’ Nataony natory be mihitsy àry i Adama. Naka taolana iray teo amin’ny tratrany izy avy eo, dia nanamboarany vady ho an’i Adama ilay izy. Eva no anaran’ilay vehivavy. I Adama sy Eva no fianakaviana voalohany teto an-tany. Dia ahoana hoy i Adama tamin’izay? Faly be izy dia niteny hoe: ‘Jereo ’nge ny zavatra vitan’i Jehovah tamin’ny taolan-tratrako e! ’Zay vao mba misy mitovy amiko!’

Nasain’i Jehovah niteraka i Adama sy Eva, amin’izay ho feno olona ny tany. Tiany hiara-hanamboatra ny tany manontolo ho lasa paradisa ry zareo. Zaridaina tsara tarehy izany paradisa izany, hoatran’ny zaridainan’i Edena. Tsy lasa paradisa anefa ny tany izao. Fa inona no nitranga? Ho hitantsika ao amin’ny toko manaraka izany.