Davida sy Saoly

Nataon’i Saoly Mpanjaka lehiben’ny miaramilany i Davida, rehefa avy namono an’i Goliata. Nandresy imbetsaka i Davida, ka lasa tian’ny vahoaka. Isaky ny avy niady izy, dia nitsena azy ny vehivavy, ary nandihy sady nihira hoe: ‘I Saoly nahafaty an’arivoarivony, fa i Davida kosa nahafaty an’alinaliny.’ Lasa nialona an’i Davida àry i Saoly, ka te hamono azy.

Tena nahay nitendry harpa i Davida. Rehefa nitendry harpa ho an’i Saoly izy indray andro, dia notorahan’i Saoly lefona. Nahay niala anefa izy, ka ny rindrina no voa. Imbetsaka i Saoly taorian’izay no niezaka namono an’i Davida. Voatery nitsoaka àry i Davida tamin’ny farany, dia niafina tany an-tany efitra.

Nitondra miaramila 3000 i Saoly, dia lasa nitady an’i Davida. Niditra tao amin’izay lava-bato izay izy, indray andro, nefa i Davida sy ny namany efa niafina tao. Dia hoy ny naman’i Davida: ‘Izao ianao no afaka mamono an’i Saoly.’ Nijaikojaiko nankeo amin’i Saoly àry i Davida, dia nanapahany kely ny sisin’akanjony, nefa tsy tsikaritr’i Saoly akory. Nanenina be anefa i Davida avy eo hoe tsy nanaja ny mpanjaka voahosotr’i Jehovah. Tsy navelany hamono an’i Saoly koa ny namany. Niteny tamin’i Saoly avy teny lavidavitra mihitsy aza izy avy eo hoe: ‘Ianao ange teo azoko novonoina fa tsy novonoiko e!’ Dia tsy nitady hamono an’i Davida intsony ve i Saoly taorian’izay?

Mbola nitady an’i Davida ihany i Saoly sy ny miaramilany. Indray alina anefa, dia iny i Davida sy Abisay zanak’anabaviny fa nijaikojaiko nankany amin’ny tobin’i Saoly. Natory tamin’io fotoana io na i Abnera mpiambina an’i Saoly aza. Dia hoy i Abisay: ‘Tsy hahita hoatr’izao intsony isika! Ao hovonoiko i Saoly.’ Hoy anefa i Davida: ‘An an an! Aleo i Jehovah ihany no hanasazy azy. Alaivo fotsiny ny lefony sy ilay fasiany rano, dia andao handeha.’

Niakatra teo amin’ny tendrombohitra nahatazana ny tobin’i Saoly i Davida avy eo, dia niantsoantso hoe: ‘Abnera a! Fa naninona ianao no tsy niambina ny mpanjaka? Aiza izao ilay fasiany rano sy ny lefony?’ Fantatr’i Saoly ny feon’i Davida, dia hoy izy: ‘Afaka namono an’ahy mihitsy ianao, nefa tsy namono. Fantatro fa ianao no ho mpanjakan’ny Israely manaraka eo.’ Lasa nody i Saoly avy eo. Fa hainao ve hoe nisy tia an’i Davida ihany ny havan’i Saoly?