Nalefa Tany Roma i Paoly

I Jerosalema no tanàna farany nandehanan’i Paoly, tamin’izy nanao dia fanintelony hitoriana tany amin’ny faritra maromaro. Nosamborina izy tany ary nogadraina. Indray alina, dia nahita an’i Jesosy tao amin’ny fahitana izy. Hoy i Jesosy taminy: ‘Handeha ho any Roma ianao, ary hitory any.’ Nafindra tany Kaisaria i Paoly tatỳ aoriana, dia nigadra tany roa taona. Rehefa notsaraina teo anatrehan’i Festosy Governora izy, dia niteny hoe: ‘Aleo izaho hotsarain’i Kaisara any Roma.’ Dia hoy i Festosy: ‘Eny àry! Hotsarain’i Kaisara izany ianao!’ Dia nalefa sambo nankany Roma izy, ary niaraka taminy i Lioka sy Aristarko.

Nisy rivo-mahery anefa teny afovoan-dranomasina. Naharitra andro maromaro ilay izy, ka tsy nieritreritra ny ho velona intsony ny olona tao amin’ilay sambo. Hoy anefa i Paoly: ‘Nisy anjely niresaka tamiko tao amin’ny nofy hoe: “Aza matahotra ry Paoly! Ho tonga any Roma ianao, ary tsy hisy ho faty ny olona ato anaty sambo.” Dia aza kivikivy izany fa tsy ho faty isika.’

Naharitra 14 andro ilay rivo-mahery. Nahatazana nosy ihany ry zareo tamin’ny farany! Ny nosy Malta ilay izy. Nidona tamin’ny dongom-pasika anefa ilay sambo ka potika. Ireo olona 276 tao anatiny kosa tody soa aman-tsara teny an-tanety. Ny sasany nilomano, ary ny sasany nitazona tamin’ny potik’ilay sambo. Dia nikarakara an-dry zareo ny olona tao Malta, ary nandrehitra afo mba hanafana an-dry zareo.

Nentin’ny miaramila tamin’ny sambo hafa nankany Roma i Paoly, telo volana taorian’izay. Nitsena azy ny mpiara-manompo rehefa tonga tany izy. Nisaotra an’i Jehovah izy rehefa nahita an-dry zareo, ary lasa natanja-tsaina. Navela hanofa trano i Paoly, nefa nisy miaramila niambina azy ihany satria mbola gadra izy. Roa taona izy no nijanona tao. Niresahany momba an’i Jesosy sy ny Fanjakan’Andriamanitra izay olona tonga nitsidika azy. Nanoratra taratasy ho an’ny fiangonana tany Azia Minora sy Jodia koa izy. Tena nampiasain’i Jehovah hitory ny vaovao tsara tamin’ny firenena be dia be marina i Paoly!