LAKOLOSY

Zavamaneno poakaty vita amin’ny metaly, miendrika poara na vera mihohoka, ary mamoaka naoty tokana rehefa ampanenoana.

Ny Eksodosy no miresaka voalohany momba ny lakolosy, ao amin’ny fitantarana momba ny tranolay masina. Miverina impito ny hoe paʽamôhn (heb.) ao. Nisy lakolosy kely volamena nifanelanelana tamin’ny ampongabendanitra vita tamin’ny kofehy manga sy volomparasy somary mena ary mena midorehitra, ny morontongotry ny akanjo manga nanaovan’ny mpisoronabe.​—Ek 28:33-35; 39:25, 26.

Metsillah (heb.), avy amin’ny fototeny midika hoe ‘mangorintsina’ (1Sa 3:11), no ilazana ny lakolosy kely nafatotra teo amin’ny tadin-tsoavaly. (Za 14:20) Natao sokitra tamin’ireo lakolosy ireo ny teny hoe “An’i Jehovah ny fahamasinana!”, toy ny teo amin’ny “takela-bolamena” tamin’ny satroka lamban’ny mpisoronaben’ny Israely. Ny zava-drehetra mihitsy àry no nampahafantatra fa masina i Jehovah.​—Ek 39:30, 31; ampit. Za 14:21.