FILEMONA

(Filemôna) [Be fitiavana].

Kristianina nanana andevo. Nonina tao Kolosia (tany amin’ny faritra atsimoandrefan’i Azia Minora) izy, ary anisan’ilay fiangonana nivory tao an-tranony. Namelombelona an’ireo Kristianina hafa izy, ary fakan-tahaka ny finoany sy fitiavany. Tian’ny apostoly Paoly io mpiara-miasa taminy io. (Flm 1, 2, 5-7; ampitahao Kl 4:9 sy Flm 10-12.) Tia nandray vahiny koa izy, matoa te hatory tany aminy i Paoly.​—Flm 22; ampit. As 16:14, 15.

Toa fianakavian’i Filemona i Apia sy Arkipo, matoa noresahin’i Paoly tao amin’ny taratasiny ho an’i Filemona. Mety ho vadiny àry i Apia, ary mety ho zanany lahy i Arkipo.​—Flm 2.

Toa noho ny fitorian’i Paoly no naha lasa Kristianina an’i Filemona. (Flm 19) Tsy nitory tao Kolosia akory i Paoly (Kl 2:1), fa nitory tany Efesosy kosa nandritra ny roa taona, ka “nandre ny tenin’ny Tompo daholo ny mponina tany amin’ny faritr’i Azia [anisan’izany i Kolosia].” (As 19:10) Mety ho izany àry no nahalalan’i Filemona ny Fivavahana Kristianina.

Mbola tsy nanoratra ho an’i Filemona i Paoly no nitsoaka i Onesimosy andevony. Mety ho nangalatra ny volan’ny tompony mihitsy aza izy io, mba hankanesany tany Roma. Tany izy no nihaona tamin’i Paoly ka lasa Kristianina.​—Flm 10, 11, 18, 19; jereo MPANOMPO, ANDEVO.