Ny Atsinanana Afovoany, toerana hitrangan’ny Hara-Magedona ve?
“HARA-MAGEDONA” — Inona no dikan’io anarana notsoahina avy ao amin’ny Soratra masina io? Amin’ny janoary sy febroary 1985, Ny Tilikambo Fiambenana dia manokana ireo pejiny voalohany ho amin’ny fitohitohizan-dahatsoratra mivaofy an’io foto-dresaka io. Manantena izahay fa hahita fampaherezana ianao ao amin’ireo fanazavana araka ny Baiboly aseho ao.
“AMIN’NY fotoana ihazakazahan’izao tontolo izao ho amin’ny adiny farany, ny tanàna tena tokony harahi-maso indrindra dia tsy New York, na Moscou, na Paris, na Pékin, na Le Caire. Jerosalema no tokony hifantohan’ny maso. Izany no hevitra nolazain’ny teolojiana amerikana roa, John F. sy John E. Walvoord, tao amin’ny bokiny hoe Hara-Magedona, ny solitany sy ny fahasahiranana any Atsinanana Afovoany.
Marina tokoa fa be dia be no mitodika amim-panahiana any Jerosalema sy ny faritra mikorontana manodidina azy. Porofon’izany ity fanamarihana tao amin’ny Times any Londres ity: “Mihamaharaiki-tahotra hatrany ny any Atsinanana Afovoany.” Ny sasany mila hahazo antoka fa indray andro any dia hipoaka ao ny ady hifanaovan’i Etazonia sy ny Firaisana sovietika. Tamin’ny janoary 1984, dia nihasimba ny fifandraisana tamin’ireo fanjakana mahery anankiroa, hany ka ny Bulletin des savants atomistes (anglisy) dia nihevitra fa ilaina ny mampandroso ny “famantaranandron’ny fitsarana farany” malaza, famantarana natao hanazavana ny lalana mbola tokony halehan’izao tontolo izao alohan’ny hilentehana ao amin’ny fandripahana noklehera. Hatramin’izay, ireo fanondroana fotoanan’io famantaranandro io dia manamarika misasakalina latsaka telo minitra. Izao tokoa no azo novakina tao amin’ilay “bulletin” resahina: “Tonga eo amin’ny fotoana fanapahan-javatra eo amin’ny Tantara àry isika, eo an-katoky ny vanim-potoana fifanatrehana, eo amin’ny fotoana andrahonan’ireo lalàna tsotran’ny hery mitratrevatreva hisolo toerana izay rehetra mety ho karazana fifampidinihana eo amin’ireo fanjakana mahery. Fahatsinjovan-javatra maharaiki-tahotra tsotra izao tokoa izany.”
Any Etazonia anefa dia mihamaro ny mpitory teny sy teolojiana mpanao ara-bakiteny midera tena noho izany tarehin-javatra izany, satria ny fananihana mihatra amin’ny any Atsinanana Afovoany dia toa mahatonga hino ny faminanian’izy ireo izay sarotra ninoana hatreo. Araka ny filazan’izy ireo tokoa dia tokony hitranga tsy ho ela mihitsy ao amin’io faritra eto amin’izao tontolo izao io ny ady “Hara-Magedona”. Amin’ny fanairana tsy ankijanona ao amin’ny boky, ny lahateny sy ny zavatra alefa ao amin’ny televiziona, ireny mpaminavina ireny dia efa nahangona mpanaraka maro.
Miady hevitra koa ny amin’ny filaharan’ny fisehoan-javatra hentitra ireo mpivaofy teny resahina. Hitranga tahatahaka izao ny “fisehoan-javatra amin’ny Hara-magedona” fampiasa hatramin’ny ela: Nanomboka tamin’ny namoronana ny fanjakan’Isiraely ny fanisana miverina. Amin’izany, ny kristiana dia mahatsapa fa mananontanona ny “fampiakarana” azy. Hisy fotoana handaozany ny tany mba hankanesana any an-danitra. Rehefa tapitra ny fito taona “fahoriana” hanaraka, dia hiova hanaraka ny kristianisma Isiraely. Ny ankamaroan’olona kosa anefa dia hivory eo ambany fahaizana mahagagan’ny mpitondra jadona tsy manan-tsahala iray (ny “Antikristy”) izay hitarika fiaraha-miokon’ny firenena folo. Isiraely koa aza mba hiandany amin’izy ireo. Amin’izany ny fikambanan’ireo tany Arabo sy fanjakana hafa tarihin’i Rosia dia handefa fanafihana tampoka an’Isiraely. Hisakana amin’ny fomba mahagaga ny fanafihan’izy ireo anefa Andriamanitra. Hisy fanafihana hafa iray hanaraka izany anefa, ho tarihin’ilay “Antikristy amin’io indray mandeha io. Io fisehoan-javatra farany io no hanapoaka ady lehibe any Atsinanana Afovoany: Hara-magedona.
Ho hitan’ny sasany ho toa tena marina angamba izany fisehoan-javatra izany. Tena manambara tokoa ny Baiboly fa hilahatra amin’ny Hara-Magedona” ho amin’ny ady, ireo firenena (Apokalypsy 16:14-16). Nefa moa ve izy tena milaza tokoa fa hitranga any Atsinanana Afovoany izany? Raha ny marina, aiza no hitranga io ady io?