Miely Maneran-tany Ireo Fitahiana avy Amin’ny Fampianaran’i Gileada
VOAFETRA ihany ny hasarobidin’ny fampianarana eo amin’izao tontolo izao. Koa satria izy io miorina indrindra amin’ny hevitr’olombelona fa tsy amin’ny fahamarinan’Andriamanitra, dia tsy afaka manome zava-kendrena marina eo amin’ny fiainana izy. Hafa anefa ny Sekolin’i Gileada. Tao amin’ny teny fanokafany tamin’ny fanolorana diplaoma ny kilasin’i Gileada faha-93, i Theodore Jaracz anisan’ny Fitambara-mpitantana dia nanazava tsara fa io sekoly io dia manome fampianarana tena misy ventiny. Araka ny voalazan’ny Salamo 119:160, dia “fahamarinana no [ventin-kevitry, NW ] ny teninao [ny an’Andriamanitra]”. Koa tamim-pahataitairana lehibe no nihainoan’ny mpanatrika efa ho 6 000 ilay fandaharana natao ho fizarana diplaoma tamin’ny 13 Septambra 1992.
Ny lahateny voalohany tamin’ny maraina izay nitondra ny lohateny hoe “Manohiza Mandresy Izao Tontolo Izao sy Ilay Mpanapaka Azy”, dia nataon’i Lon Schilling, anisan’ny Komitin’ny Toeram-piompian’ny Watchtower. Nifantoka tamin’ny Apokalypsy 12:11 ny Rahalahy Schilling, ary nohazavainy fa ilay andininy dia mampiseho fomba fandresena telo: 1) amin’ny alalan’ny ran’ny Zanak’ondry, 2) amin’ny alalan’ny fanambarana, ary 3) amin’ny fananana toe-tsaina feno fahafoizan-tena. Nampahatsiaro an’ireo mpianatra izy fa maro amin’ireo mpanompon’i Jehovah no naneho toe-tsaina toy izany ary vonona ny hiatrika fahafatesana mihitsy aza mba hitanana ny tsy fivadihany sy ny fahatokiany.
“Tano ny Fatokiana Tsara dia Tsara Anananao” no foto-kevitra novelabelarin’i John E. Barr, anisan’ny Fitambara-mpitantana. Tamin’ilay feony miavaka noho ny hafanany, dia nampitaha ny fifampitokiana eo amin’i Jehovah sy ny mpanompony amin’ny fifampitokiana mitombo ao anatin’ny fanambadiana vanona izy. Tamin’ny fampiasana hevitra avy ao amin’ny 2 Timoty 1:12, 13, dia nampirisika ireo mpianatra izy mba hitandrina ny fatokian’izy ireo, amin’ny fiheverana ho sarobidy “ny mariky ny teny tsy misy kilema” ao amin’ny Baiboly. Nohamafisiny fa ny fanaovana fianarana manokana dia tapany tena lehibe amin’ny fandaharam-potoana isan’andro, ary nanariny tamin-katsaram-panahy ireo mpianatra mba tsy hamela mihitsy ny valin-tenin’izy ireo any am-pivoriana ho tonga zavatra mandeha ho azy fotsiny, fa mba hanao izay hampisy heviny azy ireny.
Nanao ilay lahateny nanaraka hoe “Manehoa Fiahiana Feno Fitiavana Amin’ireo Olona toy ny Ondry”, i William Van De Wall, anisan’ny Komitin’ny Sampan-draharahan’ny Fanompoana. Nanontany ireo mpianatra izy hoe toetra manao ahoana no tadiavin’izy ireo ho hita eo amin’ny dokotera iray mitsabo ny fianakaviany, ary nampirisika azy ireo izy mba hamboly fahaiza-mipetraka eo amin’ny toeran’ny hafa, fangorahana, ary famindram-po mitovy amin’izay heverin’izy ireo fa sarobidy.
Niresaka tamin’ny fomba mampientana ny fo momba ilay foto-kevitra hoe “Amin’Andriamanitra dia Azo Tanterahina ny Zava-drehetra” i Daniel Sydlik, anisan’ny Fitambara-mpitantana. Nampahatsiaro ireo mpianatra izy fa nihomehy i Abrahama sy i Saraha tamin’ilay zavatra toa tsy ho azo notanterahina, dia ny fanantenana hitera-jaza tamin’ny fahanteran’izy ireo. Maro amin’ireo fampanantenan’Andriamanitra no toa tsy azo tanterahina araka ny fomba fijerin’olombelona; kanefa, araka ny nanontanian’ilay anjely tamin’i Abrahama, “moa misy zavatra mahagaga izay tsy hain’i Jehovah va?” (Genesisy 18:14). Nampirisika ireo mpianatra ny rahalahy Sydlik mba haneho finoana ny fahaizan’Andriamanitra hahavita izay tsy azo tanterahina, ka tsy hamela izany finoana izany hihaosa na hangozohozo, na inona na inona fitsapana mety ho hitan’izy ireo.
Manome torohevitra ireo mpampianatra
Niteny nanaraka izany ireo mpampianatra roa ao Gileada. Voalohany, dia namelabelatra ilay foto-kevitra hoe “Ny Fananana Anarana Tsara Laza Amin’Andriamanitra” i Jack D. Redford. Izay mahatonga ny anarana iray ho tsara laza na ho ratsy laza, hoy ny fanjohian-keviny, dia ilay olona mitondra azy. Nampifanoheriny tamin’ny anarana hoe Adama, Nimroda, Jezebela, Saoly, ary Jodasy ny anarana hoe Noa, Abrahama, Rota, Paoly, ary Timoty. Misy hevitra sy fihetseham-po maro be mifandray amin’ny anarana tsirairay noho ny lalam-piainan’ilay nitondra azy. Nanontany ireo mpianatra izy hoe karazana anarana inona no hananan’izy ireo rehefa afaka 10, 100, na 1 000 taona mihitsy aza — anaran’ny mpitsoaka an-daharana iray sa ny an’ny mpitaraina iray sa ny an’ny misionera mahatoky iray? Mifantoha amin’ny ala olana sy ny zava-kendrena fa tsy amin’ny zava-manahirana, hoy ny torohevitra nomeny azy ireo.
“Hatraiza ny Fitandremanao ny Finoanao?”, hoy ny foto-kevitra nampieritreritra novelabelarin’i Ulysses V. Glass. Nampitovy ny finoana matanjaka tamin’ny famantaranavaratra (boussole) tsara iray izay manondro foana ny lalana marina izy. Ny famantaranavaratra iray ao amin’ny fiarakodia dia mety hiharan’ny herin’ny sahan’andriamby (champ magnétique) hafa ankoatra ny an’ny tany, ka ilaina hofoanana ny sahan’andriamby toy izany. Toy izany koa, ity tontolo ity dia manana hery mitaona maro izay afaka mampihozongozona na mampahosa ny finoantsika raha avelantsika hanao izany izy. Rehefa nampitandrina ilay kilasy tamin’ny hery mitaona toy izany ny Rahalahy Glass, dia nidera azy ireo koa izy noho ny fahatakaran’izy ireo ny fihetsika sy ny fihetseham-pon’ny hafa amin’ny fomba mahafinaritra.
Ny lahateny farany tamin’ny maraina dia nataon’i Albert D. Schroeder, mpikambana ao amin’ny Fitambara-mpitantana. Nampirisika ireo mpianatra izy mba “Hitana ny Toe-tsain’ny Misionera”, ka nidera azy ireo noho ny nanehoany toe-tsaina misionera nitovy tamin’izay nataon’ny kilasy voalohany tamin’ny 1943, fony izy niasa tamin’ny naha-mpitana ny rejisitr’ilay sekoly. Voamariny fa izy ireo dia liana tamin’ny olona, mpitory voajanahary izay tia ny hotarihin’ny fanahin’Andriamanitra. Aza mitsahatra mampitombo izany toe-tsaina izany, ary ampiasao amin’ny fomba feno ny Fandikan-tenin’Izao Tontolo Izao Vaovao, amin’ny fianarana manokana ataonareo hoy ny fampirisihany. Nofaranany ny teniny tamin’ny fandinihana ireo andininy tsirairay ao amin’ny Salamo faha-24, ho ohatra.
Tonga olona nahazo diplaoman’i Gileada avy teo ireo mpianatr’i Gileada! Notolorana ny diplaomany izy ireo teo am-pamakiana mafy ny toerana nanendrena azy ho misionera, ka izany dia narahin’ny tehaka be avy amin’ny mpanatrika.
Ny tolakandro, dia nitarika ny Fianarana Ny Tilikambo Fiambenana i Calvin Chyke, anisan’ny Komitin’ny Fanontam-pirinty. Nanaraka izany ny fandaharana nahafinaritra nataon’ireo mpianatra, izay nahakasika fitantarana zavatra hitan’ireo mpianatra teny amin’ny saha fitoriana nandritra ilay fianarana naharitra dimy volana, ary koa fandefasana diapositives milazalaza ny tany sasany izay nanendrena azy ireo. Fanampin’izany, dia nisy mpivady be taona nadinadinina, ary nilaza ny sasany tamin’ny fahendrena sy ny fanandraman-javatra azon’izy ireo nandritra ny taona maro naha-misionera azy izy. Ny tolakandro dia nifarana tamin’ilay fampisehoana tantara tonga tamin’ny ilana azy indrindra, hoe Aza Mety Hofitahina na Mamazivazy an’Andriamanitra.
Nivoaka ny mpanatrika, velombelona erỳ, nientam-po nahita izay azon’ny fampianarana ny fahamarinan’Andriamanitra atao, ary ravoravo nahafantatra fa ny soa avy amin’izany fampianarana izany dia mbola ho tsapa maneran-tany. Eo am-piparitahan’ireo misionera 48 ireo any amin’ny tany nanendrena azy, dia misy vavaka maro manaraka azy ireo, vavaka milaza fanantenana sy fatokiana amim-pahatsorana fa ho fitahiana ho an’ny olon’Andriamanitra ireo olona mahatoky ireo na aiza na aiza alehany.
[Efajoro, pejy 19]
Tarehimarika Momba Ilay Kilasy
Isan’ny tany nisy solontena: 7
Isan’ny tany nanendrena: 18
Isan’ny mpianatra: 48
Isan’ny mpivady: 24
Antsalan’ny taona: 32,8
Antsalan’ny taona naha-tao amin’ny fahamarinana: 15,3
Antsalan’ny taona naha-tao amin’ny fanompoana manontolo andro: 10,4
[Efajoro, pejy 20]
NAHAZO DIPLAOMAN’NY KILASY FANITARANA AN’I GILEADA
Tamin’ny 21 Jona 1992, dia nisy antokona misionera 24 nahazo diplaoma avy amin’ny kilasy fahefatra amin’ny Sekoly Fanitarana an’i Gileada any Selters/Taunus, Alemaina. Ilay kilasy voaforon’ny mpivady 11 sy anabavy mpitovo 2 avy any amin’ny tany fito, tamin’ny antsalany, dia 32 taona, vita batisa hatramin’ny 14 taona, ary 8,5 taona nanaovana ny asa fitoriana manontolo andro. Maherin’ny 2 000 no nanatrika ilay fizarana diplaoma.
Nanokatra ny fandaharana ny Rahalahy Jaracz tamin’ny famoaboasana ny Ohabolana 11:24 (NW ) izay milaza hoe: “Misy izay manaparitaka ary anefa mitombo ihany”. Nomarihiny fa ireo mpianatra dia nadiva hiparitaka ary azo antoka fa hampandroso ny fitomboana.
Nisy lahateny niorina tamin’ny Soratra Masina nampahery maro nataon’i Richard Kelsey, mpampifandrindra ny Komitin’ny Sampana Alemanina; i Wolfgang Gruppe, anisan’ny Komitin’ny Sampan-draharahan’ny Fanompoana; i Werner Rudtke sy i Edmund Anstadt izay mpikambana ao amin’ny Komitin’ny Sampana koa; ary ireo mpampianatra roa lahy, i Dietrich Förster sy i Lothar Kaemmer. I Albert Schroeder, anisan’ny Fitambara-mpitantana no nanao ny lahateny fototra nahaliana nitondra ny lohateny hoe “Manohiza Mikaroka Vatosoa Ara-panahy”. Ny namarana ilay fandaharana dia ny fanolorana ireo fanendrena any amin’ny tany 11 atsy Afrika, Amerika Afovoany, ary Eoropa Atsinanana, ka taorian’izay dia nisy mpianatra iray nahazo diplaoma namaky taratasy avy amin’ilay kilasy ho an’ny Fitambara-mpitantana nilaza ny fankasitrahan’izy ireo tamim-pahatsorana.
[Sary, pejy 18]
Ny Kilasy Faha-93 Nahazo Diplaoma avy tao Amin’ny Sekoly Ara-baibolin’ny Gileada Alamin’ny Watchtower
Eo amin’ny lisitra eto ambany, ireo laharana dia tononina avy eo aloha mankany aoriana, ary avy eo ankavia miankavanana isaky ny laharana.
1) Hitesman, C.; West, P.; Evans, D.; Hipps, M.; Simonelli, N.; Wood, S.; Corkle, M.; Flores, C.; Thomas, J. 2) Jones, M.; Nissinen, J.; Sponenberg, M.; Zachary, K.; Ravn, G.; Backman, M.; Wettergren, A.; Evans, D.; Flores, R.; Caporale, G. 3) Simonelli, N.; Rechsteiner, M.; Rechsteiner, M.; Ruiz-Esparza, L.; Gerbig, B.; Simpson, C.; Zanewich, C.; Zachary, B.; Ricketts, L. 4) Simpson, J.; Backman, J.; Corkle, G.; Gerbig, M.; Ricketts, B.; Bagger-Hansen, L.; Jones, A.; Zanewich, K.; Ravn, J.; Hipps, C. 5) Sponenberg, S.; Hitesman, A.; Caporale, L.; Ruiz-Esparza, S.; Thomas, R.; Bagger-Hansen, B.; Wood, M.; West, M.; Wettergren, C.; Nissinen, E.