Fanafahana Amin’ny Fotoan’ny Fampiharihariana An’i Jesosy Kristy
“Mifalia, mba hiravoravoanareo indrindra [mandritra ny fampiharihariana ny, NW ] voninahiny koa.” — 1 PETERA 4:13.
1. Tamin’ny fomba ahoana no nanomezan’i Jehovah harena ny mpanompony?
NAMPANANKARENA ny Vavolombelony tamin’ny alalan’ny fanomezana maro i Jehovah. Amin’ny maha-Mpampianatra Lehibe antsika azy, dia nanome fahazavana antsika ny amin’ny fahalalana feno momba ny sitrapony sy ny fikasany, izy. Tamin’ny alalan’ny fanahiny masina, dia nampitombo tao amintsika ny fahaizana hanome fahazavana amim-pahasahiana izy. Milaza amintsika toy izao ny apostoly Paoly nahazo tsindrimandry ao amin’ny 1 Korintiana 1:6, 7: “Araka ny niorenan’ny filazana an’i Kristy teo aminareo, ka dia tsy latsaka amin’ny fanomezam-pahasoavana rehetra hianareo, miandry ny [fampiharihariana an’i, NW ] Jesosy Kristy Tompontsika”.
2. Fahatsinjovan-javatra mahafaly inona no atolotry ny “fampiharihariana an’i Jesosy Kristy Tompontsika”?
2 “Ny fampiharihariana an’i Jesosy Kristy Tompontsika” — inona no hevitr’izany? Izany dia manondro ny fotoana hampiharihariana an’i Jesosy ho Mpanjaka be voninahitra, rehefa hanao zavatra mba hamalian-tsoa ireo mpanara-dia azy mahatoky sy hampiharana famaliana amin’ireo ratsy fanahy, izy. Araka ny asehon’ny 1 Petera 4:13, izany dia ho fotoana hahafahan’ireo Kristiana voahosotry ny fanahy sy mihazona ny tsy fivadihany, sy ireo namany mahatoky mahaforona ny olona betsaka, ‘hiravoravo indrindra’, satria izany dia hampahafantatra ny faran’ny fandehan-javatr’i Satana.
3. Amin’ny ahoana isika no tsy maintsy miorina tsara, sahala amin’ireo rahalahintsika tany Tesalonika?
3 Arakaraka ny anakekezan’izany fotoana izany, noho ny fahatezerany, i Satana dia mampitombo ny fanereny amintsika. Toy ny liona mierona, dia mitady handrapaka antsika izy. Tsy maintsy miorina tsara isika! (1 Petera 5:8-10). Ireo rahalahintsika tany Tesalonika fahizay, raha mbola vaovao tao amin’ny fahamarinana, dia niharam-pahoriana mitovy amin’ireo hitan’ny maro amin’ny Vavolombelon’i Jehovah amin’izao andro izao. Noho izany, dia tena misy heviny amintsika ny tenin’ny apostoly Paoly. Nanoratra toy izao izy: “Zavatra marina amin’Andriamanitra ny hamaly fahoriana izay mampahory anareo, ary ny hanome [fanamaivanana, NW ] anareo izay ampahorina kosa mbamin’ny tenanay, [amin’ny fampiharihariana an’i, NW ] Jesosy Tompo, avy any an-danitra mbamin’ny anjelin’ny heriny, amin’ny afo midedadeda, hamaly izay tsy mahalala an’Andriamanitra sy izay tsy manaiky ny filazantsaran’i Jesosy Tompontsika”. (2 Tesaloniana 1:6-8). Eny, ho avy ny fanamaivanana!
4. Nahoana ny klerjy no mendrika ilay fitsarana izay hampiharina aminy amin’ny fotoan’ny fampiharihariana an’i Jesosy?
4 Tamin’ny andron’i Paoly, ny maro tamin’ireo fahoriana dia avy tamin’ireo mpitondra fivavahana jiosy. Mitovy amin’izany koa amin’izao andro izao, ny fanoherana ny Vavolombelon’i Jehovah tia fiadanana matetika dia avy amin’ireo izay mihambo ho solontenan’Andriamanitra, indrindra fa ny klerjy ao amin’ny Tontolon’ireo Fivavahana Lazaina fa Kristiana. Ireo dia mihambo ho mahalala an’Andriamanitra, kanefa mandà ilay “Jehovah iray ihany” ao amin’ny Baiboly, ka manolo azy amin’ny Trinite tsy azo fantarina iray. (Marka 12:29). Tsy mankato ny vaovao tsara momba an’i Jesosy Tompontsika izy, fa mitodika any amin’ny fanapahan’olombelona mba hahazoana fanamaivanana ary mandà ny vaovao tsaran’ny Fanjakan’i Kristy feno fahamarinana ho avy. Ireo mpanohitra ara-pivavahana rehetra ireo dia tsy maintsy ho foana amin’ny fotoana “fampiharihariana an’i Jesosy Tompo avy any an-danitra”!
Ny ‘fahatongavan’i’ Jesosy Kristy
5. Sary mazava tsara ahoana no ampisehoana ny fampiharihariana an’i Jesosy ao amin’ny Matio 24:29, 30?
5 Io fampiharihariana io dia asehon’i Jesosy amin’ny alalan’ny sary mazava tsara ao amin’ny Matio 24:29, 30. Rehefa milazalaza ireo lafin-javatra samihafa amin’ilay famantarana ny fanatrehany sy ny fifaranan’ny fandehan-javatra izy, dia manao hoe: “Ny masoandro dia hohamaizinina, ary ny volana tsy hahazava; ny kintana hiraraka avy any an-danitra, ary ny herin’ny lanitra hohozongozonina.” Amin’izany fotoana izany, dia “hiseho eo amin’ny lanitra ny famantarana ny Zanak’olona”. “Hitomany” ireo firenena rehetra amin’ny tany, ary “hahita ny Zanak’olona [ny Mpanjaka Mesianikan’Andriamanitra] avy amin-kery sy voninahitra lehibe eo amin’ny rahon’ny lanitra”. Io ‘fiaviana’, na ‘fahatongavana’ (NW ) io, er·khoʹme·non amin’ny teny grika, dia manondro ny fisehoan’i Jesosy amin’ny maha-Mpanamarina an’i Jehovah azy.
6, 7. Amin’ny ahoana no hoe “ny maso rehetra hahita Azy”, ary iza avy no anisan’izany?
6 Io ‘fahatongavana’ io koa dia lazalazain’ny apostoly Jaona ao amin’ny Apokalypsy 1:7, izay anambarany hoe: “Indro Izy avy [“tonga”, NW ] amin’ny rahona”. Tsia, tsy hahita an’i Jesosy amin’ny masony ara-bakiteny akory ireo fahavalony, satria “ny rahona” dia midika fa tonga amin’ny fomba tsy hita maso izy mba hanatanteraka didim-pitsarana. Raha natao hahita ny voninahiny any an-danitra amin’ny masony ara-bakiteny tsy voaro ny olombelona tsotra, dia ho lasa jamba, tsy misy hafa amin’i Saoly, teny an-dalana ho any Damaskosy, izay tonga jamba tampoka rehefa niseho taminy tao anatin’ny mazava lehibe nanelatrelatra i Jesosy nomem-boninahitra. — Asan’ny Apostoly 9:3-8; 22:6-11.
7 Ny fitantarana ao amin’ny Apokalypsy dia milaza fa “ny maso rehetra hahita Azy, na dia izay nandefona Azy aza; ary hitomany [noho izy, NW ] ny firenena rehetra ambonin’ny tany”. Izany dia midika fa ireo mpanohitra eto an-tany dia hahita amin’io fampiharan’i Jesosy fandringanana io fa tonga amin-kery sy voninahitra lehibe izy amin’ny maha-Mpanatanteraka ny didim-pitsaran’i Jehovah azy. Nahoana ireo fahavalo ireo no antsoina hoe “izay nandefona Azy”? Izany dia satria ny fihetsiny feno fahatezerana amin’ny mpanompon’i Jehovah amin’izao andro izao dia mitovy amin’ny an’ireo mpanenjika an’i Jesosy. Tena ‘hitomany noho izy’ tokoa izy ireo.
8. Fampitandremana inona no samy nomen’i Jesosy sy i Paoly momba ny fandringanana ho avy tampoka?
8 Amin’ny fomba ahoana no hahatongavan’izany andro famalian’i Jehovah izany? Ao amin’ny faminaniana ao amin’ny Lk 21 Lioka toko faha-21, i Jesosy dia milazalaza ny amin’ireo fisehoan-javatra feno loza izay famantarana ny fanatrehany nanomboka tamin’ny 1914. Avy eo, eo amin’ny andininy Lk 21:34 faha-34 sy Lk 21:35 faha-35, dia mampitandrina toy izao izy: “Mitandrema, fandrao ny fonareo hovesaran’ny vokatry ny [fihinanana tafahoatra, NW ] sy ny [fisotroana tafahoatra, NW ] ary ny fiahiahian’izao fiainana izao, ka ho avy tampoka aminareo tahaka ny fandrika izany andro izany. Fa hihatra amin’izay rehetra mitoetra etỳ ambonin’ny tany rehetra izany.” Eny, izany andro famalian’i Jehovah izany dia ho tonga tampoka, vetivety foana! Manamafy izany toy izao ny apostoly Paoly ao amin’ny 1 Tesaloniana 5:2, 3: “Ho avy toy ny mpangalatra amin’ny alina ny andron’[i Jehovah, NW ]. Raha misy olona manao hoe: [Fiadanana sy filaminana, NW ], dia hanjo azy tampoka ny fandringanana”. Na dia amin’izao fotoana izao aza, ireo firenena dia efa miresaka momba ny fiadanana sy filaminana ary manoro hevitra mba hanamafy ny fahefan’ny Firenena Mikambana mba hiambina ireo faritra amin’ny tany misy zava-manahirana amin’ny alalan’ny hery ara-tafika.
9. “Voafafy” ho an’iza ny fahazavana, ary nahoana?
9 Eo amin’ny andininy 1Te 5:4 faha-4 sy 1Te 5:5 faha-5, dia manohy milaza amintsika toy izao ilay apostoly: “Fa hianareo, ry rahalahy, tsy ao amin’ny maizina, mba hahatratra anareo toy ny mpangalatra izany andro izany. Fa hianareo rehetra dia zanaky ny mazava sy zanaky ny andro; tsy an’ny alina na an’ny maizina isika.” Faly isika fa zanaky ny mazava — mpitondra fahazavana amin’ny hafa izay maniry mafy ny tena fiadanana sy filaminana ao amin’ny tontolo vaovaon’Andriamanitra. Ao amin’ny Salamo 97:10, 11, isika dia mamaky toy izao: “Hianareo izay tia an’i Jehovah, mankahalà ny ratsy; miaro ny fanahin’ny olony masina Izy ary mamonjy azy amin’ny tànan’ny ratsy fanahy. Ny fahazavana no voafafy ho an’ny marina, ary ny fifaliana ho an’ny mahitsy fo.”
Ny filaharan’ireo fisehoan-javatra
10. Filazana mialoha inona no tokony harahintsika momba ny andro fampamoahan’Andriamanitra? (Apokalypsy 16:15).
10 Hanao ahoana ny filaharan’ireo fisehoan-javatra rehefa hamely ny fahoriana lehibe? Aoka isika hitodika any amin’ny Apokalypsy toko faha-16. Mariho, araka ny voalazalaza eo amin’ny andininy faha-13 ka hatramin’ny faha-16, fa misy fanahin’ny demonia, fanahy maloto, manangona ireo firenena amin’izao tontolo izao ho amin’ny Hara-magedona, ny adin’ilay andro lehiben’Andriamanitra Tsitoha. Eto indray koa, dia asongadina ny fanatonan’ilay andro fampamoahana, toy ny mpangalatra, ary ampitandremana isika mba hiambina — mba tsy hanala ny fitafiantsika ara-panahy izay hanamarika antsika ho amin’ny famonjena. Tonga ny fotoana hitsarana ireo olona amin’ny tany, ireo firenena ary — ny olona iray hafa. Iza izany?
11. Tamin’ny fomba ahoana no nampahafantaran’ilay vehivavy ao amin’ny Apokalypsy 17:5 ny tenany?
11 Izany dia vehivavy ara-panoharana iray izay tena nanandrana nanao ny tenany ho “zavatra” mihitsy. Lazalazaina ho “zava-miafina, Babylona Lehibe, renin’ny mpijangajanga sy ny zava-betaveta, amin’ny tany” izy io ao amin’ny Apokalypsy 17:5. Tsy zava-miafina intsony anefa izy io ho an’ny Vavolombelon’i Jehovah. Nampahafantatra mazava tsara ny tenany ho ny empira maneran-tanin’ny fivavahan-diso izy io, ka ireo antokom-pinoana ao amin’ny Tontolon’ireo Fivavahana Lazaina fa Kristiana no mahaforona ny tapany lehibe indrindra aminy. Zava-betaveta eo imason’i Jehovah ny fitsabahany amin’ny raharaha ara-politika, ny nahatongavany ho “leon’ny ran’ny olona masina” tamin’ny fanenjehany ny Kristiana marina, ary ny maha-tompon’andraikitra azy ny amin’ny ‘ran’izay rehetra novonoina teny ambonin’ny tany’, anisan’izany ireo maherin’ny zato tapitrisa voavono tamin’ireo ady natao tamin’ity taonjato faha-20 ity fotsiny. — Apokalypsy 17:2, 6; 18:24.
12. Nahoana no voaheloka ireo antokom-pinoana ao amin’ny Tontolon’ireo Fivavahana Lazaina fa Kristiana?
12 Ny ratsy indrindra amin’ny rehetra, dia ny fahafaham-baraka nentin’ireo antokom-pinoana ao amin’ny Tontolon’ireo Fivavahana Lazaina fa Kristiana tamin’ny anaran’Andriamanitra izay lazaina amim-pihamboana sy fihatsarambelatsihy fa manana azy ireo ho solontenany. Nampianatra filozofia babyloniana sy grika izy ireo fa tsy ny Teny madion’Andriamanitra, ary anisan’ny tompon’andraikitra ny amin’ny faharatsiam-pitondran-tenan’ireo firenena manontolo amin’ny fankasitrahana fomba fiaina feno fileferana izay manitsakitsaka ireo fotopoto-pitsipika ao amin’ny Baiboly. Ireo mpandraharaha feno hafetsena sy faniriana mihoa-pampana eo anivony dia voahelok’ireto teny ao amin’ny Jakoba 5:1, 5 ireto: “He! hianareo manan-karena, mitomania sy midradradradrà noho ny fahoriana izay efa manjo anareo. Efa velona tamin’ny fy tetỳ ambonin’ny tany hianareo sady nanaram-po tamin’ny fahafinaretana; efa namahy ny fonareo tamin’ny andro hamonoana hianareo.”
Haringana anie i Babylona Lehibe!
13. Ahoana no anombohan’ny famelezana amin’ny fahoriana lehibe, ary zavatra maika dia maika inona no antitranterina ao amin’ny Apokalypsy 18:4, 5 ny hanaovana azy?
13 Ny famelezana amin’ny fahoriana lehibe dia hanomboka amin’ny fampiharana ny didim-pitsaran’i Jehovah amin’i Babylona Lehibe. Ny Apokalypsy 17:15-18 dia milazalaza amin’ny fomba azo alaina sary an-tsaina tsara momba ny ‘hevitr’Andriamanitra’ — dia ny hitarika ireo “tandroka folo”, izany hoe ireo hery matanjaka avy ao amin’ilay “bibi-dia” mampiseho ny Firenena Mikambana voaforon’ny firenena maro, mba hanaisotra an’i Babylona Lehibe. “Ary ny tandroka folo sy ny bibi-dia izay efa hitanao, dia ireo no hankahala ilay vehivavy janga ka hahatsinontsinona azy sy hampitanjaka azy sy hihinana ny nofony ary handevona ny tenany amin’ny afo. Fa Andriamanitra efa nanome fo ireo hanatanteraka ny heviny”. Tsy mahagaga raha mandefa fampitandremana maika dia maika toy izao ao amin’ny Apokalypsy 18:4, 5, ny feo iray avy any an-danitra: “Mialà aminy hianareo, ry oloko, mba tsy hiombonanareo ota aminy, ary mba tsy hisy hahazo anareo ny loza manjo azy. Fa ny fahotany efa nitehika tamin’ny lanitra, ary Andriamanitra efa nahatsiaro ny ratsy nataony.” Mbola mitohy ihany ilay antso manao hoe: Tapaho ny fatorana rehetra amin’ny fivavahan-diso, dieny mbola tsy diso aoriana loatra!
14. Iza no halahelo noho ny fahafoanan’i Babylona Lehibe, ary nahoana?
14 Hanao ahoana ny fandraisan’izao tontolo izao ny fahafoanan’i Babylona Lehibe? Avy eny lavitra, ireo mpanao politika mpandray kolikoly — ireo “mpanjakan’ny tany” — dia malahelo azy satria nifanome fahafinaretana izy ireo tamin’ny fijangajangana ara-panahy nifanaovan’izy ireo nandritra ny taonjato maro. Mitomany sy misaona azy koa ireo mpanao raharaham-barotra feno faniriana mihoa-pampana, dia ireo “mpandranto (...) izay efa tonga mpanan-karena taminy”. Mihataka aminy koa ireo, ka manao hoe: “Indrisy! indrisy! ilay tanàna lehibe, izay nitafy rongony fotsy madinika sy lamba volomparasy sy jaky ary niravaka volamena sy vato soa ary pèrila! Fa tamin’ny ora iray monja no nahafoana ny harena be toy izany.” Tsy hisy intsony mandrakizay ireo fitafiana feno ravaka rehetra anaovan’ireo loham-piangonana sy ny rentin’ireo katedraly lehibe maneran-tany! (Apokalypsy 18:9-17). Kanefa moa ve ny olona rehetra no halahelo an’i Babylona Lehibe?
15, 16. Antony tokony hifaliana inona no ananan’ny vahoakan’Andriamanitra?
15 Mamaly izany toy izao ny Apokalypsy 18:20, 21: “Mifalia noho izay zavatra nanjo azy hianao, ry lanitra, sy hianareo olona masina, sy hianareo Apostoly, ary hianareo mpaminany; fa Andriamanitra efa nitsara azy ka namaly azy noho ny taminareo.” Toy ny vato lehibe fikosoham-bary iray atsipy any an-dranomasina, dia “hatsipy mafy toy izany no ho fandrava an’i Babylona, ilay tanàna lehibe, ka tsy ho hita intsony izy”.
16 Antony tokony hifaliana re izany! Manamafy izany ny Apokalypsy 19:1-8 (NW ). Inefatra no re avy any an-danitra ilay antso hoe “Miderà an’i Jah, ianareo, ry olona!” Ny telo voalohany amin’ireo Haleloia ireo dia midera an’i Jehovah satria nampihatra didim-pitsarana ara-drariny tamin’i Babylona Lehibe, ilay vehivavy janga maharikoriko, izy. Tsy eo intsony ilay empira maneran-tanin’ny fivavahan-diso! Misy feo mivoaka avy any amin’ny seza fiandrianan’Andriamanitra manao hoe: “Miderà an’Andriamanitsika, ianareo mpanompony rehetra, izay matahotra Azy, na ny kely na ny lehibe.” Endre ny tombontsoantsika handray anjara amin’ny fihirana izany hira izany!
Ny fampakaram-badin’ilay Zanak’ondry
17. Raha ampitahaina ny Apokalypsy 11:17 sy 19:6, ao anatin’ny tarehin-javatra roa inona avy no anombohan’i Jehovah manapaka amin’ny maha-Mpanjaka azy?
17 Mampiditra loha hevitra hafa iray ilay Haleloia fahefatra: “Miderà an’i Jah, ianareo, ry olona, satria Jehovah Andriamanitsika, ilay Tsitoha, dia efa nanomboka nanapaka amin’ny maha-Mpanjaka.” Tsy efa nisy hira mitovy amin’izany ve tao amin’ny Apokalypsy 11:17 (NW )? Izao no vakintsika ao: “Misaotra Anao izahay, Jehovah Andriamanitra, ilay Tsitoha, (...) satria efa nandray ny fahefanao lehibe ianao sady efa nanomboka nanapaka amin’ny maha-mpanjaka.” Eny tokoa. Kanefa, ny teny manodidina ny Apokalypsy 11:17 dia miresaka momba ny niterahan’i Jehovah ilay Fanjakana Mesianika tamin’ny 1914 mba “hanapaka ny firenena rehetra amin’ny tehim-by”. (Apokalypsy 12:5). Ny Apokalypsy 19:6 kosa dia ao anatin’ny faritra iray miresaka momba ny fandringanana an’i Babylona Lehibe. Rehefa voaesotra ny fivavahana oharina amin’ny vehivavy janga, dia ho voamarina mandrakizay ny maha-Andriamanitra an’i Jehovah. Ho hita hatraiza hatraiza amin’izay ka ho mandrakizay ny fanompoam-pivavahana aminy, ilay Tompom-piandrianana sady Mpanjaka Tampony!
18. Manokatra ny lalana ho amin’ny fanambarana maharavoravo hoe ahoana ny fanesorana an’i Babylona Lehibe?
18 Noho izany, dia azo atao ilay fanambarana feno haravoana hoe: “Aoka isika hifaly sy ho ravoravo ka hanome voninahitra [an’i Jah]; fa tonga ny fampakaram-badin’ny Zanak’ondry, ka efa niomana ny vadiny. Ary nasaina nitafy rongony fotsy madinika sady madio no mangatsakatsaka izy; fa izany rongony fotsy madinika izany dia ny asa marina ataon’ny olona masina.” (Apokalypsy 19:7, 8). Ilay fotoana marina hahazoan’ireo voahosotra mbola eto an-tany ny fitsanganana amin’ny maty ho any an-danitra dia tsy voambara. Kanefa omena toky isika eto amin’ity teny ity fa ho fotoana hahafaly ny fandraisany anjara amin’ny fampakaram-badin’ilay Zanak’ondry, dia i Kristy Jesosy, ary vao mainka ho toy izany satria ho vavolombelona hanatri-maso ny fampietrena ilay vehivavy janga maharikoriko, dia i Babylona Lehibe, izy ireo.
Ringana ny tontolon’i Satana
19. Fisehoan-javatra hafa inona no voalazalaza ao amin’ny Apokalypsy 19:11-21?
19 Hita indray ilay soavaly fotsy voatonona voalohany tao amin’ny Apokalypsy 6:2. Izao no vakintsika ao amin’ny Apokalypsy 19:11: “Ary Izay nitaingina [ilay soavaly fotsy] dia atao hoe Mahatoky sy Marina, ary amin’ny fahamarinana no itsarany sy iadiany.” Ilay “Mpanjakan’ny mpanjaka sy Tompon’ny tompo” mitaingin-tsoavaly àry dia mandroso mba hamely ireo firenena sy hanitsaka “ny famiazana ny divain’ny firehetan’ny fahatezeran’Andriamanitra Tsitoha”. Tsy misy vokany ny hiangonan’ireo “mpanjakan’ny tany mbamin’ny miaramilany” mba hiady ao Hara-magedona. Mamarana ny fandreseny ilay Mpitaingina ilay soavaly fotsy. Tsy misy miangana amin’ny fandaminana eto an-tanin’i Satana. — Apokalypsy 19:12-21.
20. Inona no hanjo ny Devoly?
20 Ahoana anefa ny amin’ny Devoly mihitsy? Ao amin’ny Apokalypsy 20:1-6, i Kristy Jesosy dia lazalazaina ho toy ny “anjely nidina avy tany an-danitra, nanana ny fanalahidin’ny lavaka tsy hita noanoa sy gadra lehibe eny an-tànany”. Misambotra ilay dragona, dia ilay Menarana ela, ny Devoly sy Satana, izy, mamatotra azy, manipy azy ho any amin’ny lavaka tsy hita noanoa ary manidy azy ka manisy tombo-kase eo amboniny. Rehefa tsy eo intsony i Satana ka tsy afaka ny hamitaka ireo firenena intsony, dia mandroso amin’izay ny Fanjakana Arivo Taona be voninahitr’ilay Zanak’ondry sy ny ampakariny. Tsy misy ranomasom-pijaliana intsony! Tsy misy ilay fahafatesana nolovana avy tamin’i Adama intsony! Tsy misy alahelo, tsy misy fitarainana, tsy misy fanaintainana! “Efa lasa ny zavatra taloha.” — Apokalypsy 21:4.
21. Eo am-piandrasantsika amim-pahadodonana ny fampiharihariana an’i Jesosy Kristy, inona no tokony ho fahatapahan-kevitsika?
21 Eo am-piandrasantsika amim-pahadodonana ny fampiharihariana an’i Jesosy Kristy Tompontsika, dia aoka isika hampiseho zotom-po amin’ny filazana amin’ny hafa ireo fampanantenana momba ilay Fanjakana nataon’Andriamanitra tamim-pitiavana. Efa antomotra ny fanafahana! Enga anie isika handroso hatrany, tsy an-kijanona, amin’ny maha-zanaka nahazo fahazavana, dia zanak’i Jehovah, ilay Tompom-piandrianana!
Famerenana
◻ Inona no mampiseho fa efa antomotra ny fampiharihariana an’i Jesosy Kristy?
◻ Amin’ny fomba ahoana no hahatongavan’ny andro famalian’i Jehovah?
◻ Ahoana no tokony ho fomba fijerin’ireo “tia an’i Jehovah” ny tarehin-javatra eo amin’izao tontolo izao ankehitriny?
◻ Hanao ahoana ny filahatry ny fisehoan-javatra rehefa hamely ny fahoriana lehibe?
[Sary, pejy 23]
Tonga “amin’ny rahona” i Jesosy, amin’ny fomba tsy hita maso, mba
hampihatra didim-pitsarana
[Sary, pejy 25]
Tsy ho ela, ny fivavahan-diso sy ny fandehan-javatra ratsin’i Satana ary i Satana mihitsy dia samy ho levona