Fivoriambe Mampientam-po Izay Mampandroso ny Fampianarana Araka An’Andriamanitra
ANKEHITRINY izao tontolo izao dia mahazo filazana tondraka. Ao amin’ny televiziona sy ny radio, ao amin’ireo boky na amin’ny alalan’ireo ordinatera, dia misy tahirim-pahalalana saiky tsy manam-petra mahakasika izay foto-kevitra rehetra mety ho azon’ny saina eritreretina. Na dia izany aza dia marary sy maty ny olona. Misy manerana ny tany manontolo ny heloka bevava sy ny hanoanana ary ny fahantrana, ary mahavoa olona maro mbola tsy nisy toy izany ny fikorontanana ara-pihetseham-po. Ireo fahalalana rehetra azo raisina dia tsy nanitsy ny tarehin-javatra. Nahoana? Satria tsy niraharaha ny fahendren’Andriamanitra ny taranak’olombelona.
Nifanentana tsara tokoa àry ilay loha hevitra hoe “Fampianarana Araka An’Andriamanitra” izay nofidina ho an’ireo fivoriamben’ny distrikan’ny Vavolombelon’i Jehovah natao vao haingana! Ilay fandaharana dia nampahatsiaro an’izay nanatrika teo fa ny fampianarana hita ao amin’ny Baiboly, Tenin’Andriamanitra, ihany no tena misy vidiny mamonjy aina.
Nanomboka ny alakamisy 3 Jona tany Uniondale any New York, Etazonia, ny fivoriambe voalohany. Nanomboka teo, dia naseho tany amin’ny tanàn-dehibe samy hafa nitety tany ilay fandaharana, ka nifarana tany amin’ny kaontinentan’i Afrika sy Amerika Atsimo.
Tolakandron’ny andro voalohany
Ny andro tsirairay avy dia nanana loha hevitra izay nanamafy lafiny iray tamin’ny fampianarana araka an’Andriamanitra. Ilay fandaharana tamin’ny andro voalohany, ohatra, dia niorina tamin’ilay loha hevitra hoe “Fahalalana ny Fampianarana Izay avy Amin’Andriamanitra”. (Jaona 7:17). Novelabelarina tsara io hevitra io arakaraka ny nandrosoan’ilay andro.
Taorian’ny hira sy ny vavaka, dia nanokatra ny fandaharana ilay mpitari-draharahan’ny fivoriambe tamin’ilay lahateny nitondra ny lohateny hoe “Mamory Antsika eto ny Fampianarana Araka An’Andriamanitra”. Nasehony fa ny vahoakan’i Jehovah dia ampiraisin’ny fianarana ny fomban’Andriamanitra sy ny fandehanana amin’ny lalany. (Mika 6:1-5). Manatanjaka ny firaisan-kinan’izy ireo ny fampianarana araka an’Andriamanitra. Nampirisihina ireo mpanatrika ny fivoriambe mba hankafy ny fisakaizan’izy ireo feno firaisan-kina. — Salamo 133:1-3.
Taoriana kelin’izay, tamin’ny tolakandro, dia noresahina ny amin’ireo fivoriana ataon’ny kongregasiona tsy tapaka, tao anatin’ny fitohitohizan-dahateny nitondra ny lohateny hoe “Fivoriana Izay Mampianatra Antsika Momba Ireo Lalan’i Jehovah”. Ilay mpandahateny voalohany dia nampahatsiaro an’ireo mpanatrika ny fivoriambe fa rehefa miara-mivory isika dia manome voninahitra an’i Jehovah, ka noho izany dia mandray fitahiana avy Aminy. Ilay mpandahateny nanaraka dia nanamafy ny ilana handray anjara amin’ireo fivoriana. Amin’ny fanaovana izany, dia midera an’i Jehovah ampahibemaso isika sy mampiseho ny finoantsika ary manatanjaka ny finoan’ny hafa. Nasehon’ilay mpandahateny fahatelo tao amin’ilay fitohitohizan-dahateny ny ilana hampihatra izay ianarantsika any amin’ireo fivoriana. Tsy maintsy ‘ho mpankatò ny teny isika fa tsy ho mpihaino fotsiny ihany’. — Jakoba 1:22.
Tonga nanaraka izany ny dinidinika nahafinaritra iray mikasika ny fihirana fiderana ho an’i Jehovah. Ny hira atao amin’ny fo dia tapany lehibe amin’ny fanompoam-pivavahana ataontsika. Io lahateny io dia narahin’ny lahateny fototra hoe “Mandresy ny Fampianarana Araka An’Andriamanitra”. Loha hevitra tsara dia tsara re izany! “I Jehovah no Loharanon’ny fampianarana tsara indrindra azon’iza na iza raisina”, hoy ilay mpandahateny. Avy eo, taorian’ny dinidinika fohy mikasika ny fahagagana momba ny atidohan’ny olombelona, dia hoy izy: “Tokony hampiasa ny fahafahantsika misaina voalohany indrindra mba handraisana fampianarana araka an’Andriamanitra isika. Izany ihany no manome ny fahendrena marina.” Marina tokoa re izany!
Ilay maraina faharoa
‘Aza Mitsahatra Mampahamendrika ny Fampianaran’Andriamanitra, Mpamonjy Antsika’, no loha hevitry ny andro faharoa tamin’ilay fivoriambe. (Titosy 2:10). Nanjary nisongadina io fotopoto-pitsipika io tao amin’ilay lahateny hoe “Ny Fampianarana Araka An’Andriamanitra sy Ireo Fampianaran’ny Demonia”. Eny, manana ny fampianarany ireo Demonia. (1 Timoty 4:1). Araka ny nohazavain’ilay mpandahateny, dia resin’ny fampianarana araka an’Andriamanitra ny ‘fahendren’i’ Satana, tamin’ny fampiharihariana ireo fampianaran-diso sy fomba feno hafetsen-dratsin’ny Devoly. Noho izany, dia misy Kristiana mahitsy fo sahabo ho 4 500 000 tsy andevon’ny haizin’i Satana intsony. — Jaona 8:32.
Na dia izany aza, dia tsy maintsy tsy mitsahatra manohitra an’i Satana isika. Izany dia nohamafisin’ilay lahateny hoe “Manohitra ny Toe-tsain’izao Tontolo Izao ve Ianao?” Mahafaty io toe-tsain’izao tontolo izao io. Izy io dia mampirisika fitondran-tena ambany sy fiheverana feno fikomiana ny fahefana ary faniriana feno fitsiriritana zavatra ara-nofo. Tsy maintsy mandini-tena tsy an-kijanona ny Kristiana. Mbola manana fari-pitsipika ambony ve izy mikasika izay jereny, izay henoiny, na izay vakiny? Tamin’ny fomba nampahery dia niteny toy izao ilay mpandahateny: “Midera anareo izahay, ry rahalahy sy anabavy ary tanora, noho ny ezaka feno fahatsoram-po efa ataonareo amin’io lafiny io.” — 1 Jaona 2:15-17.
Misy anton-javatra iray manasarotra ny fanoherana ny toe-tsain’izao tontolo izao. Inona izany? Isika rehetra dia samy tsy tanteraka avokoa. Marina fa maty ho an’ny fahotantsika i Jesosy, kanefa dia tsy maintsy mbola miady amin’ny fironana hanota ihany isika. Nodinihina izany tao amin’ilay lahateny hoe “Fiadiana Amin’ny Fangejan’ny Ota eo Amin’ny Nofo Tsy Tanteraka”. Ankoatra ny zavatra hafa, dia nilaza ilay mpandahateny fa afaka mandresy isika eo amin’ny ady mafy ataontsika amin’ny ota raha mitafy ny toetra vaovao sy manalavitra izay rehetra mampanaram-po ny fironan-dratsintsika.
“Ataovy Fomba Fiainanao ny Fampianarana Mahasoa” no lohatenin’ilay lahateny nanaraka. Misy manahy tafahoatra ny amin’ny fahasalamany ara-batana. Raha ny marina anefa, dia zava-dehibe lavitra ny fahasalamana ara-panahy. Nohamafisin’ilay mpandahateny ny ilana handraisana tsara ny andraikitsika amin’io lafiny io, ary nanan-teny nampahery manokana ho an’ny vehivavy kristiana izy. Hoy izy: “Isika dia mankasitraka aoka izany ireo anabavy efa be taona sy ireo anabavy tanora kokoa izay mahay mandanjalanja ny zotom-pony ho an’ny fanompoana sy ny fikarakarany ireo andraikiny manokana.” Eny, ary isika rehetra dia misaotra an’i Jehovah noho ilay fampianarana mahasoa izay mampisaraka antsika amin’izao tontolo izao.
Namarana ny fandaharana tamin’ny maraina ilay lahateny hoe “Mampiharihary ny Zava-kendren’ny Fiainana ny Fampianarana Araka An’Andriamanitra”. Hoy ilay mpandahateny: “Na ho ela na ho haingana, dia saiky ny olona rehetra no manontany tena hoe: ‘Inona no zava-kendren’ny fiainana?’ ” Tamin’ny fanaporofoan-kevitra mahery, dia noporofoiny fa ny Baiboly ihany no manome valiny marina ho an’io fanontaniana io. Avy eo dia nasehon’ilay mpandahateny fa ny fampanantenan’Andriamanitra mahatalanjona dia tena manome antsika zava-kendrena eo amin’ny fiainana. Azo inoana fa maro tamin’ireo mpihaino no nieritreritra hoe: ‘Izany mihitsy no ilain’ny olona ao amin’ny faritaniko ho re.’ Nitovy hevitra tamin’izany ny Fitambara-mpitantana. Nisy bokikely vaovao mitondra ny lohateny hoe Inona no Zava-kendren’ny Fiainana? navoaka tamin’ny faran’io lahateny io. Ravoravo toy inona moa ny rehetra! Ny fiatoana tamin’ny mitataovovonana dia nanome fahafahana handinika ilay bokikely vaovao.
Ny tolakandro faharoa
Ny lahateny voalohany tamin’ny tolakandro dia nanana ilay loha hevitra nampionona hoe “Apetraho Amin’i Jehovah ny Fanahianao Rehetra”. Misy zavatra maro mahatonga fanahiana; kanefa ny Tenin’Andriamanitra dia milaza fa tokony hametraka ny fanahiantsika rehetra aminy isika. (1 Petera 5:6, 7). Marina fa misy zava-manahirana sasany tsy mety afaka, ary mikasika izany, dia izao no fampirisihan’ilay mpandahateny: ‘Manàna faharetana. Miandrasa an’i Jehovah. Minoa mafy fa ny fanarahana ny Baiboly foana no tsara indrindra. Raha mitana ny fontsika hiraikitra amin’i Jehovah isika, dia hanjary hanana ny “fiadanan’Andriamanitra” izay mihoatra noho ny fahalalana rehetra isika.’ — Filipiana 4:6, 7.
Ny lahateny efatra nanaraka dia nampiseho fa ny fampianarana araka an’Andriamanitra dia mihatra amin’ny fiainam-pianakaviana. Ilay voalohany hoe “Fanaovana ny Fanambadiana ho Fifamatorana Maharitra”, dia nampahatsiaro an’ireo mpanatrika ny fivoriambe fa eo imason’i Jehovah, ny fanambadiana dia tsy zavatra fanary rehefa avy nampiasaina, toy ny iheveran’ny maro azy eo amin’izao tontolo izao. Mba hahombiazan’ny fanambadiana anefa, dia tsy maintsy manaraka ny fitarihan’i Jehovah isika. Izy no nanao antsika. Noho izany, ny Teniny ara-tsindrimandry dia mirakitra ny torohevitra momba ny fanambadiana tsara indrindra azo raisina.
Ilay lahateny hoe “Miezaha Mafy ho Famonjena ny Ankohonanao” dia niresaka ny amin’ireo zava-tsarotra mitaky fiezahana eo amin’ny fikarakarana ankohonana amin’izao andro sarotra izao. (2 Timoty 3:1, NW ). Ireo ray aman-dreny dia mampianatra ny zanany ny fahadiovana, ny fahalalam-pomba, ny fomba fiasa, ary ny fomba hisehoana ho malala-tanana sy be fiheverana ny hafa. Mbola zava-dehibe kokoa ny tsy maintsy ampianaran’izy ireo ny zanany ho tonga mpanompon’i Jehovah be fandavan-tena. — Ohabolana 22:6.
Tao amin’ilay dinidinika nanaraka hoe: “Ry Ray Aman-dreny, Mila Fiheverana Mampiseho Fahaizana Manokana Ireo Zanakareo”, ny mpandahateny dia nampahatsiaro an’ireo mpanatrika ny fivoriambe ny ilana hidera ireo ankizy no sady tsy hanakimpy ny mason’ny tena eo anoloan’ny fahalemen’izy ireo. Ny ray aman-dreny dia tsy maintsy ho mailo indrindra eo amin’ireo fironana ho amin’ny tsy fahamarinana, ny fitiavana fatratra ny zavatra ara-nofo, na ny fitiavan-tena.
Ireo tanora nanatrika ny fivoriambe indrindra no nihaino tamim-pitandremana ilay lahateny hoe “Ry Tanora — Ireo Fampianaran’iza no Arahinareo?” Sarotra ny tarehin-javatra ho an’ny tanora kristiana amin’izao andro izao. Mora ny fiarahana amin’izao tontolo izao saingy mitarika ho amin’ny fahafatesana izany. Na dia mitaky herim-po amin’ny tanora iray aza ny fifikirana amin’ny fampianarana araka an’Andriamanitra, dia mitondra fitahiana lehibe izany dieny izao, ary fiainana mandrakizay amin’ny hoavy. — 1 Timoty 4:8.
Nifarana ilay andro faharoa tamin’ilay fampisehoana tantara nanohina ny fo hoe Tanora Izay Mahatsiaro ny Mpamorona Azy Amin’ny Andro Fahatanorany. Tao amin’ny teny fampidirana, ilay mpiandraikitra ny fampisehoana dia niantso ireo tanora ao amin’ny fandaminan’Andriamanitra ho “tafika teokratika iray manompo amin’ny tsy fivadihana sy amim-pandavan-tena an’i Jehovah Andriamanitra sy i Kristy Jesosy Mpanjaka voatendriny any an-danitra”. Nanampy teny toy izao izy: “Ireo tanorantsika dia tena manatontosa zavatra tsara tokoa!” Naseho an-tsary tamin’ilay fampisehoana tantara fa raha mampiofana tsara ny zanaka iray ny ray na ny reny, izany dia hitondra soa ho an’ilay zanaka rehefa lehibe izy ary manompo an’i Jehovah araka ny safidim-pony.
Marainan’ny andro fahatelo
Ny loha hevitra ho an’ny andro fahatelo dia hoe “Manohiza Mampianatra Olona avy Amin’ny Firenena Rehetra”. (Matio 28:19, 20, NW ). Tsy isalasalana fa ireo mpanatrika fivoriambe dia nanantena torohevitra tonga amin’ny ilana azy mikasika ny asa fitoriana, ary tsy diso fanantenana izy ireo. Ny fitohitohizan-dahateny iray nitondra ny lohateny hoe “Fanatontosana Amim-pifaliana ny Asa Nanirahana Antsika Hitory sy Hampianatra” dia nanatanjaka ny fahatapahan-kevitr’izy ireo tsy hitsahatra handray anjara amin’ny asa fitoriana. Ny lahateny fanokafana dia niresaka mikasika ny fitsidihana voalohany; ilay faharoa, mikasika ny fiverenana mitsidika; ary ilay fahatelo, mikasika ny fampianarana ny Baiboly. Nasaina nody tany aminy sy hanatrika ny fivoriambe niaraka tamin’ny havana aman-tsakaizany ireo misionera maneran-tany. Tany amin’ny toerana sasany, dia nandray anjara tamin’io tapany amin’ny fandaharana io ireo misionera. Naharavoravo ny nahazoana fahatakarana sasany mikasika ny fahombiazana hitan’izy ireo tany amin’ny toerana nanendrena azy. Ilay lahateny nanaraka hoe “Fitondrana ny Vaovao Tsara any Amin’ny Olona Rehetra” dia nandinika ny vokatry ny fitoriana tsy ara-potoana.
Nifarana ilay maraina tamin’ny lahatenin’ny batisa izay mandrakariva dia fisehoan-javatra lehibe amin’ny fihaonambe ataon’ny Vavolombelon’i Jehovah. Tany amin’ireo fivoriambe nisesy, dia nisy antokon’olona maro vao nanolo-tena nitsangana teo anatrehan’ilay vahoaka tafavory ary namaly tamin-toky hoe “eny” tamin’ireo fanontaniana roa natao taminy. Avy eo izy ireo dia natao batisa ampahibemaso. Porofo mahery toy inona moa izany mikasika ny vokatra lehibe nentin’ny fampianarana araka an’Andriamanitra!
Tolakandron’ny andro fahatelo
Niantomboka tamin’ny dinidinika lalina araka ny Soratra Masina ny fandaharana tamin’ny tolakandro. Mahazatra ny Vavolombelon’i Jehovah ireo teny ao amin’ny Matio 24 toko faha-24 sy ny Lioka 21 toko faha-21. Nieritreritra ve ny sasany fa tsy nisy zava-baovao azo nolazaina mikasika ireo toko ao amin’ny Baiboly ireo? Endre izany fahadisoan-kevitr’izy ireo! Ireo lahateny hoe “Inona no ho Famantarana ny Fanatrehanao?” sy hoe “Lazao Aminay: Rahoviana no ho Tonga Izany Zavatra Izany?” dia nitondra ireo mpanatrika ny fivoriambe tao amin’ny dinidinika mahaliana mikasika tapany amin’ireo toko roa ireo, ary nanome fanazavana araka ny toetr’andro ny amin’ny andininy sasany. Nisy dinidinika velombelona taorian’ilay fotoam-pivoriana rehefa nampitaha ireo naoty nalainy ireo mpanatrika ny fivoriambe mba hahitana raha azon’izy ireo tsara ireo hevitra. Tsy isalasalana fa fanontaniana maro no ho voavaly rehefa hivoaka ao amin’ny Ny Tilikambo Fiambenana io fanazavana io.
Nitohy ilay loha hevitra momba ny fianarana ny Baiboly tamin’ilay lahateny hoe “Valin-teny Mampahafanta-javatra ho An’ireo Fanontanianao Ara-Baiboly”. Avy eo dia nitodika tany amin’ny foto-kevitra hafa ilay fandaharana. Ny taona 1993 dia nanamarika ny faha-50 taonan’ny niorenan’ny Sekoly Ara-baibolin’i Gileada An’ny Watchtower. Ilay lahateny hoe “Dimampolo Taona Nanaovana Fampiofanana sy Asa Misioneran’i Gileada” dia nampiseho tamin’ireo mpanatrika ny fivoriambe izay efa tontosa nandritra izany vanim-potoana izany. Raha nisy misionera nanatrika teo nandritra ilay lahateny hoe “Ireo Zava-bitan’ny Fitoriana ny Filazantsara eo Amin’ny Saha Maneran-tany”, dia nasaina izy ireo mba hizara tamin’ny mpanatrika ny sasany tamin’ireo fanandraman-javatra hitany. Nampientam-po tokoa ny fandrenesana ny fitantaran’ireo misionera!
Ny lahateny nanaraka hoe “Ny Antony Tsy Itsaharan’ny Vavolombelon’i Jehovah Miambina”, dia fianarana tantara hafa iray. Nasehony fa eo am-piambenana ny Kristiana hatramin’ny taonjato voalohany am.f.i. ka hatramin’izao. Izany dia nitarika ho amin-javatra tsy nampoizina hafa iray. Teo am-piandohan’ilay lahateny nanaraka nitondra ny lohateny hoe “Marisika Ireo Mpitory Ilay Fanjakana Amin’ny Tany Rehetra”, dia nampiseho boky lehibe iray (rehefa nisy azo noraisina tamin’ny fiteny teo an-toerana) ny mpandahateny ary niteny hoe: “Mahafaly anay ny manambara eto anio ny fivoahan’itỳ boky vaovao itỳ, izay mitondra ny lohateny hoe Les Témoins de Jéhovah — Prédicateurs du Royaume de Dieu.” Ilay boky dia mirakitra fitantarana amin’ny antsipiriany mikasika ny tantara maoderin’ny Vavolombelon’i Jehovah. Izy io dia milaza tantara mampientam-po mikasika ny fiaretana sy ny fahatapahan-kevitra ary ny fahombiazana, ka manome porofo mahery ny amin’ny fiasan’ny fanahin’i Jehovah eo amin’ireo mpanompony.
Ny maraina fahefatra
Tonga sahady ny andro farany tamin’ilay fivoriambe. Ny loha hevitra ho an’ilay andro hoe “Mandray Soa avy Amin’ny Fampianarana Araka An’Andriamanitra Isika” dia nampanantena fiafarana tsara dia tsara ho an’ilay fandaharana. (Isaia 48:17). Tamin’ny maraina, ny sain’ny mpanatrika ny fivoriambe dia nifantoka tamin’ny fitohitohizan-dahateny iray nisy lahateny nahery telo. Nitondra ny lohateny hoe “Ny Hafatra Fampitandremana Nanomezana Tsindrimandry an’i Jeremia — Tamin’ny Lasa sy Amin’izao Andro Izao” ilay fitohitohizan-dahateny izay nirakitra famakafakana isan’andininy ny Jeremia 23, 24, 25 toko faha-23, 24 sy faha-25. Mirakitra hafatra mahery toy inona moa ireo toko ireo! Ny Isiraely nivadika tamin’ny andron’i Jeremia dia tsy maintsy nipararetra tamin’ireo fampitandremana tsy niolakolaka sy ara-tsindrimandrin’Andriamanitra. Mbola nipararetra be lavitra izao tontolo izao manontolo rehefa tanteraka ireo fampitandremana ireo. Hafa ve ny tarehin-javatra amin’izao andro izao? Tsy izany mihitsy. Ny Vavolombelon’i Jehovah dia mitory amin-kerim-po ny hafatra fitsaran’Andriamanitra. Amin’ny farany dia tsy maintsy hiatrika ny fampiharana ny didim-pitsaran’i Jehovah itỳ fandehan-javatra itỳ iray manontolo. Izany dia hidika ho fandravana tanteraka ho an’ny tontolon’i Satana.
Nifarana ny alahady maraina tamin’ilay fampisehoana tantara faharoa hoe Aza Mety Hofitahina na Mamazivazy An’Andriamanitra. Nasehon’izy io an-tsary ny fomba ahafahan’ny fampianarana araka an’Andriamanitra miaro antsika tsy ho voataonan’ireo vidéos sy mozika mampietry, ary amin’ny fironana hamafy tsy fifanarahana eo amin’ireo samy Kristiana. Tamin’ny fifaranan’ilay fampisehoana tantara, ilay mpitari-draharaha dia nanonona ireo teny nampieritreritra nataon’ny olona iray tao amin’ilay tantara hoe: “Tsy vita fanefitra amin’ny fitaoman’izao tontolo izao isika. Raha tsy manohitra isika, izao tontolo izao dia afaka ny hanimba ny fisainantsika amin’ny fomba an-kolaka. Ary ny hitoerantsika ho mahatoky na tsia dia hiankina amin’izay nafafintsika.” Marina tokoa re izany!
Ny tolakandro farany
Nanatona ny fiafarany haingana ilay fivoriambe rehefa tonga teo amin’ny lampihazo ilay mpandahateny mba hanao ny lahateny ampahibemaso nitondra ny lohateny hoe “Fampianarana Mahasoa ho An’ny Fotoan-tsarotra Misy Antsika”. Tamin’ny fomba nazava sy araka ny fandrindran-kevitra, dia nampahafantariny ireo zava-manahirana lehibe indrindra izay mahazo antsika amin’izao andro izao ary nasehony ny fomba sasany ahafahan’ny fampianarana araka an’Andriamanitra manampy antsika mba hanana fiainana tsaratsara kokoa. Nilaza izy fa, raha manaraka ny fampianarana araka ny Soratra Masina dieny izao isika, dia ho afaka hanaraka izany mandrakizay ao amin’ilay tontolo vaovaon’i Jehovah.
Taorian’ny famintinana ny fianarana Ny Tilikambo Fiambenana isan-kerinandro, dia tonga ny fotoan’ny lahateny famaranana. Nilaza haingana ireo hevi-dehibe nandritra ilay fandaharana efatra andro ilay mpandahateny ary nampahatsiaro an’ireo mpanatrika ny fivoriambe ny amin’ireo boky vaovao. Nampandre koa izy fa hivoaka tsy ho ela ny vidéocassette faharoa amin’ilay fitohitohizana hoe The Bible — A Book of Fact and Prophecy (Ny Baiboly — Bokin’ny Zava-misy sy ny Faminaniana). Raha ny marina, ilay vidéocassette mitondra ny lohateny hoe The Bible — Mankind’s Oldest Modern Book, (Ny Baiboly — Ny Boky Maoderina Tranainy Indrindra Ananan’ny Olombelona) dia efa azo raisina izao amin’ny fiteny anglisy. Nisy tatitra nanohina ny fo novakina avy tany amin’ny toerana izay misy zava-manahirana lehibe, toy ny any Bosnie-Herzégovine. Ho famaranana dia namaky ny teny ao amin’ny Mpitoriteny 12:13 ilay mpandahateny nanao hoe: “Rehefa re izany rehetra izany, dia izao no faran’ny teny: Andriamanitra no atahory, ary ny didiny no tandremo, fa izany no tokony hataon’ny olona rehetra.”
Fampahatsiarovana tsara dia tsara tokoa re izany! Aoka isika rehetra hiaina ho amin’ilay andro hideran’ny taranak’olombelona manontolo an’i Jehovah, ilay Mpampianatra antsika Lehibe, sy hanarahan’izy ireo ny fampianarany araka an’Andriamanitra.
[Sary, pejy 24, 25]
Nitondra fifaliana lehibe ny fivoriambe “Fampianarana Araka An’Andriamanitra” tany Moscou sy tany Kiev
[Sary, pejy 26, 27]
1. Nanamarika ny fanoloran-tenany ho an’Andriamanitra ny maro, tamin’ny fanekena hatao batisa
2. Nientam-po ny mpanatrika fivoriambe iray 100 taona naharay boky vaovao iray
3, 4. Nankasitrahana tokoa ireo fampisehoana tantara nampieritreritra
5. Nampisongadina ny soa entin’ny fampianarana araka an’Andriamanitra ireo misionera nadinadinina tamin’ny fivoriambe