Fiatrehana ny Fanembonana ny any Amin’ny Tena eo Amin’ny Fanompoana An’Andriamanitra
NANDIDY ireo mpanara-dia azy toy izao i Jesosy Kristy: “Mandehana hianareo, dia ataovy mpianatra ny firenena rehetra”. (Matio 28:19). Ho an’ny Kristiana maro, dia nidika ho fanekena toe-javatra sarotra, lavitra ny any amin’izy ireo, ny fanatanterahana io fanirahana io. Ireo mpiandraikitra mpitety faritany sy ny vadiny ary ireo hafa dia mandao zavatra maro noho ny fanompoana an’Andriamanitra. Mety ho tena zava-tsarotra ho an’ireny Vavolombelon’i Jehovah rehetra ireny ny fanembonana ny any aminy.
Mitranga ny fanembonanao ny any aminao rehefa mitondra ny eritreritrao hiverina ho any amin’ny tsy fananana ahiahy sy ny fitiavana tany amin’ny lasa nahafinaritra, ny fahatsiarovanao. Izany dia mety hahatonga fihetseham-po mahery aoka izany, hany ka hahatsiaro tena ho kivy sy tsy afaka manohy ny asa ianao. Raha ny tena izy, taorian’ny nivarotany ny fananany sy nanaovany dia nandaniana vola be nankany amin’ny tany hafa, dia nandao ny volavolan-keviny ny sasany ka niverina nody tany aminy. Nandresy azy ireo ny fanembonany ny any aminy.
Ny fe-potoana maha-mafy toy izany ny fihetseham-po mazàna, dia mateti-piseho aorian’ny fifindrana voalohany, kanefa dia mitohy mandritra ny androm-piainana izany ho an’ny sasany. Taorian’ny nandehanan’i Jakoba lavitra nandritra ny 20 taona mahery, dia ‘manina ny tranon’ny rainy indrindra’ izy. (Genesisy 31:30). Iza no afaka manampo fa ho voatery hiaritra ny fanembonana ny any aminy? Inona no mitarika azy io? Ahoana no ahafahan’ny olona iray miatrika ny fihetseham-po toy izany?
Inona no mitarika ilay alahelo?
Mety hahazo an’iza na iza ny fanembonana ny any aminy. I Amytis, zanakavavin’i Astyage mpanjaka mediana, dia toa nanana ny antony rehetra mba hahasambatra: harena sy laza ary trano tsara tarehy. Kanefa, dia nanembona ireo tendrombohitr’i Media aoka izany izy, hany ka nanorina ireo zaridaina nihantona tao Babylona i Nebokadnezara Mpanjaka vadiny, tamin’ny fiezahany hampionona azy.
Mety hisedra indrindra ny fanembonan’ny olona iray ny any aminy rehefa toa sarotra kokoa noho ny talohan’ny nifindrany ny fiainana. Rehefa natao sesitany ny vahoakan’i Joda, dia nitaraina toy izao izy ireo: “Teo amoron’ny onin’i Babylona no nipetrahanay, sady nitomanianay, raha nahatsiaro an’i Ziona. Nefa ho nataontsika ahoana no fihira ny fihiran’i Jehovah tany an-tany nivahiniana?” — Salamo 137:1, 4.
Zavatra maro no mety hiteraka ny alahelo noho ny fanembonana ny any amin’ny tena. Hoy i Terri, izay nandao an’i Kanada: “Indray andro dia nisy sarim-pianakaviana nilatsaka avy tao anatin’ny boky iray. Rehefa noraisiko ilay izy, dia nanenika ahy tampoka ny fanembonana ny any aminay, ary dia nitomany aho.” Niaiky toy izao i Chris, izay nifindra avy tany Angletera nankany amin’ny tany mahantra kokoa: “Ny fandrenesana fotsiny ny feon’ny hira tranainy iray efa fantatra na ny hanitry ny sakafo iray nahazatra ny tena dia mety ho nampaniry fatratra ahy ireo zavatra izay nilaozako.” — Ampitahao amin’ny Nomery 11:5.
Ny fatoram-pianakaviana akaiky dia anton-javatra mandray anjara amin’izany matetika. I Roseli, Brezilianina izay ankehitriny dia mipetraka ao amin’ny tany mifanila amin’i Brezila, dia nanazava hoe: “Nahatsiaro ho kivy aho rehefa naharay vaovao ratsy avy tany aminay ka tsy afaka nankany mba hanampy. Indraindray, dia ratsiratsy kokoa ny nanjo ahy rehefa tsy naharay vaovao aho ka nanomboka naka sary an-tsaina zavatra maro.” Nifindra avy tany Amerika Avaratra nankany amin’ny tanàna kely iray any amin’ireo tany mafanan’i Amazonia i Janice. Hoy izy: “Manembona ny any aminay aho rehefa mandre vaovao tsara avy any. Reko ny fomba iarahan’izy ireo mifaly, ary raha mba afaka niaraka tamin’izy ireo mantsy aho.”
Tsy ny fandaozana olona fotsiny no mahatonga ny fanembonana ny any amin’ny tena. Manazava toy izao i Linda: “Nanjary kivy aho rehefa tsy nahafantatra hoe aiza no hividianana ireo zavatra nilaiko. Tsy fantatro ny vidin-javatra na ny fomba hanaovana takalo. Lafo loatra ny fananana fiarakodia, ary voatositosika mandrakariva aho rehefa niezaka mafy mba hiakatra tao amin’ny fitateram-bahoaka feno hipoka. Izany fotsiny dia nampaniry mafy ahy hody.” Nanao izao fanamarihana izao i Janet, tamin’ny fanazavana ny hantsana mampisaraka ara-kolontsaina sy ara-toe-karena: “Ny fahantrana no nampalahelo ahy. Mbola tsy nahita olona nangataka sakafo mihitsy aho taloha, na fianakaviana maro anaka niara-nipetraka avokoa tao anatin’ny efitra iray tsy nisy rano. (...) Nampalahelo ahy aoka izany ny zavatra toy izany, hany ka nihevitra aho fa tsy afaka ny hijanona eto ela kokoa.”
Fiatrehana ny fihetseham-ponao
Tsy tokony hahatsiaro tena ho sakodiavatra isika amin’ny fananana fihetseham-po mahery ho an’ny olona tiantsika na ho an’ny toe-piainana nahazatra nanodidina ireo taona nahalehibe antsika. I Jehovah Andriamanitra dia nanome antsika fihetseham-po mba ho afaka ny hankafy ireo fifandraisana manokana mafana isika. Ireo mpiandraikitra kristiana tao amin’ny kongregasiona tao Efesosy dia lehilahy matotra ara-pihetseham-po. Kanefa inona no nitranga rehefa nadiva hifarana ny fitsidihan’ny apostoly Paoly azy ireo? Endre, “nitomany mafy izy rehetra, dia namihina ny vozon’i Paoly ka nanoroka azy”! (Asan’ny Apostoly 20:37). Mazava ho azy fa io zava-nitranga io dia tsy nahatafiditra fanembonana ny any amin’ny tena. Kanefa, dia mahatonga antsika hieritreritra izy io. Ara-dalàna ny hananana fihetseham-po, kanefa tsy tokony havelantsika hifehy antsika izany. Ahoana àry no ahafahanao miatrika amim-pahombiazana ny fanembonanao ny any aminao?
Ny fianarana ny fiteny eo an-toerana dia fanalahidin’ny fahatsiarovan-tena ho tafatombina. Ny fahatsapana embona ny any amin’ny tena dia mety ho mafy kokoa rehefa voasakantsakana ny fifampiresahana satria voatery miezaka mafy amin’ny fampiasana fiteny hafa ianao. Noho izany, raha azo atao, dia mianara ny mamaky sy miteny ny fitenin’ilay faritra alohan’ny hifindranao ho any. Raha tsy izany, dia mifantoha amin’ny fianarana ilay fiteny mandritra ny herinandro vitsivitsy voalohany aorian’ny fahatongavanao. Amin’izay ianao no manana ny antony manosika mahery indrindra ka hanana araka izany ny fahafahana tsara indrindra hianatra azy io. Raha manokana ireo herinandro ireo ho amin’ny fianarana fiteny indrindra ianao, dia hankafy tsy ho ela ireo resadresaka, ary izany dia hanampy anao hampitony ny fahatsapanao embona ny any aminao.
Ataovy izay hahazoana namana vaovao haingana araka izay azo atao, satria izany dia hanampy anao hahatsiaro tena ho any aminao. Ny kongregasionan’ny Vavolombelon’i Jehovah no toerana tsara indrindra mba hahazoana tena namana. Manaova ny dingana voalohany ary misehoa ho liana ny amin’ny hafa. Miezaha mba hahafantatra ny fanabeazana azony mbamin’ny fiaviany, ny fianakaviany, ny zava-manahirana azy, sy ny zavatra mahaliana azy. Asao any an-tranonao ireo mpiray finoana aminao. Avy eo, dia ho hitanao fa ireo hafa dia ho liana ny aminao.
Eo anivon’ny vahoakan’Andriamanitra, ny fisakaizana dia mety ho akaiky toy ny fatoram-pianakaviana. Hoy i Jesosy: “Fa na iza na iza no manao ny sitrapon’Andriamanitra, dia izy no rahalahiko sy anabaviko ary reniko.” (Marka 3:35). Manome toky an’ireo mpanara-dia azy toy izao koa i Jesosy: “Tsy misy olona efa nahafoy trano, na rahalahy, na anabavy, na reny, na ray, na zanaka, na tany, noho ny amiko sy ny filazantsara, ka tsy handray zato heny amin’izao andro ankehitriny izao — dia trano sy rahalahy sy anabavy sy reny sy zanaka sy tany mbamin’ny fanenjehana — ary amin’ny andro ho avy dia fiainana mandrakizay.” (Marka 10:29, 30). Tsy irery isika amin’izany firalahiana ara-panahy mahafinaritra izany, na dia any amin’ny tany tsy mahazatra aza.
Ny fihazonana fisakaizana amin’ireo izay any aminao dia afaka manampy anao koa hiatrika ny fanembonana ny any aminao. Mety ho gaga ianao hahita fa rehefa nifindra ianao izao, dia misy heviny indrindra ny fifandraisana amin’ny alalan’ny taratasy, satria angamba hihevitra bebe kokoa ny teny holazainao ianao. Hisy zavatra mampientana maro holazaina. Nanolo-kevitra toy izao i Janet, izay voalaza teo aloha: “Lafo ny fiantsoana amin’ny telefaonina avy lavitra, kanefa ny fandefasana amin’ny alalan’ny paositra cassette nalaina feo dia mora ihany. Toa hafahafa ny firesahana amin’ny milina fandraisam-peo amin’ny voalohany. Kanefa, raha miresaka amin’olona amin’ny alalan’ny micro eo anelanelanareo ianao, dia mora atao sady mahaliana izany.” Mety hangataka ny hahazo cassette koa ianao ho setrin’izany.
Hoy i Shirley, izay nifindra monina avy tany Etazonia nankany Amerika Latina efa 25 taona lasa izay: “Manoratra mandrakariva fitantarana fanandraman-javatra mampahery aho, toy izay zava-manahirana. Izany dia mampirisika ny hafa hanohy hanoratra amiko.” Mitandrema anefa. Ny fanoratana taratasy be loatra dia mety hisakana anao tsy hahazo namana vaovao. Hoy i Del, izay nifindra avy tany Kanada nankany amin’ny tany hafa: “Halaviro ny fipetrahana ao an-trano sy ny fieritreretana amin’alahelo ireo zavatra tsy misy eo aminao. Mandehana kosa mivoaka ka ankafizo ny toerana ipetrahanao vaovao.”
Fantaro ny fomba amam-panao, tantara, hatsikana, sy toerana mahaliana sady tsara tarehy ao amin’ilay tany tsy mahazatra anao. Izany dia hanampy anao tsy hampitodika ny sainao ho amin’ny anton-javatra tsy manorina. Ary raha mikasa ny hipetraka ao amin’ilay tany nifindranao ianao, dia tsara indrindra ny tsy hitsidihanao ny tanindrazanao aloha loatra na matetika loatra. Mitaky fotoana ny hahazoana namana vaovao sy ny hifankazarana amin’ny toe-piainana manodidina vaovao. Ny fitsidihana ny any aminao ela be dia mampiato izany fanaovan-javatra izany. Rehefa lasa mifahatra amin’ny fonenanao vaovao ianao, dia afaka mankafy ny fodiana mba hitsidika — ary avy eo dia hiverina. Mandra-pahatongan’izany, dia aza mitsahatra mampitombo firaiketam-po amin’ny fonenanao vaovao.
Aza mitsahatra ny manantena zavatra
I Jehovah dia nanome antsika ny tany manontolo ho fonenantsika. (Salamo 115:16). Amin’ny fananana toe-tsaina kristiana falifaly, dia mety hahafinaritra ny fiainana any amin’ny tany rehetra. Raha mifindra ianao mba hampandroso ny tombon-tsoan’ilay Fanjakana sy hitory ny vaovao tsara any amin’ny tany hafa na any an-toeran-kafa ao amin’ny tanindrazanao, dia ataovy amin’ny fanampoizan-javatra falifaly izany. Aoka ianao hanantena ny hahazo namana vaovao, hianatra momba ireo fomba amam-panao samy hafa, hanao mpianatra, na hanao zavatra ahazoana valisoa eo amin’ny fanompoana an’Andriamanitra.
I Jehovah Andriamanitra dia Sakaiza iray izay hiaraka aminao mandrakariva, na aiza na aiza misy anao. (Salamo 94:14; 145:14, 18). Koa mitoera ho akaiky azy amin’ny vavaka. (Romana 12:12). Izany dia hanampy anao hitadidy ny fikasanao eo amin’ny fiainana amin’ny maha-mpanompon’Andriamanitra. I Abrahama sy i Saraha dia nitadidy tao an-tsaina ny fikasany rehefa nandao ny fonenany nampiadana tao amin’ny tanànan’i Ora izy ireo. Ho fankatoavana ny baikon’i Jehovah, dia nandao havana aman-tsakaiza izy ireo. (Asan’ny Apostoly 7:2-4). Raha nitadidy hatrany sy naniry fatratra ny toerana izay nilaozany izy ireo, dia ho nanana fahafahana hiverina. Kanefa naniry toerana tsara kokoa izy ireo — amin’ny farany dia fiainana ao amin’ny paradisa eto an-tany eo ambany fanapahan’ny Fanjakan’Andriamanitra any an-danitra. — Hebreo 11:15, 16.
Ny fitoriana any amin’ny faritany hafa na any amin’izay ilana mpitory ilay Fanjakana bebe kokoa ao amin’ny tanindrazanao dia mety ho zava-tsarotra ihany. Kanefa asa mahavokatra sy ahazoana valisoa indrindra koa izy io. (Jaona 15:8). Ary raha manenika anao vetivety ireo eritreritra tsy manorina, dia azo resena izy ireny amin’ny fitadidiana ao an-tsaina ny zava-kendrenao sy amin’ny fibanjinana ny eo aloha. Hoy ny anabavy misionera tsy manambady iray: “Rehefa mahatsapa aho fa tonga amiko ny alahelo, dia miezaka ny hieritreritra ny amin’ny tontolo vaovao sy ny fomba haha-fianakaviana iray ny taranak’olombelona rehetra aho.” Ny eritreritra mahafinaritra toy izany dia afaka manampy anao hihazona ny fifalianao ka tsy ho resin’ny fanembonana ny any aminao.
[Sary, pejy 29]
Tsy voatery hanembantsembana ny fanompoana kristiana ny fanembonana ny any amin’ny tena