Fihazonana ny Firindrana Eo Amin’ireo Loholona sy Ireo Mpikarakara Momba ny Asa

FOTOANA fohy taorian’ny Pentekosta 33 am.f.i., dia nisy toe-javatra nilana fikarakarana maika nipoitra teo amin’ny kongregasiona kristiana niforona vao haingana. Nisy fandaharana naorina mba hikarakarana ireo vehivavy nananotena sahirana ara-pivelomana. Kanefa afaka fotoana fohy dia “nimonomonona tamin’ny Hebreo ny Helenista, satria tsy mba enina tamin’ny fiantrana isan-andro ny mpitondratenany”. — Asan’ny Apostoly 6:1.

Tonga tany am-poto-tsofin’ny apostoly ireny fitarainana ireny. “Ary ny roa ambin’ny folo lahy nampiangona ny mpianatra rehetra ka nanao hoe: Tsy mety raha mandao ny tenin’Andriamanitra hitandrina latabatra izahay. Koa amin’izany, ry rahalahy, mizahà fito lahy eo aminareo, izay tsara laza sady feno ny Fanahy sy fahendrena, mba hotendrenay hitandrina izany raharaha izany.” — Asan’ny Apostoly 6:2, 3.

Mampiseho mazava tsara fotopoto-pitsipika lehibe momba ny fandaminana ao anatin’ny kongregasiona kristiana izany. Ampiasaina mba hikarakara raharaha mahazatra ny lehilahy manana andraikitra sasany, fa mikarakara raharaha ara-panahy mavesatra kokoa kosa ny hafa. Tsy hoe mbola tsy nisy izany tany aloha. Teo amin’ny Isiraely fahiny, i Arona sy ny taranany dia notendrena mba hanompo tamin’ny naha-mpisorona nanao sorona ho an’Andriamanitra. Kanefa, nandidy i Jehovah fa manampy azy ireo ny Levita amin’ny ‘fitandremana ny fanaka rehetra momba ny trano-lay fihaonana’. (Nomery 3:5-10). Toy izany koa, ireo mpiandraikitra ankehitriny dia ampian’ireo mpikarakara momba ny asa.

Ny anjara asan’ireo loholona sy mpikarakara momba ny asa

Manasongadina toetra ilaina ambony ho an’ireo loholona sy mpikarakara momba ny asa ny Soratra Masina. (1 Timoty 3:1-10, 12, 13, NW; Titosy 1:6-9). Tsy mpifaninana akory izy ireo fa miasa ho amin’ny zava-kendrena iray ihany: ny fampandrosoana ny kongregasiona. (Ampitahao amin’ny Efesiana 4:11-13.) Na dia izany aza, dia misy fahasamihafana sasany eo amin’ny asa tontosain’izy ireo ao amin’ny kongregasiona. Izao no lazaina amin’ireo mpiandraikitra, ao amin’ny 1 Petera 5:2: “Andraso ny ondrin’Andriamanitra izay eo aminareo [“izay andraikitrareo”, fanamarihana ambany pejy], mitandrina azy tsy an-tery, fa amin’ny sitrapo [araka an’Andriamanitra]; tsy amin’ny fitiavana harena maloto, fa amin’ny zotom-panahy”. Ampamoahin’Andriamanitra izy ireo ny amin’ny fomba anatanterahany io andraikitra masina io. — Hebreo 13:17.

Ahoana ny amin’ireo mpikarakara momba ny asa? Tsy mitaky aminy toy ny amin’ireo loholona mba hahafeno fepetra amin’ny fahaizany mampianatra, ny Soratra Masina. Somary hafa noho ny an’ireo loholona ny raharaha iandraiketan’izy ireo. Tamin’ny taonjato voalohany am.f.i., dia tsy isalasalana fa nisy zavatra maro tamin’ny karazany ara-nofo, mahazatra, na madinika, izay nitaky fiheverana, angamba anisan’izany ny fividianana fitaovana hanaovana kopia ny Soratra Masina na ny fanaovana kopia mihitsy aza.

Ankehitriny, ireo mpikarakara momba ny asa dia manohy manatanteraka asa lehibe isan-karazany ao anatin’ny kongregasiona, toy ny fikarakarakana ireo kaonty sy faritanin’ny kongregasiona, ny fizarana gazety sy boky, sy ny fikojakojana ny Efitrano Fanjakana. Ny mpikarakara momba ny asa sasany izay manana ilay fahaiza-mampianatra dia mety hampiasaina mihitsy aza amin’ny fampianarana, indraindray amin’ny fitarihana Fianarana ny Bokin’ny Kongregasiona sy amin’ny fisahanana tapany amin’ny Fivoriana Momba ny Asa ary amin’ny fanaovana lahateny ampahibemaso.

Rehefa miara-miasa amin’ny fomba mirindra ireo loholona sy mpikarakara momba ny asa, dia voakarakara amin’ny fomba voalanjalanja ireo zavatra ilain’ny kongregasiona — ara-panahy sy ara-pandaminana. Falifaly amin’izay ireo mpikambana ao amin’ny kongregasiona, sady matanjaka ary mamokatra ara-panahy. Tsarovy izay nosoratan’i Paoly tamin’ireo voahosotra tany Efesosy hoe: “(Izay akambana sy ampiraisina tsara) noho ny fifanompoan’ny isan-tonony, araka ny fiàsan’izay rehetra momba azy amin’izay mety ho anjara-asany avy ka hampandrosoany ny tenany amin’ny fitiavana.” — Efesiana 4:16.

Tsy maintsy miezaka mafy ireo loholona sy mpikarakara momba ny asa mba hampitombo firindrana toy izany, izany hoe, fifanarahana, fifanekena, fiaraha-miasa, sy firaisan-tsaina. Kanefa, ny firindrana toy izany dia tsy tonga ho azy. Tsy maintsy ambolena sy arovana amim-pitandremana izany.

Izay azon’ireo loholona atao

Ny dingana lehibe iray dia ny fiekena fa ny fifandraisan’ny loholona amin’ny mpikarakara momba ny asa dia tsy ny an’ny tompo amin’ny mpanompo, na ny mpampiasa amin’ny mpiasa. Any amin’izay isian’ny firindrana marina, dia mihevitra ireo mpikarakara momba ny asa ho toy ny mpiara-manompo an’Andriamanitra ireo loholona. (Ampitahao amin’ny 1 Korintiana 3:6-9.) “Mitariha làlana amin’ny fifanomezam-boninahitra”, hoy ny Romana 12:10. Noho izany, ireo loholona dia manalavitra ny hitondra ireo mpikarakara momba ny asa amin’ny fomba izay mety hiseho ho fanaovana teniko fe lehibe na fanambaniana. Mampirisika, fa tsy mangeja, ny faharisihana hanombo-javatra mahasoa izy ireo. Mitarika ho amin’ny famoahan’ireo mpikarakara momba ny asa izay tsara indrindra ao aminy sy manampy azy ireo hankafy ny asany ao amin’ny kongregasiona ny fitondrana azy ireo amim-panajana.

Tokony hotadidin’ireo loholona koa fa ny fanirahana azy ireo hiandry ny andian’ondrin’Andriamanitra izay andraikiny dia mahafaoka ireo rahalahy manompo amin’ny maha-mpikarakara momba ny asa. Marina fa antenaina ho Kristiana matotra ireny lehilahy manana andraikitra ireny. Kanefa, toy ny sisa amin’ny andian’ondry, dia mila fiheverana manokana izy ireny indraindray. Tokony hampiseho fiheverana amim-paharisihana ny fandrosoan’izy ireny ara-panahy ireo loholona.

Ohatra, fony nihaona tamin’i Timoty tovolahy ny apostoly Paoly, dia takany avy hatrany ny fahafahana hahavita zavatra nananan’i Timoty ary ‘tiany ho entiny miaraka aminy izy’. (Asan’ny Apostoly 16:3). Nanompo tamin’ny naha-mpiray dia tamin’i Paoly i Timoty, ka nandray fiofanana tsy hay tombanana ho vokatr’izany. Eny tokoa, taona maro tatỳ aoriana, dia afaka nanoratra tamin’ireo Kristiana tany Korinto toy izao i Paoly: “Nirahiko ho any aminareo Timoty, zanako malalako sy mahatoky ao amin’ny Tompo, ka izy no hampahatsiaro anareo ny fanaoko ao amin’i Kristy”! — 1 Korintiana 4:17.

Ry loholona, efa nanomboka nampiasa ny fahafahana feno hahavita zavatra ananan’ireo mpikarakara momba ny asa ao amin’ny kongregasionanareo ve ianareo? Manampy azy ireo handroso ve ianareo amin’ny fanomezana azy fiofanana manokana amin’ny firesahana ampahibemaso sy amin’ny fanaovana fikarohana ao amin’ny Baiboly? Nanasa ireo ampy fahaizana ve ianareo mba hiaraka aminareo amin’ny fitsidihan’ny mpiandry? Miara-miasa amin’izy ireo ve ianareo eny amin’ny saha fitoriana? Tao amin’ilay fanoharana nataon’i Jesosy ny amin’ny talenta, dia hoy ilay tompo tamin’ireo mpanompony nahatoky: “Tsara izany, ry mpanompo tsara sady mahatoky”! (Matio 25:23). Moa ve ianareo mazoto manome toy izany koa, teny fiderana sy fankasitrahana an’ireo mpikarakara momba ny asa izay, amim-piheveran-tena araka ny tena izy, dia manatanteraka ny asa anendrena azy ireo amin’ny fomba tsara dia tsara? (Ampitahao amin’ny Ohabolana 3:27.) Raha tsy izany, hihevitra ve izy ireo fa tsy ankasitrahana ny asany?

Zava-dehibe toy izany koa ho an’ny fifandraisana eo amin’ny asa mirindra ny fampitan-kevitra. (Ampitahao amin’ny Ohabolana 15:22.) Tsy tokony hanendrena na hesorina araka izay tiana na araka ny kisendrasendra ireo raharaha asaina hiandraiketana. Tokony hidinika amim-pahatsorana ny amin’ny fomba azo ampiasana tsara indrindra ao amin’ny kongregasiona ny fahaizan’ny rahalahy iray, ireo loholona. (Ampitahao amin’ny Matio 25:15.) Rehefa misy fanendrena hanao asa iray, dia tokony hampianarina tanteraka ny amin’izay takina aminy marina ny rahalahy iray. “Raha tsy misy mpitondra [mahay, NW ]”, hoy ny fampitandreman’ny Ohabolana 11:14, “dia rava ny firenena”.

Tsy tsara mihitsy ny hilazana fotsiny amin’ny rahalahy iray mba haka ny fiantsorohana ny asa ao amin’ny sampan-draharahan’ny kaonty, ny an’ny gazety, na ny an’ny zavatra vita an-tsoratra, avy amin’ny mpikarakara hafa. Indraindray dia misy mpikarakara notendrena vao haingana iray mandova firaketana an-tsoratra tsy marina na tsy feno be dia be. Mahaketraka re izany! “Aoka ny zavatra rehetra hatao amin’ny fahamendrehana sy ny filaminana”, hoy ny fandidian’ny 1 Korintiana 14:40. Tokony hanao ny dingana voalohany ireo loholona amin’ny fampiofanana ireo rahalahy, ka hampifankazatra azy ireo amin’ny fomba fanaovan-javatra ao amin’ny kongregasiona sady hanome ohatra mihitsy amin’ny fanarahana ireny fomba ireny. Ohatra, ireo loholona dia tokony handamina ny hisian’ny fanamarinana ny kaontin’ny kongregasiona isaky ny telo volana. Ny fanaovana tsirambina fandaharana lehibe toy izany dia afaka mitarika ho amin’ny zava-manahirana ary mampihena ny fanajan’ireo mpikarakara momba ny asa an’ireo toromarika avy amin’ny fandaminana.

Kanefa, aoka hatao hoe toa manao tsirambina ny fisahanana ny asa nanendrena azy manokana iray ny rahalahy iray? Toy izay hanaisotra azy tsy misy hataka andro amin’ilay asa nanendrena azy, dia tokony hiresaka ny amin’ilay raharaha miaraka aminy ireo loholona. Angamba tsy fisian’ny fampiofanana ilay zava-manahirana. Raha mbola mahita fahasahiranana ihany ilay rahalahy amin’ny fisahanana ilay asa nanendrena azy, dia angamba hanao tsara izy amin’ny asa hanendrena hafa.

Afaka mampitombo ny firindrana koa ireo loholona amin’ny fampisehoana fanetren-tena. Mampirisika an’ireo Kristiana ‘tsy hanao na inona na inona amin’ny fifampiandaniana, na handrani-tena foana fa amin’ny fanetren-tena dia samy hanao ny namany ho mihoatra noho ny tenany’, ny Filipiana 2:3. Araka izany, ny loholona iray dia tokony hiezaka ny hiara-miasa raha mangataka azy hipetraka eo amin’ny fitoerana iray ao amin’ny efitrano ny mpikarakara ny mpanatrika iray. Tsy hanjohy hevitra izy hoe satria loholona, dia tsy mila ny mankato. Angamba ilay mpikarakara ny mpanatrika manaraka an-tsakany sy an-davany fotsiny ny fanoloran-kevitra mba hipetrahana eny amin’ny faritra samy hafa ao amin’ny efitrano, na dia tokony hotadidiny aza fa tsy misy fitsipika hoe tsy maintsy manao izany ny rehetra.a Hanalavitra ny hanova tsy amin’ny antony ireo fanapahan-kevitra momba ny raharaha izay nanendrena mpikarakara momba ny asa iray, ny loholona iray.

Mpikarakara momba ny asa izay miasa ho amin’ny firindrana

“Ny [mpikarakara momba ny asa, NW ] koa toy izany ihany, ho maotona”, hoy ny fanamarihan’ny apostoly Paoly (1 Timoty 3:8). Ny fiheverany ny asa anendrena azy ireo amim-pahamaotinana — ho tapany amin’ny fanompoany masina — dia mandray anjara be dia be amin’ny fisakanana ny fihenjanana tsy hitombo. Raha mpikarakara momba ny asa ianao, manatontosa ireo raharaha iandraiketanao amim-kafanam-po ve ianao? (Romana 12:7, 8). Nilofo mba hanjary hahay hisahana ireo raharaha iandraiketanao ve ianao? Azo itokiana sy azo ianteherana ve ianao? Mampiseho toe-tsaina feno fahavononana ve ianao rehefa omena asa anendrena anao? Misahana asa nanendrena azy telo samy hafa ao amin’ny kongregasiona ny mpikarakara momba ny asa iray ao amin’ny tany iray atsy Afrika. Manao ahoana ny fihetsiny? “Midika ho asa mafimafy kokoa fotsiny izany”, hoy izy, “ary tsy mahafaty anao ny asa mafy.” Eny tokoa, ireo izay manome avy amin’ny tenany dia mahita fahasambarana lehibe indrindra. — Asan’ny Apostoly 20:35.

Afaka mahavita zavatra be dia be koa ianao mba hampitomboana ny firindrana, amin’ny fiaraha-miasa amin’ny fomba feno amin’ireo loholona. “Manekè ny mpitondra anareo, ka manoava azy”, hoy ny Hebreo 13:17, “fa izy miambina ny fanahinareo araka izay tokony hataon’ny olona mbola hampamoahina, mba hanaovany izany amin’ny fifaliana, fa tsy amin’ny fisentoana; fa tsy hahasoa anareo izany.” Marina fa lehilahy tsy lavorary ireo loholona, ary mety ho mora ny hahitana fahadisoana eo amin’izy ireo. Kanefa, miteraka tsy fitokiana ny fihetsika tia manakiana. Afaka mandrava ny fifalianao izany ary afaka ny hisy fiantraikany eo amin’ny hafa ao amin’ny kongregasiona amin’ny fomba tsy mahasoa. Araka izany, dia nanome izao torohevitra izao ny apostoly Petera: “Hianareo izay mbola tanora fanahy (...), dia maneke ny loholona. Eny, samia misikina fanetren-tena hianareo ka mifanompoa; (...) Koa amin’izany manetre tena ambanin’ny tàna-maherin’Andriamanitra, mba hanandratany anareo amin’ny fotoan’andro”. — 1 Petera 5:5, 6.

Amin’ny fotoanany indrindra izany torohevitra izany raha toa ka mihevitra ianao fa nodian-tsy hita tamin’ireo tombontsoam-panompoana. Angamba “maniry ny asan’ny mpitandrina [“mpiandraikitra”, NW ]” ianao, kanefa tsy nisy fanendrena natao. (1 Timoty 3:1). Afaka manampy anao hihazona “fihetsika mahay miandry” ny fanetren-tena. (Fitomaniana 3:24, NW ). Toy izay hahatsapa fahasosorana amin’ireo loholona — fihetsika izay azo antoka fa hanimba ny fifandraisanareo tsara — dia anontanio izy ireo raha misy lafin-javatra izay mety hihatsaranao. Tsy isalasalana fa ho hita ho toy ny porofon’ny fandrosoana ara-panahy ny fahavononanao marina hanaiky sy hampihatra torohevitra.

Afaka manampy mpikarakara momba ny asa hihazona ny fandanjalanjany ny fanetren-tena sy ny fiheveran-tena araka ny tena izy araka an’Andriamanitra, raha toa ka manana fahaizana ambony na tombontsoa eo amin’ny fianarana sy ny toerana ara-tsosialy izy. Toy inona moa ny fakam-panahy mety hahazo azy mba hanandrana hihoatra ireo loholona na hisarika ny saina ho amin’ny fahaizany manokana! Mampahatsiahy antsika ny Ohabolana 11:2 fa “ao amin’ny manetry tena [“mihevi-tena araka ny tena izy”, NW ] no misy ny fahendrena”. Ny rahalahy iray mihevi-tena araka ny tena izy dia mahatsapa ny fetran’ny heriny. Vonona ny hiasa mangingina amin’ny toerana tsy dia voamarika loatra izy ary vonona ny hampiasa ny fahaizany mba hanohanana ireo loholona. Mety hanampy azy koa ny fiheveran-tena araka ny tena izy mba hahatsapana fa na dia mety hanana fahalalana betsaka araka an’izao tontolo izao aza izy, dia mety ho mbola tsy ampy izay ananany eo amin’ny lafiny lehibe toy ny fahendrena sy ny fahaiza-manavaka ara-panahy — toetra izay mety hihoaran’ireo loholona ny hafa. — 1 Korintiana 1:26–2:13; Filipiana 1:9.

Mazava fa manana anjara asa lehibe ireo loholona sy mpikarakara momba ny asa. Amin’ny fitambarany, dia afaka mahavita zavatra be dia be izy ireo mba hampandrosoana ny rehetra ao amin’ny kongregasiona. Kanefa, mba hanaovana izany, dia tsy maintsy miara-miasa amin’ny fomba mirindra izy ireo, “amin’ny fanetren-tena rehetra sy ny fahalemem-panahy, amin’ny fahari-po mifandefitra amin’ny fitiavana, mazoto mitana ny firaisana avy amin’ny Fanahy amin’ny fehim-pihavanana”. — Efesiana 4:2, 3.

[Fanamarihana ambany pejy]

[Sary, pejy 27]

Mihevitra an’ireo mpikarakara momba ny asa, tsy ho toy ny eo ambany fahefany fotsiny ireo loholona, fa ho toy ny mpiara-manompo an’Andriamanitra aminy