Ny Fomba Anompoan’ireo Mpiandraikitra Mpitety Faritany Amin’ny Maha-mpitandrin-draharaha Mahatoky
“Samia mifanompo araka ny fanomezam-pahasoavana izay noraisinareo, dia tahaka ny mpitandrina tsara ny fahasoavana maro samy hafa izay an’Andriamanitra.” — 1 PETERA 4:10.
1, 2. a) Ahoana no hamaritanao ilay teny hoe “mpitandrin-draharaha”? b) Iza avy no tafiditra ho anisan’ireo mpitandrin-draharaha izay ampiasain’Andriamanitra?
MAMPIASA ny Kristiana mahatoky rehetra ho mpitandrin-draharaha, i Jehovah. Matetika ny mpitandrin-draharaha dia mpanompo iray miandraikitra ny ankohonana iray. Mety hitantana ny raharaham-barotry ny tompony koa izy. (Lioka 16:1-3; Galatiana 4:1, 2, NW ). Niantso ny fitambaran’ireo voahosotra mahatoky eto an-tany ho “mpitandrin-draharaha mahatoky”, i Jesosy. Nankininy tamin’io mpitandrin-draharaha io “ny fananany rehetra”, anisan’izany ny asa fitoriana ilay Fanjakana. — Lioka 12:42-44; Matio 24:14, 45, NW.
2 Nilaza ny apostoly Petera fa ny Kristiana rehetra dia samy mpitandrina ny fahasoavana maro samy hafa izay an’Andriamanitra. Samy manana ny toerana sahaza azy avy ny Kristiana tsirairay, ka amin’izany toerana izany no ahafahany manatontosa fitandreman-draharaha amim-pahatokiana. (1 Petera 4:10). Mpitandrin-draharaha ireo loholona kristiana voatendry, ary misy mpiandraikitra mpitety faritany eo anivon’izy ireo. (Titosy 1:7, NW ). Ahoana no tokony hiheverana ireny loholona mpitety faritany ireny? Toetra sy zava-kendrena inona avy no tokony hananan’izy ireny? Ary ahoana no ahafahan’izy ireo manao soa be indrindra?
Velom-pankasitrahana noho ny fanompoan’izy ireo
3. Nahoana no azo antsoina hoe “mpitandrina tsara” ireo mpiandraikitra mpitety faritany?
3 Hoy ny mpivady kristiana iray, raha nanoratra tamin’ny mpiandraikitra mpitety faritany sy ny vadiny: “Tianay holazaina ny fankasitrahanay noho ny fotoana rehetra sy ny fitiavana rehetra nomenareo anay. Amin’ny maha-fianakaviana anay, dia nandray soa lehibe tamin’ny fampaherezana sy ny torohevitra rehetra avy aminareo izahay. Fantatray fa tsy maintsy manohy mitombo ara-panahy izahay, kanefa noho ny fanampian’i Jehovah sy noho ny rahalahy sy anabavy sahala aminareo, dia manjary mora kokoa ny zava-tsarotra entin’ny fanombohana manao zavatra.” Mitranga matetika ny fitenenana toy izany satria manisy fiheverana manokana an’ireo mpiray finoana aminy ireo mpiandraikitra mpitety faritany, tsy misy hafa amin’ny mpitandrin-draharaha mahay iray mikarakara tsara izay ilain’ny ankohonana iray. Ny sasany dia mpandahateny miavaka. Maro no havanana amin’ny asa fitoriana, kanefa kosa ny hafa dia fantatra noho ny hafanany sy ny fangorahany. Amin’ny fambolena sy fampiasana talenta toy izany mba hanompoana ny hafa, ireo mpiandraikitra mpitety faritany dia azo antsoina ara-drariny hoe “mpitandrina tsara”.
4. Fanontaniana inona izao no hodinihina?
4 “Ny mpitandrina fananana dia tokony ho olona mahatoky”, hoy ny nosoratan’ny apostoly Paoly. (1 Korintiana 4:2, fanamarihana ambany pejy). Ny fanompoana Kristiana tahaka ny tena any amin’ny kongregasiona samy hafa isan-kerinandro, isan-kerinandro, dia tombontsoa tsy manam-paharoa sy mahafaly. Na dia izany aza, dia andraikitra mavesatra koa izy io. Ahoana àry no ahafahan’ireo mpiandraikitra mpitety faritany manatontonsa ny fitandreman-draharahany amim-pahatokiana sy amim-pahombiazana?
Fanatontosana amim-pahombiazana ny fitandreman-draharahany
5, 6. Nahoana no zava-dehibe aoka izany eo amin’ny fiainan’ny mpiandraikitra mpitety faritany ny fianteherana amim-bavaka amin’i Jehovah?
5 Tena ilaina ny fianteherana amim-bavaka amin’i Jehovah raha tian’ireo mpiandraikitra mpitety faritany ny ho mpitandrin-draharaha mahomby. Noho ny fandaharam-potoanany sy ireo andraikiny maro, dia mety hahatsiaro tena ho itambesaran’ny enta-mavesatra izy ireo. (Ampitahao amin’ny 2 Korintiana 5:4.) Koa mila ny manao zavatra mifanaraka amin’ny hiran’i Davida mpanao salamo toy izao izy ireo: “Apetraho amin’i Jehovah ny entanao, ary Izy no hanohana anao; tsy havelany hangozohozo mandrakizay ny marina.” (Salamo 55:22). Mampionona koa ny tenin’i Davida manao hoe: “Isaorana anie [i Jehovah, NW ], Izay mitondra ny entantsika isan-andro isan-andro”. — Salamo 68:19.
6 Taiza i Paoly no nahazo ilay tanjaka nisahanany ireo andraikiny ara-panahy? “Manana tanjaka ho an’ny zavatra rehetra aho noho ilay manome hery ahy”, hoy ny nosoratany. (Filipiana 4:13, NW ). Eny, i Jehovah Andriamanitra no Loharanon’ny tanjak’i Paoly. Toy izany koa fa nanoro hevitra toy izao i Petera: “Raha misy olona manompo, dia aoka izy hanao izany araka ny hery izay omen’Andriamanitra azy; mba hankalazana an’Andriamanitra amin’ny zavatra rehetra amin’ny alalan’i Jesosy Kristy”. (1 Petera 4:11). Ny rahalahy iray izay mpiandraikitra mpitety faritany nandritra ny taona maro dia nanantitrantitra ny ilana hiantehitra amin’Andriamanitra tamin’ny filazana hoe: “Mitodiha mandrakariva any amin’i Jehovah rehefa mikarakara zava-manahirana, ary tadiavo ny fanampian’ny fandaminany.”
7. Ahoana no andraisan’ny fahaiza-mandanjalanja anjara eo amin’ny asan’ny mpiandraikitra mpitety faritany?
7 Ilain’ny mpiandraikitra mpitety faritany mahomby ny fahaiza-mandanjalanja. Sahala amin’ireo kristiana hafa, dia mikely aina izy ‘mamantatra izay zavatra lehibe kokoa’. (Filipiana 1:10, NW ).a Rehefa manana fanontaniana momba ny raharaha sasany ireo loholona eo an-toerana, dia fahendrena ny iarahany midinika amin’ilay mpiandraikitra ny fizaran-tany izay mitsidika. (Ohabolana 11:14; 15:22). Azo inoana fa ny fanamarihana voalanjalanja ataony sy ny torohevitra araka ny Soratra Masina omeny dia ho hita fa tena mahasoa rehefa manohy mikarakara ilay raharaha ireo loholona aorian’ny handaozany ilay kongregasiona. Mitovitovy amin’izany no nolazain’i Paoly tamin’i Timoty toy izao: “Izay zavatra efa renao tamiko teo anatrehan’ny vavolombelona maro dia atolory ny olona mahatoky, izay hahay mampianatra ny sasany kosa.” — 2 Timoty 2:2.
8. Nahoana no tena ilaina ny fianarana sy ny fanaovana fikarohana ary ny fisaintsainana ny Baiboly?
8 Tena ilaina ny fianarana sy ny fikarohana ary ny fisaintsainana ny Soratra Masina mba hanomezana torohevitra marim-pototra. (Ohabolana 15:28). Hoy ny mpiandraikitra ny distrika iray: “Rehefa miara-mivory amin’ireo loholona isika, dia tsy tokony hatahotra ny hiaiky fa tsy fantatsika ny valin’ny fanontaniana manokana iray.” Ny filofosana mba ‘hananana ny sain’i Kristy’ momba ny raharaha iray no mahatonga hety ny fanomezana torohevitra miorina amin’ny Baiboly, izay hanampy ny hafa hampifanaraka izay ataony amin’ny sitrapon’Andriamanitra. (1 Korintiana 2:16). Indraindray, dia mila manoratra any amin’ny Fikambanana Watch Tower ny mpiandraikitra ny fizaran-tany, mba hahazoana fitarihan-dalana. Na ahoana na ahoana, ny finoana an’i Jehovah sy ny fitiavana ny fahamarinana dia zava-dehibe lavitra noho izay fiheveran’ny hafa na ny fahaiza-mandaha-teny. Tsy tonga “tamin’ny teny sy fahendrena marevaka” i Paoly, fa nanomboka kosa ny fanompoany tany Korinto “azon’ny fahalemena sy ny fahatahorana ary ny fangovitana be”. Nahatonga azy tsy hahita vokatra ve izany? Mifanohitra amin’izany fa nanampy ireo Korintiana kosa izany mba hanam-pinoana ‘tsy amin’ny fahendren’ny olona, fa amin’ny herin’Andriamanitra ihany’. — 1 Korintiana 2:1-5.
Toetra hafa tena lehibe
9. Nahoana no ilain’ny loholona mpitety faritany ny fahaizana mipetraka eo amin’ny toeran’ny hafa?
9 Manampy ireo mpiandraikitra mpitety faritany hahita vokatra tsara ny fahaizana mipetraka eo amin’ny toeran’ny hafa. Nampirisika mafy ny Kristiana rehetra mba haneho ‘fiaraha-miory’, na mba ‘hahay hipetraka eo amin’ny toeran’ny hafa’ (NW ), i Petera. (1 Petera 3:8). Tsapan’ny mpiandraikitra ny fizaran-tany iray fa ilaina ny ‘fahalianana amin’ny rehetra ao amin’ny kongregasiona sy ny fanehoana fiheverana marina tokoa’. Tamin’ny toe-tsaina mitovy amin’izany no nanoratan’i Paoly toy izao: “Miaraha mifaly amin’izay mifaly, ary miaraha mitomany amin’izay mitomany”. (Romana 12:15). Ny fihetsika toy izany dia manosika ny mpiandraikitra mpitety faritany hanao ezaka amim-pahatsorana mba hahatakarana ny zava-manahirana sy ny toe-javatra misy ireo mpiray finoana aminy. Amin’izay izy ireo dia afaka manome torohevitra mampahery araka ny Soratra Masina izay afaka mitondra soa tokoa raha ampiharina. Naharay itỳ taratasy itỳ avy tamin’ny kongregasiona iray any akaikin’i Turin, any Italia, ny mpiandraikitra ny fizaran-tany iray havanana amin’ny fahaiza-mipetraka eo amin’ny toeran’ny hafa: “Raha ta hahaliana ny hafa ianao, dia manehoa fahalianana aminy; raha ta hahafinaritra ny hafa ianao, dia manehoa toetra mahafinaritra; raha te ho tiana ianao, dia aoka ianao haha-te ho tia; raha ta hampiana ianao, dia mivonòna hanampy. Izany no nianaranay taminao!”
10. Inona avy no nolazain’ny mpiandraikitra ny fizaran-tany sy ny distrika momba ny fanetren-tena, ary ohatra manao ahoana no navelan’i Jesosy tamin’io lafiny io?
10 Manampy ireo mpiandraikitra mpitety faritany hanao soa betsaka ny fanetren-tena sy ny maha-azo hatonina azy. Nanamarika toy izao ny mpiandraikitra ny fizaran-tany iray: “Zava-dehibe indrindra ny fitanana fihetsika manetry tena.” Nampitandrina ireo mpiandraikitra mpitety faritany vaovao toy izao izy: “Aza mamela ny tenanareo ho voataona loatra amin’ireo rahalahy manankarena kokoa, noho izay mety hataon’izy ireo ho anareo, na mametra ny fisakaizanareo amin’olona toy izany, fa mikeleza aina mandrakariva kosa mba hifampiraharaha amin’ny hafa tsy misy fizahan-tavan’olona.” (2 Tantara 19:6, 7). Ary ny mpiandraikitra mpitety faritany iray tena manetry tena dia tsy hanana fiheverana tafahoatra ny amin’ny halehiben’ny toerana tanany amin’ny maha-solontenan’ny Fikambanana azy. Nanao izao fanamarihana izao tamin’ny fomba mety ny mpiandraikitra ny distrika iray: “Aoka ianao hanetry tena sy ho vonon-kihaino ireo rahalahy. Aoka ianao ho azo hatonina mandrakariva.” Tamin’ny naha-lehilahy niavaka indrindra azy teto an-tany, dia afaka nanao izay hahasanganehana ny olona i Jesosy Kristy, kanefa dia nanetry tena sy azo nohatonina aoka izany izy, hany ka na dia ireo ankizy aza dia tsy nihafahafa teo anatrehany. (Matio 18:5; Marka 10:13-16). Tian’ireo mpiandraikitra mpitety faritany ny ankizy sy ny zatovo ary ireo zokiolona — eny, na iza na iza ary ny olona rehetra ao amin’ny kongregasiona — tsy hihambahamba hanatona azy ireo.
11. Rehefa ilaina izany, inona no mety ho vokatry ny fialan-tsiny?
11 Mazava ho azy fa “tafintohina amin’ny zavatra maro isika rehetra”, ary tsy misy mpiandraikitra mpitety faritany vita fanefitra amin’ny fanaovana fahadisoana. (Jakoba 3:2). Rehefa manao fahadisoana izy ireo, ny fialan-tsiny amim-pahatsorana dia manome oha-panetren-tena ho an’ireo loholona hafa. Araka ny Ohabolana 22:4, “ny valin’ny fanetren-tena sy ny fahatahorana [feno fanajana] an’i Jehovah dia harena sy voninahitra ary fiainana”. Ary moa ve ny mpanompon’Andriamanitra rehetra tsy mila ny ‘manaraka an’Andriamaniny amin’ny fanetren-tena’? (Mika 6:8). Rehefa nanontaniana izy hoe torohevitra inona no homeny ny loholona mpitety faritany vaovao iray, dia nanazava toy izao ny mpiandraikitra ny fizaran-tany iray: “Hajao fatratra sy asio fiheverana fatratra ny rahalahy rehetra, ary hevero ho tsara kokoa noho ianao izy ireo. Hiana-javatra betsaka avy amin’ireo rahalahy ianao. Manetre tena hatrany. Aoka ianao ho tsotra. Aza mamboamboatra fihetsika.” — Filipiana 2:3.
12. Nahoana no zava-dehibe aoka izany ny zotom-po ho an’ny fanompoana kristiana?
12 Mampisy lanjany ny tenin’ireo mpiandraikitra mpitety faritany ny zotom-pony ho an’ny fanompoana kristiana. Raha ny marina, rehefa mamela ohatra mampiseho zotom-po eo amin’ny asa fitoriana izy mivady, dia mahazo fampaherezana haneho zotom-po eo amin’ny fanompoany koa ireo loholona sy ny vadin’izy ireo ary ny sisa ao amin’ny kongregasiona. “Aoka ianao ho be zotom-po ho an’ny fanompoana”, hoy ny fampirisihana mafy nataon’ny mpiandraikitra ny fizaran-tany iray. Nanampy teny toy izao izy: “Hitako fa, amin’ny ankapobeny, arakaraka ny maha-be zotom-po ny kongregasiona iray eo amin’ny fanompoana no maha-vitsy kokoa ireo zava-manahirana hitan’izy ireo.” Izao no nomarihin’ny mpiandraikitra ny fizaran-tany iray: “Mino aho fa raha miara-miasa amin’ireo rahalahy sy anabavy eny amin’ny saha ireo loholona ka manampy azy ireo hankafy ny fanompoana, izany dia hiteraka fiadanan-tsaina sy fahafaham-po lehibe indrindra eo amin’ny fanompoana an’i Jehovah.” Ny apostoly Paoly dia ‘sahy niteny ny filazantsara tamin’ireo Tesaloniana na dia be aza ny fanoherana’. Tsy nahagaga raha nanana fahatsiarovana nahafinaritra momba ny fitsidihany sy ny asa fitoriany izy ireo ka naniry mafy ny hahita azy indray! — 1 Tesaloniana 2:1, 2; 3:6.
13. Manisy fiheverana ny amin’inona ireo mpiandraikitra mpitety faritany rehefa miara-miasa amin’ireo Kristiana tahaka azy eo amin’ny fanompoana eny amin’ny saha?
13 Rehefa miara-miasa amin’ireo Kristiana tahaka azy eo amin’ny fanompoana eny amin’ny saha ny mpiandraikitra mpitety faritany iray, dia asiany fiheverana ny toe-javatra misy azy ireo sy ny fetran’ny tenan’izy ireo. Na dia mety hanampy aza ny tolo-kevitra ataony, dia fantany fa mety hanahy mafy ny sasany rehefa mitory miaraka amin’ny loholona iray ampy fanandraman-javatra. Amin’ny toe-javatra sasany àry, dia mety hahasoa kokoa ny fampaherezana noho ny torohevitra. Rehefa miaraka amina mpitory na mpisava lalana any amin’ny fampianarana Baiboly izy, dia mety ho tian’izy ireo kokoa raha izy no mitarika izany. Azo inoana fa izany dia hampahafantatra azy ireo fomba sasany hanatsarany ny fomba fampianarany.
14. Nahoana no azo lazaina fa mandrisika zotom-po ao amin’ny hafa ireo mpiandraikitra mpitety faritany be zotom-po?
14 Mandrisika zotom-po ao amin’ny hafa ireo mpiandraikitra mpitety faritany be zotom-po. Ny mpiandraikitra ny fizaran-tany iray tany Ouganda dia namakivaky ala mikitroka nandritra ny adiny iray mba hiarahana tamin’ny rahalahy iray hankany amin’ny fampianarana Baiboly iray izay tsy nandroso firy. Nandritra ny dia an-tongotra nataon’izy ireo, dia avy be aoka izany ny orana ka kotsa tanteraka izy ireo rehefa tonga. Rehefa fantatr’ilay fianakaviana nisy eni-mianaka fa mpiandraikitra mpitety faritany ilay mpitsidika azy ireo, dia nanaitra ny sain’izy ireo mafy izany. Fantatr’izy ireo fa ireo mpitondra fivavahana tao amin’ny fiangonan’izy ireo dia tsy ho naneho fahalianana toy izany tamin’ny andian’ondry mihitsy. Ny alahady nanaraka izy ireo dia tonga tany amin’ny fivoriana voalohany natrehiny, ary nilaza ny faniriany ho tonga Vavolombelon’i Jehovah.
15. Zavatra niainana tsara dia tsara inona no hitan’ny mpiandraikitra ny fizaran-tany iray tany Meksika?
15 Tany Oaxaca, fanjakana meksikana, dia nanao ezaka tsy tena notakina taminy, ny mpiandraikitra ny fizaran-tany iray. Nanao fandaharana izy mba hitoetra tao amin’ny cellule tany am-ponja nandritra ny efatra alina mba hitsidihana antokona voafonja fito izay tonga mpitory ilay Fanjakana. Nandritra ny andro maromaro dia niaraka tamin’ireo voafonja ireo izy, raha nanao fanambarana isaky ny cellule sy nitarika fampianarana Baiboly izy ireo. Noho ny fahalianana hita, dia nitohy hatramin’ny alim-be ireny fampianarana ireny. “Tamin’ny faran’ilay fitsidihana, dia nahatsiaro tena ho feno fifaliana ireo voafonja sy ny tenako ho vokatr’ilay fifampaherezana”, hoy ny nosoratan’io mpiandraikitra ny fizaran-tany be zotom-po io.
16. Nahoana no mahasoa aoka izany rehefa manome fampaherezana ny mpiandraikitra mpitety faritany sy ny vadiny?
16 Miezaka ny hampahery ireo mpiandraikitra mpitety faritany. Rehefa nitsidika ireo kongregasiona tany Makedonia i Paoly, dia ‘nampahery azy ireo tamin’ny teny maro’ izy. (Asan’ny Apostoly 20:1, 2, NW ). Ireo teny fampaherezana dia mety ho tena hahasoa mba hitarihana ny tanora sy ny antitra ho amin’ny zava-kendrena ara-panahy. Tao amin’ny biraon’ny sampana lehibe iray an’ny Fikambanana Watch Tower, ny fanadinadinana tsotsotra natao dia nampiharihary fa efa ho ny 20 isan-jaton’ireo mpiasa an-tsitrapo no nampirisihin’ny mpiandraikitra ny fizaran-tany mba hiditra ao amin’ny fanompoana manontolo andro. Hita fa loharanom-pampaherezana lehibe koa ny vadin’ny mpiandraikitra mpitety faritany noho ny ohatra tsara dia tsara omeny amin’ny maha-mpitory ilay Fanjakana manontolo andro azy.
17. Ahoana no iheveran’ny mpiandraikitra ny fizaran-tany efa zokiolona iray ny amin’ny tombontsoany mitondra fanampiana ho an’ny hafa?
17 Mila fampaherezana indrindra ireo be taona sy ireo fanahy ketraka. Nanoratra toy izao ny mpiandraikitra ny fizaran-tany iray efa zokiolona: “Ny lafiny amin’ny asako izay manome fifaliana anaty tsy hay lazaina, dia ny tombontsoa hanampy ireo tsy mitory intsony sy ireo [zokiolona] efa osa eo anivon’ny andian’ondrin’Andriamanitra. Manana heviny manokana ho ahy ny teny ao amin’ny Romana 1:11, 12, rehefa mahazo fampaherezana sy tanjaka lehibe aho eo ‘am-panomezako fahasoavam-panahy ho an’ny olona toy izany mba hampaherezana azy ireo’.”
Valisoa noho ny asa falifaly ataony
18. Manana zava-kendrena araka ny Soratra Masina inona avy ireo mpiandraikitra mpitety faritany?
18 Izay hahasoa indrindra ireo mpiray finoana aminy no imasoan’ireo mpiandraikitra mpitety faritany. Irin’izy ireo ny hanatanjaka ny kongregasiona sy hampahery azy ireny ara-panahy. (Asan’ny Apostoly 15:41). Miezaka mafy ny mpiandraikitra mpitety faritany iray mba “hanome fampaherezana sy hanolotra famelombelomana ary hampandroso ny faniriana hanatanteraka ny fanompoana sy hanohy hiaina mifanaraka amin’ny fahamarinana.” (3 Jaona 3). Ny hafa iray dia miezaka manao izay hahatafatoetra amin’ny finoana, ireo mpiray finoana aminy. (Kolosiana 2:6, 7). Tadidio fa “tena mpiara-miasa” ireo mpiandraikitra mpitety faritany fa tsy tompon’ny finoan’ny hafa akory. (Filipiana 4:3; 2 Korintiana 1:24). Ny fitsidihany dia fotoam-pampaherezana sy fotoana anaovana asa fanampiny, ary koa fahafahana ho an’ny fitambaran-doholona mba hijery indray ny fandrosoana vita sy handinika ireo zava-kendrena amin’ny hoavy. Amin’ny teniny sy ny ohatra omeny, dia afaka manantena ny hahazo fampaherezana sy fandrisihana ho amin’ny asa amin’ny hoavy ireo mpitory sy mpisava lalana sy mpanampy amin’ny fanompoana ary loholona ao amin’ny kongregasiona. (Ampitahao amin’ny 1 Tesaloniana 5:11.) Koa tohano amin’ny fo manontolo àry ny fitsidihan’ny mpiandraikitra ny fizaran-tany, ary mandraisa soa feno amin’ny fanompoana ataon’ny mpiandraikitra ny distrika.
19, 20. Ahoana no namalian-tsoa an’ireo mpiandraikitra mpitety faritany sy ny vadiny noho ny fanompoana mahatoky nataony?
19 Valian-tsoa amin’ny fomba tondraka ireo mpiandraikitra mpitety faritany sy ny vadiny noho ny fanompoana mahatoky ataony, ary afaka matoky izy ireo fa hitahy azy ireo i Jehovah noho ny soa ataony. (Ohabolana 19:17; Efesiana 6:8). Mpivady zokiolona efa nanompo an-taonany maro tao amin’ny asa fitetezam-paritany i Georg sy i Magdalena. Tamin’ny fivoriambe iray tany Luxembourg, dia nohatonin’olona iray izay nitoriany efa maherin’ny 20 taona talohan’izay, i Magdalena. Taitra ny fahalianan’io vehivavy jiosy io tamin’ny fahamarinana noho ilay zavatra vita an-tsoratra momba ny Baiboly navelan’i Magdalena taminy, ary tatỳ aoriana dia natao batisa izy. I Georg dia nohatonin’ny anabavy ara-panahy iray izay nahatadidy ny nitsidihany azy tany an-tranony, efa ho 40 taona lasa izay. Ny fomba fampisehoany ny vaovao tsara tamin-kafanam-po dia nahatonga azy io sy ny vadiny hanaiky ny fahamarinana tamin’ny farany. Mazava ho azy fa dibo-kafaliana i Georg sy i Magdalena.
20 Nitondra fifaliana ho an’ny tenany ny fanompoana nahavokatra nataon’i Paoly tany Efesosy, ary mety ho izany no nanosika azy hanonona ny tenin’i Jesosy manao hoe: “Mahasambatra kokoa ny manome noho ny mandray.” (Asan’ny Apostoly 20:35). Koa satria mahafaoka fanomezana tsy an-kijanona ny asa fitetezam-paritany, ireo izay ao anatin’izy io dia mahita fahasambarana, indrindra fa rehefa manjary fantany ny voka-tsoan’ny asa mafy nataony. Nilazana toy izao tao amin’ny taratasy, ny mpiandraikitra ny fizaran-tany iray izay nanampy loholona kivy: “ ‘Fanampiana lehibe nanatanjaka’ ahy teo amin’ny fiainako ara-panahy ianao — mihoatra noho izay fantatrao. (...) Tsy ho fantatrao amin’ny fomba feno mihitsy hoe fanampiana lehibe toy inona moa ianao ho an’ilay Asafa maoderina, izay ‘saiky nibolasitra ny tongony’.” — Kolosiana 4:11; Salamo 73:2.
21. Nahoana ianao no milaza fa ny 1 Korintiana 15:58 dia mihatra amin’ny asan’ireo mpiandraikitra mpitety faritany?
21 Ny Kristiana zokiolona iray izay tao amin’ny asan’ny fizaran-tany nandritra ny taona maro dia tia ny nieritreritra ny amin’ny 1 Korintiana 15:58 izay nampirisihan’i Paoly mafy toy izao: “Miorena tsara, aza miova, ary mahefà be mandrakariva amin’ny asan’ny Tompo, satria fantatrareo fa tsy foana tsy akory ny fikelezanareo aina ao amin’ny Tompo.” Azo antoka fa manan-javatra be hatao amin’ny asan’ny Tompo ireo mpiandraikitra mpitety faritany. Ary velom-pisaorana toy inona moa isika noho izy ireo manompo amim-pifaliana aoka izany amin’ny maha-mpitandrin-draharaha mahatokin’ny fahasoavan’i Jehovah azy!
[Fanamarihana ambany pejy]
a Jereo ilay lahatsoratra hoe “Afaka ny ho Sambatra ve Ianao Raha Manan-javatra Be dia Be Tsy Maintsy Atao?” ao amin’ny Ny Tilikambo Fiambenana tamin’ny 15 Aogositra 1991, pejy faha-28-31.
Ahoana no Havalinao?
◻ Nahoana no azo heverina ho “mpitandrina tsara” ireo mpiandraikitra mpitety faritany?
◻ Inona avy ireo anton-javatra sasany izay manampy ny mpiandraikitra ny fizaran-tany sy ny distrika hahavita soa betsaka?
◻ Nahoana no zava-dehibe aoka izany ny fanetren-tena sy ny zotom-po ho an’ireo manao ny asa fitetezam-paritany?
◻ Manana zava-kendrena tsara dia tsara inona avy ireo mpiandraikitra mpitety faritany?
[Sary, pejy 16]
Miezaka mampahery ireo mpiray finoana aminy, ny mpiandraikitra mpitety faritany
[Sary, pejy 17]
Afaka mandray soa avy amin’ny fiarahana amin’ny mpiandraikitra mpitety faritany sy ny vadiny amin’ny fomba mitovy ny tanora sy ny antitra
[Sary, pejy 18]
Mampitombo zotom-po ao amin’ny hafa ny fanompoana amin-jotom-po ataon’ny mpiandraikitra mpitety faritany