Mivory Ireo Iraka Milaza Fiadanana Araka An’Andriamanitra

“NITOMBO hery izahay isaky ny fivoriamben’ny distrika natrehinay”, hoy ny loholona kristiana iray avy any Etazonia. “Kanefa, tamin’itỳ taona itỳ dia tsy hay tsotra izao izay nilazana azy. Nandao ny fivoriambe izahay isan’andro, nanontany tena hoe amin’ny ahoana no hihoatra noho ny zavatra nampoizinay ny ampitso, ary dia tsy diso fanantenana izahay!”

Raha nanatrika ny iray tamin’ireo Fivoriamben’ny Distrika “Iraka Milaza Fiadanana Araka An’Andriamanitra” ianao, dia tsy isalasalana fa hiombon-kevitra amin’io mpamonjy fivoriambe feno hafanam-po io. Nifantoka tamin’ny lafiny samy hafa amin’ilay fanirahana tanterahin’ny Vavolombelon’i Jehovah amin’ny maha-irak’Andriamanitra azy, ny andro tsirairay tamin’ilay fivoriambe. Andeha isika hijery indray ilay fandaharana telo andro.

‘Akory ny Hatsaran’irỳ Mitory Fiadanana’

Io no loha hevitra tamin’ny andro voalohan’ilay fivoriambe. Niorina tamin’ny Isaia 52:7 izy io. Amin’izao andro sarotra izao, dia maro no manompo an’i Jehovah ao anatin’ny toe-javatra manahirana. Nisy fanadinadinana ny sasany tamin’ireo olona mahatoky ireo tamin’ilay lahateny hoe “Fihainoana Vaovao avy Amin’ny Mpitory Fiadanana Be Zotom-po”. Nampahery tokoa ny fihainoana ny fanehoan-kevitr’izy ireo manokana, ary tamin’izany no nahazoan’ireo mpanatrika fivoriambe toky fa afaka manatanjaka ny tenany koa i Jehovah, manome “hery mihoatra noho ny mahazatra” mihitsy aza mba hanampiana azy ireo hiaritra. — 2 Korintiana 4:7, NW.

Tsy mavesatra ny zavatra takin’i Jehovah. (1 Jaona 5:3). Nohazavaina izany tao amin’ny lahateny farany tamin’ny fandaharana ny maraina, izay nahatratra ny fara heriny tamin’ny famoahana ilay bokikely 32 pejy mitondra ny lohateny hoe Inona no Takin’Andriamanitra Amintsika? Io bokikely fianarana vaovao misy sary kanto io dia tsy isalasalana fa hanana anjara asa lehibe eo amin’ny fanampiana olona maro kokoa hianatra momba ny fikasan’Andriamanitra. Hita ao amin’ny lahatsoratra fianarana farany ato amin’itỳ gazety itỳ sy eo amin’ny pejy faha-16 sy 17 ireo fanazavana momba ny fampiasana io zavatra vita an-tsoratra vaovao io.

Nasongadin’ilay lahateny hoe “Fiaretana eo Amin’ny Asa Izay Tsara”, fa tena mahafantatra tsara ny fisedrana mahazo antsika i Jehovah. Ny hoe miaritra dia midika hoe mitana ny fijoroantsika ka tsy mamoy fanantenana. Nanome antsika ny Teniny sy ny fanahiny ary ny fandaminany mba hanampiana antsika i Jehovah. Mitaky fiaretana ny mitory, kanefa manampy antsika hiaritra ny fitoriana, satria mihazona ny finoantsika ho velona. Noho isika efa manakaiky ny tsipika fahatongavana àry, dia tsy tokony havelantsika hampihena ny zotom-pontsika ny olana mahazo antsika, satria izay miaritra hatramin’ny farany ihany no hovonjena. — Matio 24:13, NW.

Nisarika ny saina ho amin’ny fanafahana an’ireo babo jiosy avy tany Babylona sy ny famerenana tamin’ny laoniny ny fanompoam-pivavahana madio tany Jerosalema tamin’ny 537 al.f.i., ilay lahateny fototra hoe “Ny Anjara Asantsika Amin’ny Maha-iraka Milaza Fiadanana Araka An’Andriamanitra Antsika”. Io fisehoan-javatra io, hoy ny fanazavan’ilay mpandahateny, dia fahitana mialoha fotsiny ny amin’izay hotanterahin’ny Fanjakan’Andriamanitra tsy ho ela amin’ny ambaratonga maneran-tany. (Salamo 72:7; Isaia 9:6). Ny hitory ny vaovao tsara momba io Fanjakana io sy ny hiaina mifanaraka amin’io hafatra io no asa anendrena antsika amin’izao fotoana izao. Tokony hanosika antsika tsy hitsahatra hanohy io asa io ny fitiavana an’Andriamanitra sy ny mpiara-belona. — Asan’ny Apostoly 5:42.

Zavatra nisongadina tamin’ny fandaharana ny zoma ilay fitohitohizan-dahateny hoe “Mitandrema Tena Amin’ireo Fandrika Miafin’ny Fialam-boly”. Matetika no manome taratry ny fisainana araka ny demonia ny mozika, ireo sarimihetsika, vidéo, fampisehoana ao amin’ny televiziona, kilalao vidéo, boky, gazetiboky, sy boky misy sary mampihomehy, amin’izao andro izao. Noho izany, dia ilaintsika ny ‘mankahala ny ratsy’ sy ‘mifikitra amin’ny tsara’. (Romana 12:9). Eny, tsy maintsy mihevitra ny fialam-boly simba ho maharikoriko isika ka manalavitra azy io, raha mbola mifantoka amin-javatra madio sy mampiseho hatsaran-toetra ary mendri-piderana ny saintsika. (Filipiana 4:8). Mandrisika ny saintsika amin’ny hevitra mampahery sy mampiofana antsika hahay hanavaka ny tsara sy ny ratsy, ireo zavatra vita an-tsoratra sy fitaovana fanaovana fikarohana omen’ny fandaminan’i Jehovah. (Hebreo 5:14). Tokony hifikitra amin’ireo tahirin-tsakafo ireo isika, tsy misy hafa amin’ny hifikirantsika amin’ny zahatra, raha eo amin’ny ranomasina misamboaravoara isika.

Nanaraka izany ilay lahateny hoe “Manohera ny Devoly — Aza Milefitra Amin’ny Fandrafiana”. Fotoana fohy talohan’ny hidirany tao amin’ny Tany Nampanantenaina, dia Isiraelita an’arivony maro no voafandriky ny fahalotoam-pitondran-tena. Tsy nilefitra tamin’ny fandrafiana ny fanompoam-pivavahana marina i Finehasa. Nanao zavatra tamim-pahatapahan-kevitra nanoherana ireo mpanao ratsy izy, ary nampifaly an’i Jehovah ny fifikirany tsy nizarazara. (Nomery 25:1-13, NW ). Ny hanao ny tsirairay avy amintsika ho tsy mendrika ny hiditra ao amin’ny tontolo vaovaon’Andriamanitra no zava-kendren’i Satana. Noho izany, tahaka an’i Finehasa, dia tsy maintsy manohitra ny ezaka ataon’ny Devoly mba handotoana antsika isika. Na manambady isika na mpitovo, dia tsy maintsy ‘mandositra ny fijangajangana’. — 1 Korintiana 6:18.

Ilay hoe “Fanohanana Amim-panehoana Tsy Fivadihana ny Tsy Fiovan’ny Tenin’Andriamanitra” no lahateny namarana ny andro voalohan’ilay fivoriambe. Mpandika teny maro no manova na manaisotra ampahany amin’ny Soratra Masina. Ohatra, mba hihavanana amin’ireo mpiaro ny zon’ny vehivavy, ireo mpandika tenin’ny The New Testament and Psalms: An Inclusive Version dia miantso an’Andriamanitra, tsy hoe ny Ray, fa hoe ny Ray-sady-Reny, ary miantso an’i Jesosy hoe “ilay Olombelona”, fa tsy hoe ny “Zanakalahy”, mifanitsy amin’ny hoe “Zanak’olona” ao amin’ny Baiboly malagasy. Mifanohitra amin’izany, ny Fandikan-tenin’Izao Tontolo Izao Vaovao dia mifikitra amim-pahatokiana aoka izany amin’ny soratry ny teny tany am-boalohany, hany ka nitondra fanazavana ho an’ny fomba fisainantsika momba ny raharaha maromaro araka ny Soratra Masina izy io. Ohatra, hoy ilay mpandahateny: “Ny fandikana araka ny marina ao amin’ny Fandikan-tenin’Izao Tontolo Izao Vaovao no nanome ny fototra ho an’ny fandaminana indray ireo kongregasiona, tamin’ny fanendrena ireo fitambaran-doholona, mba hanaraka akaiky kokoa ny modely naorina tao amin’ny kongregasiona kristiana tamin’ny taonjato voalohany.” Mampiseho ny tsy fivadihantsika amin’ny Tenin’Andriamanitra isika amin’ny famakiana azy io isan’andro sy amin’ny fampiharana ny toroheviny. Hoy koa ilay mpandahateny: “Asehontsika fa mpiaro tsy mivadika ny Tenin’Andriamanitra isika amin’ny fitoriana azy io amin-jotom-po amin’ny hafa sy amin’ny fampiasana azy io amim-pitandremana rehefa mampianatra ny hafa, ka tsy hitady na oviana na oviana ny hampiditra ny hevitsika amin’ny fanolanana na fanitarana izay lazainy.”

‘Ny Fiadanan’Andriamanitra dia Mihoatra Noho ny Hevitra Rehetra’

Io loha hevitra io, niorina tamin’ny Filipiana 4:7 (NW ) no nampiditra ho amin’ny andro faharoan’ilay fivoriambe. Nivaofy ny amin’ny fomba fijery araka ny mety ny fanompoan’ny tena, ny fianakavian’ny tena, ny fanoloran-tena nataon’ny tena, sy ny lafiny hafa amin’ny fiainana andavanandro, ny ankabetsahan’ny fanazavana natolotra.

Taorian’ny nandinihana ny andinin-teny tamin’ilay andro, dia natolotra ny fitohitohizan-dahateny iray nitondra ny lohateny hoe “Iraka Mitondra Vaovao Tsaran’ny Fiadanana”. Hafatra momba ny fiadanana ny hafatra entintsika, ary izy io dia tokony hampitaina amin’ny fomba maneho hoe tia fihavanana isika. (Efesiana 6:15). Ny zava-kendrentsika dia ny hamabo ny fo, fa tsy ny saina fotsiny. Manampy antsika hanao izany indrindra ny fampiofanana sy ny zavatra vita an-tsoratra raisintsika avy amin’ny fandaminan’i Jehovah. Tsy tokony hamela ny tsy firaikana na ny tsy firaharahana hanakivy antsika isika. Tokony hanohy ‘hanao araka izay fara herintsika’ kosa isika, ka hanana fahazarana mahasoa raha ny amin’ny fianarana manokana, ny fanatrehana fivoriana, sy ny fandraisana anjara amin’ny asa fitoriana. (2 Timoty 2:15, NW ). Tsy tokony hatao tsirambina ny fanaovan-tsoa amin’ny hafa, indrindra fa amin’ny mpianakavintsika ao amin’ny finoana. (Galatiana 6:10). Mazava ho azy fa ny fanaovantsika araka izay fara herintsika dia tsy midika hoe miasa mandra-pahalany hery tanteraka. Izay azon’ny tsirairay atao arakaraka ny fahaizany sy ny toe-javatra misy azy dia azon’i Jehovah ekena.

Manome ny fotoanany sy ny heriny ary ny fananany mba hampandrosoana ny tombontsoan’ilay Fanjakana ny vahoakan’Andriamanitra. Nasehon’ilay lahateny hoe “Fanomezana Amim-pifaliana eo Anivon’ny Fandaminan’i Jehovah”, fa, satria mihamaro ny olona toy ny ondry mandray ny hafatra momba ilay Fanjakana, dia ilaina ny fitaovana sy ny toeram-pivoriana ary ny tranon’ny Sampana fanampiny. Mahatonga ny fandaminana ho afaka hampiasa izay rehetra ilaina mba hanatanterahana ny asa fitoriana maneran-tany ireo fanomezana ataontsika. Manome voninahitra an’i Jehovah sy mitondra fifaliana ho an’ilay mpanome koa ny fanomezana amim-pahalalahan-tanana. Noho izany, amin’ny maha-Kristiana antsika, dia tsy tokony hanao tsirambina io lafiny lehibe amin’ny fanompoam-pivavahantsika io isika. — 2 Korintiana 8:1-7.

Namarana ilay fotoam-pivoriana maraina ny lahatenin’ny batisa — zavatra misongadina foana io amin’ny fivoriana lehiben’ny Vavolombelon’i Jehovah. Fifaliana re izany nahita an’ireo nanolo-tena vao haingana nanaraka ny dian’i Jesosy tamin’ny fanekena hatao batisa tao anaty rano! (Matio 3:13-17). Izay rehetra manao io dingana io dia nampianarina tamin’ilay loharanon’ny fahendrena lehibe indrindra — ny Baiboly. Ambonin’izany, dia nahita ny tena zava-kendrena eo amin’ny fiainana izy ireo, ary mandray fitahiana amin’ny fahazoana ny fiadanana izay avy amin’ny fahalalana fa manao izay mahitsy izy ireo. — Mpitoriteny 12:13.

Nisy torohevitra mivantana tsara nomena tamin’ilay lahateny hoe “Aoka Hiaro Anao ny Fahaiza-manavaka”. Tena zava-dehibe ny fahaiza-manavaka raha ny amin’ny fifampiraharahana ara-barotra. Sady tsy tokony hanao raharaha ara-barotra an’ny tenantsika manokana ao amin’ny Efitrano Fanjakana isika, no tsy tokony hanararaotra ny Kristiana tahaka antsika mba hahazoana tombony ara-bola. (Ampitahao amin’ny Jaona 2:15, 16.) Ilaina koa ny fahaiza-manavaka rehefa mampiasa vola amin’ny raharaha ara-barotra na rehefa misambotra na mampisambotra vola isika. “Ny tsy fahombiazan’ny raharaha ara-barotra eo anivon’ny Kristiana dia nitarika ho amin’ny fahadisoam-panantenana, sy ho amin’ny famoizana ny fahasalamana ara-panahy mihitsy aza, teo amin’ny sasany izay maimay hiditra tao amin’ny tetika hahazoam-bola nahitan-doza”, hoy ny fanamarihan’ilay mpandahateny. Na dia tsy misy mahadiso ny iarahan’ny samy Kristiana manao raharaha ara-barotra aza, dia azo antoka fa fahendrena ny fitandremana. Ary rehefa misy fifanekena ara-barotra ataon’ny andaniny roa, dia tokony hatao an-tsoratra foana ireo fepetra amin’ilay fifanarahana.

Nodinihina tao amin’ilay lahateny hoe “Lahy sy Vavy no Namoronany Azy”, ny fari-pitsipik’Andriamanitra ho an’ny lehilahy sy ny vehivavy. Naolana ny anjara asan’ny lehilahy sy ny vehivavy nandritra ny tantara manontolo. “Maro no mampifangaro ny toetran-dehilahy amin’ny hoe fanapahana amin-kasiahana, amin’ny toetra henjana, na amin’ny fanamparana ny maha-lahy azy”, hoy ilay mpandahateny. “Any amin’ny kolontsaina sasany, dia tsy ho fahita firy, hahamenatra mihitsy aza, izany hoe lehilahy mitomany izany, na ampahibemaso izany na mitokana. Kanefa, ny Jaona 11:35 dia mitantara fa fony izy teo anivon’ny vahoaka, teo ivelan’ny fasan’i Lazarosy, dia ‘nitomany i Jesosy’.” Ahoana ny amin’ny vehivavy? Matetika ny toetram-behivavy no ampitovina lanja amin’ny fanintonana ara-batana. Nanontany toy izao anefa ilay mpandahateny: “Raha tsara tarehy ny vehivavy iray, nefa tsy manana fahendrena ka tia mifamaly, maneso, na mizahozaho, moa ve izy afaka ny ho tena tsara tarehy araka ny tena hevitr’io teny io, izany hoe manana ny tena toetram-behivavy marina?” (Ampitahao amin’ny Ohabolana 11:22; 31:26.) Eo amin’ny teniny sy ny fitondran-tenany ary amin’ny fisehoany ankapobe, ny lehilahy sy ny vehivavy kristiana dia miezaka mafy ny hanaraka ny fari-pitsipiky ny Baiboly. Hoy ilay mpandahateny: “Ny lehilahy izay maneho ny vokatry ny fanahy dia mora hajaina, ary ny vehivavy izay manao izany dia mora tiavina.” — Galatiana 5:22, 23.

Nanaraka izany ilay fitohitohizan-dahateny hoe “Miahy Anao Ilay Andriamanitry ny Fiadanana”. Kristiana maro no manana fanahiana ara-bola. Na dia izany aza, dia mampanantena toy izao i Jehovah: “Izaho tsy handao anao mihitsy na hahafoy anao akory.” (Hebreo 13:5). Na dia eo aza ny fahasahiranana ara-bola, ny sasany dia naneho fatokiana an’io fampanantenana io tamin’ny fidirana tao amin’ny fanompoan’ny mpisava lalana mpanampy na maharitra. Ny hafa izay tsy afaka manao ny asan’ny mpisava lalana ankehitriny dia mametraka ny tombontsoan’ilay Fanjakana eo amin’ny toerana voalohany amin’ny fanararaotana ny fahafahana rehetra mba hanaovana fanambarana. (Matio 6:33). Tokony hoderaina avokoa ny ezaka rehetra toy izany! Nanome zavatra vita an-tsoratra maro be ny fandaminan’i Jehovah mba hanampiana antsika eo amin’ny fanompoantsika sy mba hanampiana antsika hiatrika ny olana mahazo antsika. Raha mampiseho fankasitrahana noho ny fandaharana ara-panahy alamin’i Jehovah isika, dia hitahy antsika amin’ny fanomezana antsika fiadanana izy amin’izao andro misavorovoro ara-toe-karena izao. — Salamo 29:11.

Teo am-pifaranan’ny lahateny farany tamin’ilay andro hoe “Mikatsaha Fihavanana Araka An’Andriamanitra ao Amin’ny Fiainam-pianakaviana”, dia ravoravo ireo mpamonjy fivoriambe nahazo ilay boky vaovao hoe Ny Tsiambaratelon’ny Fahasambaram-pianakaviana. “Ianaro amim-pahazotoana izy itỳ, manokana sy miaraka amin’ny fianakaviana”, hoy ny fampirisihan’ilay mpandahateny. “Miezaha amim-pahatsoram-po hampihatra ny torohevitra miorina amin’ny Baiboly ato, ary dia hahazo antoka ianao fa hitombo ny fiadanana sy ny fahasambaran’ny fianakavianao.”

‘Tano ny Firaisana ao Amin’ny Fehim-pihavanana’

Niorina tamin’ny Efesiana 4:3 io loha hevitra io, izay nifanentana tamin’ny andro faran’ilay fivoriambe. Nampianarin’Andriamanitra ny Vavolombelon’i Jehovah, izay nalaina avy tamin’ny firenena rehetra eo amin’izao tontolo izao. Noho izany, dia tia fihavanana izy ireo. Manaraka ny ohatra navelan’i Jesosy izy ireo, ary miezaka ‘hitana ny firaisana avy amin’ny Fanahy amin’ny fehim-pihavanana’.

Nasongadina tao amin’ilay fitohitohizan-dahateny hoe “Famantarana Ilay Karazana Iraka Tsara”, ilay fiadanana manenika ny fandaminan’Andriamanitra. Nisy mpaminany sandoka teo amin’ny Isiraely fahiny. Kanefa, ny tena irak’Andriamanitra — ireo mpaminany toa an’i Isaia sy i Ezekiela ary i Jeremia — dia nanambara mialoha araka ny marina ny amin’ny fianjeran’i Jerosalema, ny fe-potoan’ny sesitany, sy ny fanafahana ny vahoakan’Andriamanitra taorian’izay. Misy tarehin-javatra mitovy amin’izany amin’izao andro izao. Heniky ny iraka sandoka ny faritra tapahin’ny politika sy ny fivavahan-diso. Kanefa, nanangana ny Vavolombelony i Jehovah mba hanambara ny fikasany raha ny amin’itỳ fandehan-javatra itỳ. Nanomboka tamin’ny 1919 indrindra, dia nampiasaina mba hanambara ny hafatra avy amin’Andriamanitra ny mpanompon’i Jehovah. Hafa toy inona moa izy ireo raha ampitahaina amin’ny iraka sandoky ny Tontolon’ireo Fivavahana Lazaina fa Kristiana! Enga anie isika hanao ny anjarantsika amim-pahazotoana eo amin’io asa io, mandra-pilazan’i Jehovah hoe vita ilay izy.

Nasongadin’ilay lahateny hoe “Mihainoa ary Mankatoava ny Tenin’Andriamanitra”, fa ny Soratra Masina no loharano lehibe indrindra anovozana tari-dalana sy fampiononana ary fanantenana. (Isaia 30:20, 21; Romana 15:4). Mihamilefitra loatra ny tontolo amin’izao andro izao. Noho izany, dia ilaintsika mbola tsy nisy toy izany ny mihaino ny torohevitra avy ao amin’ny Tenin’Andriamanitra sy ny fandaminany. Mahafantatra ny fahalementsika i Jehovah, ary ao amin’ny Teniny izy dia manoritra mazava ny lalana hahasoa antsika. Manome antsika fatokiana mba hiroso ho amin-javatra na inona na inona angatahin’i Jehovah amintsika ny fahalalana fa manohana antsika izy.

Izany dia nampiditra ho amin’ilay fampisehoana tantara nanaraka, izay nanaovan’ny mpilalao fitafiana tamin’ny andron’ilay tantara. Nitondra ny lohateny hoe “Nahoana no Manaja ny Fandaharana Teokratika?”, izy io. Ny fitantaran’ny Baiboly momba an’i Gideona no fototra nampiasaina tamin’io fampisehoana io, izay nanantitrantitra fianarana mahery — tsy maintsy manaraka ny toromarik’Andriamanitra isika, ka tsy hanolo izany amin’ny fomba fisainantsika manokana, na hitady hanilika ny torohevitra teokratika.

Momba ilay foto-kevitra hoe “Tena Fiadanana Rehefa Ela ny Ela! — Inona no Loharanony?”, ny lahateny ampahibemaso. Mihoatra noho izay zavatra na inona na inona azon’itỳ tontolo itỳ alaina sary an-tsaina ny fiadanana ampanantenain’Andriamanitra. “Ny tena fiadanana dia midika hoe fiadanana isan’andro”, hoy ilay mpandahateny. “Ny fiadanan’Andriamanitra dia midika hoe tontolo iray tsy hisy aretina, fanaintainana, alahelo ary fahafatesana.” Milaza amintsika ny Baiboly fa “mampitsahatra ady hatramin’ny faran’ny tany” i Jehovah. (Salamo 46:9). Ahoana no hanaovany izany? Amin’ny fanafoanana ilay mpanetsika ady, dia i Satana Devoly. (Apokalypsy 20:1-3). Hanokatra ny lalana ho amin’ny ‘handovan’ny mpandefitra ny tany ka hiravoravoany amin’ny haben’ny fiadanana’ izany. — Salamo 37:11.

Taorian’ny famintinana ny lahatsoratra fianarana Ny Tilikambo Fiambenana tamin’ilay herinandro, dia natolotra ny lahateny farany tamin’ilay fivoriambe. Nitondra ny lohateny hoe “Fandrosoana Hatrany, Amin’ny Maha-iraka Milaza Fiadanana Araka An’Andriamanitra Antsika”, io lahateny nandrisika io, izay nanamafy fa sady tsy manam-paharoa no ilaina maika ny asa fitoriana ataontsika. Tsy izao no fotoana hakana aina, handaniana andro, na hiverenana amin’ny hevi-diso. Ampy fitaovana amin’izay ilaintsika isika — hafatra avy amin’Andriamanitra, ny fanahiny masina, sy ireo fandaharana maro be avy amin’ny fandaminany teokratika feno fitiavana. Amin’ny maha-mpanompon’i Jehovah antsika, dia enga anie àry isika handroso hatrany amin’ny maha-iraka milaza fiadanana araka an’Andriamanitra antsika!

[Efajoro/Sary, pejy 9]

Fandaharana Feno Fitiavana ho An’ny Fianakaviana

Nientam-po ireo izay nanatrika tamin’ny andro faharoan’ny Fivoriamben’ny Distrika “Iraka Milaza Fiadanana Araka An’Andriamanitra” fa nahazo ilay zavatra vita an-tsoratra vaovao mitondra ny lohateny hoe Ny Tsiambaratelon’ny Fahasambaram-pianakaviana. Mirakitra fanazavana araka ny Soratra Masina izay hahasoa ny fianakaviana rehetra tia an’Andriamanitra io boky io.

Hoy ny fanamarihan’ny loholona iray avy any Connecticut, Etazonia: “Tamin’ny 15 Jona izahay no nahazo ny boky Fahasambaram-pianakaviana. Tamin’ny 16 Jona aho dia nahavaky ny antsasak’izy io. Tamin’ny faha-17 izahay no nanao ny fianaram-pianakavianay voalohany tamin’izy io, ary nahazo fampaherezana aoka izany izahay! Tamin’io andro io ihany koa aho no nahavita ny famakiana ilay boky. Tsy isalasalana fa ho sarobidy amin’izay rehetra mampiasa azy, io zavatra vita an-tsoratra tsara dia tsara io. Manolotra porofo fanampiny ny fahatsorana sy ny fanazavana araka ny toetr’andro ao amin’ilay boky, fa manome ‘sakafo amin’ny fotoana mety ny mpanompo mahatoky sy malina’, ary tena mahafantatra ny zavatra ilaintsika amin’izao fotoana misedra izao.” — Matio 24:45-47, NW.

[Sary, pejy 7]

Samy ta hahafantatra izay takin’Andriamanitra ny tanora sy ny antitra