Mitantara Ireo Mpitory Ilay Fanjakana
Fandosirana ho ao Amin’ny Fandaminana Teokratikan’i Jehovah
TALOHA ela izay, dia voatosika hanambara toy izao i Isaia mpaminany: ‘Tsy maintsy manome voninahitra an’i Jehovah any amin’ireo nosin-dranomasina izy ireo’. (Isaia 24:15, NW ). Mihevitra an’ireo nosin-dranomasina ho anisan’ny “tany onenana” izay nolazain’i Jesosy fa “tsy maintsy hitoriana ny filazantsara” ny Vavolombelon’i Jehovah. — Matio 24:14, NW; Marka 13:10.
Any amin’ny 1 400 kilaometatra eo ho eo, any avaratra-atsinanan’i Tahiti no misy ireo Nosy Marquises. Anisan’ny vondro-nosy mitokana antsoina hoe Polynezia frantsay, ao Pasifika Atsimo, izy ireo. Mandrobona ny zavamaniry ao amin’ireo nosy ireo, noho ny tany mahavokatra sy volkanika, sy noho ny toetr’andro mafana sy mando. Kanefa, mamokatra karazam-boa hafa koa ireo Nosy Marquises. Hevero ny amin’ny fianakaviana iray izay nandray tsara ny hafatra momba ilay Fanjakana tao amin’ny nosy Hiva-Oa.
Tsy nahasambatra an’i Jean sy i Nadine vadiny ny fitambaran’olona lazaina fa mandroso, any Eoropa Andrefana, nisy azy. Koa nanapa-kevitra ny handao an’io fomba fiaina misomebiseby io izy ireo, ka nifindra honina tany amin’ireo Nosy Marquises niaraka tamin’ny zanaka kelin’izy ireo. Voaorina tsara teny amin’ny lohasaha nitokana iray ny trano vaovaon’izy ireo, izay natao tamin’ny bararata. Voatery nandeha an-tongotra nanaraka lalan-kely mikintoantoana tany an-tendrombohitra izy ireo mba hahatongavana tany amin’ireo mpiara-monina taminy akaiky indrindra. Lalana adiny telo avy eo aminy, raha mandeha jipy, no nisy ny tanàna akaiky indrindra nisy dokotera sy sekoly ary fivarotana enta-madinika.
Tsy liana tamin’ny fivavahana i Jean sy i Nadine. Tena nandray anjara tamin’ny resaka momba ny niandohan’ny fiainana anefa izy ireo. Matetika izy ireo no namelabelatra teôria sarotra momba ny evolisiona. Tsy nisy tamin’ireo teôriany ireo anefa nitondra fahafaham-po ho azy.
Rehefa avy niaina nitokana nandritra ny enin-taona izy ireo, dia gaga nahazo ny fitsidihan’ny Vavolombelon’i Jehovah roa. Avy tamin’ireo mponin’ny vohitra nanodidina no nahafantaran’ireo Vavolombelona ny toerana nisy an’i Jean sy i Nadine. Mazava ho azy fa tonga tany amin’ny teôrian’ny evolisiona ny resaka. Nitondra iray tamin’ilay boky hoe La vie: comment est-elle apparue? Évolution ou création?, izay navoakan’ny Vavolombelon’i Jehovah, ireo Vavolombelona, ary akory ny hafalian’izy mivady. Faly i Jean sy i Nadine nanana boky iray izay nanolotra famakafakana feno ny fomba nampisy ny fiainana.
Natomboka ny fampianarana Baiboly, fotoana fohy tatỳ aoriana. Nanao fandrosoana hatrany i Jean sy i Nadine nandritra ny fe-potoana tokony ho telo taona. Nanjary niaiky izy ireo fa tsy ho ela dia ho lasa paradisa ny tany manontolo. Taorian’ny nitomboan’ny ankohonany ho nisy ankizy telo, dia nanjary tena zava-tsarotra ny dia naharitra adiny efatra mba hanatrehana ireo fivoriana kristiana any amin’ny Efitrano Fanjakana. Tsy nanakana azy ireo tsy hanatrika anefa izany. Tamin’ny farany, dia nanamarika ny fanoloran-tenany ho an’i Jehovah tamin’ny alalan’ny batisa tao anaty rano i Jean sy i Nadine. Tamin’ny fivoriambe iray tao amin’ny vohitra lehibe indrindra no nanaovany izany, ary nisy tampon’isan’ny mpanatrika 38!
Mba hanampiana an’ilay antokon’olom-bitsy mpitory ilay Fanjakana, dia nanapa-kevitra ny handao ilay tranony nitokana ilay fianakaviana. Nifindra tao amin’ny vohitra iray nisy mponina tokony ho arivo izy ireo, ary mpanampy amin’ny fanompoana ao amin’ilay kongregasionan’ny Vavolombelon’i Jehovah eo an-toerana izao i Jean. Io fianakaviana io, izay nandositra tany amin’ireo nosy mba hialana tamin’ny fandrosoana, dia mihevitra ho tombontsoa ny nahitany ilay hany toeram-pialofana marina, dia ny fandaminana teokratikan’i Jehovah.