ETO Madagasikara, dia hisy fivoriambe 10 halamina manomboka amin’ny Aogositra ka hatramin’ny Septambra. Azo inoana fa hatao ao amin’ny tanàna iray tsy dia lavitra ny fonenanao ny iray amin’ireo fivoriana telo andro ireo. Any amin’ny ankamaroan’izy ireo, dia hanomboka isan’andro — ny zoma ka hatramin’ny alahady — amin’ny mozika amin’ny 9.30 maraina ny fandaharana.

Hanasongadina tatitra momba ny fandrosoan’ny fitoriana ilay Fanjakana any amin’ny faritra samihafa amin’ny tany ny fandaharana ny zoma maraina. Ary hoantitranterin’ny lahateny fototra hoe “Ny Avotr’i Kristy — Ny Fomba Itondran’Andriamanitra Famonjena”, ny loha hevitry ny fivoriambe.

Ny tolakandro, ny fitohitohizan-dahateny hoe “Ry Ray Aman-dreny — Alenteho ao Amin’ny Zanakareo ny Lalan’Andriamanitra”, dia hanome fanoloran-kevitra momba ny fomba handrisihana ireo tanora mba ho tia sy hanompo an’i Jehovah. Hifarana amin’ny lahateny hoe “Misy Fiainana ve Aorian’ny Fahafatesana?” ny fandaharana ny tolakandro.

Ny fandaharana ny asabotsy maraina dia hanasongadina ny asa fanaovana mpianatra ataon’ny Vavolombelon’i Jehovah, ao anatin’ny fizarana telo misesy hoe “Ampio Hiditra eo Amin’ny Lalan’ny Fiainana ny Olona”, sy ny hoe “Zava-tsarotra ny Fahatratrarana Olona”, ary ny hoe “Ampianaro Izay Rehetra Nandidian’i Kristy Ireo Mpianatra”. Amin’ny fifaranan’ny fandaharana ny maraina, dia hisy fandaharana fanaovana batisa ireo mpianatra vaovao.

Mampirisika antsika hieritreritra sy hivavaka momba ireo antony manosika ny tenantsika manokana hanompo an’Andriamanitra, ny lahateny fanokafana ny asabotsy tolakandro hoe “Manompoa ho Fikendrena ny Hiaina Mandrakizay”. Manolotra fandinihana ahitana fianarana ny andinin-teny rehetra ao amin’ny Efesiana toko faha-4 ny lahateny hoe “Fankasitrahana Ireo ‘Lehilahy Natolotra ho Fanomezana’, Izay Mampianatra ny Lalan’Andriamanitra”, sy ny hoe “Ario ny Toetra Taloha ary Tafio ny Toetra Vaovao”. Manaraka izany, dia hisy fananarana tsara dia tsara araka ny Soratra Masina ao amin’ny lahateny hoe “Mitoera ho Tsy Misy Pentina Avy Amin’izao Tontolo Izao”, sy ao amin’ny fitohitohizan-dahateny mizara telo hoe “Ry Tanora — Manaraha ny Lalan’Andriamanitra”. Hifarana amin’ny lahateny hoe “Ny Mpamorona — Ny Toetrany sy ny Lalany” ny fandaharana ny tolakandro.

Ny fandaharana ny alahady maraina dia hanasongadina fitohitohizan-dahateny iray mizara telo izay hamelabelatra ireo toko mamarana ny bokin’i Ezekiela ao amin’ny Baiboly, ary koa ny fampiharana ny faminaniana ao aminy. Mamarana ny fandaharana ny maraina ny fampisehoana tantara hanaovana fitafiana toy ny fahiny, miorina amin’ny fahatokian’ireo tanora hebreo telo lahy. Ilay zava-miavaka indrindra hisongadina amin’ilay fivoriambe amin’ny tolakandro dia ny lahateny ampahibemaso hoe “Ny Hany Lalana Mankany Amin’ny Fiainana Mandrakizay”.

Azo antoka fa hanankarena ara-panahy ianao amin’ny fahatongavana any mandritra ireo telo andro rehetra. Horaisina amim-pisakaizana ianao amin’ny fotoam-pivoriana rehetra, izay mazava ho azy fa samy tsy handoavanao vola avokoa. Mba hahafantarana ny toerana akaiky indrindra ny fonenanao, dia mifandraisa amin’ny Efitrano Fanjakanan’ny Vavolombelon’i Jehovah eo an-toerana, na manorata any amin’ny mpampanonta itỳ gazety itỳ.