Vonona ny Hiatrika Tarehin-javatra Ara-pitsaboana Iray Izay Hisedra ny Finoanao ve Ianao?
Tahirizo ao amin’ny toerana izay ahafahanao mahita azy haingana rehefa misy ilana azy itỳ fanazavana itỳ
1 Tsy misy olona mieritreritra loatra ny hoe mety ho any amin’ny hopitaly anio na rahampitso. Kanefa, ‘ny fotoana sy ny fisehoan-javatra tsy hita mialoha dia samy mahazo antsika rehetra’. (Mpit. 9:11, NW). Na dia tsy manaiky fitsaboana iray ho ny endriky ny fikarakarana ara-pahasalamana tianao kokoa aza ianao, inona no hataonao mba hiarovana ny tenanao amin’ny fampidirin-dra tsy irina raha toa ny voina iray ka mahatonga anao tsy hahatsiaro tena ka hoentina faingana ho any amin’ny hopitaly iray? Eny, ny voina iray na ny fiharatsian’ny toe-pahasalamana tampoka dia afaka mitondra anao amin’ny fomba tsy ampoizina hiatrika fisedrana ny finoanao.
2 Raha voatery ho any amin’ny hopitaly iray ny tenanao noho ny antony iray, inona no hataonao mba hihazonana ny tsy fivadihana raha misy olona ao miteny aminao fa ho faty ianao raha tsy hampidiran-dra? Hanaiky amim-pahamaikana ve ianao fa mampiseho marina ny toe-pahasalamanao izany filazana izany? Miaiky amin’ny fomba feno ve ianao fa tsy tianao ny hampidiran-dra? Vonona ny hiatrika io fisedrana ny finoanao io ve ianao ka ‘hifady ny ra’? — Asa. 15:28, 29.
3 Ny fanoherana amim-pahombiazana ny fampidiran-dra tsy irina, mandoto amin’ny lafiny ara-panahy, dia manomboka amin’ny fiekena mafy dia mafy iray. Tsy maintsy miorina amin’ny fahatakarana mazava izay lazain’ny Baiboly momba ny ra izany fiekena mafy izany. Raha tsy izany, noho ny fahatairana amin’io fotoana io, dia ho azon’ny olona iray ampitahorina mora foana ianao, olona izay mihambo ho mahafantatra bebe kokoa momba ilay tarehin-javatra noho ianao. Ho voafitaka ve ianao ka hihevitra fa angamba mahafantatra bebe kokoa momba ny ra noho Andriamanitra ireo dokotera? Azo antoka fa amin’ireny toe-javatra ireny dia ho tianao ny “ho tapa-kevitra mafy” ny hanao “izay mahitsy” eo imason’i Jehovah, tsy maninona izay mety holazain’izay olombelona ihany. (Deot. 12:23-25, NW). Kanefa tsy maintsy miatrika izany fisedrana izany irery ve ianao? — Mpit. 4:9-12.
SAMPAN-DRAHARAHAN’NY FILAN-KEVITRA MOMBA NY FITSABOANA SY IREO KOMITY MIFANDRAY AMIN’NY HOPITALY
4 Mba hanomezana fanampiana ho an’ireo izay mila izany rehefa miatrika zava-manahirana momba ny fampidiran-dra, ny Fikambanana dia nanangana ny Sampan-draharahan’ny Filan-kevitra Momba ny Fitsaboana any Brooklyn. Nanorina Komity Mifandray Amin’ny Hopitaly koa izy io any amin’ireo tanàna lehibe indrindra any Etazonia. Ireo komity ireo dia voaforon’ny loholona maherin’ny 600 nampiofanina manokana ho amin’io asa io.
5 Afaka manao fikarohana ao amin’ny gazety ara-pitsaboana maherin’ny 3 600 maneran-tany ny Sampan-draharahan’ny Filan-kevitra Momba ny Fitsaboana mba hahitana fanazavana momba izay azo ampiasaina sy izay mandaitra amin’ireo fandidiana sy fitsaboana tsy ampiasana ra karazany maro. Avy eo izy io dia manome fanazavana momba ireny fandrosoana ara-pitsaboana ireny amin’ireo Komity Mifandray Amin’ny Hopitaly sy ireo foibem-pitsaboana ary ny dokotera sasany. (Indraindray ilay Sampan-draharahan’ny Filan-kevitra Momba ny Fitsaboana dia nandefa lahatsoratra ara-pitsaboana izay mampiseho izay azo atao tsy misy fampiasana ra ka nampihena tamim-pahombiazana ny fifandonana mihamitombo hatrany amin’ny hopitaly.) Izy io dia mampahafantatra amin’ireo komity ny amin’ireo didim-pitsarana nahazoana rariny izay hanampy ireo mpitsara amin’ny fandinihana ny raharahantsika amim-pahatakaran-javatra lalina kokoa. Izy io koa dia mitahiry firaketana an-tsoratra momba ireo dokotera maherin’ny 7 000 vonona ny hiara-miasa, hany ka manana taratasy voalamina araka ny zava-misy farany ireo komity mba hampiasaina rehefa mipoitra ireo zava-manahirana momba ny fampidiran-dra.
6 Manara-maso ny fampiofanana sy ny asan’ireo Komity Mifandray Amin’ny Hopitaly koa ny Sampan-draharahan’ny Filan-kevitra Momba ny Fitsaboana. Any amin’ireo tanàna misy azy, ireo Komity Mifandray Amin’ny Hopitaly dia manao filazalazana fampitam-baovao amin’ireo mpiasan’ny hopitaly mba hanatsarana ny fifandraisana amin’izy ireo. Manao fanadihadiana an’ireny mpiasa ireny koa izy ireo mba hahitana dokotera amboniny izay hitsabo antsika tsy misy fampiasana ra. Vonona hatrany ny hanampy anao ireny rahalahy ireny, kanefa misy ireo dingana lehibe mialoha izay tsy maintsy ataonao mba hametrahana ny fototra ho azy ireo ka hanaovany izany amin’ny fomba mandaitra indrindra.
DINGANA LEHIBE MIALOHA — EFA NANAO IZANY VE IANAO?
7 Voalohany, ataovy azo antoka fa ny mpianakavy rehetra dia samy manana ny firaketana fitakiana ara-pitsaboana azy manokana nofenoina tamin’ny an-tsipiriany — misy daty sy voasonia ary voamarin’ny vavolombelona. Ny rahalahy sasany tonga tany amin’ny hopitaly niaraka tamin’ny firaketana iray tsy nisy daty sy/na tsy voamarin’ny vavolombelona dia nahita fanoherana ny naha-manan-kery azy io. Ary moa ve ireo zanatsika tsy vita batisa rehetra samy manana ny karatra famantarana azy ireo nofenoina? Raha tsia, ahoana no ahafantaran’ny hopitaly ny toerana tananareo momba ny ra sy izay olona hantsoina amin’ny vonjy taitra mahatafiditra ny zanakao?
8 Avy eo dia ataovy azo antoka fa ny rehetra dia manana ireny firaketana ireny miaraka aminy AMIN’NY FOTOANA REHETRA. Hamarino izany amin’ireo zanakao alohan’ny handehanany mankany an-tsekoly isan’andro, eny, na dia alohan’ny handehanany eny amin’ny faritra filalaovana na fakan-drivotra iray aza. Isika rehetra dia tokony hahazo antoka fa miaraka amintsika ireny firaketana ireny any am-piasana, rehefa any am-pialan-tsasatra, na any amin’ny fivoriambe kristiana iray. Aza mandeha tsy miaraka amin’izy ireny na oviana na oviana!
9 Hevero izay mety hitranga aminao raha tonga ao amin’ny efitra fanaovana vonjy taitra ao amin’ny hopitaly iray ianao, tandindomin-doza ny toe-pahasalamanao, tsy mahatsiaro tena sy/na tsy afaka miteny ho anao. Raha tsy manana ilay firaketana miaraka aminao ianao, sady mbola tsy misy havana na loholona tonga ao amin’ny hopitaly mba hisolo vava anao, ary atao ny fanatsoahan-kevitra fa ‘mila fampidiran-dra’ ianao, dia azo inoana fa hahazo fampidiran-dra ianao. Mampalahelo fa nitranga tamin’ny sasany izany. Kanefa rehefa manana ilay firaketana isika, dia misolo vava antsika, milaza ny sitrapontsika, izy io.
10 Izany no antony maha-tsara kokoa ny firaketana ara-pitsaboana noho ny haba (bracelet) na ny rojo iambozonana ara-pitsaboana iray. Itỳ farany dia tsy manazava ny antony miorina amin’ny Baiboly mahatonga ny toerana tanantsika ary tsy misy sonia manamarina izay voalaza. Izao no nolazain’ny didim-pitsarana kanadiana iray momba ny firaketana an’ny anabavy iray: “[Ilay marary] dia nifidy ny hany fomba azo atao mba hampahafantarana amin’ireo dokotera sy ireo mpanolotra fikarakarana ara-pahasalamana hafa, raha toa ka manjary tsy mahatsiaro tena na amin’ny lafiny hafa, tsy afaka mampita ny faniriany, fa tsy manaiky fampidiran-dra izy.” Koa aza misaraka amin’izy io na oviana na oviana!
11 Koa satria natao indrindra ho amin’ny fiatrehana tarehin-javatra ilana vonjy taitra ilay fitakiana ara-pitsaboana ananantsika, dia haneho fahendrena ianao, amin’ny fandidiana azo isafidianana, amin’ny fanaovana an-tsoratra fitakiana mialoha anao manokana, feno kokoa (miorina amin’ilay fitakiana ara-pitsaboana ananantsika). Afaka mampiditra tsipiriany maro ianao amin’izay, toy ny hoe ny karazana fandidiana ary koa ny anaran’ireo dokotera sy ny hopitaly. Zonao ny manao izany ary, araka izany, dia mahazo antoka ny amin’ny fitsaboana araka ny safidinao ianao. Na dia tsy manampo fahasahiranana lehibe aza ianao sy ny dokotera, dia hazavao fa tokony harahina io fitakiana io raha sendra fisehoan-javatra tsy ampoizina. — Ohab. 22:3.
12 Ny dingana lehibe manaraka dia ny firesahana amin’ny mpiasan’ny fahasalamana tena ilaina izay tsy maintsy hifampiraharahanao, na amin’ny fandidiana azo isafidianana na amin’ny fandidiana vonjy taitra. Amin’iza indrindra ianao no tokony hiresaka?
MIRESAHA AMIN’NY MPIASAN’NY FAHASALAMANA
13 ILAY ANTOKO-MPITSABO: Izao no fotoana tokony handresena ny tahotra olona. (Ohab. 29:25). Raha miseho ho tsy matoky tena ianao, dia mety hisy hihevitra fa tsy milaza ny marina ianao. Rehefa ilaina ny fandidiana, na azo isafidianana izany na vonjy taitra, ianao na ny mpianakavinao akaiky indrindra dia tsy maintsy manao amim-pahatapahan-kevitra fanontaniana mivantana tsara momba ny mpitarika ilay antoko-mpandidy. Fanontaniana lehibe iray ny hoe: Hanaja ireo fanirian’ilay marary ve ilay antokon’olona ary amin’ny toe-javatra rehetra dia hitsabo tsy misy ra? Raha tsy misy io antoka io, dia tsy ho voaro tsara ianao.
14 Lazao mazava ary amim-piekena mampiseho fahamendrehana hoe inona avy ireo fanirianao. Ataovy mazava fa fomba fitsaboana mahasolo ra no tianao amin’ny zava-manahirana anao. Miresaha amim-pahatoniana sy amim-patokian-tena ny amin’ilay fitakiana mialoha ara-pitsaboana anao manokana ary koa ny amin’ilay taratasy fanalana andraikitra ny hopitaly amin’ny fahavoazana mety haterak’izany. Raha tsy vonona ny hanaraka ireo fanirianao ilay mpandidy, dia tsy handany fotoana ianao raha mangataka amin’ny mpitantan-draharaha ao amin’ny hopitaly mba hitady dokotera hafa ho anao. Anisan’ny asany izany.
15 MPIKARAKARA NY FANATORANANA (ANESTHÉSISTE): Amin’izay rehetra ao amin’ilay antoko-mpitsabo izay tsy maintsy hiresahanao alohan’ny fandidiana, dia TSY TOKONY HOHADINOINAO NY MIRESAKA AMIN’IO DOKOTERA IO. Raha mbola manao ny asany ilay mpandidy, ilay mpikarakara ny fanatoranana dia miandraikitra ny fihazonana anao ho velona, ka izy no manao fanapahan-kevitra momba ny raharaha toy ny hoe fampiasana ra. Koa tsy voaro amin’ny fomba feno ianao amin’ny firesahana amin’ilay mpandidy fotsiny. Koa amin’izany, dia tsy maintsy miresaka sady mandresy lahatra an’ilay mpikarakara ny fanatoranana ianao raha ny amin’ny toerana tananao, ka mamantatra raha hohajaina izany na tsia. — Ampitahao amin’ny Lioka 18:3-5.
16 Ny fanao mahazatra, ho an’ny mpikarakara ny fanatoranana, dia toa ny fitsidihana ilay marary fotoana fohy, somary tara amin’ny alina mialoha ilay fandidiana — tara loatra raha toa ka manohitra ny toeranao momba ny ra izy. Izingizino ny hifidianan’ilay mpandidy mialoha mpikarakara ny fanatoranana iray vonona ny hiara-miasa izay azonao iresahana mialoha be ilay fandidiana azo isafidianana. Amin’izay, dia hisy ny fotoana hitadiavana iray hafa raha toa ilay voalohany ka tsy vonona ny hanaraka ireo fanirianao. Aza mamela na iza na iza hanandrana ny handresy lahatra anao tsy hampihatra ny zonao ho afa-po amin’ny mpikarakara ny fanatoranana ho an’ny fandidiana anao.
17 Amin’izany rehetra izany, dia tsy maintsy ataonao mazava ny toeranao tsy azo iadian-kevitra: TSY MANDRAY RA. Mangataha fomba fitsaboana mahasolo ra ho anao. Resaho ny amin’izay zavatra rehetra fantatra mahasolo ra ho an’ny tarehin-javatra misy anao. Raha mahatsapa ilay antoko-mpitsabo fa tsy misy ilana azy ireny amin’ny toe-javatra misy anao, dia angataho izy ireo mba hikaroka zavatra azo atao hafa ao amin’ny zavatra vita an-tsoratra ara-pitsaboana. Omeo toky izy ireo fa azonao atao ny mahazo fanazavana ho azy ireo raha tiany, amin’ny fangatahanao amin’ireo loholona mba hifandray amin’ny Komity Mifandray Amin’ny Hopitaly akaiky indrindra.
FAMPIHARANA NY ZONAO
18 Diniho amim-pitandremana ilay taratasy fanalana andraikitra amin’ny fahavoazana sy ilay taratasy milaza ny fanekenao, izay asain’ny hopitaly hosoniavinao eo am-pidirana ao amin’ny hopitaly. Indraindray, aoriana avy hatranin’ny filazana fa hanaja ireo fanirianao izy ireo, dia hilaza ny fehintsoratra manaraka hoe manaiky ilay manao sonia fa afaka manome fitsaboana “mamonjy aina” ilay hopitaly rehefa tojo zava-manahirana izy ireo. Mety hahafaoka ny ra izany. Manana ny zo hanova ireny filazana ireny ianao mba tsy hahatafiditra ny ra amin’izany, na hamono ireny filazana rehetra ireny. Mety hanandrana ny hilaza aminao ireo mpitsabo mpanampy fa tsy azonao atao izany, nefa azonao atao izany! Hazavao fa ny taratasy toy io dia fifanekena atao amin’izy ireo ary tsy afaka manao sonia fifanekena iray izay tsy ekenao ianao. Raha misy manandrana manery anao hanao sonia tsy araka ny sitraponao, dia mangataha ny hiresaka amin’ny mpitantan-draharaha sy/na amin’ny solontenan’ny marary ao amin’io foibem-pitsaboana io.
19 Azonao atao ve izany zavatra izany? Eny, azonao atao. Koa aoka ianao ho mailo amin’ny zonao amin’ny maha-marary anao. Tsy avela eo an-tokonam-baravarana ireny zon’olombelona ireny rehefa miditra ny hopitaly iray ianao. Tsy voatery ny hamoy azy ireny ianao mba hahazoana fitsaboana. Aza avela hisy hilaza aminao ny mifanohitra amin’izany.
20 Ny iray amin’ireny zo ireny dia antsoina hoe ny zon’ny fanekena atao amim-pahalalana tsara, izay midika fa tsy misy fitsaboana na karazany inona na karazany inona azo omena anao tsy misy fanomezan-dalana avy aminao. Azonao atao mihitsy aza ny mandà ny fitsaboana rehetra raha izany no tianao. Ny fanekenao fitsaboana dia tsy maintsy ao aorian’ny fanazavana mazava ny amin’izay kendren’ilay antoko-mpitsabo hatao, anisan’izany ireo loza rehetra mety hitranga. Manaraka izany, dia tsy maintsy milaza aminao momba ireo zavatra rehetra azo isafidianana izay eo am-pelatanana izy ireo. Avy eo, aorian’ny nampahafantarana anao, dia mifidy izay fitsaboana irinao ianao.
21 Mba hahazoana antoka ny amin’izay ekenao, dia TSY MAINTSY manao fanontaniana tsara momba izay zavatra tsy azonao ianao, indrindra rehefa ampiasain’ny mpiasan’ny hopitaly ireo teny be pitsiny na ireo teny fampiasa ara-pitsaboana. Ohatra, raha milaza ny dokotera iray fa ho tiany ny hampiasa “plasma”, dia mety hanatsoaka hevitra amim-pahatsorana ianao fa miresaka ny amin’ny “solon’ny plasma mampody ra” izy, nefa tsy izany no izy. Alohan’ny hanekenao, dia manontania hoe: “Moa ve taharon’ny ra izany?” Momba izay mety ho fomba ampiasainy, dia manontania hoe: “Moa ve io fomba fitsaboana io mahafaoka ny fampiasana zavatra vita tamin’ny ra?” Raha milazalaza fitaovana sasany izay tiany hampiasaina izy, dia manontania hoe: “Moa ve ny rako tahirizina amin’ny fotoana sasany mandritra ny fampiasana io fitaovana io?”
22 Kanefa inona no tokony hataonao raha efa nanao izay rehetra voalaza eo ambony ianao ary mbola tsy misy ny fiaraha-miasa na misy mihitsy aza ny fanoherana sasany ny toerana tananao? Aza misalasala mangataka fanampiana. Niandry ela loatra ny sasany vao nitady sy nahazo fanampiana ka nahatandindomin-doza ny ainy mihitsy.
FANAMPIANA SAROBIDY AMIN’NY FOTOANA ILANA IZANY
23 Mariho ireto dingana manaraka ireto mba hahazoana ny fanampiana ilaina: 1) Raha vao miatrika fandidiana ianao na ny olon-tianao iray, na fandidiana azo isafidianana izany na vonjy taitra, izay isian’ny fifandonana satria ta hampiasa ra ilay hopitaly; na 2) raha miharatsy be ny toe-pahasalamanao na ny an’ny olon-tianao iray; na 3) raha milaza ny dokotera, ny mpitsabo mpanampy iray, na ny mpitantan-draharaha fa handeha haka didy avy amin’ny fitsarana izy ireo amin’ny toe-javatra misy ny ankizy iray (na ny olon-dehibe iray), dia izao:
24 ANTSOY IREO LOHOLONA EO AN-TOERANA raha mbola tsy nanao izany ianao. (Raha ny marina tokoa, noho ny toerana tanantsika momba ny ra, dia lalam-pahendrena ny mampandre ireo loholona isaky ny tsy maintsy mankany amin’ny toeram-pitsaboana iray isika.) Avy eo, raha heverina fa tena ilaina izany, IREO LOHOLONA DIA HIANTSO NY KOMITY MIFANDRAY AMIN’NY HOPITALY AKAIKY INDRINDRA. Raha tianao, ny sasany izay anisan’ny Komity Mifandray Amin’ny Hopitaly dia mety ho tonga ao amin’ny hopitaly amin’io fotoana io mba hanampy anao. — Isaia 32:1, 2.
25 Ireny loholona ao amin’ny Komity Mifandray Amin’ny Hopitaly ireny dia mahafantatra hoe iza avy ireo dokotera vonona hiara-miasa ao amin’ny faritra misy anao ary afaka mampifandray anao amin’izy ireny sady manomboka hanomana dokotera hafa na foibem-pitsaboana hafa mba hanampy. Raha tsy misy eo an-toerana, ireo loholona dia hijery miaraka amin’ny komity hafa akaiky indrindra. Ary raha tsy mahomby izany, dia hiantso ny Sampan-draharahan’ny Filan-kevitra Momba ny Fitsaboana any Brooklyn izy ireo. Mety ho afaka handamina fakana hevitra amin’ny dokotera iray vonona ny hiara-miasa koa izy ireo, dokotera izay afaka manazava amin’ilay antoko-mpitsabo anao amin’io fotoana io hoe inona no azo atao tsy misy fampiasana ra. Nampiofanina mba hikarakara tarehin-javatra toy izany ireo rahalahy ao amin’ny Komity Mifandray Amin’ny Hopitaly.
26 Ireo anisan’ny Komity Mifandray Amin’ny Hopitaly dia vonona koa ny hanampy anao na ny havana iray hiresaka amin’ny dokotera iray na amin’ny mpitantan-draharaha iray, kanefa tsy maintsy mangataka izany fanampiana izany ianao. Mazava ho azy fa tsy afaka manao ny fanapahan-kevitra ho anao ireny rahalahy ireny, kanefa matetika dia afaka manampy anao amin’ny fandinihana ny fomba fijerin’ny Fikambanana ilay raharaha izy ireny ary afaka mampahafantatra anao ny amin’ireo zavatra azonao isafidianana ara-pitsaboana sy araka ny lalàna.
27 Raha mbola tsy vonona hiara-miasa ihany ilay antoko-mpitsabo, dia miresaha amin’ny mpitantan-draharahan’ilay hopitaly momba ny fanoloana azy ireo amin’ny mpiasany hafa izay hanaja ireo fanirianao. Raha misalasala ny hanao izany ilay mpitantan-draharaha ary raha manana mpandidy hafa voaomana any an-toeran-kafa ianao sady azo afindra toerana amin’ny fomba azo antoka, dia amin’izay IHANY ianao vao manana ny safidy hanome filazana an-tsoratra ho an’ilay mpitantan-draharaha, filazana misy daty sy sonia ary ny anaran’ireo dokotera tsy vonona hiara-miasa sady milaza fa tsy mikarakara anao intsony izy ireo.
28 Azonao atao ve izany? Eny, manana izany zo izany ianao. Ary raha tonga eo anatrehan’ny mpitsara iray ilay raharaha any aoriana, ilay filazana an-tsoratra nataonao dia afaka manampy be dia be amin’ny fanekeny ireo fanirianao. Mety ho afaka hanokatra ny lalana amin’ny fomba mety ho an’ny mpandidy hafa koa izany izao mba hisalovana ka hanolotra ny fanampiany ho anao. Ary ny tena zava-dehibe indrindra, dia afaka manome anao ny fikarakarana ara-pitsaboana ilaina izany, alohan’ny hiharatsian’ny toe-pahasalamanao amin’ny fomba mampidi-doza. Aza miandry ela loatra!
29 Na dia tsy afaka miteny an’iza na iza aza izahay mba haka fiantoham-pahasalamana, dia tsy maintsy ampahafantarinay anao fa matetika dia mahita zava-manahirana lehibe izahay amin’ny fahazoana dokotera hitsabo ireo izay tsy manana fiantohana sahaza na tsy manana fiantohana ara-pitsaboana mihitsy, dokotera izay vonona hiara-miasa mazàna raha misy ny fiantoham-pahasalamana.
FANONTANIANA MISY HEVINY MARO TOKONY HOTANDREMANA
30 Tokony ho fantatrao fa misy fanontaniana sasany ataon’ireo dokotera sy ny hafa, izay tsy anontaniana amin’ny antony manosika tsara foana. Ny matetika anontanian’ireo dokotera (sy ny mpitsara sasany) indrindra dia ny hoe:
• “Aleonao ve ho faty (mamela ny zanakao ho faty) toy izay hanaiky ‘fampidiran-dra mamonjy aina’?”
31 Raha milaza ianao hoe eny, dia ho marina izany amin’ny heviny ara-pivavahana. Kanefa tsy azo matetika ny hevitr’izany valin-teny izany ary indraindray dia miteraka didim-pitsarana tsy mahasoa mihitsy aza. Tsy maintsy tadidinao fa tsy eny amin’ny asa fanompoana ianao ao amin’io tarehin-javatra io. Eo am-piresahana momba ny fomba fitsaboana ilaina kosa ianareo. Koa amin’izany, dia tsy maintsy mahay mampifanara-javatra amin’izay mihaino anao ianao, na mpitsabo na mpahay lalàna. — Sal. 39:1; Kol. 4:5, 6.
32 Ho an’ny dokotera iray, na ny mpitsara iray, na ny mpitantan-draharaha iray ao amin’ny hopitaly, ny hoe “eny” dia afaka midika fa tianao ny ho maritiora na tianao ny hanao sorona ny zanakao ho an’ny finoanao. Ny firesahana amin’izy ireo momba ny finoanao mafy ny amin’ny fananganana amin’ny maty ao amin’io tarehin-javatra io dia mazàna tsy hanampy. Izy ireo dia hanasokajy anao ho mpirehidrehitra tafahoatra ara-pivavahana, tsy afaka manao fanapahan-kevitra azon’ny saina ekena rehefa tandindomin-doza ny aina. Raha ny amin’ny ankizy, dia hoheverin’izy ireo ho toy ny ray aman-dreny manao tsirambina ianao, izay tsy manaiky ilay antsoina hoe fomba fitsaboana “mamonjy aina”.
33 Kanefa, TSY mandà fomba fitsaboana toy izany ianao. Tsy mitovy hevitra fotsiny amin’ilay dokotera ianao raha ny amin’ILAY KARAZANA fitsaboana. Izany toerana tanana izany matetika dia hanova ny tarehin-javatra manontolo ho azy ireo sy ho anao. Ankoatra izany, dia mamitaka izy ireo amin’ny fanaovana izay hisehoan’ny fampidiran-dra ho toy ny hoe tsy mampidi-doza sady ho ny HANY fitsaboana “mamonjy aina”. (Jereo ilay bokikely hoe Ahoana no Ahafahan’ny Ra Mamonjy ny Ainao?, pejy faha-7-22.) Koa tsy maintsy ataonao tena mazava izany hevitra izany. Ahoana no azonao anaovana izany? Mety hamaly toy izao ianao:
• “Tsy tiako ny (Tsy tiako ny zanako) ho faty. Raha tiako ny (tiako ny zanako) ho faty, dia ho nijanona tany an-trano aho. Kanefa tonga eto aho mba hahazo fitsaboana, mba ho velona (ny zanako). Ny tiako dia ny fomba fitsaboana mahasolo ra ho ahy (ho an’ny zanako). Misy ireo fomba fitsaboana mahasolo ra ireo.”
34 Fanontaniana hafa maromaro izay ataon’ireo dokotera na mpitsara matetika ny hoe:
• “Inona no hitranga aminao raha aneren’ny didim-pitsarana iray ny fampidiran-dra? Hoheverina ho tompon’andraikitra ve ianao?”
• “Hahatonga anao horoahina amin’ny fivavahanao na tsy hahazo ny fiainana mandrakizay ve ny fanekena na ny fandraisana fampidiran-dra an-tery aminao? Ahoana no hiheveran’ny kongregasionanao anao?”
35 Namaly ny mpitsara iray ny anabavy iray fa amin’izany toe-javatra izany, dia tsy ho tompon’andraikitra ny amin’izay hevitra tapahin’ilay mpitsara izy. Na dia marina avy amin’ny fomba fijery iray aza izany, ilay mpitsara dia nihevitra izany ho midika hoe: Koa satria tsy heverina ho tompon’andraikitra ilay anabavy, dia horaisiny eo amin’ny toerany ilay andraikitra. Nandidy ny hampidiran-dra izy.
36 Tsy maintsy takatrao fa amin’ny fanaovana ireny fanontaniana ireny, ny sasany mazàna dia mitady lalana hialana amin’ny fandavanao tsy handray ra. Aza omena azy ireo amin’ny fomba tsy nahy izany! Koa ahoana no hisorohantsika izany tsy fahazoan-kevitra izany? Afaka mamaly toy izao ianao:
• “Raha terena hampidiran-dra aho na ahoana na ahoana, dia hitovy amin’ny fisavihana ahy izany. Hijaly noho ny vokatr’izany famelezana ahy tsy irina izany aho, ara-pihetseham-po sy ara-panahy, ary izany dia mandritra ny andro sisa hiainako. Hanohitra amin’ny heriko rehetra izany fanaovana tsinontsinona ny vatako tsy nisy ny fanekeko izany aho. Hanao ny ezaka rehetra aho mba hitory an’ireo mamely ahy, tsy misy hafa amin’izay hataoko raha sendra fisavihana.”
37 Tsy maintsy avoaka ilay hevitra manaitra ny saina, mahery, mora alaina sary an-tsaina hoe ny fampidiran-dra an-tery iray amintsika dia fanaovana tsinontsinona maharikoriko ny vatantsika. Tsy raharaha araka ny kisendrasendra izany. Koa mifahara amin’ny toeranao. Ataovy mazava fa tianao ny hahazo fomba fitsaboana mahasolo ra.
INONA NO HATAONAO MBA HAHAVONONA ANAO?
38 Naverintsika nodinihina ireo zavatra sasany izay tsy maintsy ataonao mba hiarovana ny tenanao sy ny fianakavianao amin’ny fampidiran-dra tsy irina. (Any aoriana, dia antenainay ny hanome tsipiriany bebe kokoa momba ny fandaminana ireo zava-manahirana izay mipoitra rehefa andrahonana fampidiran-dra ireo zazakely sy ankizy.) Nojerentsika koa izay ataon’ny Fikambanana amim-pitiavana mba hanomezana fanampiana amin’ny fotoana ilana izany. Inona no tsy maintsy ataonao amin’io fanazavana io mba hahazoana antoka fa vonona ny hiatrika tarehin-javatra ara-pitsaboana izay hisedra ny finoanao ianao?
Voalohany: Manaova dinika ara-pianakaviana mba hanaovana fanazaran-tena amin’ireny zavatra ireny sy mba hamoahana izay holazainao sy hataonao, indrindra rehefa misy vonjy taitra.
Manaraka: Ataovy azo antoka fa manana ireo tahirin-kevitra rehetra ilainao ianao.
Avy eo: Ataovy ho antom-bavaka lehibe amin’i Jehovah ny hanohana anao amin’ny fahatapahan-kevitrao mafy ny ‘hifady ny ra’. Ny fankatoavana ny lalàny momba ny ra dia manome antoka antsika ny amin’ny fankasitrahany mba hahazoana ny fiainana tsy misy fahataperany. — Asa. 15:29; Ohab. 27:11, 12.
[Efajoro, pejy 7]
Raha tena miharatsy ny toe-pahasalamana ka tonga hatramin’ny fandrahonana ny hampidiran-dra, dia jereo itỳ faritra voafefy itỳ ny amin’izay tokony hataonao:
1. Antsoy ireo loholona ao amin’ny kongregasionanao mba hanampy anao.
2. Ataovy izay hiantsoan’ireo loholona ny Komity Mifandray Amin’ny Hopitaly akaiky indrindra raha ilaina izany.
3. Afaka manampy anao ny Komity Mifandray Amin’ny Hopitaly amin’ny firesahana amin’ireo dokotera sy ny hafa.
4. Afaka manampy anao hifandray amin’ny dokotera hafa ny Komity Mifandray Amin’ny Hopitaly mba hiara-midinika amin’ireo mpandidy amin’io fotoana io raha ny amin’ny zavatra azo isafidianana.
5. Afaka manampy koa ny Komity Mifandray Amin’ny Hopitaly mba hamindrana anao any amin’ny toerana maneho fanajana kokoa ny fitsaboana ilaina.