Tohizo Hatrany Ireo Asa Teokratika Mandritra ny Fotoam-pialan-tsasatra
1 Ny fotoam-pialan-tsasatra dia manome fahafahana handray anjara amin’ny asa maro samy hafa. Tian’ny ankamaroantsika ny manararaotra izany fotoana malalaka izany mba hanaovana zavatra hafa noho izay mahazatra antsika sy mba hialana sasatra. Tsy maintsy mitandrina anefa isika mba tsy hamela ny asa teokratika mahazatra antsika hanjary ho tapatapaka. — Fil. 3:16.
2 Isan-taona isika dia miandrandra amim-pahadodonana ny fivoriamben’ny distrika. Efa voafaritra ve ny zavatra kasainao hatao mba hanatrehana izany, amin’ny fandaminana ny fitaterana sy ny filasiana araka izay ilana izany? Efa noeritreretinao ve hoe iza no mety hila fanampiana manokana ao amin’ny kongregasiona misy anao? Ny fihetsika mampiseho hatsaram-panahy tsara dia tsara toy izany dia ho afaka hitondra fitahiana ho anao sy ny hafa.
3 Raha toa ianao manana fotoana azo ampiasaina, toy ny mandritra ny fotoam-pialan-tsasatry ny mpianatra, efa noeritreretinao ho zavatra hotratrarina ve ny handray anjara bebe kokoa amin’ny asa fanompoana? Maro no nahita izany ho fotoana mety tsara mba hirotsahana amin’ny asan’ny mpisava lalana mpanampy. Matetika izany no namoha varavarana ho amin’ny tombontsoam-panompoana lehibe kokoa. Afaka mahita tena fifaliana ireo fianakaviana rehefa miara-mandany andro maro manontolo amin’ny asa fanompoana. Na manao ahoana na manao ahoana toe-javatra, afaka mampitombo ny fotoana laninao amin’ny asa fanompoana ve ianao?
4 Ahoana ny amin’ny fanampiana kongregasiona iray mba hamita ny faritaniny? Mety ho tian’ny mpitory hafa ao amin’ny kongregasiona misy anao ny hiara-miasa aminao any amin’izay toerana ilana mpitory mandritra ny herinandro iray na roa. Raha kely ny antokon’olona misy anareo, dia angamba ho tian’ny mpitory ao amin’ny kongregasiona eo amin’ny manodidina ny hiaraka aminareo. Raha voafetra ny halavitry ny toerana ahafahanao mandeha, ny mpiandraikitra ny fizaran-tany dia mety ho afaka hanoro anao kongregasiona eny akaiky izay hankasitraka ny fanampianao. Ireo kongregasiona any ivelan’Antananarivo indrindra dia hankasitraka fanampiana amin’ny famitana ny faritaniny. Nahoana raha manao fandaminana amin’ny maha-isam-batan’olona na amin’ny maha-kongregasiona mba hanampy ny kongregasiona toy izany hamita ny faritaniny?
5 Mikasa ny hiala sasatra lavitra ny fonenanao ve ianao? Raha izany no izy, manao fandaminana ve ianao mba hanatrehana ireo fivoriana any amin’izay toerana hotsidihinao? Ahoana ny amin’ny fiarahana miasa amin’ny rahalahy any eny amin’ny asa fanompoana? Ny fampidirana izany ao anatin’ny fialan-tsasatrao dia afaka tena hitondra valisoa ho anao sy ny hafa. (Rom. 1:11, 12). Afa-tsy izany koa, afaka manao fanambarana tsy ara-potoana ve ianao eny am-panaovana dia? Ataovy azo antoka fa mitondra miaraka aminao ny Baibolinao sy zavatra vita an-tsoratra ampy azonao ampiasaina ianao. Ampiasao ny sasany amin’ny fotoananao malalaka mba hamitana ny famakiana sy ny fianarana ny Baiboly tsy arakao. Tadidio fa na dia mila miala sasatra amin’ny asa ivelan’ny fivavahana aza isika indraindray, dia tsy irintsika ny hampiato ny fanompoana an’i Jehovah.
6 Tokony ho mailaka ireo loholona mba hihazona ny asan’ny kongregasiona ho voalamina tsara. Raha misy loholona na mpikarakara momba ny asa tsy ho eo, dia tokony hisy fandaminana mba hikarakaran’ny hafa ny andraikiny. Amin’ny fampahalalana mialoha be ny mpiandraikitra prezidà ny daty tsy haha-eo azy ireo, dia hanampy azy hahita izay fanamboarana mety hatao ireny rahalahy ireny.
7 Eny, afaka ny ho tonga fotoana hanaovan-javatra be dia be ny fotoam-pialan-tsasatra. Mety hanapaka mora foana ny fahazarantsika tsara eo amin’ny fanompoana ilay Fanjakana anefa ireo fialam-boly. Hararaoty indrindra ny fahafahana anananao amin’ny fotoam-pialan-tsasatra. Farito hoe inona no zavatra ara-panahy mahasoa homenao ny toerana voalohany, ary araho akaiky izany. — Fil. 1:10.