Fanampiana Amim-pitiavana An’ireo Izay Maneho Fahalianana
1 Rehefa notarihin’ny anjelin’Andriamanitra ho any amin’ny Etiopiana iray izay naneho fahalianana tamim-pahatsoram-po tamin’ny tenin’ny fahamarinan’Andriamanitra i Filipo mpianatra, dia nanolotra tamim-pitiavana ny hanampy azy hahatakatra ny hevitr’izay novakiny. (Asa. 8:26-39). Moa ve isika manao ezaka manokana mba hanampiana ireo izay maneho fahalianana? Tokony hanao izany isika, satria tafiditra ao amin’ny asa nasain’Andriamanitra hataontsika ny fanaovana mpianatra. (Matio 28:19, 20). Inona no azontsika atao mba hanampiana azy ireny?
2 Manokàna fotoana isan-kerinandro hanaovana fiverenana mitsidika. Manaova fandaharana mba hitsidihana ireo izay naneho fahalianana, ary miezaha hanohy ilay resaka araka ny Soratra Masina natomboka tamin’ny fitsidihanao voalohany. Ataovy ao an-tsaina ny tanjona hanomboka fampianarana Baiboly. Miverena hitsidika ilay olona tsy tapaka mba hanolorana ireo nomerao farany amin’ny Ny Tilikambo Fiambenana sy Mifohaza!
3 Raha niresaka momba ny hasarobidin’ny Baiboly ianao tamin’ny fitsidihanao voalohany, dia ho azonao atao ny hanohy ilay fifampiresahana, amin’ny fampiasana fanipazan-kevitra iray avy eo amin’ny pejy faha-85 amin’ny boky “Fanjohian-kevitra”, ary hilaza zavatra toy izao:
◼ “Misy mihevitra fa tsy azo ampiharina eo amin’izao tontolo izao maoderina ny torohevitry ny Baiboly. Ahoana no fihevitrao momba izany? [Avelao ilay olona hamaly.] Tsy hanaiky ve ianao fa ny boky iray manome torohevitra tsara izay afaka manampy antsika hanana fiainam-pianakaviana sambatra, dia azo ampiharina? [Avelao ilay olona hiteny.] Niova ireo fomba fihevitra sy fanao mahakasika ny fiainam-pianakaviana, ary ny vokatr’izany, izay hitantsika amin’izao andro izao, dia tsy tsara. Ireo fianakaviana izay mampihatra izay lazain’ny Baiboly kosa anefa, amin’ny fotony, dia miorina tsara sady sambatra.” Vakio ny Kolosiana 3:18-21. Atolory ilay taratasy mivalona hoe Nahoana Ianao no Afaka Mitoky Amin’ny Baiboly, ary hazavao fa manolotra fandaharana fampianarana Baiboly maimaim-poana isika.
4 Azonao atao ny manomboka resaka momba ny toetran’ny maty amin’izao fomba izao:
◼ “Misy resaka be dia be nataon’ny olona momba ny toetran’ny maty. Inona no eritreretinao fa manjo antsika rehefa maty isika? [Avelao ilay olona hamaly.] Ny ankamaroan’ireo fivavahana dia mampianatra fa manohy miaina amin’ny endrika hafa isika. Maro no gaga rehefa mianatra izay lazain’ny Baiboly momba io raharaha io. [Vakio ny Mpitoriteny 9:5.] Na dia tsy manana fiainana misy fahatsiarovan-tena aza ireo maty, dia tsy hadino izy ireny. Nampanantena ny hamerina azy ireo ho amin’ny fiainana eo ambanin’ny fanapahan’ny Fanjakany, Andriamanitra.” Raiso Ny Tilikambo Fiambenana tamin’ny 15 Oktobra 1994 na ny pejy faha-162 ao amin’ny boky Hiaina Mandrakizay, ary miresaha momba ireo andinin-teny sy sary ao. Manaova fandaharana mba hiverenana hitsidika ilay olona indray, amin’ny fikendrena ny hanomboka fampianarana Baiboly.
5 Raha maniry hanome fanazavana fanampiny ny amin’ny fomba fijery kristiana momba ny ady eo amin’ireo firenena ianao, dia mety ho tianao ny hilaza zavatra toy izao:
◼ “Misy mino fa ny fiadiana no hany fomba handaminana fifandirana. Ahoana no fihevitrao momba izany? [Avelao ilay olona hamaly.] Ny Baiboly dia mampiseho fa Andriamanitra dia tia ny hiarahan’ny olona hiaina amim-pihavanana. [Vakio ny Romana 12:17, 18.] Ho zava-misy haneran-tany izany eo ambanin’ny fanapahan’ny Fanjakan’Andriamanitra.” Tariho ny saina ho amin’ilay bokikely hoe Tena Miahy Antsika ve Andriamanitra?, eo amin’ny pejy faha-25-26. Manolora ny hiverina mba hanazava ny antony nampianaran’i Jesosy antsika hivavaka momba ny ‘hanaovana ny sitrapon’Andriamanitra etỳ an-tany tahaka ny any an-danitra’. — Matio 6:10.
6 Ilay ionoka etiopiana dia niaiky ny tsy fahaizany hahatakatra ny hevitr’izay novakiny raha tsy nisy olona nitarika azy. (Asa. 8:31). Nanome azy tamim-pitiavana ny fanampiana nilainy i Filipo. Afaka mampiseho ny tena fitiavantsika marina ny hafa isika amin’ny fanampiana azy ireo amin’izany fomba izany koa.