Fampielezana ny Fahalalana Izay mitarika ho Amin’ny Fiainana Mandrakizay
1 I Jehovah dia “Izay mampianatra fahalalana ny olona”. (Sal. 94:10). Mampiasa antsika izy mba hampielezana fahalalana famonjena aina momba azy amin’ireo izay tsy mahafantatra ny fomba hanompoana azy amin’ny fomba azo ekena. Ny boky Fahalalana Izay Mitarika ho Amin’ny Fiainana Mandrakizay dia fitaovana fampianarana tsara dia tsara izay ahafahan’ny olona tso-po mahazo fahatakarana araka ny marina an’Andriamanitra avy ao amin’ny Teniny voasoratra, dia ny Baiboly. (1 Tim. 2:3, 4). Ny famelabelarana ny fahamarinana amin’ny fomba mazava sy lojika ao amin’ny boky Fahalalana dia hanampy ny olona hahatakatra izay tadiavin’i Jehovah hampianarina azy. Amin’itỳ volana itỳ isika dia maniry hampiditra olona ao amin’ny resaka izay hahatonga azy haniry hamaky ilay boky. Indreto misy fanoloran-kevitra sasany. Aza manandrana hanao tsy an-jery azy ireo, fa miezaha kosa hilaza ireo hevitra fototra amin’ny fomba fiteninao manokana sy amin’ny fomba firesaka tsotra.
2 Koa satria ny ankamaroan’ny olona efa namoy olon-tiana tamin’ny fahafatesana, dia mety hampiditra ny fanantenana fitsanganan’ny maty ao amin’ilay resaka ianao ka, amin’ny voalohany, dia hiteny zavatra toy izao:
◼ “Ny ankamaroantsika dia efa namoy olon-tiana tamin’ny fahafatesana. Efa nanontany tena ve ianao raha hahita iny olona iny indray? [Avelao ilay olona hamaly.] Ny fahafatesana dia tsy anisan’ny fikasan’Andriamanitra ho an’ny olombelona tamin’ny voalohany. I Jesosy dia nanaporofo fa ireo olon-tiantsika dia azo avotana avy amin’ny fahafatesana. [Vakio ny Jaona 11:11, 25, 44.] Na dia nitranga taonjato maro lasa aza izany, dia mampiseho izay nampanantenain’Andriamanitra fa hataony ho antsika. [Sokafy ny boky Fahalalana ho ao amin’ilay sary ao amin’ny pejy 85 ary vakio ilay fanazavana eo amboniny. Avy eo, dia asehoy ilay sary ao amin’ny pejy 86 ka hazavao.] Raha ho tianao ny hamaky misimisy kokoa momba an’io fanantenana fitsanganana amin’ny maty mampionona io, dia ho faly aho hametraka itỳ boky itỳ aminao.”
3 Aorian’ilay dinika voalohany momba ny fanantenana fitsanganan’ny maty, dia mety hanomboka ny resaka manaraka amin’iny olona iny ihany amin’izao fomba izao ianao:
◼ “Mety ho tsaroanao izay nolazaiko hoe ny fahafatesana dia tsy anisan’ny fikasan’Andriamanitra ho an’ny olombelona tamin’ny voalohany. Raha marina izany, nahoana no mihantitra sy maty isika? Ny sokatra sasany dia velona mihoatra ny 100 taona, ary misy hazo izay niaina efa hatramin’ny an’arivony taona maro. Nahoana ny olombelona no miaina 70 na 80 taona monja? [Avelao ilay olona hamaly.] Maty isika satria tsy nankato an’Andriamanitra ilay mpivady olombelona voalohany.” Vakio ny Romana 5:12. Avadiho ho ao amin’ny pejy 53 ny boky Fahalalana ary vakio ny lohatenin’ilay toko. Diniho ireo fehintsoratra telo voalohany, ka asehoy ny valin’ireo fanontaniana vita pirinty. Mifanaova fotoana hiverenana any aoriana mba handinihana ny sisa amin’ilay toko. Ampirisiho ilay olona hamita ny famakiana azy io mandra-pahatongan’izany.
4 Raha miresaka amin’ny olona iray izay toa mpivavaka ianao, dia ho azonao atao ny hilaza an’izao:
◼ “Misy fivavahana samy hafa an-jatony maro ara-bakiteny amin’izao andro izao. Mampianatra izao karazan-javatra inoana mifanohitra rehetra izao izy ireny. Misy milaza fa tsara avokoa ny fivavahana rehetra ka tsy mampaninona izay inoantsika. Inona no hevitrao? [Avelao ilay olona hamaly.] Nampianatra ny fivavahana marina i Jesosy ary nampiseho fa ny endrika hafa amin’ny fanompoam-pivavahana dia tsy eken’Andriamanitra. [Vakio ny Matio 7:21-23.] Raha irintsika ny hampifaly an’Andriamanitra, dia tsy maintsy manompo azy mifanaraka amin’ny sitrapony isika.” Sokafy ilay boky Fahalalana ao amin’ny toko faha-5, ary vakio ilay lohateny, ary asehoy ny sasany amin’ireo lohatenikely. Hazavao fa io fanazavana io dia hanampy ny olona iray hahafantatra ny fomba hampifaliana an’Andriamanitra. Atolory ilay boky.
5 Ny olona izay very hevitra satria misy fivavahana betsaka aoka izany, dia mety hankasitraka ny valin’izao fanontaniana izao amin’ny fiverenanao mitsidika azy:
◼ “Noho ny fisian’ny fivavahana betsaka aoka izany amin’izao andro izao, ahoana no ahafahantsika mamantatra hoe iza no marina? Ahoana no hamantaranao azy io? [Avelao ilay olona hamaly.] Nolazain’i Jesosy tamintsika ny fomba hamantarana ny mpanara-dia azy marina.” Vakio ny Jaona 13:35. Diniho ny fehintsoratra faha-18 sy 19 ao amin’ny toko faha-5 amin’ny boky Fahalalana. Asehoy fa amin’ny fampiasana ireo toro lalana araka ny Soratra Masina sy ny fanilihana tsikelikely izay tsy izy, dia afaka mamantatra ny fivavahana marina ny olona iray. Lazao fa ny Vavolombelon’i Jehovah maneran-tany dia fantatra noho ny fitiavana marina asehony sy ny fari-pitsipika ara-pitondran-tena ambony arahiny. Hazavao fa ny fianarana ny Baiboly, izay ampiasana ny boky Fahalalana, dia hampahafantatra mazava ny endrika fanompoam-pivavahana ankasitrahan’Andriamanitra.
6 Raha sendra ray na reny ianao, dia mety handaitra izao tari-dresaka izao:
◼ “Isan’andro isika dia mandre tatitra momba ny fitondran-tena feno ditran’ireo tanora izay toa tsy manana fari-pitsipika ara-pitondran-tena na inona na inona. Misy olon-dehibe ta hanome tsiny ny rafitra any an-tsekoly noho izy io tsy mampianatra ny ankizy ny tsara sy ny ratsy. Iza, araka ny hevitrao, no tokony hanome io fampiofanana io? [Avelao ilay olona hamaly.] Henoy izay lazain’ny Baiboly momba io fanontaniana io. [Vakio ny Efesiana 6:4.] Izany dia milaza amintsika fa ny fampidirana tsikelikely ny fari-pitsipika ara-pitondran-tena dia andraikitr’ireo ray aman-dreny.” Sokafy ny boky Fahalalana ao amin’ny pejy faha-145, vakio ny fehintsoratra faha-16, ary hazavao ireo sary ao amin’ny pejy faha-147. Hazavao fa ilay boky dia natao hianaran’ny fianakaviana iray manontolo. Amin’ny fampiasana ny fehintsoratra faha-17 sy 18 ao amin’ny pejy faha-146, dia manolora ny hampiseho ny fomba itarihantsika ny fianarana toy izany miaraka amin’ireo fianakaviana.
7 Raha nanomboka fampianarana niaraka tamin’ny ray na reny be fiahiana iray ianao tamin’ny fitsidihanao voalohany, dia ho azonao atao ny hanohy azy io amin’ny fiverenana mitsidika amin’ny filazana hoe:
◼ “Ny tontolo amin’izao andro izao dia mametraka fakam-panahy maro eo anoloan’ireo tanorantsika. Izany no mahasarotra erỳ ny hatahoran’izy ireo an’Andriamanitra rehefa mihalehibe izy ireo. Angamba tadidinao fa tamin’ny dinika farany nataontsika, dia nifantina fotopoto-pitsipika roa isika. Amin’ny maha-ray aman-dreny araka an’Andriamanitra antsika, dia mila manome ohatra tsara dia tsara ho an’ireo zanatsika isika, ary tokony haneho tsy an-kijanona ny fitiavantsika azy ireo. Misy zavatra hafa lazain’ny Baiboly fa ilain’ny ankizy amin’ireo ray aman-dreniny.” Vakio ny Ohabolana 1:8. Avadiho ho ao amin’ny pejy faha-148 ny boky Fahalalana, ary tohizo ilay fampianarana, ka diniho ny fehintsoratra faha-19-23. Manolora hevitra ny hiverina indray mba hianatra miaraka amin’ny fianakaviana iray manontolo, ka hanomboka ao amin’ny toko voalohany.