Ny Asan’ny Mpisava Lalana — Fampiasana Amim-pahendrena ny Fotoanantsika!
1 ‘Efa tototry ny asa aho! Tena ho fahendrena ho ahy ve ny ho mpisava lalana amin’izao fotoana izao?’ Izany no noeritreretin’ny anabavy iray nihaino ny loholona iray mpisava lalana, nanao lahateny iray tamin’ny fivoriamben’ny fizaran-tany izay nitondra ny lohateny hoe: “Fandrosoana Amim-pahazotoana Amin’ny Fanompoan’ny Mpisava Lalana”. Nieritreritra toy izao ny rahalahy tanora iray izay nanatrika teo koa: ‘Ahoana no ahitan’io rahalahy io fotoana mba ho mpisava lalana? Tsy loholona aho, nefa dia efa feno zavatra atao sahady ny fiainako!’
2 Rehefa nanohy niresaka momba ireo fitahiana azo avy amin’ny fanaovana ny asan’ny mpisava lalana ilay loholona, dia nanadinadina mpisava lalana maromaro avy tao amin’ilay fizaran-tany, izay nilazalaza ireo fanitsiana tsy maintsy nataony mba ho mpisava lalana, sy ny fitahiana tondraka nomen’i Jehovah noho ny ezaka nataony. Kilemaina ny voalohany, nanambady tsy mpino ny faharoa, ary namela asa nahafahany nisondrotra ny fahatelo, nefa dia afaka nivelona tamin’ny vola teo am-pelatanany. Nanomboka nandinika indray ny fomba fiheviny sy ny tarehin-javatra nisy azy ilay rahalahy sy anabavy nanatrika teo, rehefa nahare ny fahombiazan’ireo mpisava lalana ireo noho ny fanampian’i Jehovah. Manasa anao hanao izany koa izahay, indrindra satria, noho ny fihenan’ny ora takina amin’ny mpisava lalana, dia maro kokoa izao ny mpitory ny vaovao tsara ho afaka hanatratra azy.
3 Fantatsika fa Mpamorona sy Tompom-piandrianana eo Amin’izao Rehetra Izao ary nahazoantsika ny fiainantsika i Jehovah. (Dan. 4:14; Asa. 17:28). Mazava amintsika fa tsy mampiasa afa-tsy fandaminana iray monja i Jehovah. Manana tombontsoa miara-miasa amin’izy io amim-pahatokiana isika, ka hanohana ny “mpanompo mahatoky sy malina” amin’ny fitoriana momba ilay Fanjakana, alohan’ny hahatongavan’ny farany. (Matio 24:45, NW; 25:40; 1 Pet. 2:9). Efa lasa lavitra “ny andro farany”, koa takatsika fa mihatapitra ny fotoana hitoriantsika. (2 Tim. 3:1, NW ). Mandra-pahatongan’izany, dia mila manohana ny fianakaviantsika eo amin’ny ara-nofo isika. (1 Tim. 5:8). Toa tsy maharitra hatramin’ny faran’ny volana toy ny tamin’ny lasa ny volan’ny olona iray. Angamba tsy toy ny taloha intsony ny fahasalamantsika. Ary raha ny marina no lazaina, dia maniry ny hanana fotoana kely sy vola ho an’ny tenantsika isika. (Mpit. 3:12, 13). Koa mety hanontany tena àry isika raha tena fahendrena ny manaiky ilay fanasana mba hanao ny asan’ny mpisava lalana.
4 Anjaran’ny tsirairay amintsika ny mandinika amim-pitandremana ny tarehin-javatra misy ny tenantsika, sy ny manapa-kevitra raha afaka ny ho mpisava lalana isika na tsia. (Rom. 14:12; Gal. 6:5). Mampahery ny manamarika ny fitomboan’ny isan’ireo manaiky ilay antso hanao ny asan’ny mpisava lalana. Na dia eo aza ireo fanerena sy zava-manahirana amin’izao andro farany izao, dia asehon’ny tatitra momba ny fanompoana navoaka tao amin’ny Diary 1999 fa vahoakan’i Jehovah efa ho 700 000 maneran-tany no mandroso amim-pahazotoana amin’ny fanompoan’ny mpisava lalana. Na manompo ao anatin’ny toe-javatra sarotra ara-toe-karena ireo rahalahy sy anabavy ireo, na tsy manana fitaterana, na mahita zava-manahirana ara-pahasalamana, na miatrika zava-tsarotra hafa, dia tsy reraka amin’ny fanaovan-tsoa, ary tena mendri-piderana izy ireny. (Gal. 6:9). Nanaiky ny fanasan’i Jehovah mba hizaha toetra azy izy ireo. (Mal. 3:10). Tsapan’izy ireo fa tena fampiasana amim-pahendrena ny fotoanany sy ny fananany voafetra ny fanaovana ny asan’ny mpisava lalana. Tsapany koa fa nitahy azy ireo marina i Jehovah, noho ny nanaovany ireo fanitsiana nilaina mba hidirana sy haharetana ao amin’ny asan’ny mpisava lalana.
5 Mahazo fitahiana ireo mpisava lalana: Manazava toy izao ny anabavy iray manan-janaka vavy tena mbola kely, atsy Cameroun: “Hatramin’ny nahaterahany, dia niaraka tamiko foana teny amin’ny fanompoana ny zanako vavy. Na dia talohan’ny nahaizany nandeha aza, dia nibaby azy tamin’ny lamba tsara fatotra aho. Indray maraina, teny amin’ny fanompoana, dia nijanona teo amin’ny fivarotana kely iray teo amoron-dalana aho. Niala teo amiko ny zanako, ka nitondra gazety maromaro avy tao amin’ny kitapoko. Nibakabaka nanatona ilay fivarotana kely nanaraka izy. Na dia tsy afaka nilaza zavatra betsaka aza izy, dia nisarika ny sain’ny vehivavy iray ary nampiseho gazety iray. Talanjona fotsiny ilay vehivavy nahita zazakely toa azy nandray anjara tamin’io asa io. Nandray avy hatrany ilay gazety izy, no sady nanaiky fampianarana Baiboly!”
6 Ho fanekena ilay antso mba hisian’ny mpisava lalana mpanampy maromaro kokoa, dia nanapa-kevitra ny hanao ny asan’ny mpisava lalana, ny loholona sady loham-pianakaviana iray atsy Zambia izay miasa manontolo andro, na dia teo aza ny fandaharam-potoanany tery dia tery. Naniry hamela ohatra ho an’ny kôngregasiôna sy ho an’ny fianakaviany izy. Tamin’ny fotoana sasany izy dia nanajanona ny fiarany teo an-tsisin-dalana ka nandefa Ny Tsiambaratelon’ny Fahasambaram-pianakaviana tamin’ny cassette, ary nanasa ny mpandalo mba hanatona sy hihaino ilay fanazavana novakina mafy tao. Afaka nametraka boky Fahasambaram-pianakaviana 16, sy boky Fahalalana 13 izy, ary nanomboka fampianarana Baiboly roa, tamin’izany fomba izany.
7 Nisy toe-tsain’ny mpisava lalana tsara koa voamarika tany amin’ireo tany mifanila amin’i Zimbabwe. Nandritra ny Aprily 1998, ny kôngregasiôna iray nanana mpitory 117 dia nanao tatitra mpisava lalana mpanampy 70 sy mpisava lalana maharitra 9. Ny kôngregasiôna iray hafa nanana mpitory 94 dia nanana mpisava lalana mpanampy 58 namerina tatitra. Mbola nisy iray hafa nanana mpitory 126, nanao tatitra fa 58 no nanapa-kevitra ny ho mpisava lalana mpanampy miaraka amin’ireo mpisava lalana maharitra 4. Hita ho niavaka ny taom-panompoana farany teo tany Zimbabwe. Na dia tena sahirana tamin’ny raharahan’ny fianakaviana, sy ny asan’ny kôngregasiôna ary ny fanorenana sampana aza ireo rahalahy any, dia nifantoka tamin’ny fandaniana ny fotoanany tamim-pahendrena teny amin’ny fanompoana izy ireo.
8 Takatr’ireo mpisava lalana fa tsy miankina amin’ny herin’ny tenany ny fanombohana ny asan’ny mpisava lalana sy ny faharetana amin’izany. Izy ireo no voalohany niaiky fa na inona na inona zavatra vitany, izany dia “araka ny hery izay omen’Andriamanitra” azy. (1 Pet. 4:11). Ny finoany no mahatonga azy ho afaka hanohy ny fanompoany isan’andro. Tsy mitady izay mety aminy sy izay mampiadana azy fotsiny ireo mpisava lalana mahita vokatra, fa takany kosa fa mba handrosoana amim-pahazotoana, dia mety hotakina ny hanaovany “ady mafy be dia be”, nefa mandray fitahiana be dia be izy ho vokany. — 1 Tes. 2:2, NW.
9 Tsara hotahafina ny ohatr’i Paoly: Mirakitra an-tsoratra ireo zavatra vitan’ny apostoly Paoly teo amin’ny fanompoana, sy ny fanampiana tsara izay nomeny ny olona maro aoka izany, ny Baiboly. Kanefa, raha nisy ny olona tototra asa, dia i Paoly. Niaritra fanenjehana sy zava-tsarotra ara-batana izy mba hitoriana ny vaovao tsara sy hanatanjahana ny kôngregasiôna. Voatery niaritra tsy fahasalamana lehibe koa izy. (2 Kor. 11:21-29; 12:7-10). Tapa-kevitra ny handany ny fotoanany tamim-pahendrena izy. Niaiky izy fa nanao ny asany rehetra noho ny fanampian’i Jehovah. (Fil. 4:13). Tsy nisy na dia iray aza tamin’ireo izay nampian’i Paoly, nanana antony nilazana fa very maina na hoe ho azo nolanina tamin’ny fomba tsara kokoa ny fotoanany sy ny ezaka nataony teo amin’ny fanompoana an’i Jehovah. Na isika amin’izao andro izao aza dia mbola mandray soa avy amin’ny fampiasan’i Paoly tamim-pahendrena ny fotoanany ihany! Tena ankasitrahantsika mihitsy ny toroheviny ara-tsindrimandry mba hanampiana antsika handinika ireo zavatra omentsika ny toerana voalohany sy hifikitra amin’ny fahamarinana ao anatin’izao fotoan-tsarotra izao!
10 ‘Efa fohy ny andro mba hitoriana ny vaovao tsara’ mbola tsy nisy toy izany. (1 Kor. 7:29; Matio 24:14). Noho izany, dia mety ny hanontaniantsika tena hoe: ‘Raha hifarana tampoka ny fiainako rahampitso, moa ve aho afaka ny hiteny amin’i Jehovah anio fa nampiasa ny fotoanako tamim-pahendrena?’ (Jak. 4:14). Nahoana raha miresaka amin’i Jehovah ao amin’ny vavaka dieny izao, ka manome toky azy ny amin’ny fanirianao hampiasa ny fotoananao amim-pahendrena amin’ny maha Vavolombelony anao? (Sal. 90:12). Mivavaha amin’i Jehovah mba hanampy anao hanatsotra ny fiainanao. Na dia mety ho ianao mihitsy aza no nanapa-kevitra hoe tsy hanao azy io taloha, sao dia mety hahita ianao izao fa azo ampidirina ao amin’ny fiainanao ny asan’ny mpisava lalana?
11 Ampiasao amin’ny fomba tsara indrindra ny tarehin-javatra misy anao: Mora takatra fa noho ny tarehin-javatra dia tsy izay rehetra maniry ny ho mpisava lalana maharitra no afaka manokana 70 ora isam-bolana. Kanefa, mpitory maro izay manao ny asan’ny mpisava lalana mpanampy no tena nanao fandaharana mba hanokanana 50 ora isam-bolana eny amin’ny fanompoana, matetika araka izay azo atao na mitohy. Aza kivy raha tsy ahafahanao manao ny asan’ny mpisava lalana mpanampy na maharitra ny tarehin-javatra misy anao amin’izao fotoana izao. Mivavaha hatrany mba hiovan’ny tarehin-javatra misy anao. Mandra-pahatongan’izany, raha tsy misy fanitsiana azo atao fotsiny, dia mandraisa fampiononana amin’ny fahafantarana fa tena faly amin’izay rehetra vitanao amin’ny fanahinao manontolo eo amin’ny fanompoana azy, i Jehovah. (Matio 13:23). Marihiny fa miandany mafy aminy sy miezaka mafy ianao mba ho mpitory mahatoky izay tsy mamela na dia volana iray aza handalo fotsiny, ka tsy hanararaotra ny fahafahana hanaovana fanambarana. Angamba afaka manao fandrosoana ianao amin’ny fanatsarana ny fahaizanao mitory, ka ho mpitory sy mpampianatra ny vaovao tsara faran’izay mahay. — 1 Tim. 4:16.
12 Noho ny “andron’i Jehovah, izay sady lehibe no mahatsiravina”, efa antomotra dia antomotra, dia ilaintsika ny mampiasa amim-pahendrena ny fotoana sisa tavela, raha tiantsika ny hamita ilay asa nanirahana antsika. (Joela 3:4). Fantatr’i Satana fa kely sisa ny androny, ary miezaka mampiasa mbola tsy nisy toy izany, ny zavatra rehetra eo ambany fahefany izy, mba hampisafotofotoana ny fiainantsika sy hanasarotana ny fifantohantsika amin’ireo zavatra tena lehibe. (Fil. 1:10; Apok. 12:12). Aza hamaivanina na oviana na oviana ny fahalianan’Andriamanitra aminao. Afaka manampy anao i Jehovah mba hanatsotra ny fiainanao sy hanatratra izay farany azonao atao eo amin’ny fanompoana. (Sal. 145:16). Soa ihany fa maro no mahita fa afaka miditra ao amin’ny laharan’ny mpisava lalana mpanampy na maharitra ny tenany, rehefa nandinika indray ny tarehin-javatra nisy azy. Eny tokoa, mahita fahafaham-po lalina ireo mpisava lalana, amin’ny fampiasana amim-pahendrena ny fotoanany. Ho iray amin’izy ireo ve ianao?