Fitahiana Noho ny Fankasitrahana ny Fitiavan’i Jehovah—Fizarana 1
1 Hoy ny apostoly Jaona: “Isika tia, satria [Jehovah] efa tia antsika taloha.” (1 Jaona 4:19) Manjary mampiseho ny fankasitrahantsika an’i Jehovah isika rehefa mieritreritra izay rehetra nomeny antsika. Namela ohatra tamin’izany i Jesosy rehefa nanaiky hitory ny anaran’Andriamanitra sy ny Fanjakany. (Jaona 14:31) Tsara ny hijerentsika fomba sasany ahazoantsika maneho ny fankasitrahana ny fitiavan’i Jehovah.
2 Fitoriana isan-trano: Nampianatra ny mpianany ny fomba itoriana ilay Fanjakana i Jesosy. Nolazainy mazava fa tokony hanambara ny vaovao tsara isan-trano, izy ireo. (Lioka 9:1-6; 10:1-7) Manohy mitory isan-trano isika, na dia misy tsy miraharaha sy manohitra aza, satria tiantsika Andriamanitra sy ny mpiara-belona. Mandray soa koa anefa isika, rehefa mitory isan-trano, satria mihamatanjaka ny finoantsika, ary mihamamiratra ny fanantenantsika.
3 Mahita olona noana sy mangetaheta ny fahamarinana isika satria miasa eo ambanin’ny fitarihan’ny anjely. (Apok. 14:6) Nisy olona nilaza fa tonga tao aminy ny Vavolombelona, raha vao avy nivavaka mba hahazoana fanampiana izy. Nisy anabavy roa sy zaza iray nitory isan-trano, tany amin’ny nosy Caraïbes. Efa handeha hody izy ireo, kanjo lasa nandondòna irery ny trano nanaraka ilay zaza. Vehivavy tanora no namoha varavarana. Hitan’ireo mpitory izany ka nanatona mba hiresaka tamin’ilay vehivavy izy ireo. Nampandrosoiny izy ireo ary nohazavainy fa vao avy nivavaka tamin’Andriamanitra izy mba handefasany Vavolombelona hampianatra azy Baiboly!
4 Fitoriana eny an-dalana: Sarotra ny mahita olona any an-trano any amin’ny faritra sasany, ka tena mety ny mitory aminy eny an-dalana. Hitady izay fomba rehetra iresahana amin’ny olona ny hafatra momba ilay Fanjakana koa anefa isika, noho ny fankasitrahantsika ny fitiavan’i Jehovah.—Ohab. 1:20, 21.
5 Fiverenana mitsidika: Mitady ireo mahatsapa izay ilainy ara-panahy isika, ka miezaka mafy manome izany. (Matio 5:3) Tokony hiverina àry isika mba hanondraka ny voan’ny fahamarinana nafafintsika. (1 Kor. 3:6-8) Nisy anabavy tany Aostralia nanome taratasy mivalona vehivavy iray toa tsy liana loatra. Niverina tany aminy ihany anefa ilay anabavy. Nifankahita ihany izy ireo tamin’ny farany, ary fantatr’ilay anabavy fa nividy Baiboly lafo vidy ilay ramatoa taorian’ilay nihaonan’izy ireo voalohany. Nanomboka niara-nianatra ny Baiboly izy ireo!
6 Fampianarana Baiboly: Io no lafiny tena mety hahafaly sy hahafa-po indrindra amin’ny fanompoantsika. Fitahiana tokoa ny manampy olona hianatra momba an’i Jehovah, ny mahita azy ireny manova ny fiainany mba hampifaliana azy, ary ny manatrika ny batisany ho fanehoany ny fanoloran-tenany ho an’Andriamanitra!—1 Tes. 2:20; 3 Jaona 4.
7 Hojerentsika ao amin’ny Fanompoantsika manaraka fa mbola misy fitahiana hafa, noho ny fankasitrahantsika ny fitiavan’i Jehovah.