Ataovy Loha Laharana ny Fivoriana Tsy Tapaka
1 Loha laharana eo amin’ny fiainan’ny fianakaviana kristianina ny famonjena fivoriana tsy tapaka. Mety hampisy olana anefa ny adidy aman’andraikitra eo amin’ny fiainana. Manomboka maka amin’ny fotoana natokanao ho an’i Jehovah ve ny raharaha ao an-trano, na ny asa, na ny devoara? Hanampy antsika hamantatra izay tokony hatao loha laharana ny fananantsika ny fomba fijerin’i Jehovah.—1 Sam. 24:7; 26:11.
2 Ninia tsy niraharaha ny fomba fijerin’i Jehovah ny lehilahy israelita iray, ka nanangona kitay tamin’ny andro sabata. Nihevitra angamba izy fa nanome izay nilain’ny fianakaviany, na koa zavatra kely fotsiny izany. Nasehon’i Jehovah tamin’ny didim-pitsarany anefa, fa raharaha lehibe ny fanaovana zavatra tsy dia manao ahoana, mandritra ny fotoana natokana ho azy.—Nom. 15:32-36.
3 Fiatrehana ilay zava-tsarotra: Betsaka no miady mafy mba tsy hahatonga ny asany hanakantsakana ny famonjeny fivoriana. Niresaka tamin’ny mpampiasa azy, ohatra, ny sasany, na nifanakalo asa tamin’ny mpiara-miasa, na nitady asa mety kokoa, na koa nanatsotra ny fiainany. Azo antoka fa mampifaly an’i Jehovah ny fanaovana sorona noho ny fivavahana marina toy izany.—Heb. 13:16.
4 Mety hiteraka zava-tsarotra koa ny devoara. “Ataoko alohan’ny fivoriana ny sasany amin’ny devoarako, ary ny sisa vitaiko rehefa avy mivory”, hoy ny tanora iray. Raha misy tsy vita ny devoara rehefa misy fivoriana takariva, dia manazava amin’ny mpampianatra ny ray aman-dreny sasany fa loha laharana amin’ny fianakaviany ny fivoriana.
5 Ho vita tsara ny raharaha ao an-trano, sady ho tonga ara-potoana any am-pivoriana ny mpianakavy, raha miara-miasa sy manao fandaharana tsara. (Ohab. 20:18) Azo ampianarina hiakanjo ny ankizy, ka ho vonona handeha hivory amin’ny fotoana voafaritra tsara. Tafalentika tsara ao an-tsain’ny ankizy ny hasarobidin’ny fivoriana, raha manome ohatra ny ray aman-dreny.—Ohab. 20:7.
6 Mitombo ny fahasahiranana eto amin’ity tontolo ity, ka tena zava-dehibe ny hivoriana tsy tapaka. Enga anie isika hanana foana ny fomba fijerin’i Jehovah, ka hataontsika ho loha laharana foana ny famonjena fivoriana tsy tapaka.—Heb. 10:24, 25.