Fandaharam-potoanan’ny Fianakaviana—Fanompoana eny Amin’ny Saha
1 Mahafaly an’i Jehovah ny mahita tanora midera ny anarany. (Sal. 148:12, 13) Na ny “zaza madinika sy ny zaza minono” aza dia ‘nanome fiderana’ an’Andriamanitra tamin’ny andron’i Jesosy. (Matio 21:15, 16) Izany koa no hita ankehitriny. Ahoana no azonareo ray aman-dreny atao, mba hanampiana ny zanakareo hazoto hidera an’i Jehovah eny amin’ny fanompoana? Eto indray koa, dia zava-dehibe ny ohatra omenareo, araka ny efa nantitranterina tao amin’ilay lahatsoratra etsy ambony. Miray hevitra amin’ity raim-pianakaviana ity ny ankamaroan’ny ray aman-dreny. Hoy izy: “Tsy izay lazainao no ataon’ny ankizy, fa izay ataonao no tahafiny!”
2 Hoy ny anabavy iray nobeazin’ny ray aman-dreny matahotra an’Andriamanitra: “Rehefa nifoha izahay ny asabotsy maraina, dia tsy mba nanontany mihitsy hoe: ‘Handeha hanompo ve isika androany?’ Fantatray fa tsy maintsy handeha izahay.” Azonao atao koa ny manokana fotoana tsy miovaova isan-kerinandro, mba hiarahan’ny fianakaviana manompo eny amin’ny saha. Ho tsapan’ny zanakao amin’izay fa zava-dehibe ny fitoriana. Hianatra izay ataonao koa izy, ary ho hitanao ny fiheverany ny fanompoana, sy ny fahalalam-pombany, ary ny fahaizany mitory.
3 Ampiofano tsikelikely izy: Raha tianao hankafy ny fanompoana ny zanakao dia tokony hampianao izy hiomana tsara mba hahay hitory. Hoy ilay anabavy tetsy aloha: ‘Tsy kofehy nanara-panjaitra fotsiny izahay rehefa niaraka tamin’ny ray aman-dreninay teny amin’ny fanompoana. Fantatray fa mpandray anjara izahay, na dia hoe nandondòna ny varavarana sy nametraka taratasy fanasana fotsiny aza. Niomana tsara izahay rehefa hanao fanompoana tamin’ny faran’ny herinandro ary fantatray izay holazainay.’ Azonao ampiofanina toy izany koa ny zanakao. Manokàna fotoana kely isan-kerinandro aorian’ny fianaram-pianakaviana na amin’ny fotoana hafa, mba hanampiana azy hiomana ho amin’ny fanompoana.
4 Ho afaka handentika bebe kokoa ny fahamarinana ao an-tsain’ny zanakao ianao, raha miara-mitory ny fianakavianao. Nitondra ny zanany vavy ny ray kristianina iray, isaky ny nizara taratasy mivalona tany amin’ireo mponina tany an-dohasaha. Nandeha an-tongotra 20 kilaometatra nandroso sy niverina izy mianaka tamin’izany. Nankasitraka izany io zanany io, ka niteny hoe: “Nampiditra tsikelikely ny fahamarinana tato am-poko i Dada, nandritra ireny fotoana ireny.” (Deot. 6:7) Enga anie ka hamaly soa anao toy izany koa i Jehovah, noho ny fanaovanao ny fanompoana eny amin’ny saha ho anisan’ny fandaharam-potoanan’ny fianakavianao isan-kerinandro.