Lafiny Iray Lehibe Amin’ny Fanompoana Masina ny Fanorenana sy Fikojakojana ary Fanadiovana Efitrano Fanjakana
1 Efitrano Fanjakana 83 no naorina teto Madagasikara, nandritra ireo dimy taona farany, ary iray kosa no naverina namboarina. Ankasitrahantsika tokoa ny asa mafy ataon’ny Biraon’ny Fanorenana sy ireo rahalahy Mpanompo Amin’ny Fanorenana Efitrano Fanjakana ary ireo Mpiasa An-tsitrapo Mpanorina Efitrano Fanjakana. Asa be no mbola miandry antsika, na dia maro aza no efa vita. Ahoana no azontsika rehetra anatontosana io lafiny iray lehibe amin’ny fanompoana masina ataontsika ho an’i Jehovah io?—Apok. 7:15.
2 Aoka ianareo ho vonona: Asainay ianao mba hirotsaka an-tsitrapo amin’ny fanorenana ny Efitrano Fanjakananareo, raha mpitory vita batisa. Hankasitrahan’ny Ekipa Mpanorina Efitrano Fanjakana ny fanampianao. Ampirisihina koa ny mpitory rehetra na vita batisa izy na tsia, sy ny olon-dehibe liana izay tsara laza eo anivon’ny fiangonana, mba ho vonona hanampy. Mba omeo ny anti-panahy ny anaranareo, fa halefany any amin’ny Mpiandraikitra ny Ekipa Mpanorina Efitrano Fanjakana. Aza hadinoina koa ny milaza amin’ny mpiandraikitra ny fanorenana, raha mety ho afaka hiasa iray na roa andro mandritra ny herinandro ianareo, ankoatra ny amin’ny faran’ny herinandro. (Sal. 110:3) Tokony ho mpiasa mazoto ireo rehetra manolo-tena, ary ho tia miara-miasa. (Sal. 133:1) Ho afaka handray anjara lehibe amin’ny fahavitan’ilay tetikasa ianareo, na dia tsy manana traikefa momba ny fanorenana aza. Hahazo fampiofanana koa ianareo, mba hahafahanareo hanampy bebe kokoa eo amin’ny fikojakojana ny Efitrano Fanjakana.
3 Ahoana raha zokiolona ianao na tsy dia salama? Asehonao ny fanohananao ilay fandaharana, raha mampahery an’ireo mandray anjara amin’izany ianao. Afaka manampy ianao raha manao ny anjara eo anivon’ny fiangonana, izay tokony hataon’ireo revo amin’ny fanorenana isaky ny faran’ny herinandro. Azo antoka fa faly i Jehovah rehefa miara-miasa amim-piraisan-tsaina isika ho fampandrosoana ny asan’ilay Fanjakana.—Heb. 13:16.
4 Aoka ianareo hampahery: Mitaky fotoana sy asa mafy ny manorina toeram-pivavahana. Tsy mahagaga àry raha tena be atao ireo mandray anjara amin’ny fanorenana, mandritra io fotoana io. Koa mety tsy ho afaka hanao ny asa sasany fanaon’ny fiangonany sy ny fianakaviany izy ireo, mba hamitana ilay asa fanorenana. Enga anie isika ho mailaka hilaza teny fiderana sy fampaherezana amin’ireo mpiasa an-tsitrapo. Mamoy zavatra maro mantsy izy ireo mba hikarakarana “izany raharaha tsy maintsy hatao izany.” Tokony hoderaina koa ireo Mpanompo Amin’ny Fanorenana Efitrano Fanjakana sy Mpiasa An-tsitrapo tonga manorina ny Efitrano Fanjakananareo. Namoy zavatra maro ireny rahalahy ireny, mba hanampiana amin’ny fanorenana Efitrano Fanjakana eto amintsika.—Asa. 6:3; Rom. 14:19.
5 Aoka ianareo hahay handanjalanja: Ny fitoriana ny Fanjakan’Andriamanitra no asa lehibe indrindra ataontsika mpanompon’i Jehovah. (Marka 13:10) Izany no mahatonga ny Biraon’ny Fanorenana Efitrano Fanjakana ao amin’ny Betela hiezaka hamita ny tetikasa iray, ao anatin’ny enina na valo herinandro. Amin’izay ireo mpiasa an-tsitrapo dia tsy handao ela loatra ny andraikiny eo anivon’ny fiangonana, indrindra fa ny asa fitoriana. Ho tratrantsika io fe-potoana enina na valo herinandro io, raha samy manatontosa ny andraikiny avy ny rehetra eo anivon’ny fiangonana. Tokony hahay handanjalanja koa ireo Mpanompo Amin’ny Fanorenana Efitrano Fanjakana sy Mpiasa An-tsitrapo rehefa miantsoroka ny andraikiny. Ataony azo antoka fa tsy lasa an-tsirambina ny andraikiny eo anivon’ny fiangonana sy ny fitoriana ny vaovao tsara.
6 Ampirisihina mba ho fakan-tahaka eo amin’ny fanorenana Efitrano Fanjakana ny anti-panahy. Mpiandry sy mpitarika ny andian’ondrin’Andriamanitra izy ireo, ka tokony hanova ny fandaharam-potoanany, ary handany fotoana betsaka araka izay azony atao amin’ilay fanorenana. Azon’izy ireo atao koa ny mandamina mba ho ireo anti-panahy na mpanampy amin’ny fanompoana zokiolona no hitarika ny fanompoana eny amin’ny saha, mandritra ny fotoanan’ny fanorenana, fa izy ireo kosa hiasa ao amin’ilay efitrano. Hanaraka ho azy ny fiangonana, raha manome ohatra tsara izy ireo sy ny fianakaviany.
7 Fikojakojana ny Efitrano Fanjakana: Lafiny iray lehibe hafa amin’ny fanompoana masina ny fikojakojana ny Efitrano Fanjakanantsika. Manomboka ny fikojakojana raha vantany vao vita ny fanorenana. Andraikitr’iza izany? Tsy an’ny anti-panahy ihany, fa an’ny fiangonana iray manontolo. Asain’ny fandaminana mijery akaiky ny Efitrano Fanjakana ny anti-panahy isan-taona. Misy roa hafa amin’izany fijerena akaiky izany ataon’ny mpiandraikitra ny faritra, mandritra ny fitsidihany. Avy amin’izy ireny no hahitan’ny anti-panahy (indrindra fa ny Komitin’ny Fikojakojana) izay zavatra simba amin’ilay efitrano, ka hanaovany fandaharana mba hanamboarana azy ireny. Asaina ianareo hanohana ireny fandaharana ireny.
8 Hanao lisitra ny asa tokony hovitaina ny Komitin’ny Fikojakojana. Fe-potoana araka ny antonony no hamitana ny asa, angamba iray na roa volana. Alohan’ny hanombohan’ny asa anefa, dia tsy maintsy vidina ny zavatra sasany, toy ny loko (iray na roa litatra), jiro (ampola na néons), raobine, ary kojakoja fanolo amin’ny fanamafisam-peo. Tsy andraikitry ny fandaminana ny mividy an’ireo sy ny zavatra hafa tsy voatanisa eto, fa andraikitry ny fiangonana. Natao tsotra kokoa izao ireo Efitrano Fanjakana vao naorina, mba hahafahan’ireo rahalahy hikarakara sy hikojakoja azy ireny. Porofointsika ny fankasitrahantsika io lafiny iray lehibe amin’ny fanompoana masina io, rehefa manampy amin’ny asa fanamboarana sy mividy ireo zavatra ilaina isika.
9 Ho simba ireo Efitrano Fanjakanantsika, raha tsy vita ao anatin’ny fe-potoana araka ny antonony ny asa fikojakojana. Nanome voninahitra ny anaran’i Jehovah ilay efitrano tamin’ny vao naorina sy notokanana. Hanala baraka ilay Andriamanitsika Masina kosa izy io izao, raha ataontsika an-tsirambina. Tsy tiantsika mihitsy ny hitrangan’izany! Aoka àry isika hanatontosa amin’ny fontsika manontolo an’io lafiny iray lehibe amin’ny fanompoana masina io.
10 Fanadiovana ny Efitrano Fanjakana: Lafiny iray amin’ny fanompoana izany, ka irintsika rehetra handraisana anjara. Tokony hatao isan-kerinandro izy io, ary halamina ho isaky ny fianarana boky. Azo tendrena hanao fandaharam-panadiovana ny anti-panahy iray, mba hifandimby tsy tapaka hanao izany ny fianarana boky rehetra. Tokony hisy koa ny lisitra momba ireo zavatra tokony hatao isan-kerinandro, isam-bolana, isaky ny telo volana, ary isaky ny enim-bolana. Tokony hataon’ny Komitin’ny Fikojakojana azo antoka fa misy izay ilaina amin’ny fanadiovana, ao amin’ny Efitrano Fanjakana. Tsy tokony hoentina mivoaka ny faritry ny efitrano ireny fitaovana ireny. Ny fanomezana ataon’ny fiangonana no hividianana izay ilaina amin’ny fanadiovana, toy ny amin’ny fikojakojana ihany.
11 Tsy mitovy ny fanadiovana sy ny fikojakojana, ka tsy tokony hafangaron’ireo rahalahy. Maro ny Efitrano Fanjakana hita fa madio, nefa mampalahelo fa natao an-tsirambina ny fikojakojana azy. Samy anisan’ny fanompoana masina ataontsika ireo lafin-javatra roa ireo. Tsy ho lany vola hanaovana fanamboarana lehibe isika, raha mikojakoja ny Efitrano Fanjakanantsika. Vola natokana ho an’Andriamanitra no nanorenana ireo Efitrano Fanjakana, ka irintsika ny haneho fankasitrahana izany.
12 Nolazain’ny apostoly Paoly fa miara-miasa amim-piraisan-tsaina ireo olona eo anivon’ny fiangonana. (Efes. 4:16) Tia an’i Jehovah sy ny fivavahana marina isika ka voatosika hifarimbona, mba hanao izay hitoriana ny vaovao tsara sy hanohanana ny fanorenana sy fikojakojana ary fanadiovana ny Efitrano Fanjakana.