Ahoana no Hanatratraranao ny Tanjonao Ara-panahy?
1. Inona no tanjona ara-panahy ananan’ny tanora kristianina maro?
1 Ry tanora kristianina, azo antoka fa misy heriny eo amin’ny tanjona tianao hotratrarina ny fitiavanao an’i Jehovah, sy ny fanarahanao an’ilay tenin’i Jesosy hoe ‘katsaho aloha ny fanjakana.’ (Matio 6:33) Ny hanitatra ny fanompoanao angamba no tanjonao. Mety te ho mpisava lalana ianao, na hanompo any amin’izay ilana mpitory maro kokoa. Misy koa mieritreritra ny hirotsaka an-tsitrapo hanao asa fanorenana, na hanompo ao amin’ny Betela. Tanjona tsara sy mendrika hotratrarina tokoa ireo!
2. Inona no mety hanampy anao hanatratra ny tanjonao ara-panahy?
2 Hanampy anao hanatratra ny tanjonao ny fanoratana azy ireny. Hoy Ny Tilikambo Fiambenana 15 Jolay 2004: ‘Mihamazava ny hevitra rehefa soratana. Mety ho tianao koa àry ny hanoratra ireo tanjonao, sy izay kasainao hatao mba hanatratrarana azy ireny.’ Tsara koa raha zarainao ho tanjona maromaro ny tanjona lavitra ezaka tianao hotratrarina. Ho hitanao amin’izay ny fandrosoana vitanao, ary hifantoka foana amin’ilay tanjona lavitra ezaka ianao.
3. Milazà tanjona maromaro mety hanampy olona iray hahafeno fepetra ho amin’ny batisa.
3 Tanjona maromaro: Raha mbola tsy vita batisa ianao, dia eritrereto izay ilainao hatao mba hanatratrarana io tanjona io. Mila mahatakatra kokoa ny fampianarana fototra ao amin’ny Baiboly angamba ianao. Raha izany no izy, dia ataovy tanjona ny hianatra tsara hatramin’ny farany ny boky Ampianarina, sy hijery ny andinin-teny rehetra voatonona ao. (1 Tim. 4:15) Ataovy tanjona koa ny hamaky ny Baiboly manontolo, manomboka amin’ny Genesisy ka hatramin’ny Apokalypsy, toy ny takina amin’ny Betelita sy ny mpianatra ao amin’ny sekolin’i Gileada. Tohizo hatrany ny famakiana Baiboly isan’andro, rehefa tratranao io tanjona io. (Sal. 1:2, 3) Tena hanampy anao handroso ara-panahy izany! Manaova vavaka avy amin’ny fo rehefa manomboka sy mamarana ny famakiana Baiboly sy ny fianaranao ianao. Miezaha hatrany koa hampihatra izay ianaranao.—Jak. 1:25.
4. Misy Kristianina maniry ho lasa Betelita na mpisava lalana manokana. Inona no tanjona maromaro mety hanampy azy hanatratra izany?
4 Raha efa vita batisa kosa ianao, dia inona no tanjona hafa azonao tratrarina? Mila manatsara ny fahaizanao mitory ve ianao? Mety ho azonao atao tanjona ve, ohatra, ny hahay hampiasa kokoa ny Baiboly rehefa manompo? (2 Tim. 2:15) Inona no azonao atao mba hanitarana ny fanompoanao? Manàna tanjona maromaro sy voafaritra tsara, hanampy anao hanatratra ny tanjona lavitra ezaka efa nokendrenao. Ataovy mifanentana amin’ny taonanao sy ny toe-javatra misy anao izany.
5. Inona no tanjona maromaro niezahan’ny rahalahy iray notratrarina, mba hahatongavany ho Betelita?
5 Tanora nahatratra ny tanjony: Nitsidika ny biraon’ny sampana i Tony, tamin’izy 19 taona, ka nanjary te hanompo tany. Ratsy anefa ny fomba fiainany, sady mbola tsy nanolo-tena ho an’Andriamanitra izy. Nanapa-kevitra ny hampifanaraka ny fiainany tamin’ny lalan’i Jehovah àry izy, sy hahafeno fepetra ho amin’ny batisa. Rehefa tratrany io tanjona io, dia nataony tanjona indray ny ho tonga mpisava lalana mpanampy sy mpisava lalana maharitra. Nosoratany tao amin’ny kalandrieny ny daty tiany hanombohana izany. Alao sary an-tsaina ny hafaliany, tamin’izy nantsoina hanompo ao amin’ny Betela, rehefa avy nanao mpisava lalana nandritra ny fotoana elaela!
6. Inona no hanampy anao hanatratra ny tanjonao ara-panahy?
6 Ho tratranao koa ny tanjonao ara-panahy, rehefa ataonao loha laharana eo amin’ny fiainana ny fanompoana an’Andriamanitra. Mivavaha amin’i Jehovah, ka ankino aminy hatrany ny “asanao”, ary mazotoa foana manatratra ny tanjonao.—Ohab. 16:3; 21:5.