Afaka Miditra Amin’ny ‘Varavarana Lehibe Misokatra ho Amin’ny Asa’ ve Ianao?
1. Inona ilay “varavarana lehibe” misokatra ho antsika?
1 Nisy “varavarana lehibe” nosokafana ho an’ny apostoly Paoly. “Varavarana misokatra ho amin’ny asa” izy io. Nohararaotiny izany mba hampandrosoana ny asan’ilay Fanjakana, na maro aza ny mpanohitra. (1 Kor. 16:9) Mpitory 642 000 eo ho eo koa izao eran-tany no niditra amin’ilay varavarana lehibe misokatra ho amin’ny asa, ka lasa mpisava lalana maharitra.
2. Nahoana no tsara indraindray ny handinihana ny toe-javatra misy antsika?
2 Miova ny toe-javatra: Mametra ny fanompoana vitantsika angamba ny fiainantsika amin’izao fotoana izao, nefa mety hiova izany. Tsara àry indraindray ny handinihana ny toe-javatra misy antsika, fa tsy hiandry ny tonga lafatra. (Mpit. 11:4) Tanora efa hahavita fianarana eny amin’ny lise ve ianao? Ray na reny manan-janaka efa hiditra hianatra ve ianao? Efa hisotro ronono ve ianao? Mety hanam-potoana kokoa ianao noho ny fiovana toy izany, ka ho afaka hanao mpisava lalana maharitra. Nisy anabavy tsy salama, nefa tapa-kevitra hanao mpisava lalana tamin’izy 89 taona. Nahoana? Nieritreritra izy fa ho afaka hanao an’io asa io, satria tsy niditra hopitaly tao anatin’ny herintaona mahery.
3. Inona avy no fanovana nataon’ny mpitory sasany, mba hanaovana mpisava lalana maharitra?
3 Nikasa hitsidika an’ireo rahalahy tany Korinto i Paoly tamin’ny voalohany. Nanova ny fandaharany anefa izy, noho ny vaovao tsara. Maro koa no tsy maintsy nanao fanovana teo amin’ny fiainany, mba hanaovana mpisava lalana. Nanatsotra ny fiainany ny sasany, ka nianina tamin’ny asa tapa-potoana mba hivelomana. Mankamamy ny fanompoany izy ireo. (1 Tim. 6:6-8) Nanova ny fomba fiainany ny mpivady sasany, ka ilay lehilahy ihany no miasa. Afaka manao mpisava lalana ny vadiny amin’izay.
4. Inona no azontsika atao raha misalasala isika hoe tsy ho vitantsika ny hanatratra ny ora takina?
4 Aza tonga dia mieritreritra hoe tsy ho vitanao ny asan’ny mpisava lalana, satria matahotra ianao sao tsy hahatratra ny ora takina. Adiny roa mahery kely monja isan’andro mantsy no ilaina hataonao. Misalasala ve ianao hoe tsy ho vitanao izany? Manandrama àry manao mpisava lalana mpanampy mandritra ny iray na roa volana, fa ataovy tanjona ihany ny hanatratra 70 ora. Amin’izay dia ho hitanao fa mahafaly ny asan’ny mpisava lalana. (Sal. 34:8) Miresaha koa amin’ireo mpisava lalana. Angamba izy ireny nandresy zava-tsarotra toy ny anao. (Ohab. 15:22) Mivavaha amin’i Jehovah mba hitahiany ny ezaka ataonao hanitarana ny fanompoanao.—1 Jaona 5:14.
5. Inona avy no fitahiana raisin’ny mpisava lalana maharitra?
5 Tsy ho very maina ny ezaka ataonao: Maro ny fitahiana horaisinao raha mpisava lalana maharitra ianao. Ho sambatra kokoa ianao satria manome bebe kokoa. (Asa. 20:35) Hahay hanazava ny Tenin’Andriamanitra amin’ny fomba marina tsara kokoa ianao. (2 Tim. 2:15) Ary ho tsapanao kokoa fa momba anao ny tanan’i Jehovah. (Asa. 11:21; Fil. 4:11-13) Hanampy anao hanana toetra tsara toy ny fiaretana ny asan’ny mpisava lalana, ary hahatonga anao ho akaiky kokoa an’i Jehovah. (Jak. 4:8) Afaka miditra amin’io varavarana lehibe misokatra ho amin’ny asa io àry ve ianao, ka ho lasa mpisava lalana maharitra?