Ezaka Manokana Hanasana Olona ho Amin’ny Fahatsiarovana!
1. Inona no hataon’ny mpitory eran-tany manomboka amin’ny 21 Martsa, ary nahoana?
1 Hivory mba hahatsiaro ny porofom-pitiavana lehibe indrindra nasehon’i Jehovah Andriamanitra ny mpivavaka aminy, ny alakamisy 9 Aprily 2009. (Rom. 5:6-8) Tsy andrintsika ny hahita olona liana an-tapitrisany hiaraka amintsika, rehefa hankalaza ny nahafatesan’i Jesosy isika. Hisy taratasy fanasana manokana hozaraina eran-tany, manomboka amin’ny 21 Martsa.
2. Inona avy no hevitra mila tadidinao rehefa manolotra an’ilay taratasy fanasana?
2 Hevitra mila tadidina: Ampiasao tsara ny sary sy fanontaniana ary ilay andinin-teny eo amin’ilay taratasy fanasana. Afaka mampiseho an’ilay sary eo amin’ny pejy voalohany, ohatra, ianao ary miteny hoe: “Manasa anao izahay hiaraka aminay hankalaza ny nahafatesan’i Jesosy, amin’ny alakamisy 9 Aprily ho avy izao.” Vakio avy eo ny lohatenin’ilay taratasy sy ireo fanontaniana eo ambaniny. Aza hadinoina ny milaza amin’ilay olona fa afaka manasa ny havany sy izay olon-kafa tiany hasaina izy.
3. Inona no azonao atao amin’ireo olona nomenao fanasana?
3 Raha lehibe ny faritaninareo, dia mety hanapa-kevitra ny anti-panahy fa azo asiana fanasana eo am-baravaran’izay tsy tratra an-trano. Sady hanolotra taratasy fanasana isika no hanolotra gazety, rehefa faran’ny herinandro. Asao ny olona tsidihinao na ampianarinao Baiboly, havanao, mpiara-mianatra na mpiara-miasa, mpiray tanàna ary olom-pantatrao. Nanasa ny havany ny anabavy iray, tamin’ny herintaona. Nisy 30 izy ireo no nomeny fanasana ary nampahatsiahiviny matetika fa zava-dehibe ilay izy. Faly erỳ izy fa 25 no tonga, ary nanaiky hianatra Baiboly ny 4 taorian’izay!
4. Inona no tokony hataontsika dieny izao, ary nahoana?
4 Miomàna dieny izao: Mety ho afaka hanompo bebe kokoa ny mpitory maro amin’ny Martsa sy Aprily. Raha misy efa mandroso tsara ny zanakao na ny mpianatrao, dia tena azony hararaotina hanombohana hitory ireo volana ireo. Amboary dieny izao àry ny fandaharam-potoananao. Amin’izay ianao dia ho afaka handray anjara betsaka amin’ilay ezaka manokana hanasana olona hahatsiaro ny porofom-pitiavana lehibe indrindra nasehon’i Jehovah sy Jesosy.—Jaona 3:16; 15:13.