Aoka ny Rehetra Hankalaza An’i Jehovah!

“Mankalazà an’i Jehovah any amin’ny tany atsinanana”. — ISAIA 24:15.

1. Ahoana no niheveran’ireo mpaminaniny ny anaran’i Jehovah, ka mifanohitra amin’ny fihetsika manao ahoana hita eo amin’ny Tontolon’ireo Fivavahana Lazaina fa Kristiana amin’izao andro izao?

JEHOVAH — ilay anarana malazan’Andriamanitra! Faly toy inona moa ireo mpaminany nahatoky fahiny niteny tamin’izany anarana izany! Tamim-piravoravoana no nankalazany an’i Jehovah, ilay Tompony Manam-piandrianana, izay manana anarana mampahafantatra azy ho ilay Mpikasa Lehibe. (Isaia 40:5; Jeremia 10:6, 10; Ezekiela 36:23, NW ). Na dia ireo antsoina hoe mpaminany madinika aza dia nilaza zavatra be dia be raha ny amin’ny fanomezam-boninahitra an’i Jehovah. Iray tamin’ireny i Hagay. Ao amin’ny bokin’i Hagay izay voaforona andininy 38 monja, dia ampiasaina in-35 ny anaran’Andriamanitra. Toy ny tsy misy aina ny faminaniana toy izany rehefa nosoloana tamin’ny anaram-boninahitra hoe “Tompo” ilay anarana sarobidy hoe Jehovah, araka ny andikan’ny apostoly fatratra loatra ao amin’ny Tontolon’ireo Fivavahana Lazaina fa Kristiana azy io, ao amin’ny fandikan-tenin’ny Baiboly nataony. — Ampitahao amin’ny 2 Korintiana 11:5, fanamarihana ambany pejy.

2, 3. a) Ahoana no nahatanterahan’ny faminaniana niavaka iray momba ny famerenana tany amin’ny taniny ny Isiraely? b) Inona no fifaliana niombonan’ny sisa jiosy sy ireo namany?

² Ao amin’ny Isaia 12:2 (NW ), dia ampiasaina ny endriny roa amin’ilay anarana.a Manambara toy izao ilay mpaminany: “Indro, Andriamanitra no famonjena ahy; dia hatoky aho, fa tsy mba hatahotra; fa [i Jah Jehovah, NW ] no heriko sy fiderako, fa efa famonjena ahy Izy.” (Jereo koa ny Isaia 26:4, NW.) Araka izany, 200 taona teo ho eo talohan’ny nanafahana ny Isiraely tamin’ny fahababoana tany Babylona, i Jah Jehovah, tamin’ny alalan’i Isaia mpaminaniny, dia nanome toky fa izy no ilay Mpamonjy mahery azy ireo. Tokony haharitra nanomboka tamin’ny 607 ka hatramin’ny 537 al.f.i. izany fahababoana izany. Nanoratra toy izao koa i Isaia: “Izaho no Jehovah Izay manao ny zavatra rehetra, (...) ary milaza amin’i Kyrosy hoe: Izy no mpiandry ondriko, ka izay sitrako rehetra dia hotanterahiny; ary izy hanao amin’i Jerosalema hoe: Hatsangana hianao, ary amin’ny tempoly hoe: Haorina indray ny fanorenanao.” Iza moa io Kyrosy io? Voaporofo tamin’ny fomba niavaka, fa i Kyrosy, Mpanjakan’i Persia, izay nandresy an’i Babylona tamin’ny 539 al.f.i., ilay izy. — Isaia 44:24, 28.

³ Ho fahatanterahan’ireo tenin’i Jehovah noraketin’i Isaia an-tsoratra, dia namoaka izao didy izao ho an’ny Isiraely babo, i Kyrosy: “Koa iza avy moa aminareo rehetra no olony? Andriamaniny anie homba azy, fa aoka hiakatra any Jerosalema izay any Joda izy ka hanao ny tranon’i Jehovah, Andriamanitry ny Isiraely, — Izy no Andriamanitra Izay any Jerosalema.” Nisy sisa tamin’ny Jiosy faran’izay sambatra, niaraka tamin’ny Netinima tsy isiraelita sy ny taranaky ny mpanompon’i Solomona niverina tany Jerosalema. Tonga ara-potoana izy ireo mba hankalaza ny Andro Firavoravoana Fitoerana Amin’ny Trano Rantsankazo, tamin’ny 537 al.f.i., sady hanao fanatitra ho an’i Jehovah teo amin’ny alitarany. Ny taona nanaraka, tamin’ny volana faharoa, dia naorin’izy ireo ny fototr’ilay tempoly faharoa, tao anatin’ny hoby mafy naneho fifaliana sy fiderana an’i Jehovah. — Ezra 1:1-4; 2:1, 2, 43, 55; 3:1-6, 8, 10-13.

4. Ahoana no nahatonga ny Isaia toko faha-35 sy faha-55 ho zavatra tena izy?

⁴ Ho tanteraka tamim-boninahitra teo amin’ny Isiraely ny faminanian’i Jehovah ny amin’ny famerenana amin’ny laoniny, manao hoe: “Ravoravo ny efitra sy ny tany karankaina, ary ny tani-hay mifaly sy mamony tahaka ny lilia. (...) Dia hahita ny voninahitr’i Jehovah izy sy ny famirapiratan’Andriamanitsika.” “Amin’ny fifaliana no hivoahanareo, ary amin’ny fiadanana no hitondrana anareo; ny tendrombohitra sy ny havoana hahavelona hoby eo alohanareo (...). Ary ho anarana ho an’i Jehovah izany, dia ho famantarana mandrakizay izay tsy hesorina.” — Isaia 35:1, 2; 55:12, 13.

5. Nahoana no tsy naharitra ny fifalian’ny Isiraely?

⁵ Kanefa, tsy naharitra izany fifaliana izany. Nitady izay hanaovana fanekena ho fampiraisam-pinoana ho amin’ny fanorenana ilay tempoly, ireo mponina teny amin’ny manodidina. Tsy nanaiky ny Jiosy tamin’ny voalohany, ka nanambara toy izao: “Tsy misy raharaha hikambananareo aminay amin’ny hanaovana trano ho an’Andriamanitray; fa izahay ihany no hanao trano ho an’i Jehovah, Andriamanitry ny Isiraely, araka izay efa nandidian’itompokolahy Kyrosy, mpanjakan’i Persia, anay.” Nanjary mpanohitra feno fankahalana tamin’izay ireny mponina teny amin’ny manodidina ireny. “Nanao izay hampiraviravy tànana ny Jiosy sy nandevilevy azy mba tsy hanao ny trano” izy ireo. Nasehony tamin’ny fomba diso tamin’i Artaksersesy, mpandimby an’i Kyrosy, koa ilay tarehin-javatra, ka namoaka didy ho fandrarana ny fanorenana ny tempoly izy io. (Ezra 4:1-24). Nitsahatra nandritra ny 17 taona ny asa. Nampalahelo fa latsaka tao amin’ny fomba fiaina tia fatratra zavatra ara-nofo ny Jiosy, nandritra izany fotoana izany.

Miteny “i Jehovah, Tompon’ny maro”

6. a) Nanao ahoana ny fihetsik’i Jehovah nanoloana ilay tarehin-javatra teo amin’ny Isiraely? b) Inona no toa dikan’ny anaran’i Hagay?

⁶ Na dia izany aza, i Jehovah dia nampiseho ‘ny heriny’ ho tombontsoan’ny Isiraely, tamin’ny fanirahana mpaminany, indrindra fa i Hagay sy i Zakaria, mba hanaitra ny Jiosy ka hahatsapany ny andraikiny. Misy ifandraisany amin’ny andro firavoravoana ny anaran’i Hagay, satria izy io dia toa midika hoe “Teraka Tamin’ny Andro Firavoravoana”. Nanomboka naminany izy tamin’ny andro voalohany tamin’ny volana fahenina, fotoana fohy talohan’ny Andro Firavoravoana Fitoerana Amin’ny Trano Rantsankazo, fotoana izay nitakiana ny ‘hifalian’ny Jiosy tokoa’. (Deoteronomia 16:15). Tamin’ny alalan’i Hagay, dia nanome hafatra efatra tao anatin’ny fe-potoana naharitra 112 andro, i Jehovah. — Hagay 1:1; 2:1, 10, 20.

7. Amin’ny ahoana no tokony hampahery antsika ireo teny fanokafana ny Hagay?

⁷ Ho fampidirana ny faminaniany, dia niteny toy izao i Hagay: “Izao no lazain’i Jehovah, Tompon’ny maro”. (Hagay 1:2a). Nety ho iza moa ireny “maro” ireny? Ireo anjelin’i Jehovah maro be izy ireny, izay resahina ho hery ara-tafika indraindray ao amin’ny Baiboly. (Joba 1:6; 2:1; Salamo 103:20, 21; Matio 26:53). Moa ve tsy mampahery antsika amin’izao andro izao ny hoe mampiasa ireny hery any an-danitra tsy mety resy ireny ny tenan’i Jehovah Tompo Manam-piandrianana, mba hitarihana ny asantsika famerenana amin’ny laoniny ny fanompoam-pivavahana marina eto an-tany? — Ampitahao amin’ny 2 Mpanjaka 6:15-17.

8. Toe-tsaina inona no nisy heriny teo amin’ny Isiraely, ary inona no vokany?

⁸ Inona no foto-kevitry ny hafatr’i Hagay voalohany? Nilaza toy izao ilay firenena: “Tsy mbola tonga ny andro tokony hihaviana hanaovana ny tranon’i Jehovah.” Tsy ny fanorenana ny tempoly, izay nampiseho ny famerenana tamin’ny laoniny ny fanompoam-pivavahana tamin’Andriamanitra, intsony no nahin’izy ireo voalohany. Nitodika tany amin’ny fanorenana trano toy ny lapa ho an’ny tenany, izy ireo. Nampihena ny hafanam-pony tamin’ny fanompoam-pivavahana tamin’i Jehovah ny toe-tsaina tia fatratra zavatra ara-nofo. Vokatr’izany, dia nesorin’i Jehovah ny fitahiany. Tsy nahavokatra intsony ny sahan’izy ireo, ary tsy ampy ny fitafiany tamin’ny ririnina namirifiry. Nanjary kely ny fidiram-bolany, ary toy ny hoe nametraka ny volany tao amin’ny kitapo feno loaka izy. — Hagay 1:2b-6.

9. Fananarana mahery sady manorina inona no nomen’i Jehovah?

⁹ Indroa i Jehovah no nanome izao fananarana mahery izao: “Hevero ny làlanareo.” Niharihary fa naneho fihetsika tsara i Zerobabela, governora tao Jerosalema, sy i Josoab, mpisoronabe, ka nampirisika tamin-kerim-po ny vahoaka rehetra mba ‘hihaino ny feon’i Jehovah Andriamaniny sy ny tenin’i Hagay mpaminany, araka ny efa nanirahan’i Jehovah Andriamaniny azy, ary natahotra teo anatrehan’i Jehovah ny olona’. Ambonin’izany, dia “nambaran’i Hagay, irak’i Jehovah, ny teny nampitondrain’i Jehovah ho amin’ny olona nanao hoe: Izaho no momba anareo, hoy Jehovah”. — Hagay 1:5, 7-14.

10. Ahoana no nampiasan’i Jehovah ny heriny ho tombontsoan’ny Isiraely?

¹⁰ Nety ho nihevitra ny zokiolona sasany tao Jerosalema fa “tsinontsinona” ny voninahitr’ilay tempoly naorina indray, raha nampitahaina tamin’ny an’ilay tempoly teo aloha. Kanefa, tokony ho 51 andro tatỳ aoriana, i Jehovah dia nandrisika an’i Hagay mba hilaza hafatra faharoa. Hoy ny nambaran’i Hagay: ‘Mahereza, ry Zerobabela, hoy i Jehovah; ary mahereza, ry Josoa, zanak’i Jozadaka, mpisoronabe; ary mahereza, ianareo vahoaka rehetra, hoy i Jehovah, ka miasà; fa Izaho no momba anareo, hoy i Jehovah, Tompon’ny maro, koa aza matahotra ianareo.’ I Jehovah, izay nampiasa ny heriny tsy toha tamin’ny fotoana nanampoizana izany mba ‘hanozongozona ny lanitra sy ny tany’, dia nanao izay hahazoana antoka fa resy ny fanoherana rehetra, na dia ny fandraran’ny emperora aza. Tao anatin’ny dimy taona dia vita tamim-pahombiazana lehibe ny fanorenana ny tempoly. — Hagay 2:3-6, NW.

11. Ahoana no namenoan’Andriamanitra ‘voninahitra lehibe kokoa’ an’ilay tempoly faharoa?

¹¹ Tanteraka tamin’izay ny fampanantenana miavaka iray manao hoe: “[Tsy maintsy hiditra ireo zavatra faniry eo amin’ny firenena rehetra, NW ]; ary hofenoiko voninahitra ity trano ity, hoy Jehovah, Tompon’ny maro.” (Hagay 2:7). Ireny “zavatra faniry” ireny dia voaporofo fa ireo tsy isiraelita izay tonga mba hanolotra fanompoam-pivavahana tao amin’izany tempoly izany, satria nanome taratry ny voninahitry ny fanatrehan’i Jehovah heni-kaja, izy io. Nanao ahoana io tempoly naorina indray io, raha nampitahaina tamin’ilay naorina tamin’ny andron’i Solomona? Nanambara toy izao ilay mpaminanin’Andriamanitra: “Ny voninahitr’ity trano ity any am-parany dia ho lehibe noho ny tany aloha, hoy Jehovah, Tompon’ny maro”. (Hagay 2:9). Tamin’ny fahatanterahana voalohan’ilay faminaniana, ilay tempoly naorina indray dia naharitra ela kokoa noho ilay trano voalohany. Mbola nijoro ihany izy io rehefa niseho ny Mesia tamin’ny 29 am.f.i. Ankoatra izany, talohan’ny nampamonoan’ireo fahavalony mpivadi-pinoana azy, tamin’ny 33 am.f.i., dia ny tenan’ny Mesia mihitsy no nitondra voninahitra ho azy io, rehefa nitory ny fahamarinana tao izy.

12. Niasa ho an’ny zava-kendrena inona ireo tempoly roa voalohany?

¹² Ny tempoly voalohany sy faharoa tao Jerosalema dia niasa ho an’ny zava-kendrena tena lehibe, tamin’ny fampisehoana tandindon’ireo lafiny lehibe amin’ny fanompoan’ny mpisorona hataon’ny Mesia, ary tamin’ny fihazonana ho velona hatrany teto an-tany ny fanompoam-pivavahana madio tamin’i Jehovah, mandra-pahatongan’ny tena fisehoan’ny Mesia. — Hebreo 10:1.

Ilay tempoly ara-panahy be voninahitra

13. a) Fisehoan-javatra inona avy mahakasika ny tempoly ara-panahy no nitranga nanomboka tamin’ny 29 ka hatramin’ny 33 am.f.i.? b) Inona no anjara asa tena lehibe notanan’ny sorom-panavotan’i Jesosy tamin’ireny fisehoan-javatra ireny?

¹³ Manana heviny manokana ho an’ny andro atỳ aoriana ve ilay faminanian’i Hagay ny amin’ny famerenana amin’ny laoniny? Azo antoka fa izany! Ilay tempoly naorina indray tao Jerosalema dia nanjary ny foiben’ilay hany fanompoam-pivavahana marina teto an-tany. Izy io anefa dia tandindon’ny tempoly ara-panahy iray be voninahitra lavitra. Nanomboka niasa io tempoly ara-panahy io tamin’ny 29 am.f.i., rehefa nanosotra an’i Jesosy ho Mpisoronabe i Jehovah, ka nidina teo ambonin’i Jesosy tahaka ny voromahailala ny fanahy masina, tamin’ny batisany tao amin’ny Onin’i Jordana. (Matio 3:16). Taorian’ny nahavitan’i Jesosy ny fanompoany teto an-tany tamin’ny fahafatesana ho sorona, dia natsangana ho any an-danitra izy, dia ny lanitra izay nasehon’ny Masina Indrindra tao amin’ny tempoly, ary tany dia natolony an’i Jehovah ny vidin’ny sorony. Izany dia toy ny avotra, izay nanarona ny fahotan’ny mpianany, ary nanokatra ny lalana ho amin’ny fanosorana azy ireo ho mpisorona lefitra ao amin’ny tempoly ara-panahin’i Jehovah, tamin’ny andro Pentekosta 33 am.f.i. Ny fanompoan’izy ireo amim-pahatokiana hatramin’ny fahafatesana, ao amin’ny kianjan’ny tempoly eto an-tany, dia hitarika ho amin’ny fitsanganana ho any an-danitra amin’ny ho avy, mba hanohizana ny fanompoan’ny mpisorona.

14. a) Inona no fifaliana niaraka tamin’ny asa feno zotom-po nataon’ny kongregasiona kristiana tany am-boalohany? b) Nahoana no nihelina io fifaliana io?

¹⁴ Jiosy nibebaka an’arivony maro — ary tatỳ aoriana dia Jentilisa — no nirohotra ho amin’izany kongregasiona kristiana izany, ary nandray anjara tamin’ny fanambarana ny vaovao tsara ny amin’ny fanapahana ny tany hampiharin’ny Fanjakan’Andriamanitra ho avy. Telopolo taona teo ho eo tatỳ aoriana, ny apostoly Paoly dia afaka nilaza fa notorina ‘teny ambanin’ny lanitra rehetra teny’ ny vaovao tsara. (Kolosiana 1:23). Taorian’ny nahafatesan’ny apostoly anefa, dia tafaorina ny fivadiham-pinoana lehibe, ary nanomboka nitsilopilopy ny fahazavan’ny fahamarinana. Nohamaizinin’ny fitokotokoana niorina tamin’ny filozofia sy ny fampianaran’ny mpanompo sampy tao amin’ny Tontolon’ireo Fivavahana Lazaina fa Kristiana, ny Kristianisma marina. — Asan’ny Apostoly 20:29, 30.

15, 16. a) Ahoana no nahatanterahan’ny faminaniana tamin’ny 1914? b) Fanangonana inona no nanamarika ny faramparan’ny taonjato faha-19 sy ny fiandohan’ny taonjato faha-20?

¹⁵ Nandalo ireo taonjato. Avy eo, tamin’ireo taona 1870, dia nisy antokona Kristiana tso-po nanomboka nianatra tamin’ny fomba lalina ny Baiboly. Niainga avy tamin’ny Soratra Masina izy ireo ary afaka nanondro marina ny taona 1914 ho nanamarika ny fifaranan’ny “andron’ny jentilisa”. Tamin’izay no nifarana ireo “fetr’andro” fito ara-panoharana (2 520 taona izay nampiharan’ny olombelona fanapahana toy ny an’ny biby) tamin’ny fandraisan’i Kristy Jesosy — ilay manana “ny zo ara-dalàna” ho Mpanjaka mesianikan’ny tany — ny seza fiandrianana any an-danitra. (Lioka 21:24; Daniela 4:22; Ezekiela 21:26, 27, NW ). Nanomboka tamin’ny 1919 indrindra, ireny Mpianatra ny Baiboly ireny, fantatra amin’izao andro izao hoe Vavolombelon’i Jehovah, dia nirotsaka tamin’ny fanelezana tamin-kerim-po manerana ny tany manontolo, ny vaovao tsara ny amin’ilay Fanjakana ho avy. Tamin’ny 1919, dia an’arivony vitsivitsy tamin’izy ireo no namaly ilay antso ho amin’ny asa, navoaka tany amin’ny fivoriambe tao Cedar Point, Ohio, any Etazonia. Nitombo ny isan’izy ireo hatramin’ny taona 1935, izay nisian’ny olona 56 153 nanao tatitra momba ny fanompoana teny amin’ny saha. Tamin’io taona io, dia 52 465 no nandray ny marika, dia ny mofo sy ny divay, tamin’ny Fahatsiarovana ny nahafatesan’i Jesosy fanao isan-taona, ka nanamarika tamin’izany ny fanantenany ho tonga mpisorona hiaraka amin’i Kristy Jesosy, any amin’ny faritr’ilay tempoly ara-panahy lehiben’i Jehovah any an-danitra. Miara-manompo aminy koa izy ireo, amin’ny maha-mpiara-manjaka ao amin’ny Fanjakany Mesianika. — Lioka 22:29, 30; Romana 8:15-17.

¹⁶ Kanefa, ny Apokalypsy 7:4-8 sy ny 14:1-4 dia mampiseho fa voafetra ho 144 000 ny isa fenon’ireny Kristiana voahosotra ireny, ary maro aminy no nangonina nandritra ny taonjato voalohany, talohan’ny niorenan’ilay fivadiham-pinoana lehibe. Nanomboka tamin’ny faramparan’ny taonjato faha-19 ary nitohy hatratỳ amin’ny taonjato faha-20, i Jehovah dia namita ny fanangonana an’io antokon’olona io, izay nodiovina tamin’ny ranon’ny Teniny, nambara fa marina noho ny finoany ny sorom-panavotan’i Jesosy, ary tamin’ny farany dia nasiana tombo-kase amin’ny maha-Kristiana voahosotra azy mba hahaforona ny isa fenon’ny 144 000.

17. a) Inona no fanangonana natao nanomboka tamin’ireo taona 1930? b) Nahoana no mahaliana ny Jaona 3:30 eto? (Jereo koa ny Lioka 7:28.)

¹⁷ Inona no miseho manaraka izany, rehefa voafidy ireo voahosotra rehetra? Tamin’ny 1935, tany amin’ny fivoriambe iray manan-tantara natao tany Washington, D.C., any Etazonia, dia nampahafantarina fa ny “olona betsaka” voalaza ao amin’ny Apokalypsy 7:9-17 dia antokon’olona ho fantatra ‘aorian’ny’ (NW ) 144 000, ary fiainana mandrakizay ao amin’ny tany zary paradisa no anjarany. Rehefa avy namantatra mazava an’ilay voahosotra, dia i Jesosy, i Jaona Mpanao Batisa, izay hatsangana eto an-tany amin’ny maha-anisan’ny “ondry hafa” azy, dia nilaza toy izao ny amin’ny Mesia: “Izy tsy maintsy mitombo, fa izaho kosa tsy maintsy mihena.” (Jaona 1:29; 3:30; 10:16; Matio 11:11). Nifarana ny asa nataon’i Jaona Mpanao Batisa dia ny fanomanana mpianatra ho an’ny Mesia, rehefa nandray an-tanana ny fifantenana an’ireo ho anisan’ny 144 000 nitombo isa hatrany, i Jesosy tamin’izay. Ny mifamadika tamin’izany no nitranga tamin’ireo taona 1930. Nihena ny isan’ireo “voantso sy voafidy” ho anisan’ny 144 000, fa nanomboka kosa ny fitomboana mahatalanjona teo amin’ny isan’ny “olona betsaka” amin’ny “ondry hafa”. Manohy mitombo ny isan’io olona betsaka io, arakaraka ny anakekezan’ny fandehan-javatra ratsin’izao tontolo izao ny fiafarany ao Haramagedona. — Apokalypsy 17:14b.

18. a) Nahoana isika no afaka manantena amim-patokiana fa “olona an-tapitrisany maro velona ankehitriny no tsy ho faty mihitsy”? b) Nahoana isika no tokony hanaraka amin-jotom-po ny Hagay 2:4?

¹⁸ Teo am-piandohan’ireo taona 1920, ny lahateny ampahibemaso iray nanintona manokana, nataon’ny Vavolombelon’i Jehovah, dia nitondra ny lohateny hoe “Olona An-tapitrisany Maro Velona Ankehitriny no Tsy ho Faty Mihitsy”. Izany dia mety ho nanome taratry ny fanantenana tafahoatra tamin’izany fotoana izany. Amin’izao andro izao anefa, dia azo atao amim-patokiana feno izany fanambarana izany. Ny fitomboan’ny fahazavana mikasika ny faminaniana ao amin’ny Baiboly, sy ny fanjakan’i Baroa hita eto amin’itỳ tontolo miala aina itỳ, dia samy manambara amin-kery fa akaiky dia akaiky ny faran’ny fandehan-javatr’i Satana! Ny tatitra momba ny Fahatsiarovana tamin’ny 1996, dia mampiseho fa olona 12 921 933 no nanatrika, ary 8 757 monja tamin’izy ireo (0,068 isan-jato) no nampiseho ny fanantenany ho any an-danitra tamin’ny fandraisana anjara tamin’ny marika. Madiva ho vita ny famerenana amin’ny laoniny ny fanompoam-pivavahana marina. Aoka anefa isika tsy hampiadana ny diantsika amin’izany asa izany na oviana na oviana. Eny, milaza toy izao ny Hagay 2:4: “Mahereza, hianareo vahoaka rehetra, hoy Jehovah, ka miasà; fa Izaho no momba anareo, hoy Jehovah, Tompon’ny maro”. Enga anie isika ho tapa-kevitra fa tsy hisy mihitsy soritry ny fitiavana fatratra zavatra ara-nofo, na soritry ny toetra araka an’izao tontolo izao hampihena ny zotom-pontsika ho an’ny asan’i Jehovah! — 1 Jaona 2:15-17.

19. Ahoana no mety handraisantsika anjara amin’ny fahatanterahan’ny Hagay 2:6, 7?

¹⁹ Mahafaly ny tombontsoa ananantsika mandray anjara amin’ny fahatanterahana maoderin’ny Hagay 2:6, 7, manao hoe: “Izao no lazain’i Jehovah, Tompon’ny maro: Indray maka koa, raha afaka kelikely, dia [hanozongozona ny lanitra sy ny tany ary ny ranomasina sy ny tany maina aho. Ary hanozongozona ny firenena rehetra aho, ka tsy maintsy hiditra ireo zavatra faniry eo amin’ny firenena rehetra, NW ]; ary hofenoiko voninahitra ity trano ity, hoy Jehovah, Tompon’ny maro.” Miely patrana manerana itỳ tontolon’ny taonjato faha-20 itỳ, ny fierenana sy ny fahasimbana ara-pitondran-tena ary ny fankahalana. Ao amin’ny andro farany ho azy marina tokoa izy itỳ, ary i Jehovah dia efa nanomboka ‘nanozongozona’ azy tamin’ny fanaovana izay ‘itorian’ny Vavolombelony ny andro famaliany’. (Isaia 61:2). Hahatratra ny fara tampony io fanozongozonana savaranonando io, amin’ny fandringanana an’izao tontolo izao ao Haramagedona, kanefa alohan’io fotoana io, i Jehovah dia manangona “ireo zavatra faniry eo amin’ny firenena rehetra” — dia ireo mponina amin’ny tany toy ny ondry sy mandefitra — mba hanompo azy. (Jaona 6:44). Io “olona betsaka” io ankehitriny dia “manompo” eo amin’ny kianjan’ny tranon’i Jehovah fanaovana fanompoam-pivavahana eto an-tany. — Apokalypsy 7:9, 15.

20. Aiza no tokony hahitana ny harena sarobidy indrindra?

²⁰ Mitondra tombony sarobidy noho izay mety ho harena ara-nofo na inona izany na inona, ny fanompoana ao amin’ny tempoly ara-panahin’i Jehovah. (Ohabolana 2:1-6; 3:13, 14; Matio 6:19-21). Ambonin’izany, dia milaza toy izao ny Hagay 2:9: “Ny voninahitr’ity trano ity any am-parany dia ho lehibe noho ny tany aloha, hoy Jehovah, Tompon’ny maro; ary eto amin’ity fitoerana ity no hanomezako, fiadanana, hoy Jehovah, Tompon’ny maro.” Inona no dikan’ireo teny ireo ho antsika amin’izao andro izao? Hilaza izany ny lahatsoratra manaraka.

Ilay Voninahitra Lehibe Kokoa Ananan’ny Tranon’i Jehovah

“Hofenoiko voninahitra ity trano ity, hoy Jehovah, Tompon’ny maro.” — HAGAY 2:7.

1. Ahoana no ifandraisan’ny fanahy masina amin’ny finoana sy ny asa?

NANDRITRA ny fitoriany isan-trano, dia nihaona tamin’ny ramatoa pentekotista izay nanazava toy izao, ny Vavolombelon’i Jehovah iray: ‘Izahay no manana ny fanahy masina, fa ianareo no manao ny asa.’ Tamim-pahaiza-mandanjalanja dia nohazavaina taminy fa izay olona manana ny fanahy masina, raha ny ara-dalàna, dia ho voatosika hanao ny asan’Andriamanitra. Milaza toy izao ny Jakoba 2:17: “Ny finoana, raha tsy misy asa, dia maty mihitsy.” Noho ny fanampian’ny fanahin’i Jehovah, dia namboly finoana matanjaka ny Vavolombelony, ary ‘nofenoiny voninahitra ny tranony’ tamin’ny fanomanana azy ireo hanao asa marina — ny lehibe indrindra dia ny ‘fitoriana amin’ny tany onenana manontolo itỳ vaovao tsaran’ilay Fanjakana itỳ, ho vavolombelona amin’ny firenena rehetra’. Rehefa ho vita araka izay mahafa-po an’i Jehovah io asa io, “avy eo dia ho tonga ny farany”. — Matio 24:14, NW.

2. a) Inona no fitahiana horaisintsika raha variana amin’ny fanaovana ny asan’i Jehovah isika? b) Nahoana isika no tokony ho faly noho izay toa fisehoana ho “mitaredretra”?

² Avy amin’ireo tenin’i Jesosy ireo, dia manatsoaka hevitra isika fa ny asantsika amin’izao andro izao dia tsy maintsy mifantoka amin’ny fitoriana amin’ny hafa “ny vaovao tsara be voninahitr’ilay Andriamanitra sambatra”, nankinina tamintsika. (1 Timoty 1:11, NW ). Arakaraka ny maha-variana antsika amin’ny fanaovana amim-pifaliana ny fanompoana an’i Jehovah no toa maha-haingana kokoa ny fahatongavan’ny farany. Toy izao ny tenin’i Jehovah vakintsika ao amin’ny Habakoka 2:2, 3: “Soraty ny fahitana, ka ataovy velona tsara ny soratra eo amin’ny fàfana, mba ho azon’ny mihazakazaka hovakina aza. Fa ny fahitana dia mbola ho amin’ny fotoan’andro, ary mikendry ny farany izy ka tsy ho diso; eny, na dia mitaredretra aza izy, andraso ihany, fa ho avy tokoa izy ka [tsy ho diso aoriana, NW ].” Eny, ho avy ‘ny fahitana, na dia mitaredretra aza’. Izao isika ao anatin’ny taona faha-83 amin’ny fanapahan’ny Fanjakan’i Jesosy izao, dia mety hihevitra ny sasany fa fotoana mitaredretra no misy antsika ankehitriny. Tsy tokony ho faly ve anefa isika satria mbola tsy tonga ny farany? Nandritra itỳ folo taona amin’ireo 1990 itỳ, dia nesorina toa tamin’ny alalan’ny fahagagana ireo fameperana tamin’ny fitoriana ny vaovao tsara tany Eoropa Atsinanana, sy ireo faritra atsy Afrika, ary ireo tany hafa. Ilay fisehoana ho toa “mitaredretra” dia manome fotoana hanangonana “ondry” maro kokoa any amin’ireny faritany izay nisokatra vao haingana ireny. — Jaona 10:16.

3. Nahoana ny fahazoana araka ny toetr’andro ny hevitra momba ‘itỳ taranaka itỳ’, no tokony handrisika antsika hanao amim-pahadodonana ny asan’Andriamanitra?

³ “Tsy ho diso aoriana izy”, hoy ilay mpaminany. Nilaza i Jesosy fa tsy hanjavona itỳ taranaka ratsy fanahy ankehitriny itỳ “mandra-pahatongan’izany rehetra izany”. (Matio 24:34). Moa ve ny fahazoantsika araka ny toetr’andro ny hevitra momba ireo teniny ireo, midika fa tsy dia mahadodona firy ny asa fitoriantsika?a Ny zava-misy dia mampiseho fa ny mifanohitra amin’izany indrindra no izy! Ny taranaka misy antsika dia milentika ao anatin’ny faharatsiam-panahy sy ny fahasimbana ara-pitondran-tena mbola tsy nisy toy izany tamin’ny tantara rehetra teo aloha. (Ampitahao amin’ny Asan’ny Apostoly 2:40.) Tokony hanao ny asantsika amim-pahadodonana isika. (2 Timoty 4:2, NW ). Ny faminaniana rehetra momba ny fotoana hipoahan’ny fahoriana lehibe dia mampiseho fa ho tonga tampoka, vetivety foana, tsy ho hitahita akory — toy ny mpangalatra — izy io. (1 Tesaloniana 5:1-4; Apokalypsy 3:3; 16:15). “Koa miomàna kosa hianareo; fa amin’izay ora tsy ampoizinareo no hihavian’ny Zanak’olona.” (Matio 24:44). Koa satria manatona ny fotoana handringanana azy itỳ taranak’olombelona tsy matahotra an’Andriamanitra itỳ, dia azo antoka fa tsy tokony haniry hanary ny fanantenantsika sarobidy ny amin’ny fiainana mandrakizay isika, amin’ny fiverenana ‘hihosim-potaka indray’ ao amin’ireo fialam-boly fanaon’izao tontolo izao! — 2 Petera 2:22; 3:10; Lioka 21:32-36.

4. Inona no tarehin-javatra nitaky fanomezana ‘sakafo amin’ny fotoana mety’ nitombo, ary ahoana no nanomezana fahafaham-po an’io zavatra nilaina io?

⁴ Ho fahatanterahan’ny faminanian’i Jesosy, dia nisy “fiandohan’ny fahoriana” tamin’ny 1914, rehefa niditra tao amin’ny “fifaranan’ny fandehan-javatra” ny taranak’olombelona. Nitombo hatramin’izao andro izao ny alahelo sy ny fisehoan-javatra feno loza ary ny tsy fankatoavan-dalàna. (Matio 24:3-8, 12, NW ). Kanefa, i Jehovah dia naniraka ny kilasin’ny mpanompo mahatoky sy malina voahosotra mba hanome ‘sakafo ara-panahy amin’ny fotoana mety’ ho an’ny ankohonan’ny Tompon’izy ireo, dia i Kristy. (Matio 24:45-47, NW ). Avy eo amin’ny seza fiandrianany any an-danitra, io Mpanjaka Mesianika io ankehitriny dia mitarika fandaharam-pamahanana ara-panahy mahatalanjona iray, manerana ny tany manontolo.

“Vatsin-tsakafo” tondraka

5. Inona no fiheverana omena an’ilay zavatra fototry ny ‘sakafo’?

⁵ Hevero ny fanomanana ny “vatsin-tsakafo”. (Lioka 12:42, NW ). Ny Tenin’Andriamanitra, ny Baiboly, no zavatra fototra ao amin’ny sakafo atolotra ny Kristiana. Mba hampianarana amin’ny fomba mandaitra ny Baiboly, dia ilaina voalohany indrindra ny fandikan-teny mora vakina sady araka ny marina iray. Nandritra ireo taona, dia notanterahina tamin’ny fomba miandalana izany, indrindra fa nanomboka tamin’ny 1950, rehefa navoaka tamin’ny teny anglisy Ny Soratra Grika Kristiana — Fandikan-tenin’Izao Tontolo Izao Vaovao. Tamin’ny 1961, dia nanjary azo noraisina ny Baiboly manontolo araka ny Fandikan-tenin’Izao Tontolo Izao Vaovao, ary tsy ela dia nisy fanontana tamin’ny fiteny lehibe hafa niseho. Ny isan’ny navoaka 3 nandritra ny taom-panompoana 1996, dia mahatonga ny tontaliny hahatratra 27, ka ny 14 amin’ireo dia ny Baiboly manontolo. Mba hikarakarana an’io asa mahakasika ny Baiboly io, ary koa mahakasika ireo fitaovana fanampiana ara-baiboly, dia misy Kristiana vita fanoloran-tena 1 174 eo ho eo, miasa manontolo andro ankehitriny amin’ny fandikan-teny, any amin’ny tany 77.

6. Ahoana no nanomezan’ny Fikambanana fahafaham-po ny fangatahana zavatra vita an-tsoratra ara-baiboly?

⁶ Ho fanohanana ny asan’ireo mpandika teny maro be ireo, dia namokatra zavatra vita an-tsoratra mihamaro isa hatrany, ireo sampana 24 manana fanontam-pirinty an’ny Fikambanana Watch Tower. Mba hanaovana izany, dia mitohy ny fametrahana milina fanontam-pirinty rotative haingam-pihodina fanampiny, any amin’ireo sampana lehibe. Nitombo isam-bolana ny isan’ny gazety Ny Tilikambo Fiambenana sy ny Mifohaza! novokarina, ka nahatratra 943 892 500 ny tontaliny amin’ny fitambarany, izay fitomboana 13,4 isan-jato ho an’ilay taona. Nitombo 40 isan-jato ny tontalin’ny Baiboly sy ny boky mifono baoritra novokarina tany Etazonia, Alemaina, Brezila, Failandy, Italia, Japon, Korea, sy Meksika fotsiny, nanomboka tamin’ny 1995 ka nahatratra 76 760 098 tamin’ny 1996. Nandray anjara lehibe koa tamin’ny fitomboana ankapobe teo amin’ny famokarana zavatra vita an-tsoratra, ireo sampana hafa.

7. Amin’ny ahoana ny Isaia 54:2 no manjary mihamahadodona hatrany ankehitriny?

⁷ Nanjary tena nilaina ny fampitomboana be nandritra ireo taona 1990, noho ny fanesorana ireo fameperana tamin’ny Vavolombelon’i Jehovah tany Eoropa Atsinanana sy tatsy Afrika. Mafy ny hanoanana ara-panahy any amin’ireny toerana ireny. Noho izany, dia mihamahadodona hatrany ny fanaovana ilay antso hoe: “Halalaho ny itoeran’ny lainao, ary aoka hohenjanina ny ambain-dainao, ka aza avela hisy hiketrona; halavao ny kofehinao, ary aoreno mafy ny tsima-dainao”. — Isaia 54:2.

8. Inona no fanaovan-javatra mampiseho fahalalahan-tanana manampy amin’ny fanomezana fanohanana ara-bola?

⁸ Araka izany, dia tena nilaina ny fanitarana ireo trano tany amin’ny maro amin’ireo sampana 104 an’ny Fikambanana. Noho ny fahasarotan’ny toe-karena any amin’ny ankamaroan’ireo faritany vao avy nosokafana, dia ny fanomezana ho an’ny asa maneran-tany avy tamin’ireo tany manankarena kokoa no nisahanana ny tapany lehibe tamin’ny fandaniana natao tamin’izany fanitarana izany. Mahafaly fa nanao zavatra tamin’ny fo manontolo ireo kongregasiona sy ny isam-batan’olona, mifanaraka amin’ny Eksodosy 35:21 manao hoe: ‘Ary samy nanatona izy, dia izay rehetra nampahazotoin’ny fony, ary izay rehetra namporisihin’ny fanahiny, ka nitondra ny fanatitra ho an’i Jehovah hanaovana ny asa’. Hararaotinay izao fahafahana izao mba hisaorana an’ireo rehetra nandray anjara tamin’io fanomezana tamim-pahalalahan-tanana io. — 2 Korintiana 9:11.

9. Ahoana no ahatanterahan’ny Romana 10:13, 18 amin’izao andro izao?

⁹ Nandritra ny 1996, ireo zavatra vita an-tsoratry ny Fikambanana Watch Tower dia nanome voninahitra ny anaran’i Jehovah sy ny fikasany tokoa, hatrany amin’ny faran’ny tany. Izany dia tsy misy hafa amin’izay nambaran’ny apostoly Paoly mialoha. Tamin’ny fanononana ny faminanian’i Joela sy ny Salamo faha-19, dia nanoratra toy izao izy: “ ‘Izay rehetra miantso ny anaran’ [i Jehovah, NW ] no hovonjena’. Fa hoy izaho: Sao tsy nahare izy? Tsia; fa ‘efa nivoaka ho any amin’ny tany rehetra ny feony, ary ny teniny hatramin’ny faran’izao rehetra izao’.” (Romana 10:13, 18). Tamin’ny fanomezam-boninahitra toy izany ilay anarana sarobidy hoe Jehovah, no nandraisan’ny vahoakany anjara asa lehibe tamin’ny famenoana voninahitra ny tranony fanaovana fanompoam-pivavahana. Ahoana anefa no niroboroboan’io fanambarana io, indrindra fa nandritra ny 1996? Diniho, aza fady, ilay tabilao manaraka eo amin’ny pejy faha-18 ka hatramin’ny faha-21.

Famoriam-bokatra maneran-tany

10. Lafin-javatra misongadina inona avy no marihinao eo amin’ny asan’ny vahoakan’i Jehovah, araka ny famintinana hita eo amin’ilay tabilao eo amin’ny pejy 18 ka hatramin’ny faha-21?

¹⁰ Mbola tsy nanan-kery lehibe kokoa toy izao mihitsy ireo tenin’i Jesosy hita ao amin’ny Lioka 10:2, manao hoe: “Be ny vokatra, fa ny mpiasa no vitsy; koa amin’izany mangataha amin’ny Tompon’ny vokatra mba hampandehanany mpiasa hamory ny vokatra.” Mamaly izany antso izany ve ianao? Olona an-tapitrisany maro manerana ny tany no manao izany. Izany no porofoin’ilay tampon’isa vaovao amin’ny mpitory ilay Fanjakana 5 413 769, nanao tatitra momba ny fanompoana teny amin’ny saha nandritra ny 1996. Ankoatra izany, dia rahalahy sy anabavy vaovao 366 579 no natao batisa. Heverintsika ho sarobidy toy inona moa ireny “zavatra faniry eo amin’ny firenena rehetra” ireny, izay mandray anjara ankehitriny amin’ny ‘famenoana voninahitra ny tranon’i Jehovah fanaovana fanompoam-pivavahana’! — Hagay 2:7, NW.

11. Nahoana isika rehetra no manana antony hahadibo-kafaliana?

¹¹ Miavaka ireo tatitra momba ny fitaran’ny asa any amin’ireo saha vao avy nosokafana. Mitsiriritra an’ireo mahita fitomboana toy izany ankehitriny ve ny sasany amintsika? Mifanohitra amin’izany kosa, fa miara-mifaly amin’izy ireo isika. Samy nanana fiandohana kely ny tany rehetra. Nanoratra toy izao i Zakaria, mpaminany niara-belona tamin’i Hagay: “Iza no nanamavo ny andron’ny zava-madinika?” (Zakaria 4:10). Dibo-kafaliana isika satria any amin’ireo tany izay isian’ny asa fanambarana efa miorina tsara, dia ahitana mpitory ilay Fanjakana an-tapitrisany maro ankehitriny, ary voasa matetika ny faritany, isan-kerinandro mihitsy aza any amin’ny tanàn-dehibe maro. Manana antony hampiadanana ny asa ve isika amin’izao fotoana izao izay anitaran’i Jehovah ny fahafahana hahazo famonjena hatrany amin’ireo faritra very tombontsoa teo taloha? Tsy izany mihitsy! “Ny tanimbary dia izao tontolo izao”, hoy i Jesosy. (Matio 13:38). Tsy maintsy tohizina ny fanaovana fanambarana feno, tsy misy hafa amin’ny nanaovan’ny mpianatra tany am-boalohany fanambarana feno ny amin’ny fifaranan’ny fandehan-javatra jiosy. — Asan’ny Apostoly 2:40; 10:42; 20:24; 28:23.

Mihamandroso hatrany

12. Inona no fandrisihana azontsika mba handrosoana ‘amin’izay hitsiny’? (Jereo koa ny faritra voafefy manao hoe “Famoriam-bokatra ‘avy any Amin’ny Faran’ny Tany’.”)

¹² Eny, tsy maintsy maharaka isika, ka mandroso ‘amin’izay hitsiny’ miaraka amin’ny kalesin’i Jehovah any an-danitra misy ireo anjely. (Ezekiela 1:12). Ao an-tsaintsika ny tenin’i Petera manao hoe: “Ny Tompo tsy mahela ny teny fikasany, araka izay ataon’ny sasany ho fahelany; fa mahari-po aminareo Izy, ka tsy tiany hisy ho very, fa mba ho tonga amin’ny fibebahana izy rehetra”. (2 Petera 3:9). Aoka handrisika antsika ny zotom-po fakan-tahaka asehon’ireo rahalahintsika any amin’ny tany mahantra ara-toe-karena. Izay fisehoana ho toa mitaredretra eo amin’ny fipoahan’ny Haramagedona dia mamela ny hanangonana olona ana hetsiny maro any amin’ireny tany ireny, ary koa olona maro any amin’ireo faritany efa voasa tsara. Aza diso hevitra: “Efa antomotra ny andro lehiben’i Jehovah; eny, efa antomotra sady mihafaingana indrindra”. (Zefania 1:14). Tokony hihafaingana koa isika eo amin’ny fanaovana fanambarana feno sady farany!

13, 14. a) Inona no azo lazaina momba ny fanelezana zavatra vita an-tsoratra nandritra ny 1996? b) Fandaharana mialoha manokana inona avy no azon’ny kongregasiona atao isan-taona, ary inona no fandaharana mialoha ataonao mba handraisana anjara amin’izany?

¹³ Na dia tsy miseho eo amin’ilay tabilao momba ny fanompoana aza ireo tsipiriany, dia nisy fitomboana tsara homarihina teo amin’ny fanelezana Baiboly, boky, sy gazety, nandritra ny taona lasa. Ohatra, ny fametrahana gazety maneran-tany dia nampiseho fitomboana 19 isan-jato, mitontaly ho 543 667 923 ny isan’ny voapetraka. Ireo gazetintsika dia manamora ny fitoriana eny amin’ny toerana maro samihafa — eny amin’ny arabe, sy zaridainam-panjakana, sy fijanonan’ny aotobisy ary faritra be toeram-piasana. Ireo tatitra dia mampiseho fa any amin’ny faritany sasany efa vonton’ny fitoriana ilay Fanjakana, dia nisy olona manam-pahaizana manokana talanjona noho ny hatsaran’ireo gazetintsika, ka manaiky fampianarana Baiboly.

¹⁴ Isan-taona, mandritra ny volana Aprily, dia mahazatra an’ireo kongregasiona ny mandamina fanelezana gazety, ka manao ezaka manokana mandritra ny andro iray, isan-trano sy eny an-kalamanjana. Handray anjara amin’izany ve ny kongregasionanareo mandritra ny Aprily 1997? Ireo nomerao miavaka amin’ny Ny Tilikambo Fiambenana sy ny Mifohaza! hivoaka amin’ny Aprily, dia efa voaomana, ary ny fanolorana azy ireo amin’ny fotoana mitovy maneran-tany dia azo antoka fa tokony hamela soritra! Tao amin’ny nosin’i Chypre, ny kongregasiona izay nampiasa ho teny fanevany ny hoe: “Ataovy izay hahatratrarana ny olona rehetra araka izay azo atao amin’ny hafatra momba ilay Fanjakana”, dia nanohy isam-bolana mihitsy aza ny asa fizarana gazety nanaovana fandaharam-potoana toy izany, ka nahatratra tampon’isa vaovao tamin’ny gazety 275 359 voapetraka nandritra ny taona, dia fitomboana 54 isan-jato.

Ireo hafatr’i Hagay farany

15. a) Nahoana i Jehovah no nandefa hafatra fanampiny tamin’ny alalan’i Hagay? b) Inona no lesona tokony hampitain’ny hafatr’i Hagay fahatelo amintsika?

¹⁵ Naniraka an’i Hagay i Jehovah, 63 andro taorian’ny nampitany ny hafany faharoa niaraka tamin’ny fanambarana fahatelo izay azontsika alatsaka tsara ao am-po amin’izao andro izao. I Hagay dia niteny toy ny hoe teo am-panorenana ny fototry ny tempoly ny Jiosy, dia fototra izay efa naorin’izy ireo 17 taona talohan’izay, raha ny marina. Dia hitan’i Jehovah indray fa nety ny hanaovana fanadiovana. Nanjary nanao tsirambina ireo mpisorona sy ny vahoaka ka dia naloto teo imason’i Jehovah izy ireo. Nety ho nanao tsirambina ve ny sasany amin’ny vahoakan’i Jehovah amin’izao andro izao, ka nampiditra ny tenany mihitsy tao amin’ny lalan’izao tontolo izao milefitra loatra sy tia fatratra zavatra ara-nofo? Mahadodona ny hiheverantsika rehetra ny amin’ny hanomezam-boninahitra ny anaran’i Jehovah “hatramin’izao andro anio izao no ho mankarỳ”, ka hatoky izao fampanantenany izao: “Hatramin’izao andro anio izao no hitahiako anareo.” — Hagay 2:10-19; Hebreo 6:11, 12.

16. ‘Fanozongozonana’ inona no antomotra, ary inona no ho vokany?

¹⁶ Tamin’io andro io ihany, dia tonga faninefany sady farany tamin’i Hagay ny tenin’i “Jehovah, Tompon’ny maro”. Nampahafantariny izay voafaoka tamin’ny ‘fanozongozonany ny lanitra sy ny tany’ tamin’ny fitenenana hoe: “Hahohoko ny seza fiandrianan’ny fanjakana, ary hofoanako ny herin’ny fanjakan’ny firenena; ary hahohoko ny kalesiny sy ny mitaingina eo aminy; ary samy ho lavon’ny sabatry ny namany avy ny soavaly sy ny mpitaingina azy.” (Hagay 2:6, 21, 22). Hahatratra ny fara tampony, araka izany, ilay ‘fanozongozonana’, rehefa hanadio tanteraka ny tany ao Haramagedona, i Jehovah. Amin’izay dia efa ho tafiditra “ireo zavatra faniry eo amin’ny firenena rehetra”, ka hahaforona ny votoatin’ny fitambaran’olona ao amin’ny tontolo vaovao. Antony hifaliana sy hanomezam-piderana an’i Jehovah re izany! — Hagay 2:7, NW; Apokalypsy 19:6, 7; 21:1-4.

17. Ahoana no nanaovana an’i Jesosy ho “fanombohan-kase”?

¹⁷ Manoratra toy izao i Hagay ho famaranana ny faminaniany: “Amin’izany andro izany, hoy Jehovah, Tompon’ny maro, dia horaisiko hianao, ry Zerobabela (...), ka hataoko toy ny fanombohan-kase hianao; fa efa nifidy anao Aho, hoy Jehovah, Tompon’ny maro.” (Hagay 2:23). I Kristy Jesosy ankehitriny no ilay Mpanjaka Mesianika sady Mpisoronaben’i Jehovah nasehon’ny tandindona, izay sady manao ny asan’i Zerobabela Governora no manao ny an’i Josoa Mpisoronabe koa any an-danitra, dia asa izay nataon’izy ireo nisaraka tao Jerosalema teto an-tany. Toy ny fanombohan-kase ofisialy eo an-tanana ankavanan’i Jehovah, dia i Jesosy no nanjary ilay “eny”, amin’ny maha-fitaovana ampiasain’i Jehovah azy mba hahatanteraka ireo ‘teny fikasana maro nataon’Andriamanitra’. (2 Korintiana 1:20; Efesiana 3:10, 11; Apokalypsy 19:10). Ny hafatra ara-paminaniana manontolo ao amin’ny Baiboly dia mifantoka amin’ny fandaharana nataon’i Jehovah momba an’i Kristy amin’ny maha-Mpanjaka sady Mpanavotra manao fisoronana, azy. — Jaona 18:37; 1 Petera 1:18, 19.

18. Ahoana no hahatanterahan’ilay teny famaranana hoe: “hoy Jehovah, Tompon’ny maro”, amin’ny fomba mamelombelona?

¹⁸ Mifanaraka amin’izany indrindra, amin’izao androntsika izao, dia ao amin’ny tempoly ara-panahy mamirapiratr’i Jehovah no tokony hahitana ny voninahitra lehibe indrindra! Ary tsy ho ela, aorian’ny hanesoran’i Jehovah ny fandehan-javatr’i Satana manontolo, dia hahita fahatanterahany mbola hahafaly kokoa ny Hagay 2:9, manao hoe: “Eto amin’ity fitoerana ity no hanomezako, fiadanana, hoy Jehovah, Tompon’ny maro.” Fiadanana rehefa ela ny ela! — fiadanana maharitra eo amin’izao rehetra izao, fiadanana izay iantohan’ilay ‘fanombohan-kasen’i Jehovah’, dia i Kristy Jesosy, ilay “Andrian’ny fiadanana”, izay ny aminy no nanoratana hoe: “Ny handrosoan’ny fanapahana sy ny fiadanana dia tsy hanam-pahataperana (...); ny fahasaro-piaron’i Jehovah, Tompon’ny maro, no hahatanteraka izany.” (Isaia 9:5, 6). Mandritra ny mandrakizay manontolo, ny voninahitry ny tranon’i Jehovah fanaovana fanompoam-pivavahana dia hamirapiratra manerana ny faritra mandry feizay tapahin’ny fiandrianany eo amin’izao rehetra izao. Enga anie isika hitoetra hatrany ao amin’izany trano izany! — Salamo 27:4; 65:4; 84:10.