tsindrimandry avy amin’Andriamanitra sy nanolo-tena ho azy, taonjato maro lasa izay.”

Maro amin’ireo niara-belona tamiko, mazava ho azy fa tany ivelan’ny fandaminan’i Jehovah, no niseho ho tsy misy hafa amin’ny nampahitan’ny Photo-Drame de la Création azy mialoha tamin’ny 1914: tia vola, fahafinaretana sy voninahitra. Fa izahay izay ao anatin’ny fandaminan’ny Tompo kosa, dia niezaka izahay mba hanintona ny sain’izy ireny ho amin’ny hafatra fiainana amin’ny fomba mety hisy rehetra: fitenenana fohy manaitra, pejy manontolo maro fampahafantarana ny maro, radiao, fiarakodia misy fanamafisam-peo, fônôgrafy, fihaonambe, filaharana mandeha an-tongotra mitondra soratra fampahafantarana ny maro, ary mpitory mihamaro hatrany mandeha isam-baravarana. Noho io asa io, dia nisy fiavahana teo amin’ny olona: etsy an-daniny, dia ireo izay manohana ny Fanjakan’Andriamanitra efa tafaorina, ary etsy an-kilany ireo izay manohitra izany. Izany no nambaran’i Jesosy ho an’ny taranaka misy ahy! — Matio 25:31-46.

Hatreo amin’ny fitepoany farany, ny ‘foko sasatra’ efa antitra dia tsy hitsahatra ny hiemponempom-pankasitrahana noho ny tombontsoa ananako, dia ny ho anisan’ny taranaka iray tsy manam-paharoa. Tsy hitsahatra ny hiemponempom-pifaliana izy eo anoloan’ny fahasambarana ananako ankehitriny mahita endrika an-tapitrisany maro hazavain’ny tsiky tsy hisy hanamaloka azy intsony mihitsy.

Midera an’i Jehovah ny ankizy iray

REHEFA maniry tokoa ny hanompo an’i Jehovah ireo tanora dia manana fahafahana maro ny hanao fanambarana ny aminy. Mampiseho izany izay nitranga tany Kenya andrefana tamin’ny zazalahy kely iray dimy taona. — Mpitoriteny 12:1.

Nanontany azy toy izao ny reniny: “Inona no tianao hatao rehefa lehibe ianao?” Tao amin’ny kongregasiona ilay zazalahy dia nahamarika mpitory maharitra manokana iray; izao àry no navaliny: “Tiako ny ho mpitory maharitra manokana tahaka ny rahalahy F_________.” Nanohitra toy izao anefa ny reniny: “Tsy mety hisy izany. Ahoana no hahatongavanao na dia ho mpitory maharitra mandavantaona aza nefa tsy manana fampianarana Baiboly na dia iray monja aza ianao?” Rehefa nanontany izy hoe: “Inona àry no azoko atao?” dia nanipy hevitra tamin’ilay zanany lahy kely ilay reny mba hiezaka hampita ny fahamarinana amin’ny bokiny hoe Ny Bokiko misy Fitantarana avy ao amin’ny Baiboly.

Nentin’ilay zazalahy kely ny Bokiko ka lasa izy nitady ireo namany sy nanasa azy ireo hiara-hianatra ny Baiboly aminy. Inona no vitany?

Nahavory antokon’ankizy folo azony niaraha-nianatra izy. Nampiasa sary tamim-pahakingana izy, nametraka fanontaniana maro mba handalinana ilay foto-kevitra ary nametraka fanontaniana famerenana teo am-pifaranan’ny fianarana. Raha tsy tadidin’ireo namany ny hevitra iray, dia niarahany nijery tamin’izy ireo indray izany. Araka ny tenin-dreniny dia tena fahafinaretana ny mahita ireo ankizy rehetra ireo mipetraka eo amin’ny tany eo anoloan’ny trano eo am-piaraha-mianatra, ka mametraka fanontaniana ilay zanany lahy dimy taona ary manangan-tanana mba hamaly ny hafa rehetra.

Endrey ny fifaliana amboniny ho an’ilay reny sy ny kongregasiona manontolo, mahita valo amin’ireo ankizy ireo manatrika fivoriana! Mbola kely loatra ireo roa hafa ka tsy tonga. Izany rehetra izany dia satria ny zazalahy kely iray dimy taona naniry hidera an’i Jehovah sy hanampy ny mpiara-belona aminy.