TOA tezitra marina i Jesosy eto, sa tsy izany? Fantatrao ve ny antony nahatonga azy ho tezitra aoka izany? Satria tia tombony loatra ireo lehilahy tao amin’ny tempolin’Andriamanitra tany Jerosalema ireo. Nitady hahazo vola be avy amin’ny olona tonga teto mba hivavaka tamin’Andriamanitra izy.

Hitanao ve ireo zanak’omby sy ondry ary voromailala ireo? Eny, nivarotra ireo biby ireo tao amin’ny tempoly mihitsy ny olona. Fantatrao ve hoe nahoana? Satria nila biby sy vorona ny Israelita mba hatao fanatitra ho an’Andriamanitra.

Nilaza ny lalàn’Andriamanitra fa rehefa nanao ratsy ny Israelita iray, dia tokony hanao fanatitra ho an’Andriamanitra. Ary nisy fotoana hafa koa, izay tsy maintsy nanaovan’ny Israelita fanatitra. Nefa aiza no nety ho nahitan’ny Israelita iray vorona sy biby hatolotra an’Andriamanitra?

Ny Israelita sasany dia nanana vorona sy biby. Koa afaka nanolotra ireny izy. Nefa Israelita maro no tsy nanana biby na vorona. Ary ny hafa dia nonina lavitra loatra an’i Jerosalema ka tsy afaka nitondra iray tamin’ireo bibiny tao amin’ny tempoly. Koa tonga teto ny olona ary nividy ny biby na ny vorona izay nilainy. Nefa ireto lehilahy ireto dia naka vola be loatra tamin’ny olona. Nangalatra tamin’ny vahoaka izy. Ankoatra izany, dia tsy tokony hivarotra teto amin’ny tempolin’Andriamanitra izy.

Izany no nahatonga an’i Jesosy ho tezitra. Nazerany àry ny latabatr’ireo lehilahy, niaraka tamin’ny vola, ary naparitany ny vola vy. Nanao karavasy tamin’ny tady izy ary nandroaka ny biby rehetra tsy ho ao amin’ny tempoly. Nandidy an’ireo lehilahy nivarotra voromailala izy hoe: ‘Ento mivoaka ireo zavatra ireo! Atsaharo ny fanaovana ny tranon’ny Raiko ho toerana fahazoam-bola be.’

Ny sasany tamin’ny mpanaraka an’i Jesosy dia niaraka taminy tao amin’ny tempoly teto. Gaga izy ireo nahita izay nataon’i Jesosy. Avy eo dia tsaroan’izy ireo ny toerana ao amin’ny Baiboly izay ilazana ny amin’ny Zanak’Andriamanitra hoe: ‘Ny fitiavany ny tranon’Andriamanitra no nampirehitra azy tahaka ny afo.’

Raha mbola tany Jerosalema i Jesosy nanatrika ny Paska, dia nanao fahagagana maro izy. Taorian’izany i Jesosy dia nandao an’i Jodia ary nanomboka ny diany niverina ho any Galilia. Nefa teny an-dalana dia namakivaky ny distrikan’i Samaria izy. Aoka hojerentsika izay nitranga tany.

NIJANONA teo akaikin’ny fantsakana iray tany Samaria i Jesosy mba hiala sasatra. Lasa nankany an-tanàna ny mpianany mba hividy sakafo. Ilay vehivavy iresahan’i Jesosy dia tonga mba haka rano. Hoy i Jesosy taminy: ‘Omeo hosotroiko aho.’

Nahagaga an’ilay vehivavy izany. Fantatrao ve ny antony? Satria i Jesosy dia Jiosy, ary ravehivavy dia Samaritanina. Ary ny ankamaroan’ny Jiosy dia tsy tia Samaritanina. Tsy hiresaka akory amin’izy ireny izy! Nefa i Jesosy dia tia ny karazan’olona rehetra. Koa hoy izy: ‘Raha fantatrao izay mangataka rano aminao, dia ianao no ho nangataka taminy ary ho nomeny rano manome fiainana ianao.’

‘Tompoko’, hoy ravehivavy, ‘lalina ny fantsakana, ary tsy manana siny akory ianao. Avy aiza no hahazoanao izany rano manome fiainana izany?’

‘Raha misotro rano avy amin’ity fantsakana ity ianao dia mbola hangetaheta ihany’, hoy ny fanazavan’i Jesosy. ‘Fa ny rano izay homeko dia afaka mamelona olona iray mandrakizay.’

‘Tompoko’, hoy ravehivavy, ‘omeo amin’izany rano izany aho! Dia tsy hangetaheta intsony mihitsy aho. Ary tsy hila ny hanketo intsony aho mba haka rano.’

Nihevitra ravehivavy fa niresaka ny amin’ny tena rano i Jesosy. Nefa niresaka ny amin’ny fahamarinana momba an’Andriamanitra sy ny fanjakany izy. Tahaka ny rano manome fiainana io fahamarinana io. Afaka manome fiainana mandrakizay ho an’ny olona izany.

Hoy i Jesosy izao tamin’ilay vehivavy: ‘Andeha antsoy ny vadinao ary miverena.’

‘Tsy manambady aho’, hoy ny navaliny.

‘Marina ny navalinao’, hoy i Jesosy. ‘Nefa efa nanana vady dimy ianao, ary tsy vadinao ilay itoeranao ankehitriny.’

Gaga ilay vehivavy, satria marina izany rehetra izany. Ahoana no nahafantaran’i Jesosy ireo zavatra ireo? Satria i Jesosy no ilay Nampanantenaina nirahin’Andriamanitra, ary Andriamanitra no nanome azy izany fahalalana izany. Tamin’izay dia tonga ny mpianatr’i Jesosy, ary gaga izy ireo nahita azy niresaka tamin’ny vehivavy samaritanina.

Inona no ianarantsika avy amin’izany rehetra izany? Mampiseho izany fa i Jesosy dia tsara fanahy tamin’ny olona avy amin’ny foko rehetra. Ary tokony ho toy izany koa isika. Tsy tokony hihevitra isika hoe ratsy ny olona sasany, satria avy amin’ny karazam-poko iray fotsiny izy. Irin’i Jesosy ny hahalalan’ny olona rehetra ny fahamarinana izay mitarika ho amin’ny fiainana mandrakizay. Ary isika koa dia tokony haniry hanampy ny olona hahalala ny marina.

JEREO i Jesosy mipetraka eto. Mampianatra ireo olona rehetra ireo izy teo amin’ny tendrombohitra iray tany Galilia. Ireo nipetraka akaikiny dia ny mpianany. Nifidy 12 tamin’ireo izy mba ho apostoly. Ny apostoly dia mpianatra manokan’i Jesosy. Fantatrao ve ny anaran’izy ireo?

Ao i Simona Petera sy Andrea rahalahiny. Avy eo dia i Jakoba sy Jaona, izay mpirahalahy koa. Nisy apostoly hafa iray nantsoina koa hoe Jakoba, ary ny hafa iray dia nantsoina koa hoe i Simona. Apostoly roa no nantsoina hoe Jodasy. Ny iray dia i Jodasy Iskariota, ary ny Jodasy hafa iray dia nantsoina hoe Tadeo. Avy eo dia i Filipo sy Natanaela (antsoina koa hoe Bartolomeo), ary i Matio sy Tomasy.

Rehefa niverina avy any Samaria i Jesosy, dia nanomboka nitory voalohany indrindra hoe: ‘Akaiky ny fanjakan’ny lanitra.’ Fantatrao ve hoe inona io fanjakana io? Tena fitondram-panjakan’Andriamanitra izany. I Jesosy no mpanjakany. Hanapaka avy any an-danitra izy ary hitondra fiadanana eto an-tany. Hataon’ny fanjakan’Andriamanitra lasa paradisa iray tsara tarehy ny tany manontolo.

Mampianatra ny olona ny amin’ilay fanjakana i Jesosy eto. ‘Tokony hivavaka toy izao ianareo’, hoy ny fanazavany. ‘Rainay Izay any an-danitra, hohamasinina anie ny anaranao. Ho tonga anie ny fanjakanao. Hatao anie ny sitraponao etỳ an-tany tahaka ny any an-danitra.’ Olona maro no miantso izany hoe ‘Ny vavaka nampianaran’ny Tompo.’ Ny hafa dia miantso azy hoe ny ‘Rainay.’ Hainao ve ilay vavaka manontolo?

I Jesosy dia nampianatra koa ny olona ny fomba tokony hifampitondran’izy ireo. ‘Ataovy amin’ny hafa izay tianao hataon’izy ireny aminao’, hoy izy. Tsy tianao ve rehefa mitondra anao amin-katsaram-panahy ny hafa? Koa tokony hitondra ny olon-kafa amin-katsaram-panahy isika, hoy i Jesosy. Tsy hahavariana ve ao amin’ny paradisa an-tany rehefa hanao izany ny rehetra?

NY ZAZAVAVY hitanao eto dia 12 taona. Mihazona ny tanany i Jesosy, ary mitsangana eo akaikiny ny reniny sy ny rainy. Fantatrao ve hoe nahoana no faly erỳ izy ireo? Aoka hojerentsika.

Ny rain-drazazavavy dia lehilahy fantatr’olona atao hoe Jairo. Indray andro dia narary ny zanany vavy, ary napetraka teo am-pandriana. Nefa tsy nihatsara izy. Vao mainka nihanarary hatrany izy. Very hevitra aoka izany i Jairo sy ny vadiny, satria toa ho faty ny zanakavavy keliny. Io no hany zanany vavy. Koa nandeha i Jairo nitady an’i Jesosy. Reny ny amin’ny fahagagana nataon’i Jesosy.

Rehefa nahita an’i Jesosy i Jairo, dia nisy vahoaka betsaka nanodidina azy. Nefa namakivaky teo amin’ny vahoaka i Jairo ary nianjera teo an-tongotr’i Jesosy. ‘Marary mafy dia mafy ny zanako vavy’, hoy izy. ‘Mba tongava re manasitrana azy’, hoy ny fitalahoany. Nilaza i Jesosy fa ho avy izy.

Raha teny am-pandehanana izy ireo, dia nifanety nanakaiky azy ny vahoaka. Nijanona tampoka i Jesosy. ‘Iza no nikasika ahy?’, hoy ny fanontaniany. Tsapan’i Jesosy fa nisy hery nivoaka avy taminy, koa fantany fa nisy olona nikasika azy. Iza anefa? Izany dia vehivavy iray izay narary be nandritra ny 12 taona. Tonga teo izy mba hikasika ny fitafian’i Jesosy, ary sitrana!

Nahatonga an’i Jairo hahazoazo aina izany, satria hitany fa mora erỳ amin’i Jesosy ny nanasitrana olona iray. Nefa tonga ny iraka iray tamin’izay. ‘Aza manahirana intsony an’i Jesosy’, hoy izy tamin’i Jairo. ‘Maty ny zanakao vavy.’ Tsy nampanahy an’i Jesosy izany fa hoy izy tamin’i Jairo: ‘Aza matahotra, ho velona ny zanakao.’

Rehefa tonga tao an-tranon’i Jairo izy ireo tamin’ny farany, dia nahita ny olona nitomany tamin’alahelo lehibe. Nefa hoy i Jesosy: ‘Aza mitomany. Tsy maty ny zaza, fa matory.’ Nefa nihomehy izy ireo sady naneso an’i Jesosy, satria fantany fa maty izy.

Nentin’i Jesosy avy eo ny ray aman-drenin-drazazavavy sy telo tamin’ny apostoliny ho any amin’ny efitrano nandrian’ilay zaza. Noraisiny tamin’ny tanany ilay zazavavy ary hoy izy: ‘Miarena!’ Dia velona indray izy, araka izay hitanao eto. Ary niarina izy ka nandehandeha! Izany no antony maha-faly dia faly aoka izany ny rainy sy ny reniny.

Tsy io no olona voalohany natsangan’i Jesosy tamin’ny maty. Ny voalohany resahin’ny Baiboly dia ny zanakalahin’ny mpitondratena iray nonina tao amin’ny tanànan’i Naina. Tatỳ aoriana, i Jesosy dia nanangana koa an’i Lazarosy, anadahin’i Maria sy Marta, tamin’ny maty. Rehefa hanapaka amin’ny maha mpanjakan’Andriamanitra i Jesosy, dia hamerina indray ho amin’ny fiainana, olona maro dia maro efa maty. Tsy ho azontsika atao ve ny ho faly ny amin’izany?