AHOANA NO HIATREHANA NY FIAKARAN’NY VIDIM-PIAINANA?

Mahaiza Mitantam-bola

Isika rehetra no mijaly rehefa miakatra ny vidim-piainana. Tsy hoe tsy afa-manoatra mihitsy anefa ianao fa mbola misy zavatra azonao atao ihany.

NAHOANA IZANY NO ILAINA?

Raha tsy manao kajy ny amin’izay ampiasanao ny volanao ianao dia tsy ho hitahitanao akory dia ho lany ilay izy. Vao mainka aza izany hampiady saina anao. Misy azonao atao anefa mba ho hainao ny hitantana ny volanao, na dia kely aza ny eo am-pelatananao.

INONA NO AZONAO ATAO?

Miezaha hiaina mifanaraka amin’izay anananao. Hilamin-tsaina kokoa ianao amin’izay, sady ho vonona raha misy ilana vola tampoka.

Hahavita hiaina mifanaraka amin’izay anananao ianao raha soratanao ny vola miditra sy mivoaka. Rehefa hanao teti-bola ianao dia jereo tsara hoe inona daholo no tena ilainao. Araho tsara izay nosoratanao avy eo. Raha miova ny vidin-javatra na ny karamanao dia ovao mifanaraka amin’izay ilay teti-bolanao. Raha manambady ianao dia mazava ho azy hoe ianareo mivady no miaraka manapa-kevitra.

Andramo izao: Aloavy eo no ho eo izay zavatra vidinao raha mety, fa aza mitrosa. Hitan’ny olona sasany hoe rehefa manao an’izany ry zareo dia arany kokoa ny fandehan’ny volany sady tsy idiran-trosa mihitsy ry zareo. Makà koa fotoana anarahanao maso ny volanao any amin’ny banky, na soraty hoe ohatrinona ny vola mivoaka isan’andro sy isam-bolana. Tsy hanahy be loatra ianao rehefa fantatrao hoe ohatrinona marina ny volanao.

Manampy be ilay hoe manana teti-bola voafaritra tsara na dia tsy mora aza ilay hoe miaina mifanaraka amin’izay anananao. Mety hanampy anao tsy hiasa saina be loatra amin’ny resa-bola koa izany.

‘Manaova kajy hoe ohatrinona no ho lany.’—Lioka 14:28.

Ataovy izay hampaharitra anao amin’ny asanao. Inona avy no mety hanampy anao amin’izany? Ireto misy soso-kevitra vitsivitsy: Manajà fotoana, miezaha ho tia ny asanao, ampio ny mpiara-miasa aminao, miasà mafy, manajà olona, araho ny fitsipika mifehy ny ao am-piasanareo, ary miezaha hahay kokoa ny asanao.

Aza lanilanina ny vola. Saintsaino izao: ‘Izaho ve zatra mandany vola amin’ny zavatra tsy tena ilaiko, na amin’ny zavatra manimba mihitsy aza?’ Betsaka, ohatra, no mandany ny vola nisasarany amin’ny zava-mahadomelina, filokana, sigara, na fisotroana tafahoatra. Sady mankarary ireo no mety hahavoaroaka amin’ny asa.

“Sambatra ny olona mahita fahendrena. ... Aleo mahazo fahendrena toy izay mahazo volafotsy.”—Ohabolana 3:13, 14.

Manaova tahiry hitsinjovana ny vodiandro ho merika. Raha azo atao dia manaova tahiry mba hampiasaina rehefa misy ilana vola tampoka. Hanampy anao tsy hanahy izany raha misy marary na very asa tampoka ao aminareo, na misy zavatra hafa tsy ampoizina.

“Mety ho tratran’ny sampona [isika] rehetra amin’ny fotoana tsy ampoizina.”—Mpitoriteny 9:11.

Soso-kevitra Hitsitsiana Vola

Mandrahoa sakafo.

Betsaka kokoa ny vola laninao raha misakafo matetika any amin’ny hotely ianao, na zatra mividy hani-masaka sy zava-pisotro. Mitaky fotoana sy ezaka aloha ilay hoe mikarakara sakafo ao an-trano e! Hitsitsy vola be mihitsy anefa ianao raha manao an’izany, sady ho tsara sy ho azo antoka kokoa ny sakafo haninao.

Mahaiza miantsena.

Ataovy lisitra ny zavatra hovidina, dia miezaha mba tsy hividy zavatra ankoatra ny ao anatin’ilay lisitra.
Raha ampy ny volanao dia mividiana maromaro amin’ny zavatra sasany raha izay no mora kokoa. Ataovy azo antoka anefa hoe tsy ho simba ilay izy raha tehirizina elaela.
Jereo raha misy zavatra mora kokoa nefa tsara.
Raha azo atao ny mividy zavatra amin’ny Internet, any aminareo, dia mety hanampy anao izany. Afaka mampitaha vidin-javatra mantsy ianao ao, tsy halaim-panahy hividy zavatra hafa, ary ho arakao kokoa ny vola mivoaka.
Tadiavo hoe aiza no misy fihenam-bidy, dia ampitahao ny vidin-javatra.

Mieritrereta alohan’ny hividianana zavatra.

Mamoaka vaovao foana ny mpamokatra telefaonina sy fitaovana hafa mba hahazoany vola. Mieritrereta kely àry aloha hoe: ‘Tena mila soloana ve ny fitaovako? Raha mila soloana ilay izy, izao dia izao ve? Ilay hiaka farany mihitsy ve no ilaiko?’

Amboary izay simba ary zavatra efa niasa vidina.

Kojakojao ny fitaovanao mba tsy ho mora simba. Raha simba ilay izy dia amboary raha tsy lafo be ny manamboatra azy. Mety hitsitsy vola koa ianao raha fitaovana efa niasa no vidinao.

Mambole.

Manana toerana azonao ambolena sakafo ve ianao? Hihena ny fandanianao raha mamboly ianao sady mety ho afaka hanakalo na hivarotra na hizara amin’ny olona.

“Mandamina mialoha an’izay hataony ny mazoto, ka mahomby.”—Ohabolana 21:5.

“Jerenay mivady matetitetika ny vidin’ny zavatra fampiasanay andavanandro dia feranay ny fampiasanay ny karatra fitrosanay.”—Miles, Angletera.

“Ataonay lisitra foana ny zavatra hovidinay dimy mianaka, alohan’ny handehananay miantsena.”—Jeremy, Etazonia.

“Amboarinay mifanaraka amin’ny vidin-javatra ny teti-bolanay dia manao tahiry izahay sao misy ilana vola tampoka.”—Yael, Israely.

“Rehefa misy simba ny fiaranay sy ny fitaovana ampiasainay ao an-trano dia ampianarinay hanamboatra an’ilay izy ny zanakay fa tsy hoe mividy vaovao. Miezaka koa izahay mivady mba tsy hanenjika hividy ny hiaka farany.”—Jeffrey, Etazonia.

“Mamboly legioma aho sady miompy akoho vitsivitsy dia mba mihena ny fandaniako. Izaho aza mbola afaka mizara legioma amin’olona.”—Hono, Myanmar.

Lehilahy mitango legioma isan-karazany eo an-jaridaina.