Yantikheliyaaya Akalasiya
3 Akalasiya! Nyuuva nhohimeriya nimananna oohirikarika inanna Yesu Kristu khwilyaawe wanipottoni, vano nnowa cani nhiyereraka uthepiya ni citthu cowoothiya? 2 Masi ihaavo yaapheelaaka wuukohani: Nnepa wowaarya mwaakhenleenyu, mwaakhenle nlattu wo weettela nlamulo awula nlattu wo waamini itthu mwiiwileenyu? 3 Kiireke wiira nyuuva nkhanle atthu oohicuwelaca? Wiipaceroni, mwaankhuluvela nnepa wowaarya, vano nna co nnaakhuluvela apinaatamu oopahuwa? 4 Kiireke wiira nnyo citthunnyo ciwiirannyenleni mahala? Kinaakupali wiira khaciwiirannyenleni mahala! 5 Vano, ule noovahani nnepa wo waarya ni nopanka miiriirya iriyariinyu, niireke nopanka iyo nlattu wo weettela itthu ineetthucihaaya nlamulo awula nlattu wo waamini itthu mwiiwileenyu? 6 Iyo phiitthu imocaaru yaamwiirannyenle Aparahaamu: Uyo “ahomwaamini Yehova ni iyo yaahomwiiriha wooniya ukhala nasariya.”
7 Khweeliini nyuuva nnaacuwela wiira ale arina waamini phikhanle asaana Aparahaamu. 8 Nhina Cowantikhiya Cowaarya, ahaavo moolumo ahimile khalayiiru wiira Nluku naahala uwoona ukhala anasariya amalaponi nlattu wo waamini waya, ciicammo ahonhimyeera khalayiiru Aparahaamu ihapari comaana, eeraka: “Nlattu wawaa amalaponi otheene anaahala ucaalihiya.” 9 Phimaana, otheene ale arina waamini anaacaalihiya wamoca ni Aparahaamu, aarina waamini.
10 Otheene ale ankhuluvela itthu yantikhiye munlamuloni aholaphakaciya, kontha uhantikhiya co: “Holaphakaciya ule nohiya weettela citthu cotheene cantikhiye nrooluni yonlamulo.” 11 Uhiya commo, unawoonannya wiira khaavo nooniya ukhala nasariya ni Nluku nlattu wo weettela nlamulo, kontha “nasariya naahala ukhala nkumi nlattu wo waamini wawe.” 12 Nlamulo khaninlipihiya nuwaamini. Uhiya commo, “ntthu neettela nnya citthunnya, naahala ukhala nkumi nlattu wo nnya citthunnya.”* 13 Kristu honithuma nhina ulaphakaciya naalaphakaciyeehu ninlamulo, atthunaka uyova ulaphakaciya waahaleehu ulaphakaciya hiiva, kontha uhantikhiya co: “Holaphakaciya ule khomeliye wanipottoni.” 14 Iyo itthwiiyo yeerannyeele wiira iparakha caahalaawe uvahiya Aparahaamu, caaphwanye ciicammo amalaponi nlattu wa Kristu Yesu, wiira hiiva naakhele nnepa wowaarya waakhuluvelihiyeehu nlattu wo waamini.
15 Mayamunna, kinuuluma kipankaka nlattanihero naapinaatamu: Napankiyaka vale nleehano, hataa ukhalaka wiira apankile atthu eeli paasi, nno nleehanonno khaavo nomalamaliha ni hataa wuncerera itthu. 16 Coo, nnyo citthunnyo aakhuluvelihiye Aparahaamu ni ucuulwaawe. Cowantikhiya Cowaarya khacineera “nuucuulwaawe wotheene,” ukhalaka toko wiira anaaciya atthu enci. Uhiya commo, nnyo cineera “nuucuulwaawe,” aaciyaka ntthu mmoca paasi, Kristu. 17 Uhiya commo, mi kinwiirelani co: Nlamulo naawile cinavinreene myaakha 430, khanimmalamaliha nleehano naapankilyaawe Nluku, wiira ciicammo nihimalihe ile yaakhuluvelihilyaawe. 18 Wakhala wiira ninhala waakhela itthuvo nlattu woweettela nlamulo, paasi khaninhala waakhela nlattu wookhuluvelihiya. Masi Nluku ahonthoonyera unamaana Aparahaamu anvahaka itthuvo nlattu wonkhuluveliha.
19 Vano nlattuni waakumiheriyaaya Nlamulo? Nno naakumiheriye wiira cooniheriye citthu coohinamaana caapankaaya atthu, mpaka waahalaaya uwa ucuulu waakhuluvelihiye; nno nlamulonno naahimyaciye ninlayikha, avareliyaka nteko namakavihera* nleehano. 20 Masi nleehano napankiyaka nintthu mmoca, pooti nno nipuronno wahinkhalaawe namakavihera onleehano , iyo phiitthu ipankilyaawe Nluku, uyo aari veekha ukati waakhuluvelihaawe ila itthwiila. 21 Niireke wiira nlamulo ninaavirikaniha citthu cikhuluvelihilyaawe Nluku? Mena vakaani! Kontha unari wiira nahokumiheriya nlamulo naahala ukhitiri uvaha ukumi, isariya yaahala uwa nivareliyaka nteko nlamulo. 22 Masi nuulumo na Nluku nihovahacera citthu cotheene matampi. Coo, ale ammwaamini Nluku pooti wanaakhelaaya citthu caakhuluvelihilyaawe otheene ale ammwaamini Yesu Kristu.
23 Masi, hiiva nihinaaya wancera umwaamini Yesu, naakhikiceriya ninlamulo, niwehereraka nlamulo naahala uhimyaciya ni Nluku. 24 Phimaana, Nlamulo nihokhala khampa ntthu nonihoolela wiira anipiihe wa Kristu, wiira hiivano nooniye ukhala anasariya nlattu wo waamini. 25 Masi nna va uwilyaaya waamini, khaavo nonihoolela-tho.
26 Khweeliini otheene cinyu nkhanle asaana a Nluku, nlattu woomwaamini Kristu Yesu. 27 Kontha otheene nyuuva mpattisiye va wiira mmwaataanane Kristu, nhonwara Kristu.* 28 Khaavo nyuuta, nkereeku, ipottha awula ntthu hikhanle ipottha, ni hataa khaavo nlopwana awula nthiyana; otheene cinyu nkhanle ntthu mmoca ni nnaamwaataanana Kristu Yesu. 29 Uhiya commo, wakhala wiira nyuuva nkhanle atthu a Kristu, paasi khweeliini nkhanle ucuulu wa Aparahaamu, ni nnaahala waakhela yoohiyeria yaakhuluvelihiyaawe Aparahaamu.