Atamu ni Hawa khayaamwiiwelenle Nluku

Nihuku nimoca, Hawa naryeene veekha, yahomphwanya innwaa ni yahonkoha co: “Ikhweeli khweeliini Nluku nawuukhottiiherani ulya mihokorokho cotheene cirinnya mu?” Hawa ahaakhula eeraka co: “Mena. Hiiva pooti wanlyeehu mihokorokho cotheene, masi uhaavo mmoca nihinlamuliyeehu ulya. Nalyaakavale, ninaahala ukhwa.” Vano innweeyo yahomwiirela co: “Khannohalaca ukhwa. Mwalyaacaka ula nhokorokhoola, nnohalaca ukhala khampa Nluku.” Niireke iyo itthwiiyo yaari ikhweeli? Mena. Masi Hawa ahaamini itthu innwaa yaahimilyaaya. Ikwaha Hawa aawehaawe uyo nhokorokhooyo, nrimaawe wantepa upheela wiira alyeeke. Phimaana, Hawa ahorukula ni aholya. Ciicammo, ahonvaha Atamu ni uyo aholya. Atamu ancuwela wiira aahimwiiweleleke Nluku, anhala ukhwa. Hataa acuwelaka, uyo aholya uyo nhokorokhooyo.

Wahovira ukati ni nenno nihukunno, Yehova ahonkoha Atamu ni Hawa isiyani yaawiirihile ulya uyo nhokorokhooyo. Hawa aakhunle wiira aalilye kontha innwaa phanthepenrye. Ni Atamu enre wiira aavahiye ni Hawa, phimaana alyaaka. Atamu ni Hawa khayaamwiiwelenle Nluku. Phimaana, Yehova aahowoomola ujardim yo Eeteni ni wankhora va aheesa malayikha ni ikatana yo mooro. Nluku aapankile commo wiira Atamu ni Hawa ahituruwele-tho njardimmo.

Niireke inwaa inawuulumaca? Mena, toko nincuweleehu inwaa khacinooolumaca. Uhimya ikhweeli naari nlayikha nootakhala nrima neerihile inweeyo wuulumaca wiira ninthepyace Hawa. nno nlayikha nootakhalanno nineehaniya Sotwani Tiyapu. Yehova hokhuluveliha wiira naahala unttarusa ni wahoolo umalamaliha nno nlayikhanno, yeerannyaaka iyo itthwiiyo Sotwani khanhala waatheperya tho atthu uhimwiiwelela nluku.