Aparahaamu ahottehiya

Aparahaamu ahomwiitthuciha mwanawe, Isaaki, unfenta Yehova ni ukhuluvela citthu cotheene Yehova nohimyaawe wiira cinaahala wiirannya. Masi ukati Isaaki aarinaawe myaakha 25, Yehova ahonlepela Aparahaamu upanka itthu yoorika cinene. Yaari isiyani yeeyo?

Nluku ahomwiirela Aparahaamu co: “Wakivahe itthuvo. Ula nkwahoola akimpheela itthuvo yonama. Kinompheela mwaamwanaa. Unkuse mwaamwanaa Isaaki mpaka mwaako uneehaniya Moriyaa. Wamwiive ni ukivahe khampa ikuttho yoopahiya. Aparahaamu khaacuwela nlattuni Yehova wanlepelaawe upanka commo, masi ahomwiiwelela.

Waaseele, Aparahaamu ahoncisa mwanawe Isaaki wicisuru ni yahorwaaca umwaakoni Moriyaa nkhayi ni anantekwaawe. Anavinreene mahuku mararu weettiyaka, wahopacera wooniya mwaako Moriyaa. Aparahaamu ahowiirela anantekwaawyaayo wiira aweherere vaava. Aparahaamu ahocisa mwaalo ni ahonlepela Isaaki wiira ateese ikhuni ni yahancera urwaa umwaakoni ooyeeli caya paasi. Isaaki ahaakoha athumwaanyaayo co: “Inama ninhaleehu uvaheeyo iri vayi?” Aparahaamu ahaakhula eeraka co: “Uhikhale niiwasi-waasi. Nluku naahala univaha.”

Ukati waaphiilyaaya umwaakoni Moriyaa, ayo yaahateka nipuro naahalaaya ivaha itthuvo. Vano, Aparahaamu ahomwaatalela Isaaki ni ahontthuka meetto ni myoono.

Aparahaamu ahocisa mwaalo wiira amwiiveke Isaaki. Masi Yooyo ukatyuuyo, nahokhumelela nlayikha na Yehova ni naahokhuwela niiraka: “Aparahaamu! Uhimwiive Isaaki! Vano kihocuwela wiira khweeli unaamwaamini nluku, kontha khukhottile ukivaha mwaamwanaa.” Aparahaamu ahoweha mphantte nkiina ni ahoona ikhontwaa inatthukeleliye wamwirini. Woohipica, ahontthukula Isaaki ni ahorweela iyo ikhontweeyo ni ahovaha itthuvo.

Ikhumelo nne nihukunne, Yehova ahompatthanana Aparahaamu. Unaacuwela nlattuni? Kontha Aparahaamu ampanka citthu cotheene caalepeliyaawe ni Yehova, hataa hicuwelaka kontha isiyani Yehova anrumaawe upanka.

Yehova ahomwiirela-tho Aparahaamu co: “Kinaahala wuuvaha iparakha ni kinaahala uwinciviha asaanaa ni asiculaa.” Iyo maanaaya wiira Yehova anhala waavaha iparakha atthu otheene ampanka citthu comaana. Masi aahala waavaha iparkha nlattu waamuci a Aparahaamu.