Aparahaamu ni Sara yahomwiiwelela Nluku

Wakhiviru ni u Babeeli, yahaavo isittatti yeehaniya Uri. Iyo isittattiiyo atthwaayo khayanswalela Yehova, masi yaaswalela anluku oohikhweeli. Masi nwo, ahaavo nlopwana mmoca aari oovirikana naayo. Uyo nlopwanooyo eehaniya Aparahaamu ni answalela Yehova.

Yehova ahomwiirela Aparahaamu co: “Ukhume uwanuwaa ni ilapwaa. Urwee nipuro kinhalaaka wuuthoonyihera.” Ni Yehova ahomwiirela-tho Aparahaamu co: “Weeva ni amucyaa nnaahala winciva ni nlattu wawaa, mi kinaahala waapankela citthu comaana atthu o ntuniyani motheene.”

Aparahaamu khaacuwela nipuro eereliyaawe ni Yehova wiira akhale. Waahookhalaru commo, uyo ahonkhuluvela Yehova ni ahomwiiwelela. Phimaana, Aparahaamu ni amwaarawe, yeehaniya Sara, nkhayi ni athumwaane, yeehaniya Tera, ni hataa mwanculawe, eehaniya Lo, yahotthukaca mirintti caya ni yahorwaa, khampa caarumiyaaya ni Yehova.

Aparahaamu aarina myaakha 75 ukati uyova ni amucyaawe waaphiilyaaya ilapo Yehova yanrumilyaawe urwaa. Iyo ilapweeyo yeehaniya Kanaa. Uphiya waya nwo, Yehova ahomwiirela Aparahaamu co: “Ila ilapweela yotheene kinawaavaha asanaa ni asiculaa.” Masi, uyo ukatyuuyo Aparahaamu ni Sara yahooluvala ni yaari ahinannyara mwaana. Vano Yehova aahala uwinciviha cani amuci a Aparahaamu?