Aparahaamu ni Sara yahonyara mwaana!

Aparahaamu ni Sara yahoviriha myaakha cinci anathelanne. Ayo yahohiya inupaaya yomaana ni vano yaakhala mmatendani. Masi Sara khawanriipa nrima, kontha anankhuluvela Yehova.

Sara ampheela ukhalana mwaana. Phimaana, ahomwiirela Aparahaamu co: “Nantekwaaka Akaari annyaraka mwaana, uyo mwaanooyo nohala ukhala khampa awaaka.” Wahoolo, Akaari ahonyara mwaana ni ncina nawe naari Sumayili.

Wahoolo, Aparahaamu narina myaakha 99 ni Sara 89, ayo yahowaakhela aletto. Yaari alopwana araru. Unaacuwela ayo alopwanaayo yaari apani? Yaari malayikha! Aparahaamu ahaalepela wiira yonkome wantthuucini wiira alye vakaani. Nlayikha nimocanno nahomwiirela Aparahaamu co: “Mwaahiyu, amwaaraa anaahala unyara mwaana.” Sara aari ntendani ni aanawiiwa mwahooyo. Uyo aheera co: “Mi kihooluvala. Vano kinhala uyara cani?”

Masi uvira waya mwaakha, khampa nlayikha na Yehova naahimilyaaya, Sara ahoyara. Ncina naavahiyaawe mwaanooyo naari Isaaki, maanaaya wiira “uthyaa.”

Ukati Isaaki aarinaawe myaakha 5, Sara ahomoona Sumayili anhuvihaka Isaaki. Sara khaapheela umoona Isaaki ahuvihiyaka. Phimaana, ahonlepela Aparahaamu wiira amoomole Akaari nkhayi ni mwanawe, Sumayili. Wuupaceroni, Aparahaamu ahokhotta. Masi Yehova aahomwiirela co: “Umwiiwelele Sara. Mi kinaahala unkhikicera Sumayili. Masi itthu yuuhimenryaaka, wiira amucyaa anaahala winciva, inhala wiirannya nlattu wa Isaaki.