Mwiiriirya weerannyeele u Mar Vermelho

Ukati Farawoo waacuwenlyaawe wiira asarayeli ahokhuma Wiciipitu, aheerela anakhottwaawe co: “Ntthenkace ikaaro caka co ikhottonnyo! Nttwee naatthimakele! Khanaalamuliya waahiya.”

Ukati waatthenkacaaya ikaaro caya co ikhotonnyo, Yehova eera aahimeryaka asarayeli mapuro yaalamuliyaaya uvira. Manannani? Uthana, Yehova aavarela nteko mahutte, vano uhiyu aavarela nteko nihutte noopharela khampa mooro. Unavinreene ukati, ayo yahophiya ipahari ineehaniya Mar Vermelho ni Yehova ahaaruma wiira yeemele vakaani.

Anaryeene nne nipuronne asarayeli yahomoona Farawoo ni anakhotto awe aatthimakelaka, vano ayo khayoona nipuro nootthawela kontha uhoolo waya yaari ipahari ni uttuli waya yaanaawa anakhotto a Farawoo. Asarayeli yahopacera woova cinene ni yeera nimpheela uhokoleela Wiciipitu. Masi ukhala wiira Moceesi anankhuluvela Yehova, uyo aheera co: “Nhoove ni mweemele, moone mananna Yehova nohalaawe unoopola.”

Vano Yehova, aheerela asarayeli wiira yiitthenkace ni apacenre weetta nkwaha. Ule uhiyuule Yehova aheeriha nihutte neettiha asarayeli uturuwela uttuli. Vano nno nihuttenno naheemela uhoolo wa anatoropa o Wiciipitu. Vano mphantte warwaaya asarayeli wahopacera woonnya, masi mmphantti waaweelaaya anatoropa o Wiciipitu wahoripela cinene.

Yehova ahomwiirela Moceesi wiira athoonye ipahariiyo. Woottharanana, Yehova ahopacera uvekhulela ipahariiyo uhiyu wootheene ni iphyoo yo kuru cinene mpaka ipahariiyo ukawanyaa iriyariru ni yahokhumelela iparapaara. Asarayeli otheene yahopacera uvira iyo iparapaareeyo woohittapwa mpaka ulapuwa.

Farawoo ni anakhottwaawe yaahopacera waatthawelela asarayeli aviraka iyo iphirweeyo. Masi Yehova aheeriha ayo anakhottwaayo uhiiwanana, ukwanyuwaca ikaaro caya nnyo, mpaka anakhotto ayo yahopacera ukhuwela yiiraka co: “Nttwee nituruwe!” Yehova naawaakiha asarayeli.

Analapuwileene asarayeli otheene, Yehova ahomwiirela-tho Moceesi wiira athoonye-tho maacaayo, ukati waathoonyilyaawe miphantte coomiili co maacyaayo yahaakhuneela anatoropa o Wiciipitu. Vano Farawoo nkhayi ni anatoropaawe yahokhwa.

Anaryeene mphantte nkhwaawe, asarayeli yahoona itthu Yehova yampankenlyaawe. Wiira yoonihere usukhuru, athiyana otheene o Sarayeeli yahopacera wiina ni wiipa yiiraka co: Nimwiipele Yehova kontha otheene ninaacuwela mananna uyo ryaawe nakuru! Uyo horihela mpahari ikhavalu ni ale yeettiha. Atthu otheene yahotteeliya. Vano asarayeli yahoopwa!