Yehova ahonthanla Josuwe

Moocesi aahahoolela asarayeli myaakha cinci. Masi vano ukumyaawe waahophiyera umwiisooni. Yehova aahomwiirela co: “Weeva khunhala waakusa asarayeli waarwaanaka u Kanaa, ilapo kaakhuluvelihilyaaka. Masi kinaahala uwoonihera uttayuuttayi.” Vano Moocesi aahonlepela Yehova wiira anthanle ntthu nkhwaawe aahala waahoolela asarayeli ni Yehova aahonthanla Josuwe.

Nuuwakatyaaya, Moocesi ahaahimeerya asarayeli wiira anhala ukhwa woohipica. Ciicammo ahaahimeerya wiira Yehova honthanla Josuwe wiira aapiihe u Kanaa. Moocesi aahomwiirela Josuwe co: “Uhoove, Yehova naahala wuukavihera.” Umaliha wawe wuulumaca, Moocesi aahowela mwaako weehaniya Neepo. Waculu waya mwaako, Yehova aahomoonihera Moocesi ilapo yankhuluvelihilyaawe Aparahaamu, Isaaki ni Yakopi. Vano Moocesi aahokhwa narina myaakha 120.

Yehova aahomwiirela Josuwe co: “Ulapuwe mooloko Yortani ni urwee u Kanaa. Mi kinaahala wuukavihera khampa kankaviheraka Moocesi. Usome mahuku otheene iliivuru yo malamulo kaavahilyaaka a sarayeli. Uhoove, ulipe nrima, urwee ni upanke citthu cotheene kuurumilyaaka.”

Vano Josuwe ahaaruma anamawehaweha eeli wiira yawehawehe isittatti yo Yerikho. Ihantisi inttharanana ninaahala ucuwela itthu yiirannyeele nwo. Ukati anamawehaweha waaturuwilyaaya, yaahohimyaca wiira waari ukati womaana wiira akele u Kanaa. Vano Josuwe aahowiirela asarayeli wiira yiitthenkace kontha yanhala ulapuwa mooloko Yortani. Uyo ahaaruma anankuttho yaacisile ikasa yo nleehano wiira ahoolele. Uphiya waya, umoolokoni Yortani yaahoona wiira moolokooyo waahocara cinene ni yaari itthu yowoopiha ulapuwa maaci anacanreene. Masi ukati ayo waapacenryaaya unyakela maacyaayo, moolokooyo waahomaala uviranwo. Anankutthwaayo yaaheemela iriyari moolokooyo wiira yaaweherere a sarayeli otheene ulapuwa. Nnaakhitiri woona wiira nna ntikhinihonna naahowuupusera itthu Yehova yaapankilyaawe u Mar Vermelho?

Cinavinreene myaakha cinci, asarayeli yaahokela ilapo Yehova yaakhuluvelihilyaawe. Ayo pooti waatekaaya inupa ni waala miri caapheelaaya. Yaari itthaya yomaana ni yooreera.