Raapi ahowiipithiha anamawehaweha

Ukati anamawehaweha waaphiilyaaya u Yeriko, yaalukamile uwannyawe nthiyana eehaniya Raapi. Masi ukati a mwene o Yeriko waacuwenlyaaya wiira uwannyawe nthiyana eehaniya Raapi yaaholukama atthu yaawile uwehaweha, yaahaaruma anakhotto wiira yaavare ni yaatthuke. Ukati anakhottwaayo waaphiilyaaya vate vaa, Raapi aahowiirela anamawehawehaayo wiira yiipithe. Vano uhula wawe nkhorooyo, aahowiirela anakhottwaayo co: “Anamawehawehaayo yaari vaava, masi ahokhumaca. Mwaatthawelelaceke, pooti nnaahala waaphwanyaca niiphiro.”

Vano anakhottwaayo ukhumaca waya, Raapi aahowiirela anamawehawehaayo co: “Mi kinookaviherani kontha kinaacuwela wiira Yehova noopheela waavaha asarayeli ila isittattiila. masi sontte, nkikhuluvelihe wiira nnaahala ukoopola miiva nkhayi ni amucyaaka.” Anamawehaweha yaahomwaakhula co: “Ninawuukhuluveliha wiira atthu otheene anhala ukhala mpaani uwannya moomuu anaahala woopwa. Masi uhaana watthukelelaka ula nkhoyi wookhwiloola wacanelani va.”

Anamawehawehaayo umaliha waya umuulumana Raapi, yaahokhumela wacanelani ni yaahottawela umwaakoni ni yaahoviriha mahuku mararu aneepithile wonwo. Uviriha waya mahuku mararu aneepithile umwaakoni, yaahorwaa umoonanana Josuwe. Vano asarayeli otheene yaaholapuwa mooloko Yortani. U Yerikho yaari isittatti yuulupale asarayeli yaapacenryaaya utuphela. Yehova ahaaruma a Sarayeeli urukureerya iyo isittattiiyo mahuku 6. Wo khula nihuku urukureerya ikwaha imoca. Nihuku no na 7, Yehova ahaaruma a Sarayeeli urukureerya ikwaha 7. Anankutthaayo yiipaka mapalapatta ni a sarayelyaayo otheene yakhuwelaka niikuru caya cotheene. Vano isiri co ile isittattiile caahomora! Masi inupa ya Raapi yaatekiye waculu waya nnyo isirinnyo, khayaamonre. Raapi aahonkhuluvela Yehova ni aahopanka itthu eereliyaawe naanamawehawehaale. Phimaana, uyo nkhayi ni amucyaawe yahoopwa.