Umwaakoni karmeelu ahocuwannyaa Nluku eekhweeli

Umwene wo maloko 10 waholamuleliya ni mamwene menci ootakhala nrima, masi mwene aatepile utakhala nrima eehaniya Akaapi. Uyo ahaathela athiyana ootakhala nrima yeehaniya Yesapeeli. Yesapeeli ni Akaapi yahowiiriha atthu otheene o Isarayeli unswalela nluku oohikhweeli eehaniya Pahaali. Ciicammo yahorumaca wiiviya maporofeeta otheene a Yehova. Isiyani Yehova yaapankilyaawe? Yehova ahonruma porofeeta Eliyasi wiira amuulumane Akaapi.

Porofeeta Eliyasi ahomwiirela Akaapi wiira nlattu wo citthu coohinamaana caapankaawe, u Isarayeli yanhiya urupa ipula. Ni cahovira myaakha miraru ihirupaka ipula u Isarayeli. Phimaana, u Isarayeli wotheene yahothwaa iyoolya ni apoovu yahaavola itala. Unavinreene ukati, Yehova ahonruma-tho porofeeta Eliyasi wiira awuulumane amwene Akaapi. Amwene Akaapi umoona waya Eliyasi yahomwiirela co: “Citthu cotheene cineerannyaa nlattu wawa.”Porofeeta Eliyasi ahowaakhula co: “Nlattu waawaka? Keera hinyu mwaatheperya apoovu unswalela Pahaali. Masi nttwee nipanke mwaavi wiira nincuwele Nluku eekhweeli. Mwaalattule apoovu nkhayi ni maporofeeta a Pahaali wiira nakumaane umwaakoni Karmelu.”

Apoovwaayo yahorwaa mpaka umwaakoni karmeelu uphiya waya nwo Eliyasi ahowiirela co: “Nyuuva nhaana unthanla nluku nnopheeleenyu unswalela waakhala wiira Yehova awula Pahaali. Nipanke mwaavi wiira nincuwele Nluku eekhweeli.” Maporofeeta 450 a Pahaali ahaana yatthenkacaka nkuttho wiira anvahe nlukwaaya Pahaali. Ni miiva kinaatthenkaca nkuttho wiira kinvahe Nlukwaaka Yehova. Vano nluku nohala ukurusa mooro wiirimu wiira apahe nkuttho uvahiyaawe, uyo phiri Nluku eekhweeli.

Maporofeeta a Pahaali Yahotthenkaca nkutthwaaya ni yaheesa wakhilompini. Ayo yahoviriha nihuku notheene yanlompaka Pahaali. Masi Pahaali khaawaakhula phimaana porofeeta Eliyasi ahancera waatarawaca ayo maporofeetaayo awiirelaka co: “Atthunaka Pahaali naarupa. Nkhuweleke venci pooti naahala wunwa. Waahela maporofeeta a Pahaali akhuwelaka masi khiivo Yeerannya

Vano porofeeta Eliyasi aheesa nkutthwaawyooyo wakhilompini ni ahonaaniha ni maaci waculu va. Vano aholompa eeraka: “Sontte pwiiya Yehova, nwoonihere atthu otheene ari nna nipuronna wiira nyuuva Nluku eekhweeli.” Woohipica Yehova ahokurusa mooro wiirimu ni ahopaha nkuttho waari wakhilompini vaa. Vano asarayeli otheene yahokupali wiira Yehova Nluku eekhweeli. Ni nenno nihukunno maporofeeta 450 a Pahaali yaheevakaciya.

Vano porofeeta Eliyasi ahoona nihutte nankaani naattamelaka. ni ahowiirela a mwene Akaapi co: “Ihophiya ipula. Mwaakuvyaace wiira nwele ikaarweenyu yo ikhotto ni nrwee uwaani ihinaaya wancera urupa ipula.”Vano wiirimunnwo wahoripelihana, yahowuka iphyoo ni yahorupa ipula yinci. Amwene Akaapi yahowela ikaarwaayeeyo yaheettiha venci. Masi porofeeta Eliyasi akaviheriyaka ni Yehova, ahokhitiri uthawa venci mpaka uvikana ikaaro yo a mwene Akaapi. Ukhuma nne nihukunne u Isarayeli yahohokoleela urupa ipula. Masi ahaavo masakha makhwaawe porofeeta Eliyasi aahalaawe waanana.