Yehova ahonwacera porofeeta Eliyasi

Ukati apwiyamwene Yesapeeli waahimeryaaya citthu cotheene caawiiranyeenle maporofeeta a Bahaali, yahorusiya cinene. Ni yahonruma ntthu wiira anhimeerye Eliyasi wiira meelo kinaamwiiva khampa aapankilyaawe maporofeeta a Bahaali. Eliyasi wiiwa wawe, ahoova cinene ni ahotthawela muuthakoni. Uphiya wawe nwo ahonlompa Yehova eeraka: “Sontte Yehova ukumyaaka uhokimalela kimpheela ukhwa.” Eliyasi ahoocya cinene ni ahorupa wamwirini.

Vano Yehova ahoruma nlayikha, ni nno nlayikhanno nahonwusa Eliyasi ni nahomwiirela co: “Eliyasi wunwe, kihoowaanela itthu wiira ulye, Eliyasi ahoona iphaawu yoorukuryeerya yooviha ni icaaru yo maaci.” Uyo aholya uwurya ni ahoturuwela urupa. Vano nlayikhanno nahomunwusa-tho ni nahomwiirela co: “Ulyeeke-tho vakaani, kontha uhaana ukhalana ikuru wiira upanke nkwaha muulupale.” Ulyaawawe, Eliyasi aheetta nkwaha wo mahuku 40 mpaka waaphiilyaawe u mwaakoni Orebe. Uphiya wawe nwo ahokela nnikhukuni ni ahorupa. Masi Yehova ananwacera Eliyasi ni ahonkoha kontha isiyani aaryaawe oriipiya nrima ni kontha isiyani waatthawilyaawe. Eliyasi ahaakhula eeraka: “Oo Yehova, asarayeli otheene yaakhuluvelihile wiira yaahala wuuswalelani nyuuva paahi. Masi iyo kahi phiitthu impankaaya. Ayo ahowiivakaca maporofeeteenyu ni vano ampheela ukiiva miiva.”

Yehova ahonlepela Eliyasi ukhuma nnikhukunimmo ni wiira arwee eemele waculu mwaako. Vano ahomoonihera ikuru cawe. Wiipaceroni, Yehova ahomoonihera iphyoo yo ikuru cinene. Uvira waya, Yehova aheeriha itthayeeyo uttettemela venci ni ahokumihera mooro mwinci. Wiimaleloni, Eliyasi aheewa ncuu nankaani ni nomaalelyaa. uyo ahokhuneela ikhoveeyo ni ahokhumela vate. Vano Yehova ahonkoha co: “Nlattuni weeva utthawilyaa?” Porofeeta Eliyasi ahaakhula eeraka co: “Kihanle veekhaaka, khaavo nooswalelani-tho.” Yehova ahomwiirela Eliyasi co: “Khuri veekha, ahaavo a asarayeli ookhalaka imiliyawu 7 ankiswalela.” Vano Yehova ahomwiirela wiira amwiihane Elisewu wiira akhale porofeeta. Woohipica, Eliyasi ahopanka itthu yaarumiyaawe ni Yehova. Nineetthuca isiyani niitthu yaamwiirannyeenle Eliyasi? Napankaka itthu Yehova innilepelaawe uyo naaniwacera. Vano nttwee noone citthu caamwiirannyeenle Eliyasi myaakha caavinre.