Mwaana a nankhweli ahonwelelihiya

Myaakha cahaarupaaya ipula, Yehova ahonruma Eliyasi wiira akhume Isarayeli ni arwee ilapo yeehaniya u Sarefaa. Kontha nwo yahaavo athiyana amoca nnankhweli yaahala unvaha iyoolya. Uphiya wawe nwo, Eliyasi ahowoona athiyana oohuva Yehova awaacaawyaayo yarokotthaka ikhuni. Vano Eliyasi ahaalepela maaci oowurya ni iphaawu wiira akhuure, vano anaankhwelyaayo yahaakhula yiiraka co: “Mi akinaphaawu, kirina iphepa impankeliya iphaawu ni makhura vakaani paahi ni nnyo citthunnyo cinhala ukitosera miiva ni mwaamwanaka paasi” Eliyasi ahowaakhula eeraka co: “Yehova hokhuluveliha wiira mwakipankelaka iphaawu, iphepeenyu ni makhureenywaayo khanhala umala mpaka inhalaaya urupa ipula.”

Vano anaankhwelyaayo yaahoryaa uwannyaya ni yahompankela iphaawu Eliyasi. Ni khampa Yehova caakhuluvelihilyaawe, anaankhwelyaayo ni mwaamwanayooyo khayaamalenle iyoolya mpaka wancenryaaya urupa ipula.

Masi yaheerannya itthu yooriipiha nrima, mwaana anaankhwelyooyo ahowerennya cinene ni ahokhwa. Vano anaankhwelyaayo yahonsonttela Eliyasi wiira aakavihere. Eliyasi ahonwyaa mwaanooyo ni ahonrweeha ikwaartu yooculu, ahomwaatalela wakorini ni aholompa Yehova eeraka: “Sontte, umunwelelihe ula mwaanoola.” Itthu Eliyasi yalepenlyaawe yaakhala toko khayaahala wiirannya. Kontha ule ukattyuule ari hiinaaya wooniya ntthu ookhwa onwelelaka ni ale anaankhwelyaale ni mawanayooyo khayapanka mphantte wo apoovu a Yehova

Masi waahookhalaru commo mwaanooyo ahonwelelihiya. Vano Eliyasi ahowiirela anaankhwelyaayo co: “Mmooneke, mwamwaninyuyo honwelela.” Anaankhwelyaayo yahotteeliya nrima cinene, mpaka yahomwiirela Eliyasi co: “Vano kihaamini wiira nyuuva porofeeta ni citthu cotheene cinhimyeenyu cikhanle cokhweeli ni cinkhuma wa Yehova!”