Yerusalemu ahokwanyulaciya

Cahovira myaakha cinci apoovu o Yutaa ananyanyanle Yehova ni yaaswalelaka anluku oohikhweeli. Yehova ahaaruma maporofeeta wiira yaakavihere apoovu o Yutaa. Masi ayo apoovwaayo khayaapheela uwiiwelela maporofeeta. Mpaka yanthyaa citthu caahimeeriyaaya ni maporofeeta. Isiyani Yehova yaahalaawe upanka wiira amalamalihe uswali woohikhweeli u Yutaa?

Ule ukatyuule mwene o Babilooniya eehaniya Nabukodonosor, antuphela ni waakheelela isittatti cinci. Mpaka uyo ahotuphela isittatti yo Yerusalemu ni ahoncisa mwene Joaquim, ahooleli o Yerusalemu, anakhotto ni atthu akhwaawe o Yutaa ahaarwaana u Babilooniya. Ciicammo ahocisa mihakhu co ntempulu ya Yehova. Vano, mwene Nabukodonosor ahonthanla Zetekiya wiira akhale mwene nipuro na Joaquim.

Wuupaceroni, Zetekiya ammwiiwelela mwene o Babilooniya. Masi maporofeeta owootha ni atthu akhwaawe, yaahomwiirela Zetekiya wiira anrukunuwele mwene o Babilooniya. Vano Jeremiya ahaahimerya atthwaayo eeraka co: “Mwahiyaka umwiiwelela mwene o Babilooniya, anaahala ukhumelela masakha. Atthu enci inaahala waavola itala, anaahala uweryaaciya ni anaahala ukhwa”.

Uvira waya myaakha 8 Zetekiya aaholakela unrukunuwela mwene o Babilooniya. Ni aholepela ukaviheriya ni anakhotto o Wiciipitu. Vano, mwene Nabukodonosor ahaaruma anakhottwaawe urukureerya u Yerusalemu. Jeremiya aahomwiirela Zetekiya co: “Wiivaherere wa mwene o Babilooniya! Yehova himile wiira weevahereraka vale atthu otheene anaahala woopwa. Ni waahiivaherereke, mwene o Babilooniya naahala waaruma atthu wiira apahiye Yerusalemu ni weeva unaahala utthukiya.” Zetekiya ahaakhula eeraka: “Wiivaherera mi? Akintthuna!”

Uvira waya mwaakha mmoca ni nuusu, a Babilooniya yahokhitiri ukela u Yerusalemu ni yaahopaha isittattiiyo. Ayo yaahopaha itempulu ya Yehova, yaahowiivakaca atthu enci ni yahaacisa atthu imiliau cinci yaarwaanaka u Babilooniya wiira yaatthukele.

Masi waahookhalaru wiira ahootthawa, a Babilooniya yahokhitiri unvara ni urwaanela mwene Nabukodonosor. Mwene Nabukodonosor ahoruma wiiviya asaana a Zetekiya uhoolo wawe. Nuuwakatyaaya, Nabukodonosor ahonttemulaca miithwaayo ni aahontthukela nkhattya. Zetekiya ahokhala mmo nkhattyammo mpaka waakhwilyaawe. Masi Yehova ahaakhuluveliha apoovu o Yutaa eeraka co: “Caviraka myaakha 70, kinaahala wuuturuselani u Yerusalemu.”

Masi mwancuwela wiira ahaavo amirawo yanfenta Yehova yaacisiye ciicammo u Babilooniya? Isiyani yaahala wiirannyeeha?