Amirawo acese yaamwiiwelenle Yehova

Amwene Nabukodonosor yaapheela a saana o mamwene o Yuuta wiira yavareke nteko upalaasiyu waya. Vano, yahonruma nhooleli aanatoropa eehaniya Aspenas wiira aathanle asaana o mamwene yaarina ukumi womaana ni oowalaala. Ayo asaana o mamwennyaayo, yanhala utthenkaciya myaakha miraru ni yanhala wiitthucihiya usoma, wantikha ni wuulumaca iluuka yo Babilooniya. Yaahala ulya wameecani yo amwene ni nkhayi naatthu otheene yaahala ukhala upalasiyu. Nhina ayo amirawaayo, aahonthanliya Daniele, Ananiyasi, Misayeli ni Azariya. Uphiyawaya u Babilooniya Aspenas ahaavahaca macina makhwawe wiira yiihaneliye ni yahopacera wiihaniya co: Beltessazar, Sadraki, Mesaki ni Apeteneku. Niireke citthu ceetthucihiyaaya anari u Babilooniya canhala umalamaliha upatthani waarinaaya ni Yehova?

Ayo amirawo acesyaayo, yaholakela umwiiwelela Yehova. Ayo yancuwela wiira a Babilooniya anlya coolya cinkhottihiya munlamuloni na Yehova. Phimaana, yahomuulumana Aspenas ni yaahonlepela wiira khayaahala ulya iyoolya yaamwene. Aspenas aahakhula eeraka: “Masi wakhalaka wiira nyuuva khannohala ulya iyoolya yaamwene ni awoonakani nyuuva wiira nnaavololaca mmakhuvani, miiva kinaahala wiiviya”

Vano Daniele aahorwaa umuulumana nlopwana aawacera amirawo, amwiirelaka co: “Ninawuulepelani wiira nnittehattehe. Mpaka mahuku 10 nnivahe coolya cikhwaawe ni maaci. Yaviraka ayo mahukwaayo, nnilikanihe naamirawo akhwaawe anlya iyoolya yaamwene.

Nlopwana aawacera amirawooyo aahotthuna ni uvira waya mahuku 10, Daniele nkhayi naasipatthannyaawe phaarina ukumi womaana cinene waavikana amirawo yaalya iyoolya yaamwene. Yehova ahotteeliya venci nlattu wo woona ayo amirawaayo yawiiwelelaka. Mpaka Yehova ahonvaha ucuwelaca Daniele wiira akhitiri utaphulela citthu coolohiya.

Umaliha waya myaakha miraru yatthenkaciyaka, Aspenas ahaacisa amirawo otheene ni ahaarwaana waamwene Nabukodonosor. Amwene yaahowoopana mwaha ayo amirawaayo ni yaahonenela wiira Daniele, Ananiyasi, Misayeli ni Azariya yaari oocuwelaca cinene ni oowehaweha. Phimaana, yahaathanla ayo amirawo acesaayo wiira avare nteko upalaasiyu waamwene. Khula itthu amwene yaalakelaaya upanka, yaanalepela ankhili ayo amirawaayo. Yehova ahonkavihera Daniele ni naasipatthannyaawyaayo ukhala ucuwelaca waavikana anamacuwelaca ni anahako otheene aamwene.

Daniele, Ananiyasi, Misayeli ni Azariya yaakhala naamalaponi ni yaahottalivana naamucyaaya. Waanookhalaru commo, ayo khayanliyalacile Yehova. Vano weeva, niireke unahala umuupuwela Yehova hataa nkhalaka naamalaponi awula ukhalaka uttayi naamucyaa?