Ester ahowoopola apoovwaawe

Ester aari mwanthiyana o Yuuta aakhala u Susaa, isittatti yo u Persiya. Uyo aakhala nwo ukhala wiira amucyaawe yahokumihiya u Yerusalemu ni amwene Nabukodonosor. Ester aakhala ni mwaana aatitiyaawe eehaniya Mortekayi. Mortekayi aavara nteko upalaasiyu wo amwene o Persiya yeehaniya Asuweru.

Amwene Asuweru yaapheela apwiyamwene akhwaawe, phimaana yaahaaruma anantekwaaya wiira yaathanle athiyana ooreera cinene mapuro yaalamulelaaya unhela nhina Ester. Vano amwennyaayo yahonthanla Ester, masi Mortekayi aahonhimeerya Ester wiira khaalamuliya uhimyaca wiira aari nyuuta.

Nlopwana mmoca owiicona eehaniya Hamaa, aari cheefi ananteko otheene aamwene. Uyo aapheela wiira atthu otheene ankoromeleke. Masi Mortekayi khaapheela unkhoromela! Nlattu wo iyo itthwiiyo Hamaa ahorusiya cinene ni aaholakela umwiiva Mortekayi! Ukati Hamaa aacuwenlyaawe wiira Mortekayi aari nyuuta ahoopuwela uwiiva a Yuuta otheene. Phimaana uyo ahaatheperya amwennyaayo awiirelaka co: “Ayuuta atthu owoopiha ni ootakhala nrima, phimaana unaareera waamalamaliha.” Ukati amwene Asuweru waacuwenlyaaya, yahonruma Hamaa wiira a kumihere nlamulo naahimya wiira a Yuuta otheene ahaana wiiviya nihuku 13 no mweeri wo Adar. Masi Yehova eera oonaka citthu cotheene ceerannya.

Ester khaacuwela nlamulo naakumiheriye phiyaaru. Vano Mortekayi aahonvelelihera Ester ikoopiya yo nlamulo naakumiheriye ni aahomwiirela wiira ahaana wuulumana amwene. Ester ahaakhula eeraka co: “Wakhala wiira kinaarwaa uwuulumana amwene ahikiihanne miiva kinaahala wiiviya ni uhovira mweeri nteru ahikiihanne. Masi Aaye kinaarwaa. Wakhala wiira anaakithoonya ni nttonttwaaya wo iseeturu, mi kinaahala ukhala nkumi. Masi yaahikithoonyeke, kinaahala wiiviya.”

Vano Ester aahorwa mpaka upalaasiyu wo amwene. Ukati amwene yaamonnyaaya, yaahomookolela nttonttwaaya wo iseeturu ni yahonkoha wiiraka co: “Kuupankeleni isiyani apwiyamwene Ester?” Ester ahaakhula eeraka co: “Uhokicivela wuulattulani nyuuva ni Hamaa wiira nalye wamoca.” Uliyakoono Ester aahowiirela-tho amwennyaayo wiira anhala utthenkaca iyoolya nihuku nikhwaawe wiira yalyaace-tho nkhayi. Vano nkwaha wo nayeelyuuyo, amwene yahonkoha-tho Ester wiira ahimye itthu yancivela upankeliya. Ester ahaakhula eeraka co: “Haavo nlopwana nopheela ukiiva miiva nkhayi ni apoovwaaka, sontte nnoopole! vano amwennyaayo yahonkoha wiira tipani yooyo? Ester aahowiirela Hamaa nrineenyuuyooyo. Amwene Asuweeru yaahorusiya cinene ni yaahoruma wiira eeviye Hamaa.

Masi khaavo aalamuliya urukunusa nlamulo aakumihenryaawe Hamaa, hataa amwennyaayo. Amwene Asuweru yahonthanla Mortekayi wiira akhale cheefi aananteko amwene otheene ni aahonlevela wiira akumihere nlamulo nikhwaawe. Nno nlamulonno naahimya wiira a Yuuta yahaana wiicaakiha ukati yaahalaaya utupheliya. Vano nihuku 13 no mweeri wa Adar a Yuuta yahaatthema awanannyaaya. Nuuwakatyaaya ayuuta yahopacera utthapela nno nihukunno khula mwaakha.