Estra aheetthuciha nlamulo na Yehova

Cahovira myaakha coophiyaka 70 asarayeli enci anaturuwileene u Yerusalemu. Masi asarayeli akhwaawe yaakhala mapuro yaalamuleliya ni umwene wo Persiya. Nhina ayo atthwaayo ahaavo nankuttho muulupale eehaniya Estra, eetthuciha apoovu malamulo a Yehova. Estra ahoona wiira asarayeli yaakhala u Yerusalemu khayeewelela malamulo a Yehova. Phimaana uyo aaholakela urwa waakavihera. Amwene o Persiya yeehaniya Artaxerxes, yaahomwiirela co: “Nluku hoovaha ucuwelaca wiira wiitthucihe malamulwaawe. Uturuweleke u Yerusaleemu. Wakhalaka wiira haavo nopheela wuuthara, pooti wuuthara.” Estra ahaathukumaniha atthu otheene yaapheela uturuwela u Yerusalemu. Ayoca yahonlompaca Yehova wiira aakhikicere ukati yaahalaaya weetta nkwaha.

Uvirawaya myeeri 4, atthwaayo yahophiya u Yerusalemu. Vano asuulupaale o Yerusalemu yaahonhimeerya Estra wiira asarayeli yaahaathela athiyana yaaswalela anluku oohikhweeli. Ukati Estra weewiilyaawe nyo ihaparinnyo, aahokhoroma uhoolo wa apoovu otheene ni aholompa eeraka: “Pwiiya Yehova nyuuva khammala unipankela citthu comaana, masi hiiva ninoopankelani citthu cinoorusani paasi. Asarayeeli yaahottharuwa, masi khayaahile upanka citthu canrusa Yehova. Phimaana, Estra ahaathanla mahumu ni masuwiisi wiira awacere nnyo myahannyo. Uvira waya myeeri miraru, atthu otheene yahanswalela Yehova yahoomoliya.

Cinavinreene myaakha 12. Vano, isiri co Yerusalemu caaholokihaciya. Estra ahaatthukumaniha apoovu wa kampu wiira aasomele malamulo anluku. Ukati aatthukunlyaawe ilivuru, apoovu yaheemela. Estra ahonttitthimiha Nluku ni apoovu otheene yahaamini citthu Estra ahimyaawe. Ukati aasomaawe ni aataphulelaka malamulo a Yehova, apoovu yanonviriyana. Usa waya, asarayeli yahopacera uhimyaca itampi caya ni yahohimyaca wiira yahohiya umwiiwelela Yehova ni yahopacera wunla. Usa waya ,Estra ahaasomela-tho apoovu malamulo a Yehova. Asarayeli yaahoona wiira wahaattamela ukati wo ifesta yo iparaaka. Ayo khayaarina-tho ukati ni yaahopacera wiithenkaca wiira atthape iyo ifesta yuulupaleeyo.

Ukati yaavirihaaya ifesta yo mahuku 7, asarayeli yaahotteeliya cinene ni yaahonsukhuru Yehova nlattu wo waacaaliha uruwerya mmamattani waya. nkwaha woomalela asarayeli yaatthenkacilyaaya ifesta yo iparaaka waari ukati wa Josuwe. Umala waya ifesteeyo, apoovu yaahothukumana ni yahomlopa Yehova yiiraka co: “Pwiiya Yehova, phinyuuva nnikumihile ilapo yo Wiciipitu, nhonivaha iyoolya muuthakoni ni nna nipuro nomananna. Masi khula nkwaha nimmakela wuupankelani citthu cowuurusani. Nhaaruma maporofeeta wiira anikavihere masi hiiva khanitthunne uwiiwelela. Uhookhalaru commo, nnaanipisera nrima ni nhomalihera itthu yankhuluvelihileenyu Aparahaamu. Vano ninaalapha wiira khaninhala uhiya uwiiwelelani. Wootharanana, yahantikha citthu cotheene yaakhuluvelihilyaaya wiira yanhala weettela. para apoovu woonihere wiira yanhala weettela citthu caakhuluvelihilyaaya, asuulupaale oyerusalemu, malevita ni anankuttho yahaasinari itukumentwiiyo.