Tiyapu aahonttehatteha Yesu

Yesu upattisiya wawe, aahorwaa wuuthakoni. Uyo aahokhala wonwo mahuku 40 woohilya itthu ni yaahonvola itala. Vano Tiyapu aahowa unttehatteha amwiirelaka co: “Wakhala wiira weeva mwaana a Nluku, wiirele ala malukwaala vaa wiira athatuwe iphaawu.” Yesu amuupuseraka citthu cantikhiye munlamuloni na Yehova, aahomwiirela co: “Ntthu khankhala nkumi nlattu wo yoolya paasi. Masi haana wiiwelela itthu Yehova impheelaawe.”

Woottharanana, Tiyapu aahonttehatteha-tho Yesu nkwaha wonayeeli: “Wakhala wiira weeva mwaana a Nluku, wiivonyere vathi ila itempulwiila. Kontha uhantikhiya nnuulumoni na Nluku wiira Nluku naahala uruma malayikha ni ayo anaahala wuukaphula.” Vano Yesu aahomwiirela ciicammo uhantikhiya nnuulumoni na Nluku: “Uhinttehattehe Yehova Nlukwaa.”

Sotwani aahonttehatteha ikwaha yoneeraru. Uyo aahomoonihera Yesu ikuvernu cotheene co ntuniyani ni ahomwiirela co: “Mi kinaahala wuuvaha citthu cotheene nnya, wakiswalelaka imaara imoca paasi.” Masi Yesu ahomwaakhula eeraka: “Ukhume vaa, Sotwani! Kontha uhantikhiya nnuulumoni na Nluku wiira ninlamuliya unswalela Yehova paasi.”

Vano Tiyapu aahokhuma ni malayikha yahowaana iyoolya ni yaahonvaha Yesu. Ukhumelela waya citthu cotheene nnyo, Yesu aahopacera uvara nteko waarumiyaawe: waalalyeera atthu ihapari ca Nluku. Atthwaayo waanaacivela cinene wiitthucihiya ni Yesu ni yaanontthara mapuro otheene yaarwaawe.