Yesu naakhala Mesiya

Joau anlalyeera eeraka aanhala uwa ntthu ofayita cinene unvikana uyova. Vano ukati Yesu waarinaawe myaakha 30, uyo aahorwaa umoolokoni Jordau nipuro Joau Mpattisa aapattisaawe atthu. Yesu aahonlepela Joau wiira ampattise, masi Joau ahaakhula eeraka co: “Mi akinlamuliya wuupattisani. Phinyuuva wuuphwanenleni ukipattisa miiva.” Vano Yesu, aahomwaakhula co: “Joau, Yehova nopheela wiira weeva ukipattise miiva.” Ooyeeli caya yaahokelaca mmoolokonimmo ni Joau aahompattisa Yesu.

Ukati waakhumilyaawe mmaacini, ahoona irimu yahulyaaka ni nnepa wowaarya wakhuruwaka wiirimu toko ikhuntta. Ni naheewannya ncu wiirimu neeraka co: “Weeva ukhanle mwanaka, nonfentaaka cinene ni nokitteeliha nrima.”

Uyo waari ukati Yesu waakhanlyaawe Kristu awula Mesiya. Vano, aari uwiitthenkaceene wiira apacere uvara nteko Yehova wanrumilyaawe.

Yesu upattisiya wawe, aahorwaa muuthakoni ni ahokhala wonwo mahuku 40. Ukati waaturuwilyaawe, aahorwaa umuulumana Joau. Ukati Joau oonnyaawe wiira Yesu hophiya, aheera co: Mooneke ikhontwaa ya Nluku inkumiha itampi ntuniyani motheene. Joau aahimya commo, aapheela wiira atthu otheene acuwele wiira Yesu aari Mesiya. Masi ukati Yesu waaryaawe wuuthakoni, yaahomwiirannyeela itthu. Nnacuwela isiyani? Nttwee noone.