Ihapari caalaleriye ni Joau Mpattisa

Joau mwaana a Zakariya ni Elisapeti aahunnuwa ni aahokhala porofeeta. Yehova ahonruma waahimeerya atthu wiira Mesiya anhala uwa. Masi uhiya waalalyeera nsinakooka awula mmawannyaya. Joau aalalyeera muuthakoni. Uyo anwiitthuciha atthu yaakhuma u Yerusalemu ni otheene yaakhuma u Yuteeya. Ni ciicammo anaahimeerya wiira yaapheelaka untteeliha nrima Nluku, yahaana yaahiyaka upanka citthu cootakhala. Atthu yaamwiiwelela, yanttharuwa itampi caya ni uyo ahaapattisa.

Joau aari ntthu oohuva ni aawara ikuwo coopankiya nimapururu o mwannama neehaniya ikamelu. Iyoolyaawe yaari macoope ni uravo. Khula ntthu ampheela uncuwela Joau. Hataa mafarisewu ni masadusewu, yaayo yeethenca venci, yaahorwaa umuulumana Joau. Masi Joau ahowiirela co: “Nhuupuwele wiira Nluku nawuuvahani ifayita nyuuva waavikana atthu akhwaawe. Nnolamuliya urukunusa mirima cinyu ni woonihera uttharuwa.”

Atthu enci yaahonkoha Joau isiyani yaalamuliyaaya upanka wiira antteelihe nrima Nluku. Joau ahowaakhula eeraka co: “Mwakhalana ikacako piili, imoceeyo munvahe nkhunaninyu hirina.” Nnacuwela kontha isiyani Joau aakhunlyaawe commo? Uyo aapheela uniitthuciha wiira Nluku naakhala ootteeliya nihiiva wakhalaka wiira ninawaafenta akhunanihu.

Joau ahowiirela alopwana yaaliviha nsoko co: “Nkhale ookhuluvelya ni nhaathepye atthu.” Anatoropaayo ahowiirela co: “Nhoothe ni nhiwinnyere nsurukhu akhunaninyu.”

Ukati anankuttho ni malevita wankohilyaaya Joau wiira aari tipani, Joau aahowakhula co: “Mi kintthu kinaakavihera atthu umwaattamela Yehova, khampa porofeeta Isaiya caahimilyaawe.”

Atthwaayo waanaacivela venci citthu ceetthucaaya ni Joau. Mpaka atthu akhwaawe yankohana wakhala wiira uyo aari Mesiya. Masi Joau aahowiirela co: “Naawa ntthu ofayita cinene ukivikana miiva. Mi khunkiphwanela hataa vakaani unrula isantaliya cawe! Mi kimpattisa nimaaci masi uyo nohala upattisa ninnepa wowaarya.”